Skip to content

ᑕᖕᒫᕐᕕᒃ ᓴᖅᑭᑎᑦᑎᕗᖅ ᒪᒃᑯᒃᑐᓂ ᐃᖅᑲᓇᐃᔮᖃᕐᓂᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ

ᑖᓕᐊ ᐋᒻᔅᑐᕌᖕ ᐃᖃᓗᖕᓂᕐᒥᐅᑕᖅ, ᕼᐊᓄᕆ ᐊᖑᑎᙳᓂᖅ, ᑐᓄᐊᓂ, ᐊᒻᒪ ᑕᐃᕕᑦ ᕋᐃᓕ ᕿᔪᓇᖅ ᑰᒑᕐᔪᖕᒥᐅᑕᖅ ᖃᐅᔨᓴᖅᐳᑦ ᑐᒥᐅᔪᒥ ᐊᒻᒪ ᐳᔾᔪᐃᑦ ᐃᓂᖏᓐᓂ ᐱᕋᔭᖕᓂᙳᐊᖑᓯᒪᔪᒥ ᐃᓂᖓᓂ ᓄᓇᕗᒻᒥ ᐋᓐᓂᐊᖅᑐᓕᕆᓂᕐᒧᑦ ᑕᖕᒫᕐᕕᖓᓂ ᐱᓕᕆᐊᖑᓚᐅᖅᑐᒥ ᐃᖃᓗᖕᓂ ᒪᐃ 6-ᒥ 10-ᒧᑦ.

CSI-ᑎᑐᑦ ᐋᖅᑭᒃᓯᒪᔪᒥ ᐱᔾᔪᑎᖃᖅᑐᒥ ᖃᐅᔨᓴᕐᓂᒃᑯᑦ ᐱᓕᕆᔾᔪᓯᐅᔪᓄᑦ ᐱᕋᔭᖕᓂᕐᒧᑦ ᖃᐅᔨᓴᐃᓂᐅᔪᓄᑦ ᐊᒻᒪ ᐱᕕᒃᓴᖃᕐᓂᐅᔪᒥ ᐃᓕᑦᑎᓂᕐᒧᑦ ᑲᓇᑕᐅᑉ ᓯᕗᓪᓕᖅᐹᖓᓂ ᐃᓅᓪᓗᓂ ᐆᒻᒪᑎᓄᑦ ᐱᓚᒃᑐᐃᔨᐅᔪᒥᑦ ᑖᓇ ᒪᐃ ᑭᒻᒪᓕᐊᕐᔪᖕᒥ ᒪᕐᕉᓪᓗᑎᒃ ᖁᑦᑎᖕᓂᕆᔭᐅᓚᐅᖅᑐᓂ ᐊᑐᐃᓐᓇᐅᑎᑕᐅᔪᓂ ᑲᑎᙵᔪᓄᑦ ᐃᓕᓐᓂᐊᖅᑎᓄᑦ ᓄᓇᕗᓕᒫᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔮᖑᔪᓄᑦ ᑕᖕᒫᕐᕕᖕᒥ ᑕᒪᑐᒪᓂ ᑕᖅᑭᐅᔪᒥ.

ᑕᖕᒫᕐᕕᒃ, ᐱᓕᕆᐊᖑᓚᐅᖅᑐᒥ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᐅᑉ ᓄᑖᖑᔪᒥ ᐃᓕᓐᓂᐊᕐᕕᖏᑕ ᐃᒡᓗᖁᑎᖏᓐᓂ ᐊᖓᔪᖅᑳᖃᕐᕕᖕᒥ ᒪᐃ 6-ᒥ 10-ᒧᑦ, ᑲᑎᖃᑎᖃᖅᑎᑦᑎᓚᐅᖅᐳᖅ 20-ᓂ ᐃᓕᓐᓂᐊᖅᑎᓂᑦ ᐃᖃᓗᒃᑑᑦᑎᐊᒥ, ᖁᕐᓗᖅᑐᖅ, ᐅᖅᓱᖅᑑᖅ, ᑰᒑᕐᔪᒃ, ᖃᒪᓂᑦᑐᐊᖅ, ᓇᐅᔮᑦ, ᑲᖏᖅᖢᒑᐱᒃ ᐊᒻᒪ ᐃᖃᓗᖕᓂ.

"ᑐᕌᒐᕆᔭᖓ ᐆᒪᙵᑦ ᑕᐅᑐᒃᑕᑐᐊᖃᑲᐃᓐᓇᕐᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔮᖑᔪᓄᑦ ᑐᑭᓯᔪᓐᓇᕐᓂᐊᕐᒪᑕ, 'ᑭᓲᕙᑦ ᓂᕈᐊᒐᕆᔪᓐᓇᖅᑕᒃᑲ ᑕᖅᑳᓂ?' ᐊᒻᒪᓗ 'ᐅᑎᕈᒪ ᓄᓇᓕᖕᓄᑦ, ᖃᓄᖅ ᐸᕐᓇᐃᔪᓐᓇᖅᐳᖓ ᐃᓕᓐᓂᐊᖅᑕᓐᓂᑦ? ᖃᓄᖅ ᐃᓕᓐᓂᐊᒐᒃᓴᓐᓂ ᓂᕈᐊᕐᓂᖃᕈᓐᓇᖅᐳᖓ?'" ᐅᓂᒃᑳᕆᓚᐅᖅᐳᖅ ᒥᓯᐅᓪ ᑑᕐᐳᓐ, ᐅᖃᐅᔾᔨᔨᐅᔪᖅ NVision Insight Group-ᒥ ᑲᒪᒋᔭᖃᖅᑐᒥ ᐊᐅᓚᑕᐅᓂᐅᔪᒥ.

ᑑᕐᐱᓐ, ᓯᕗᓂᐊᓂ ᐊᑯᓂᐅᔪᒥ ᓄᓇᕗᒻᒥ ᐃᓕᓴᐃᔨᐅᓚᐅᖅᓯᒪᔪᒥ, ᐅᖃᓚᐅᖅᐳᖅ ᑕᒪᕐᒥᒃ ᓄᓇᕗᒻᒥ ᐃᓕᓐᓂᐊᕐᕖᑦ, ᐃᓕᓴᐃᔩᑦ ᐊᒻᒪ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑭᒡᒐᖅᑐᐃᔨᐅᔪᑦ ᖃᐃᖁᔭᐅᓯᒪᓚᐅᖅᐳᑦ ᑐᒃᓯᕋᕐᓂᕐᒧᑦ ᑕᖕᒫᕐᕕᖕᒧᑦ. ᐃᓕᓐᓂᐊᕐᕕᐅᔪᓐᓇᖅᑐᓂ ᑐᒃᓯᕋᓚᐅᖅᑐᓂ ᐅᓂᒃᑳᕆᔭᕆᐊᖃᓚᐅᖅᐳᑦ ᖃᓄᐃᒻᒪᑦ ᐃᓚᐅᖃᑕᐅᔪᒪᓂᖏᓐᓂ ᐊᒻᒪᓗ ᖃᓄᖅ ᐃᑲᔪᖅᓱᐃᔪᓐᓇᕋᔭᕐᓂᖏᓐᓂ ᐃᓕᓐᓂᐊᖅᑎᓂᑦ.

24-ᓂ ᐃᓕᓐᓂᐊᖅᑎᓂᑦ ᑐᒃᓯᕋᖅᑐᖃᓚᐅᖅᑎᓪᓗᒍᓇᖕᒥᓂᖅ ᑎᑎᕋᕐᓂᖃᖅᖢᑎᒃ ᖃᓄᐃᒻᒪᑦ ᐃᓚᐅᖃᑕᐅᔪᒪᓂᖏᓐᓂ ᑕᖕᒫᕐᕕᐅᔪᒥ, ᐃᓚᖃᖅᑐᒥ ᐆᒃᑑᑎᐅᔪᒥ ᖃᓄᖅ ᑭᓇᑐᐃᓐᓇᒥᒃ ᐃᑲᔪᖅᓯᒪᓂᖏᓐᓂ ᓄᓇᓕᖏᓐᓂᐊᑐᐃᓐᓇᐅᔪᓂ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᓂᖓᓂ ᐱᔪᓐᓇᖅᑎᑦᑎᑐᐃᓐᓇᓚᐅᖅᐳᑦ 20-ᓄᑦ.

ᐃᓚᒋᔭᐅᖃᑕᐅᔪᒥ ᓴᑭᐅᕋ ᑯᐊᑦᓗᐊᒃ, ᖁᑦᑎᖕᓂᓕᖕᒥ 10-ᒥ ᐃᓕᓐᓂᐊᖅᑎᐅᔪᒥ ᖁᕐᓗᖅᑐᖅ ᖁᑦᑎᒃᑐᒥ ᐃᓕᓐᓂᐊᕐᕕᖓᓂ.

"ᐃᓗᐊᖅᓴᐃᔨᐅᔪᒪᕗᖓ, ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓗᐊᖅᓴᐃᓂᕐᒧᑦ," ᑯᐊᑦᓗᐊᒃ ᐅᖃᓚᐅᖅᐳᖅ. "ᐊᖏᕐᕋᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓕᓐᓂᐊᕐᕕᐊᕈᓯᖓᓐᓂ, ᖃᐅᔨᓇᓱᒃᐸᓪᓕᐊᓚᐅᖅᐳᖓ ᐃᓗᐊᖅᓴᐃᔨᙳᕐᓂᕐᒧᑦ, ᐊᓱᐃᓛᒃ ᖁᕕᐊᕐᔪᐊᓚᐅᖅᐳᖓ ᐆᒪᙵᑦ ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔮᖑᔪᓄᑦ ᑕᖕᒫᕐᕕᖕᒥ. ᑕᒪᐅᙵᓚᐅᖅᐳᖓ ᐊᒻᒪ ᐊᒥᓱᒃᑲᓐᓂᐊᓗᖕᓂ ᓂᕈᐊᒐᒃᓴᖅᑕᖃᓚᐅᖅᐳᖅ."

ᐃᒻᒪᖄ, ᑲᒪᓚᐅᖅᐳᖅ ᐊᔾᔨᒌᙱᕈᓘᔭᖅᑐᓂ ᐃᓗᐊᖅᓴᐃᔨᓄᑦ ᓂᕈᐊᒐᒃᓴᐅᔪᓂᑦ. ᐊᒻᒪᓗ, ᒪᕐᕈᖓᓂ ᐅᓪᓗᖓᓂ ᑕᓪᓕᒪᓄᑦ-ᐅᓪᓗᕐᓄᑦ ᑕᖕᒫᕐᕕᖕᒥ, ᐅᖃᓚᐅᖅᐳᖅ ᐃᓕᑦᑎᕐᔪᐊᕐᓂᖓᓂ. ᖁᔭᓕᒋᕗᖅ ᑭᒃᑯᓕᒫᓄᑦ ᐱᓕᕆᔪᓐᓇᖅᓯᑎᑦᑎᓚᐅᖅᑐᓄᑦ.

"ᐊᓕᐊᓇᐃᑦᑎᐊᖅᖢᓂ ᑕᖕᒫᕐᕕᐅᕗᖅ. ᑕᒪᑦᑕᑦᑎᐊᖅ ᐱᑦᑎᐊᖃᑦᑕᐅᑎᕗᒍᑦ, ᐃᓕᓐᓂᐊᖅᑏᑦ. ᐃᑲᔪᖃᑦᑕᐅᑎᖃᑦᑕᖅᐳᒍᑦ," ᐅᖃᓚᐅᖅᐳᖅ.

ᐊᑕᐅᓯᖅ ᖃᓄᐃᓕᐅᕐᓂᐅᔪᖅ ᕿᒪᐃᓚᐅᖅᐳᖅ ᐃᖅᑲᐅᒪᐃᓐᓇᕐᓂᐊᖅᑕᒥᓂᑦ ᑯᐊᑦᓗᐊᒃᒧᑦ CSI (ᐱᕋᔭᖕᓂᐅᔪᒥ ᐃᓂᖓᓂ ᖃᐅᔨᓴᐃᓂᐅᔪᒥ) ᐊᑐᖅᑕᙳᐊᒥ-ᐱᓕᕆᓪᓗᑎᒃ, ᓄᑖᓂ ᖃᐅᔨᒋᐊᕈᑎᓂᑦ ᓴᖅᑭᑎᑕᐅᕙᒃᖢᑎᒃ ᖃᐅᑕᒫᒥ ᐃᓂᒋᔭᖓᓂ ᓴᓇᙳᐊᒐᕐᒧᑦ ᑎᒡᓕᒃᑕᐅᓂᐅᔪᒧᑦ.

"ᓯᕗᓪᓕᕐᒥ ᑲᑉᐱᐊᓱᓚᐅᖅᐳᖓ. ᐱᓪᓚᕆᐅᓇᓱᒋᓚᐅᖅᑕᕋ. ᖃᐅᔨᒐᓚ ᐱᙳᐊᑐᐃᓐᓇᕐᓂᑦᑎᓐᓂ, ᐊᒻᒪ ᖁᕕᐊᒋᕐᔪᐊᖅᖢᒍ ᐱᓕᕆᑎᓪᓗᑕ DNA-ᖑᔪᒥ. ᑲᒪᓇᓚᐅᖅᐳᖅ," ᐅᖃᓚᐅᖅᐳᖅ.

"ᖃᐅᔨᓴᕐᓂᒃᑯᑦ ᐱᓕᕆᔾᔪᓯᐅᔪᓄᑦ ᐱᕋᔭᖕᓂᕐᒧᑦ ᖃᐅᔨᓴᐃᓂᐅᔪᓄᑦ, ᐅᔾᔨᖅᓱᕆᐊᓕᖕᒥ ᓂᐱᐅᑎᑕᖃᓚᐅᖅᐳᖅ. ᖃᔅᓯᐊᕐᔪᖕᓂ ᐸᓴᒋᔭᖃᖅᖢᑎᒃ. ᐃᑉᐸᒃᓴᖅ ᕙᐃᐸᖓᓂ ᖃᐅᔨᓴᐃᓂᖃᓚᐅᖅᐳᖅ, DNA ᖃᐅᔨᓴᐃᓂᐅᔪᒥ," ᐅᓂᒃᑳᓚᐅᖅᐳᖅ ᑑᕐᐱᓐ.

ᐅᖅᓱᖅᑑᕐᒥᐅᑕᖅ ᐊᓚᐃᕋ ᓴᓪᓕᕆᓇ, ᖁᑦᑎᖕᓂᓕᖕᒥ 11-ᒦᑦᑐᒥ, ᓯᕗᓪᓕᕐᒥ ᓘᒃᑖᖑᔪᒪᓚᐅᖅᐳᖅ ᐃᓗᐊᖅᓴᐃᔨᐅᓗᓂᓘᓐᓃᑦ.

"ᓄᓇᒋᔭᓐᓂ ᐃᓗᐊᖅᓴᐃᔩᑦ ᖃᓄᐃᓕᐅᓗᐊᙱᓚᑦ ᓄᓇᓕᑦᑎᓐᓄᑦ ᑭᓯᐊᓂ ᐱᔭᕆᐊᖃᓪᓚᕆᓕᕌᖓᒥᒃ ᐅᕝᕙᓘᓐᓃᑦ ᑭᖑᕙᓗᐊᕈᓂ. ᓄᑕᕋᐅᒃᑲᓐᓂᖅᑎᓪᓗᖓ, ᐊᓯᔾᔨᕈᒪᓚᐅᖅᐸᕋ ᑕᐃᒪᐃᓐᓂᖓᓄᑦ. ᐃᓅᖃᑎᒃᑲ ᐃᑲᔪᕈᒪᓚᐅᖅᐸᒃᑲ," ᐅᖃᓚᐅᖅᐳᖅ ᓴᓪᓕᕆᓇ.

ᑭᓯᐊᓂ ᓴᖅᑭᑎᑕᐅᓂᖓᓂ ᑏᕖᒃᑯᑦ ᓂᐱᒃᑯᑦ ᓴᖅᑭᑎᑕᐅᓂᐅᔪᒥ ᓯᖓᐃᑎᓪᓗᒋᑦ ᐃᓱᒪᓐᓂᒃ ᐊᓯᔾᔩᓯᒪᕗᖅ. ᐊᔾᔨᖏᑦ ᓴᓪᓕᕆᓇᒧᑦ ᑲᒪᓇᕆᕙᖓ.

"ᑏᕖᒃᑯᑦ ᓂᐱᒃᑯᑦ ᓴᖅᑭᑎᑕᐅᓂᐅᔪᖃᓚᐅᖅᑎᓪᓗᖓ ᐅᕙᓂ (ᐱᓇᓱᐊᕈᓯᐅᓚᐅᖅᑐᒥ) ᕿᐱᙳᕋ ᐲᖅᑕᐅᓂᐊᖅᑎᓪᓗᒍ, ᐃᒪᐃᓚᐅᖅᐳᖓ 'ᑲᒪᓇᖅ, ᑕᖅᑐᕋᐅᓇ. ᐆ, ᐊᒻᒪ ᑎᖑᒐ,'" ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑕᖕᒫᕐᕕᒃ ᓲᕐᓗ ᐱᓕᒻᒪᒃᓴᓂᕐᒧᑦ ᑕᖕᒫᕐᕕᐅᔪᖅ ᐃᓗᐊᖅᓴᐃᔨᓄᑦ.

"ᑭᓇᒥᒃᑭᐊᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐅᖃᓪᓚᒃᑐᖃᓚᐅᖅᐳᖅ ᖃᓄᖅ ᓄᓇᕗᒻᒥ ᒐᕙᒪᒃᑯᑦ ᐃᑲᔪᖅᓱᐃᕙᖕᓂᖏᓐᓂ ᐊᔾᔨᒌᙱᕈᓘᔭᖅᑐᓂ ᑮᓇᐅᔭᖃᖅᑎᑕᐅᓂᐅᔪᓄᑦ ᐊᑭᖃᙱᑦᑐᒥᒃ ᐃᓕᓐᓂᐊᕆᐊᒃᑲᓐᓂᕈᓯᐅᖏᓐᓄᑦ ᐊᔪᙱᓛᖑᓂᐊᒍᑦ ᐱᓪᓗᒍ ᐃᓕᓐᓂᐊᕐᓂᕐᒧᑦ," ᐅᖃᓚᐅᖅᐳᖅ ᑑᕐᐱᓐ.

"ᓅᑎᑦᑎᓇᓱᕐᔪᐊᖅᐳᒍᑦ ᒥᖅᑯᒻᒥ ᐃᓄᖕᓂ ᓂᕈᐊᕐᓂᖏᓐᓂ ᐃᖅᑲᓇᐃᔮᖑᔪᓂᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᒧᑦ. ᑕᑖᕐᔪᐊᖅᑐᒥ ᐱᓇᓱᐊᕈᓯᐅᕗᖅ ᑕᐃᒪᑐᖅ ᐊᔾᔨᒌᙱᕈᓘᔭᖅᑐᓂ ᖃᓄᐃᓕᐅᕐᓂᐅᔪᓄᑦ ᐃᒻᒥᖕᓂᒃ ᑕᑯᔪᓐᓇᕐᓂᐊᕐᒪᑕ ᐃᒻᒥᖕᓂᑦ ᐅᑯᓇᓂ ᐃᓂᐅᔪᓄᑦ."