ᑕᐃᒪᑐᖅ ᐊᔾᔨᓕᐅᕆᓂᑐᐃᓐᓇᐅᔾᔮᙱᓚᖅ

231

ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ
ᐱᓇᓱᐊᕈᓯᐅᓚᐅᖅᑐᒥ ᓄᓇᕗᒻᒥ ᑐᙵᕕᖓᑦ ᐊᑎᓕᐅᖃᑎᖃᓚᐅᖅᐳᑦ ᓄᓇᕗᒻᒥ ᒐᕙᒪᒃᑯᓐᓂ ᓴᖅᑮᒃᑲᓐᓂᕐᓂᕐᒧᑦ ᐊᒻᒪ ᓄᑖᙳᕆᐊᖅᑎᑦᑎᓂᕐᒧᑦ ᐱᓕᕆᖃᑎᒌᖕᓂᐅᔪᒥ ᒪᕐᕉᔪᓄᑦ ᑲᑐᔾᔨᖃᑎᒌᖑᔪᓄᑦ.

ᐊᖏᕈᑎ, ᑕᐃᔭᐅᔪᖅ ᑲᑐᔾᔨᖃᑎᒌᓐᓂᖅ ᒪᓕᒋᐊᓕᖓᓐᓂ, ᓇᓗᓇᐃᖅᓯᕗᖅ ᖃᔅᓯᒐᓚᖕᓂ ᓯᕗᓪᓕᐅᔾᔭᐅᖁᔭᐅᔪᓂ ᑲᑎᙵᓂᐅᔪᓄᑦ ᐱᓕᕆᖃᑎᒌᖕᓂᕐᒧᑦ ᐃᓚᐅᑎᑦᑎᓂᕐᒥ ᐃᓄᖕᓂ ᓴᙱᒋᐊᖅᑎᑦᑎᓂᐅᔪᒧᑦ, ᐱᐅᓯᒋᐊᖅᑎᑦᑎᓂᕐᒥ ᐱᐅᓂᖓᓂ ᐃᓅᓯᕐᒥ ᐊᒻᒪ ᐃᓄᒃᑲᓐᓂᕐᓂ ᐃᓚᐅᑎᑕᐅᓂᖏᓐᓂ ᓴᖅᑭᑎᑦᑎᓂᐅᔪᒥ ᐊᑐᐊᒐᕐᒥ.

ᐊᐱᕆᔭᐅᒐᒥ ᖃᓄᐃᒻᒪᑦ ᐱᒻᒪᕆᐅᓂᖓᓂ ᓄᓇᕗᒻᒥ ᒐᕙᒪᒃᑯᓐᓂ ᐊᑎᓕᐅᖃᑕᐅᓂᖏᓐᓄᑦ ᐆᒥᖓ, ᓯᕗᓕᖅᑎ ᔫ ᓴᕕᑲᑖᖅ ᑭᐅᓚᐅᖅᐳᖅ “ᓄᑖᖑᓪᓗᓂ ᐊᕐᕌᒎᖕᒪᑦ” ᐸᑦᑕᒃᑐᖅᑕᐅᓪᓗᓂ.

ᑭᓯᐊᓂ ᐊᕐᕌᒍᒐᓴᓂ ᓄᓇᕗᒻᒥ ᑐᙵᕕᒃᑯᓐᓂ ᐊᒻᒪ ᓄᓇᕗᒻᒥ ᒐᕙᒪᒃᑯᓐᓂ ᐊᐅᓚᑦᑎᓂᖏᓐᓂ ᒪᕐᕉᓕᖓᓂᐅᓪᓗᑎᒃ, ᑎᑎᖅᑲᖁᑕᐅᔪᒥ ᐊᑎᓕᐅᕆᓂᐅᔪᖅ ᐊᔾᔨᓕᐅᖅᑕᐅᑐᐃᓐᓇᕐᓂᕐᒧᑦ ᓈᒻᒪᒃᑑᔮᖅᐸ?

ᐊᒥᓱᓂ ᐱᓕᕆᑦᑎᐊᕐᓂᐅᔪᓄᑦ ᐅᓂᒃᑳᖅᑕᖃᐅᖅᑐᓂ ᓄᓇᕗᒻᒥᙶᖅᑐᒥ ᐱᔾᔪᑎᖃᖅᑐᒥ ᐃᖏᕐᕋᓂᕆᔭᐅᔪᓂ ᑮᓇᐅᔭᓕᐅᕈᑎᒃᓴᐅᔪᓄᑦ ᐅᕝᕙᓘᓐᓃᑦ ᑭᓴᖅᓯᓂᖓᓂ ᐃᓄᖕᓄᑦ ᐃᓕᖅᑯᓯᐅᔪᓄᑦ ᐊᑐᖅᑕᐅᕙᒃᑐᓂ, ᑭᓯᐊᓂ ᐊᒥᓱᓂ ᐱᔭᕆᐊᖃᕐᓂᖃᖅᐳᑦ ᑭᐅᔭᐅᕙᙱᑦᑐᓂ.

ᒪᕐᕉᒃ ᐱᓕᕆᖃᑎᒌᒃᑐᑦ, ᐱᓕᕆᖃᑎᒌᒡᓗᑎᒃ ᐅᕝᕙᓘᓐᓃᑦ ᐃᒻᒥᒃᑰᕐᓗᑎᒃ, ᐱᓕᕆᕙᓪᓕᐊᓯᒪᕗᑦ ᑐᕌᒐᒃᓴᐅᔪᓄᑦ ᓲᕐᓗ ᐃᓄᒃᑎᑐᒻᒥ ᐅᖃᐅᓯᓪᓚᕆᐅᑎᑕᐅᓂᖓᓂ ᐃᓕᓐᓂᐊᕐᕕᖕᓂᑦ ᐊᒻᒪ ᒐᕙᒪᒃᑯᓐᓄᑦ ᑎᑎᕋᕐᕕᐅᔪᓄᑦ ᑕᐃᒪᙵᓂ ᓄᓇᕗᙳᓚᐅᖅᑎᓪᓗᒍ. ᐃᓚᖏᓐᓂ ᐱᐅᓯᕚᓪᓕᕐᓂᖃᕋᓗᐊᖅᑎᓪᓗᒍ ᐱᓕᕆᓂᐅᔪᖅ ᖃᓂᒡᓕᒋᐊᖅᓯᒪᙱᑦᑎᐊᖅᐳᖅ ᐱᔭᕇᖅᑕᐅᓂᖓᓄᑦ.

ᐊᒡᒍᒧᑦ ᒪᓕᒐᓕᐅᖅᑎ ᐹᓪ ᖁᐊᓴ ᐊᐱᖅᓱᕐᔪᐊᓚᐅᖅᐳᖅ ᓴᕕᑲᑖᕐᒥ ᐅᒃᑐᐱᕆᐅᓚᐅᖅᑐᒥ ᖃᓄᐃᓕᖓᓕᕐᓂᖓᓂ ᐅᖃᐅᓯᕐᒧᑦ ᐱᕙᓪᓕᐊᑎᑕᐅᓂᖓᓄᑦ, ᐊᐱᕆᓪᓗᓂ ᐳᐃᒍᖅᓯᒪᖕᒪᖔᑦ ᖃᓄᐃᒻᒪᑦ ᓄᓇᕗᖃᕐᓂᖓᓂ ᓇᖕᒥᓂᖅ ᐅᑭᐅᖅᑕᖅᑐᖃᕐᓂᖓᓂ.
“ᒐᕙᒪᒃᑯᑦ ᐊᐅᓚᔭᕆᐊᖃᓚᐅᖅᐳᖅ ᐃᓄᒃᑎᑐᑦ ᐊᒻᒪ ᐃᓄᐃᑦ ᓱᓕ ᓂᕆᐅᒃᐳᑦ ᐅᓪᓗᒥᒥ ᑭᓯᐊᓂ ᓱᓕ ᐱᑕᖃᙱᓚᖅ,” ᐅᖃᓚᐅᖅᐳᖅ ᖁᐊᓴ.

ᓴᖅᑭᑎᑦᑎᒃᑲᓐᓂᕐᓂᕐᒥ ᐃᒡᓗᒃᓴᒃᑲᓐᓂᕐᓂ ᐆᒃᑑᑎᑦᑎᐊᕙᐅᒃᑲᓐᓂᕋᔭᖅᐳᖅ ᑐᙵᕕᖃᑦᑎᐊᖅᑐᒥ ᐱᒻᒪᕆᐅᓂᖓᓂ ᐊᑲᐅᙱᓕᐅᕈᑕᐅᔪᒥ ᑕᑯᒃᓴᐅᔪᒥ ᐃᖏᕐᕋᓂᖄᕐᔪᑐᐃᓐᓇᖅᖢᓂ.

ᓄᕕᐱᕆᐅᓚᐅᖅᑐᒥ, ᒪᓕᒐᓕᐅᖅᑎᒃᑯᖏᓐᓂ, ᐃᒡᓗᓕᕆᔨᕐᔪᐊᒃᑯᑦ ᒥᓂᔅᑕᖓ ᐸᑎᖅ ᓇᑦᓱᕐ ᐃᑲᔪᖅᑕᐅᔪᒪᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᓐᓂ ᐃᒡᓗᒃᓴᓕᐅᕐᓂᕐᓄᑦ ᐃᓄᖕᓄᑦ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ ᓄᓇᕗᒻᒥ ᑐᙵᕕᒃᑯᓐᓄᑦ.

ᑮᓇᐅᔭᓂᒃ ᑎᒍᒥᐊᕐᓂᖃᖅᑎᓪᓗᒋᑦ ᑎᑭᐅᑎᓕᖅᑐᒥ $2 ᐱᓕᐊᓐᓄᑦ ᐊᒻᒪᓗ 2018/2019 ᑮᓇᐅᔭᓕᕆᓂᕐᒧᑦ ᐊᕐᕌᒎᔪᒥ “ᑎᑭᐅᑎᔭᐅᕐᔪᐊᕐᓂᐅᔪᒥ” ᑮᓇᐅᔭᓂᒃ ᐊᑐᖅᑐᒃᓴᓄᑦ ᖃᑭᔾᔪᑎᓂᑦ $27 ᒥᓕᐊᓐ ᐅᖓᑖᓂ, ᑐᒃᓯᕋᕐᓂᐅᔪᖅ ᑐᓴᖅᑕᐅᓚᐅᙱᑦᑎᐊᖅᐳᖅ.

ᖃᔅᓯᓂ ᐃᓚᐃᓐᓇᖓᓂᓪᓘᓐᓃᑦ ᖃᑭᔾᔪᑎᐅᔪᓂ ᓄᓇᑖᕋᓱᐊᕐᓂᕐᒧᑦ ᑲᑐᔾᔨᖃᑎᒌᖑᔪᓂ ᐃᑲᔪᕋᔭᖅᐸ ᐃᒡᓗᒃᓴᖃᕐᓂᕐᒧᑦ ᐊᒃᓱᕈᕈᑕᐅᔪᓂ ᓄᓇᕗᒻᒥ?

ᑲᒪᒋᔭᕆᐊᖃᕐᓂᐅᔪᖅ ᐅᑯᓄᖓᑐᐃᖑᙱᓚᖅ ᓄᓇᕗᒻᒥ ᑐᙵᕕᒃᑯᓐᓄᑦ ᑕᐃᒪᐃᑦᑐᒐᓚᖕᓄᑦ ᐱᓕᕆᓂᐅᔪᓄᑦ, ᑭᓯᐊᓂ ᑕᒪᒃᑭᑦ ᑲᑐᔾᔨᖃᑎᒌᖑᔪᑦ ᓴᖅᑭᔮᕐᓂᐅᔪᒧᑦ ᓇᖏᕈᒪᒍᑎᒃ ᐊᒻᒪ ᐅᖃᐅᓯᖃᕐᓗᑎᒃ ᐱᓕᕆᖃᑎᒌᖕᓂᐅᔪᒥ ᐊᒻᒪ ᐃᑲᔪᕐᓂᕐᒧᑦ ᓄᓇᕗᒻᒥᐅᓂ, ᓴᖅᑭᔮᓪᓚᕆᒃᑐᓂ ᖃᓄᐃᓕᐅᕐᓂᐅᔪᑦ ᐱᓕᕆᐊᖑᔪᓂ ᑎᑎᕋᖅᑕᐅᑦᑎᐊᓪᓗᐊᖅᐳᑦ ᑐᑭᓯᓇᑦᑎᐊᖅᑐᒥ ᐅᖃᐅᓯᕐᒥ.

ᐊᒥᓱᑦ ᐅᖃᐅᓯᒃᓴᓕᐊᖑᔪᓂ ᐃᓅᖃᑎᒌᖕᓄᑦ ᓯᐊᒻᒪᖅᑎᑦᑎᓂᐅᔪᓄᑦ ᐊᑕᔪᓂ ᐆᒧᖓ ᐅᓂᒃᑳᓕᐊᒧᑦ ᐊᔾᔨᒌᙱᕈᓘᔭᖅᑐᓄᑦ ᓯᐊᒻᒪᖅᑎᑦᑎᓂᕐᒧᑦ ᐊᓂᐊᑎᑕᐅᓂᐅᔪᓄᑦ ᒪᓕᓚᐅᖅᐳᑦ ᐊᔾᔨᐸᓗᐊᓂ ᑎᑎᕋᖅᓯᒪᓂᐅᔪᒥ.

“ᐅᕙᑦᑎᓐᓄᑦ ᐱᕚᓪᓕᕈᑎᖃᔾᔮᙱᒻᒥᔪᖅ. ᐊᕐᕌᒍᒃᑲᓐᓂᕐᓂ 20–ᓂ ᐱᑕᖃᙱᓐᓂᐅᔪᒥᑦ,” ᑎᑎᕋᓚᐅᖅᐳᖅ ᐊᑕᐅᓯᕐᒥ ᕙᐃᔅᐳᒃᑯᑦ ᐊᑐᖅᑎᐅᔪᒥ, ᑎᑎᕋᖅᖢᓂ ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ ᐅᓂᒃᑳᓕᐊᖓᓂ (“ᓄᓇᕗᒻᒥ ᒐᕙᒪᒃᑯᑦ ᐊᒻᒪ ᐃᓄᐃᑦ ᑲᑐᔾᔨᖃᑎᒌᖑᔪᑦ ᓄᑖᙳᕆᐊᖅᑎᑦᑎᕗᑦ ᐊᖏᖅᓯᒪᓂᖏᓐᓂ ᐱᓕᕆᖃᑎᒌᖕᓂᕐᒧᑦ,” ᔭᓄᐊᕆ 23).

“ᐊᕿᑦᑐᖓᔪᐊᓗᒃ ᖃᓄᐃᓐᓂᐅᓚᐅᖅᑐᓄᑦ ᕿᑎᐊᓂ 1999-2020–ᒥ ᐱᔪᒪᔭᒥ ᐊᓯᐊᒎᑦᑎᐊᖅᖢᓂ ᒥᑭᑦᑐᑯᓗᐃᑦ ᐃᓄᒃᐸᓱᒡᔪᑦ!” ᐊᓯᐊᓂ ᑎᑎᕋᖅᑐᖃᓚᐅᖅᐳᖅ.

ᐃᓱᒪᒋᔭᐅᓂᐅᔪᑦ ᐱᒻᒪᕆᐅᕗᑦ ᐊᒻᒪᓗ ᓄᓇᕗᒻᒥᐅᑦ ᐅᖃᐅᓯᖃᕈᑎᒃ ᐅᒃᐱᕈᓱᙱᓐᓂᖏᓐᓂ ᒐᕙᒪᒋᔭᖏᓐᓂ ᐊᒻᒪ ᓄᓇᕗᒻᒥ ᑐᙵᕕᒃᑯᓐᓂ. ᓇᓗᓇᙱᑦᑎᐊᖅᐳᖅ ᖃᓄᐃᓕᐅᕐᓂᖃᕆᐊᖃᖅᐳᖅ ᑐᙵᕕᒃᑖᒃᑲᓐᓂᕐᓂᖏᓐᓂ ᐱᓕᕆᖃᑎᒌᖕᓂᕐᓄᑦ ᐊᒃᓱᕈᕈᑕᐅᔪᓂ ᑕᒪᕐᒥᓕᒫᑦ ᓄᓇᕗᒻᒥᐅᑕᑦ ᑐᑭᓯᓂᐊᕐᒪᑕ ᐅᑯᓂᖓ ᐊᒃᓱᕈᕐᓂᖏᓐᓂ.

ᓄᓇᕗᒻᒥ ᒐᕙᒪᒃᑯᑦ ᐊᒻᒪ ᓄᓇᕗᒻᒥ ᑐᙵᕕᒃᑯᑦ ᐱᓕᕆᖃᑎᒌᖕᓂᖏᓐᓂ ᐋᖅᑭᒃᓱᐃᓂᐊᖅᐳᑦ ᓴᙱᔪᐊᓗᖕᒥ ᑲᑎᙵᓂᐅᔪᒥ ᐊᔭᐅᕆᔪᓂ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑦᑎᐊᒃᑲᓐᓂᕐᓂᐅᔪᒥ ᑭᓯᐊᓂ ᑕᒪᓐᓇ ᐊᖅᑯᑎᐅᔪᖅ ᓇᓚᐅᑦᑖᕆᔭᒃᓴᐅᙱᓚᖅ ᐊᒻᒪᓗ ᐊᑐᖅᑕᐅᔪᓐᓇᕐᓗᓂ ᐊᖅᑯᑎᐅᕗᖅ ᐱᔭᕆᐊᖃᕐᓂᐅᔪᓄᑦ ᓄᓇᕗᒻᒧᑦ.

ᑎᑎᕋᑦᑎᐊᓪᓗᐊᖅᐳᑦ ᑭᓱᓪᓚᕆᐅᓂᖓᓂ ᐸᕐᓇᒍᑎᒋᓂᐊᖅᑕᖓᓂ ᓄᓇᕗᒻᒥᐅᑦ ᐃᑲᔪᖅᓱᐅᔪᓐᓇᕐᓂᐊᕐᒪᑕ.