ᖄᖏᖅᓯᒪᓕᖅᑐᓄᑦ ᐊᕐᕌᒍᓄᑦ ᑕᓪᓕᒪᓄᑦ, ᐃᓄᑐᖃᕐᓄᑦ ᐱᓕᕆᐊᖑᕙᓪᓕᐊᔪᓄᑦ ᐱᓕᕆᔨᐅᓪᓗᓂ, ᒦᒥ ᓈᑕᓇᐃᓐ ᐱᕙᓪᓕᐊᑎᑦᑎᓯᒪᕗᖅ ᐱᓕᕆᐊᖑᔪᓂ ᐃᓄᑐᖃᕐᓄᑦ ᑐᒃᓯᕌᖑᓯᒪᔪᓄᑦ ᐃᓄᑐᖃᕐᓄᑦ’ ᑲᑎᒪᔨᕋᓛᓂᑦ ᓄᓇᓕᖓᓐᓂ.
ᓈᑕᓇᐃᓐ ᐱᓕᕆᓲᖑᕗᖅ “ᐱᒻᒪᕆᕐᔪᐊᖑᔪᒥ” ᐊᑐᕐᓂᖃᐅᑎᐅᔪᒥ ᓴᓇᓂᕐᒧᑦ ᑕᒪᒃᑭᓂ ᐃᓄᑐᖃᕐᓄᑦ ᐱᓕᕆᐊᒃᓴᓕᐊᖑᔪᓄᑦ “ᐆᒻᒪᖅᑎᑕᐅᓂᖏᓐᓄᑦ” ᑲᖏᖅᖢᒑᐱᖕᒥ, ᐅᖃᖅᐳᖅ ᒥᐊᓪᑭᒻ ᕌᓐᑕ, ᐃᓕᓴᖅᓯᕕᐅᑉ ᐃᓱᒻᒥᖅᑐᐃᔨᖓ.
“ᐱᕕᒃᓴᖃᑦᑎᐊᖅᐳᒍᑦ ᒦᒥᐅᑉ ᐃᓂᖓ ᐊᔾᔨᐅᙱᕐᔪᐊᕐᓂᖓᓂ,” ᐅᖃᓚᐅᖅᐳᖅ ᕌᓐᑕ. “ᐃᓄᑐᖃᕐᓄᑦ’ ᐱᓕᕆᔨᖓᓄᑦ ᐃᓂᑕᖃᙱᓚᖅ ᐊᒥᓱᓂ ᓄᓇᓕᐅᔪᓂ ᐱᓕᕆᓪᓚᕆᓲᓄᑦ ᐃᓄᑐᖃᕐᓄᑦ’ ᑲᑎᒪᔨᕋᓛᓄᑦ,” ᐅᓂᒃᑳᓚᐅᖅᐳᖅ. ᓈᑕᓇᐃᓐ ᐃᓂᒋᔭᖓ ᐱᓕᕆᔪᓐᓇᖅᑎᑦᑎᕗᖅ ᐃᑲᔪᖅᓱᐃᓂᕐᒥ ᐃᓄᑐᖃᕐᓄᑦ ᐊᒻᒪᓗ ᐱᓕᕆᐊᕆᔭᐅᖁᔭᐅᔪᓂ ᐃᓱᒪᒋᔭᐅᔪᓂ ᐱᓪᓚᕆᙳᖅᑎᑕᐅᓂᖏᓐᓂ.
ᑕᒪᑐᒪᓂ ᐊᕐᕌᒍᑐᐊᒥ, ᓈᑕᓇᐃᓐ ᐊᐅᓚᑦᑎᓯᒪᕗᖅ ᐊᔾᔨᒌᙱᕈᓘᔭᖅᑐᓂ ᐃᓄᑐᖃᕐᓄᑦ ᐱᓕᕆᐊᖑᔪᓂ ᓴᓇᓂᕐᒧᑦ ᐱᖅᑯᓯᑐᖃᖅᑎᒍᑦ ᓴᓇᕐᕈᑎᓂᑦ, ᖃᒧᑎᓂᑦ, ᑲᒥᖕᓂᑦ, ᐊᖑᓇᓱᒃᑐᖅᓯᐅᑎᓂᒃ ᐊᓐᓄᕌᓂᒃ ᐊᒻᒪ ᑐᐱᕐᓂᑦ.
ᓴᓂᐊᓂ ᐅᑯᓂᖓ ᐊᑕᐅᓯᐊᖅᑐᓂ ᐱᓕᕆᐊᖑᔪᓂ, ᐊᕐᕌᒍᒥ ᐱᓕᕆᐊᖑᕙᓪᓕᐊᔪᓄᑦ ᐱᓕᕆᔨᖓ ᐊᐅᓚᑦᑎᓲᖑᕗᖅ ᐃᓄᑐᖃᕐᓄᑦ ᖃᕐᒪᖓᓂ ᓇᒡᒐᔾᔭᐅᒥ ᐅᓪᓗᑐᐃᓐᓇᕐᒧᑦ. ᕿᑎᐊᓂ 1 ᐅᓐᓄᓴᒃᑯᑦ 5 −ᒧᑦ ᐅᓐᓄᒃᑯᑦ ᐃᓄᑐᖃᑦ ᑲᑎᖃᑎᒌᒍᓐᓇᖅᐳᑦ ᐱᓕᕆᓂᕐᒧᑦ ᒥᖅᓱᒐᒃᓴᖏᓐᓂ ᐊᒻᒪ ᐃᓅᖃᑎᒌᖕᓂᕐᒧᑦ. ᖃᕐᒪᒃ ᒪᑐᐃᖓᕙᖕᓂᖓᓂ ᑭᒃᑯᓕᒫᓄᑦ, ᒪᒃᑯᒃᑐᑦ ᐃᓯᕈᓐᓇᕆᕗᑦ ᐅᖃᐅᔾᔨᓂᖅᑖᕆᐊᖅᑐᕐᓗᑎᒃ ᐃᓄᑐᖃᕐᓂ, ᐅᖃᓚᐅᖅᐳᖅ ᓈᑕᓇᐃᓐ.
ᐅᐱᕐᙶᑉ ᐱᒋᐊᕐᓂᖓᓂ ᖃᕐᒪᖅ ᒪᑐᔭᐅᔭᕆᐊᖃᓚᐅᖅᐳᖅ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᖅ-19−ᒧᑦ. ᒪᑐᐃᒃᑲᓐᓂᓚᐅᖅᐳᖅ ᐊᐅᔭᒥ ᐃᓅᖃᑎᒌᖑᔪᓄᑦ ᐅᖓᓯᒌᒋᐊᖃᕐᓂᐅᔪᓂ ᒪᓕᒋᐊᓕᖕᓂ ᐃᓕᓯᒪᔪᓂᑦ.
ᖃᕐᒪᖅ ᐃᓄᖃᕈᓐᓇᖅᐳᖅ ᑎᑭᐅᒪᔪᓄᑦ ᖁᓕᓂᑦ ᐃᓄᖕᓂ, ᒫᓐᓇᐅᔪᒥ ᐅᓄᙱᓐᓂᖅᓴᐅᔪᓂ ᑕᓪᓕᒪᓂᒃ ᐃᓄᑐᖃᕐᓂ ᓇᓂᔭᐅᔪᓐᓇᖅᐳᑦ ᖃᕐᒪᕐᒥ.
“ᐱᒻᒪᕆᐅᕗᖅ ᓇᓗᓇᐃᖅᓯᓂᕐᒥ ᐊᒥᓱᓂ ᐃᓄᑐᖃᕐᓂ ᐃᖅᑲᐅᒪᓂᖏᓐᓂ ᓯᕗᓂᐊᓂ ᐊᐃᑦᑐᐃᓐᓇᖅᑐᓂ ᐋᓐᓂᐊᓂᒃ ᐊᐃᑦᑐᐃᓂᐅᓚᐅᖅᑐᒥ ᐊᑐᖅᑕᐅᓂᐅᓚᐅᖅᑐᒥ ᐃᓅᓯᕆᔭᖏᓐᓂ,” ᐅᖃᓚᐅᖅᐳᖅ ᕌᓐᑕ. “So ᑕᐃᒫᒃ ᑭᒡᓕᖃᒃᑲᓐᓂᐅᔭᖅᐳᖅ ᐅᐸᒍᒪᙱᓐᓂᖃᕐᓂᖓᓂ ᐃᓚᖓᒍᑦ ᖃᓄᖅ ᑲᑎᖃᑎᒌᖕᓂᐊᕐᓂᖏᓐᓄᑦ ᐊᒻᒪᓗ ᐱᓕᕆᖃᑎᒌᒡᓗᑎᒃ.”
ᐊᕐᕌᒍᓕᒫᒥ ᐅᓪᓗᑐᐃᓐᓇᒃᑯᑦ, ᓈᑕᓇᐃᓐ ᐋᖅᑭᒃᓱᐃᓲᖑᒋᕗᖅ ᐃᓄᑐᖃᕐᓂ ᐱᙳᐊᕐᓂᕐᒧᑦ, ᑏᑐᕐᓂᕐᒧᑦ ᐊᒻᒪ ᓂᕆᓗᑎᒃ ᓂᕿᓪᓚᑦᑖᓂ ᐃᓕᓴᖅᓯᕕᖕᒥ. ᑭᓯᐊᓂ ᐱᔾᔪᑎᖃᖅᑐᒧᑦ ᓄᕙᒡᔪᐊᕐᓇᖅ-19−ᒧᑦ ᑭᒡᓕᖃᖅᑎᑕᐅᓂᐅᔪᒧᑦ, ᐅᓇ ᐃᓅᖃᑎᒌᖕᓂᐅᔪᒥ ᖃᓄᐃᓐᓂᐅᔪᒥ ᓄᖅᑲᖅᑎᑕᐅᓯᒪᕗᖅ ᑕᐃᒪᙵᓂ ᐅᐱᕐᙶᒥ.
ᐱᓇᓱᐊᕈᓯᐅᓛᖅᑐᒥ, ᑭᓯᐊᓂ, ᐅᓇ ᐃᓄᑐᖃᕐᓄᑦ ᖃᓄᐃᓐᓂᐅᔪᖅ ᓂᕆᐅᒋᔭᐅᕗᖅ ᐱᒋᐊᒃᑲᓐᓂᕐᓂᐊᕐᓂᖓᓂ, ᐅᖃᓚᐅᖅᐳᖅ ᕌᓐᑕ ᓯᑎᐱᕆ 9−ᒥ.
ᓈᑕᓇᐃᓐ ᐸᕐᓇᒃᑭᕗᖅ ᐱᒋᐊᖅᑎᑦᑎᓂᐊᕐᓂᖓᓂ ᕿᓯᓕᕆᓂᕐᒥ ᐃᓕᓐᓂᐊᕐᓂᐅᔪᒥ ᐃᓄᑐᖃᕐᓄᑦ ᒪᕐᕉᖕᓂ ᐱᓇᓱᐊᕈᓯᐸᓗᖕᓂ.
ᓴᓂᐊᓂ ᑐᓂᓯᓂᕐᒥ ᐱᓕᕆᐊᖑᓂᐊᖅᑐᓄᑦ ᐱᓪᓚᕆᙳᖅᑎᑕᐅᓂᖏᓐᓂ ᐃᓄᑐᖃᕐᓄᑦ, ᓈᑕᓇᐃᓐ ᐅᖃᓚᐅᖅᐳᖅ ᐃᒃᐱᒍᓱᒃᐸᒃᐳᖅ ᐊᓕᐊᓇᐃᒋᔭᐅᓂᖓᓂ ᐱᙳᐊᕐᓂᐅᔪᓄᑦ, ᑕᒧᓗᖕᓂᕐᒧᑦ ᐊᒻᒪ ᐃᓕᑦᑎᓂᕐᒥ ᐱᖅᑯᓯᑐᖃᖅᑎᒍᑦ ᐱᓕᕆᓂᐅᔪᓄᑦ ᐃᓄᑐᖃᕐᓂᑦ.
ᕌᓐᑕ ᐅᓂᒃᑳᓚᐅᖅᐳᖅ ᓈᑕᓇᐃᓐ ᑐᒃᓯᕋᖅᓯᒪᕙᒌᖅᐳᖅ ᐊᔾᔨᒌᙱᑦᑐᓂ ᐱᓕᕆᐊᖑᔪᓄᑦ ᐃᓄᑐᖃᕐᓄᑦ, ᑭᓯᐊᓂ ᒪᓕᖕᓂᖃᖅᐳᖅ ᑮᓇᐅᔭᖃᖅᑎᑕᐅᓂᐅᔪᒥ.
“ᑕᒪᒃᑭᒐᓚᑦ ᐃᓕᖅᑯᓯᓕᕆᓂᕐᒥ ᐊᒻᒪ ᐃᑦᑕᕐᓂᓴᓕᕆᔨᒃᑯᓐᓂᙶᓲᖑᕗᑦ,” ᐅᖃᓚᐅᖅᐳᖅ ᕌᓐᑕ, ᐅᖃᐅᓯᖃᖅᑎᓪᓗᒍ ᑮᓇᐅᔭᓂ ᐱᔭᕆᐊᖃᖅᑐᓂ ᐊᐅᓚᑦᑎᓂᕐᒧᑦ ᐱᓕᕆᐊᖑᔪᓄᑦ. ᐊᕐᕌᒍᑕᒫᒥ, ᑲᑐᔾᔨᖃᑎᒌᖑᔪᖅ ᑐᓂᓯᓲᖑᕗᑦ ᐃᓕᓴᖅᓯᕕᖕᒥ ᐃᓄᑐᖃᕐᓄᑦ ᑲᑎᒪᔨᕋᓛᓂᑦ ᑐᓂᕐᕈᑎᓂᑦ ᐊᐅᓚᑦᑎᓂᕐᒧᑦ ᑲᑎᙵᓂᐅᔪᒧᑦ. ᑐᓂᓯᓲᖑᒋᕗᖅ ᐃᓚᖓᓐᓂ ᑮᓇᐅᔭᓂᒃ ᓈᑕᓇᐃᓐ ᐃᓂᖓᓄᑦ ᐃᓄᑐᖃᕐᓄᑦ ᐱᓕᕆᐊᖑᔪᒧᑦ ᐱᓕᕆᔨᐅᓂᖓᓄᑦ ᐅᖃᓚᐅᖅᐳᖅ.
“ᑲᒪᓇᖅᓯᒪᕗᖅ ᐃᑲᔪᖅᓱᐃᓯᒪᓂᖏᓐᓂ ᐱᒻᒪᕆᐅᒋᔭᑦᑎᓐᓂ ᐱᓕᕆᐊᖑᔪᓂ ᖄᖏᖅᓯᒪᓕᖅᑐᓄᑦ ᐊᕐᕌᒍᓄᑦ 20−ᓄᑦ,” ᐅᖃᓚᐅᖅᐳᖅ ᐃᓕᓴᖅᓯᕕᐅᑉ ᐃᓱᒻᒥᖅᑐᐃᔨᖓ.
ᐃᓄᑐᖃᕐᓄᑦ ᐱᓕᕆᐊᖑᔪᑦ “ᐱᓪᓚᕆᐅᔪᒥ” ᐱᒻᒪᕆᐅᓂᖃᖅᐳᑦ ᓄᓇᓕᐅᔪᓄᑦ. ᑐᓂᓯᓲᖑᕗᑦ ᐃᓂᐅᔪᒥ ᐅᖃᐅᓯᖃᕐᓂᕐᒧᑦ ᐱᖅᑯᓯᑐᖃᖅᑎᒍᑦ ᖃᐅᔨᒪᓂᐅᔪᒥ, ᐃᓅᖃᑎᒌᖕᓂᕐᒧᑦ ᐊᒻᒪ ᐱᙳᐊᕐᓂᐅᔪᓄᑦ ᐅᖃᓚᐅᖅᐳᖅ ᕌᓐᑕ. ᑭᓯᐊᓂ, ᐅᖃᓚᐅᖅᐳᖅ, ᐅᑯᐊᓕᒫᑦ ᐱᓕᕆᐊᖑᔪᑦ ᐱᓕᕆᕙᙱᓚᑦ ᒦᒥᑕᖃᙱᑎᓪᓗᒍ.