ᑎᑭᐅᑎᓂᖅ ᓄᓇᕘᑉ ᐊᖏᕈᑎᐊᑕ ᑕᐅᑐᒃᑕᑐᐊᖃᑲᐃᓐᓇᕐᓂᖓᓂ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓᓐᓄᑦ

747

ᐅᖃᐅᓯᖅ ᐊᒃᑐᐃᓲᖑᕗᖅ ᓇᐅᒃᑯᓕᒫᑦᑎᐊᖅ ᖃᐅᑕᒫᒥ ᐃᓅᓯᐅᔪᒥᑦ ᐊᒻᒪ ᑕᒪᑐᒧᖓ ᐱᔾᔪᑕᐅᔪᒥ United Nations ᐅᖃᐅᓯᖃᖅᓯᒪᕗᑦ 2019−ᒥ ᐊᕐᕌᒎᓂᖓᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᐅᓂᖓᓄᑦ.
ᓄᓇᕗᒻᒥ ᑐᙵᕕᒃᑯᑦ (NTI) ᐃᓚᐅᖃᑕᐅᕗᖅ. 

ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᓇᖏᖅᐳᖅ ᐊᕙᓗᔭᐅᓯᒪᓪᓗᓂ ᐃᖃᓗᖕᓂ ᐃᖅᑲᓇᐃᔭᖅᑎᓂᑦ ᖁᕕᐊᓱᒡᕕᐅᓚᐅᖅᑳᕋᓂ. ᓯᕗᓂᐊᓂ, ᓴᐅᒥᖕᒥ: ᒪᕇ ᐱᓗ, ᑏᓇ ᑎᑰᑐ, ᐊᒪᐅᓪᓚ ᑰᑑ, ᕿᓚᕝᕙᖅ ᑭᐊᕆᓐ ᖃᑉᓗᓈ, ᓵᓐᑐᕋ ᐅᒥᒃ ᐊᒻᒪ ᓄᖅᓗ ᐅᐊᐃᑦ. ᒪᕐᕈᖓᓂ, ᓴᐅᒥᖕᒥ: ᐳᓃᔅ ᑲᓛᒃ, ᕇᐱᑲ ᒪᐃᒃ, ᐋᑎᓚᐃᓐ ᓵᓚᒨᓂ, ᐃᓕᓴᐱ ᐊᐃᐱᓕ, ᔫᒥ ᐃᔨᑦᓯᐊᖅ. ᓇᖏᖅᑐᑦ: ᑲᐃᓕ ᐊᒡᓘᒃᑲᖅ, ᑏᓇ ᐳᕋᐃᔅ, ᑮᑦ ᐊᕐᓇᒃᑲᖅ, ᓴᐃᓚ ᐊᓕᐊᑦ, ᐲᑕ ᐊᓐᓂᕐᒥᐅᖅ, ᓇᐸᑦᓯ ᑯᓗᓛ, ᓵᓐ ᐅᐊᑦᔅᕼᐅᐊᓐ, ᐃᓕᓴᐱ ᐃᑭᓪᓗᐊᖅ, ᑭᐊᕆᓐ ᕙᓚᕈᑎ, ᓖᓴ ᐃᓱᓪᓗᑕᖅ, ᐊᓗᑭ ᑰᑦᑎᖅ, ᔫᓐ ᓴᐸ, ᐊᓪᒪ ᐃᑦᑐᐊᑦᓯᐊᖅ, ᖃᔮᖅ ᐃᐊᓪᔅᕘᑦ, ᐃᓚᐃᓐ ᐅᑉᐸᕼᐅᐊᒃ−ᐳᕋᔅᑭ, ᔩᓂ ᐋᕆᐊᖅ−ᖁᓪᓗᐊᓕᒃ, ᓰᓚ ᐅᓛᔪ, ᓕᓯ ᐊᓕᖅᑲᑐᖅᑐᖅ ᐊᒻᒪ ᑐᕌᕕᔅ ᑰᐳᕐ.

ᐅᖃᐅᓯᖅ ᐱᓪᓚᕆᐅᕗᖅ ᐃᓚᒋᔭᐅᓪᓗᓂ ᐃᓕᓐᓂᐊᖅᑐᓕᕆᓂᕐᒧᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᒪᓕᒐᓕᕆᓂᕐᒧᑦ, ᐅᖃᓚᐅᖅᐳᖅ ᐊᖓᔪᖅᑳᖅ ᐊᓗᑭ ᑰᑦᑎᖅ.
“ᑕᐃᒪᓐᓇ ᑕᐅᑐᒃᑕᓗᐊᖃᑲᐃᓐᓇᒐᔪᒃᐳᖓ ᐅᖃᐅᓯᕐᒧᑦ. ᑐᙵᕕᐅᓪᓗᓂ ᐃᓚᒋᔭᐅᓇᓱᒋᕙᕋ. ᐱᓕᕆᑦᑎᐊᕈᓐᓇᕈᑦᑎᒍᑦ ᐱᐅᔪᒥ ᐊᒃᑐᐃᓂᖃᕐᓂᐊᖅᐳᖅ ᐊᒥᓱᐊᓗᖕᓂ ᐊᓯᖏᓐᓂ ᐃᓂᐅᔪᓂᑦ ᐱᔨᑦᑎᕋᕐᓂᕐᒧᑦ ᐊᒻᒪ ᑐᓂᓯᓂᐅᔪᓂ,” ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᑎᓯᐱᕆ 14−ᖑᑎᓪᓗᒍ.
ᐊᑕᐅᓯᖅ ᑰᑦᑎᐅᑉ ᐊᐃᑦᑖᕆᓛᕆᓯᒪᔭᖓ ᐱᑕᖃᙱᓗᐊᙱᓐᓂᖓᓂ ᒪᕐᕉᖕᓂ ᐅᖃᐅᓯᕐᓂ ᐃᓕᓐᓂᐊᕐᓂᐅᔪᒥ ᑕᒪᒃᑭᓄᑦ ᖁᑦᑎᖕᓂᓕᐅᔪᓂ ᓄᓇᕗᒻᒥ ᐃᓕᓐᓂᐊᕐᕕᓂᑦ. ᑕᒪᓐᓇ, ᐃᓚᖓᓐᓂ ᐊᓯᖏᓐᓂ ᐱᓕᕆᑦᑎᐊᙱᓐᓂᐅᔪᓂ ᒐᕙᒪᐅᔪᓂ ᓄᓇᕗᒻᒥ ᐊᒻᒪ ᑲᓇᑕᒥ ᐊᑐᓕᖅᑎᑦᑎᓂᕐᒧᑦ ᑎᑎᕋᖅᓯᒪᓂᐅᔪᓂ ᓄᓇᕗᒻᒥ ᐊᖏᕈᑎᖓᓐᓂ, ᓄᓇᕗᒻᒥ ᑐᙵᕕᒃᑯᑦ ᐃᓚᒋᔭᐅᖃᑕᐅᓂᕐᒥ ᑐᕌᖅᑎᑦᑎᓂᖃᓚᐅᖅᐳᑦ ᑲᑐᔾᔨᖃᑎᒌᖑᔪᒥ 2018 ᓄᙳᐊᓂ ᕿᒥᕐᕈᓇᖕᓂᕐᒧᑦ ᓇᖕᒥᓂᖅ ᐊᐅᓚᑦᑎᓂᕐᒧᑦ ᒐᕙᒪᖃᕐᓂᕐᒧᑦ.
“ᑕᒪᑐᒪᓂ ᐊᕐᕌᒎᔪᒥ ᓇᓗᓇᐃᖅᓯᕗᖅ ᐊᕐᕌᒍᓂ 25−ᓂ ᑕᐃᒪᙵᓂ ᓄᓇᕗᒻᒥ ᐊᖏᕈᑎᖓ ᐊᑎᓕᐅᖅᑕᐅᓚᐅᕐᓂᖓᓂ. ᐊᑕᐅᓯᐅᔪᒥ ᐅᖃᐅᓯᕆᒐᔪᒃᑕᕗᑦ ᐅᓇᐅᕗᖅ: ᓇᒦᓕᖅᐱᑕ? ᑭᓱᑦ ᑕᐅᑐᙳᐊᖅᑕᐅᓚᐅᖅᐸᑦ? ᐃᓄᐃᑦ ᑎᑭᐅᑎᓯᒪᕙᑦ ᑕᐅᑐᙳᐊᖅᑕᐅᓚᐅᖅᑐᒥ? ᓇᒥ ᑎᑭᐅᑎᓯᒪᙱᓗᐊᖅᐸ? ᑐᑭᖃᖅᐳᖅ ᐊᑕᐅᓯᐅᔪᖅ ᖃᓄᐃᓕᖓᓂᐅᓇᔭᖅᑐᒥ ᑖᔅᓱᒥᖓ ᓄᓇᕗᒻᒥ ᑐᙵᕕᒃᑯᑦ ᐃᓚᒋᔭᐅᖃᑕᐅᓂᕐᒥ ᐅᕙᑦᑎᓐᓂ ᑐᕌᖅᑎᑦᑎᓇᔭᕐᓂᖓᓂ ᐱᒋᐊᕐᓂᕐᒧᑦ ᐆᒥᖓ ᖃᐅᔨᓴᐃᓂᐅᔪᒥ ᐊᒻᒪ ᕿᒥᕐᕈᓗᒍ ᓂᕈᐊᒐᒃᓴᐅᔪᓂᑦ,” ᐅᖃᓚᐅᖅᐳᖅ ᑰᑦᑎᖅ.
ᐊᓯᐊᓂ ᑰᑦᑎᐅᑉ ᐊᐃᑦᑖᕆᓯᒪᒋᔭᖏᓐᓂ ᑲᑐᔾᔨᖃᑎᒌᖑᔪᒥ ᐱᓕᕆᖃᑎᖃᕐᓂᐅᔪᒥ ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪ ᓄᓇᕗᒻᒥ ᑐᙵᕕᒃᑯᓐᓂ ᑎᑭᐅᑎᓂᖃᙱᓗᐊᕐᓂᖓᓂ.
“ᓄᖅᑲᖅᓯᒪᙱᓚᒍᑦ ᐅᖃᐅᔾᔨᓯᒪᓂᕐᒧᑦ, ᐃᓕᖕᓂ ᐱᓕᕆᖃᑎᖃᕈᒪᕗᒍᑦ, ᐅᕙᓃᑉᐳᒍᑦ. ᐱᓕᕆᖃᑎᖃᕈᒪᕗᒍᑦ ᐊᖏᔪᓂ ᐊᑲᐅᙱᓕᐅᕈᑕᐅᔪᓂ ᐃᓅᓯᕐᒥ ᐱᐅᓯᑎᑦᑎᕚᓪᓕᕐᓂᐊᖅᑐᒥ ᐃᓄᖕᓄᑦ,'” ᐅᖃᓚᐅᖅᐳᖅ.
“ᑕᐅᑐᒃᑕᓐᓂ, ᐃᓕᓐᓂᐊᖅᑐᓕᕆᓂᕐᒧᑦ ᒪᓕᒐᖓᑕ ᕿᒥᕐᕈᔭᐅᓂᖓ ᐊᑕᐅᓯᐅᓪᓗᓂ ᐊᑲᐅᙱᓕᐅᕈᑎᕐᔪᐊᖑᕗᖅ ᑕᑯᔪᒪᓇᔭᓚᐅᖅᑕᓐᓂ ᐃᓚᐅᑎᑦᑎᒃᑲᓐᓂᖅᑐᒥ ᑲᑐᔾᔨᖃᑎᒌᖕᓂᐅᔪᒥ ᐊᒻᒪ ᐱᕙᓪᓕᐊᑎᑦᑎᖃᑎᖃᖅᑐᒥ. ᐅᕙᓐᓄᑦ ᑐᑭᖃᑦᑎᐊᖅᐳᖅ ᐊᒻᒪ ᐱᔭᕆᐊᖃᕐᓂᖃᖅᐳᖅ ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪ ᓄᓇᕗᒻᒥ ᑐᙵᕕᒃᑯᓐᓂ ᐱᓕᕆᓗᑎᒃ ᑲᑐᔾᔨᓗᑎᒃ. ᑲᒪᓚᐅᖅᐳᒍᑦ ᑐᓴᕋᑦᑕ ᓯᕗᒻᒧᑦ ᐃᖏᕐᕋᓂᖏᓐᓂ ᐃᓕᓐᓂᐊᖅᑐᓕᕆᓂᕐᒧᑦ ᒪᓕᒐᕐᒧᑦ ᐅᖃᖃᑎᖃᕐᓂᐅᔪᓂᑦ ᐊᒻᒪ ᐊᖏᖅᑕᐅᓯᒪᔪᒥ ᒪᓕᒐᙳᖅᑎᑦᑎᓂᕐᒧᑦ ᑐᒃᓯᕋᕈᑕᐅᔪᒥᒃ.”
ᐅᖃᐅᓯᖅ ᑕᑯᒃᓴᐅᓂᖃᕐᔪᐊᕆᕗᖅ ᑲᓇᑕᒥ ᑭᒡᓕᐅᔪᒥ, ᒐᕙᒪᑐᖃᒃᑯᑦ ᓴᖅᑭᑎᑦᑎᔪᒪᓪᓗᑎᒃ ᓄᑖᖑᔪᒥ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓄᑦ ᒪᓕᒐᙳᖅᑎᑕᐅᓂᐅᔪᓂ
ᑰᑦᑎᖅ ᐃᓱᒪᓕᐅᕆᓯᒪᒋᕗᖅ ᑲᓇᑕᒥ ᒪᓕᒐᙳᖅᑎᑕᐅᓂᐅᔪᖅ ᐃᓱᒪᒋᔭᕆᐊᖃᕆᕗᖅ ᓄᓇᕘᑉ ᐊᔾᔨᐅᙱᓐᓂᖓᓂ ᖃᓄᐃᓐᓂᖓᓂ−ᑕᒪᕐᒥᒐᓚᒃ ᓄᓇᕘᑉ ᐃᓄᖕᓂ ᐅᓄᕐᓂᕆᔭᖓᓐᓂ 85 ᐳᓴᓐᑎᖓᓂ ᑕᒪᒃᑭᖅᑐᒥ ᐃᓄᒋᐊᖕᓂᖓᓂ, ᐃᓄᒃᑐᑦ ᐅᖃᓪᓚᓲᖑᕗᑦ.
“ᐱᓕᕆᐊᕆᔭᐅᔪᒪᓚᐅᖅᑐᖅ ᓴᖅᑭᑎᑦᑎᓂᕐᒥ ᓄᓇᕗᒻᒥ ᐃᓄᒃᑐᑦ ᐅᖃᐅᓯᐅᓂᖓᓂ ᐱᔨᑦᑎᕋᕐᓂᕐᒧᑦ, ᐱᓕᕆᐊᖑᔪᓂ ᑐᓂᔭᐅᓂᖏᓐᓄᑦ,” ᐅᖃᓚᐅᖅᐳᖅ.
“ᐱᒋᐊᕐᓂᖓᓂ, ᐅᖃᖅᓯᒪᕗᖓ ᒪᓕᒐᙳᖅᑎᑕᐅᓂᖓ ᓇᓗᓇᐃᒃᑯᑎᑐᐃᓐᓇᐅᓂᖓᑕ ᐅᖓᑖᓅᕆᐊᖃᖅᐳᖅ. ᐊᒻᒪ ᐅᔾᔨᖅᓱᑦᑎᐊᖅᓯᒪᕗᖓ ᖃᐅᔨᒪᓪᓗᖓ ᐊᒥᓱᐊᓗᖕᓂ ᓄᓇᖃᖅᑳᖅᓯᒪᔪᓂ ᐅᖃᐅᓯᖅᑕᖃᕐᓂᖓᓂ ᑲᓇᑕᓕᒫᒥ ᐃᓄᒃᑐᑦ, ᓇᖕᒥᓂᖅ ᒪᓕᒐᙳᖅᑎᑦᑎᓂᖃᙱᒃᑯᓂ, ᓴᐅᔭᐅᓂᐊᖅᐳᖅ ᐊᔾᔨᒌᙱᕈᓘᔭᖅᑐᓄᑦ ᐃᓚᒋᔭᐅᔪᓄᑦ ᑎᑎᕋᖅᑕᐅᒋᐊᙵᖅᑕᐅᔪᓄᑦ ᑭᐅᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓂ ᐊᔾᔨᒌᙱᕈᓘᔭᖅᑐᓂ ᖃᓄᑐᐃᓐᓇᖅ ᐊᑐᖅᑕᐅᓂᖓᓂ.”
ᓂᕆᐅᖕᓂᖃᓗᐊᕌᓗᙱᓚᖅ.
“ᓴᓂᕐᕙᐃᓂᖃᖃᑦᑕᓗᐊᕐᒪᑦ ᐅᒃᐱᕈᓱᙱᓚᖓ ᑎᑭᐅᑎᓛᕐᓂᑦᑎᓐᓂ ᐊᖏᑦᑎᐊᕐᓗᑕ ᐊᒻᒪ ᓱᓕᑦᑎᐊᕐᓗᑕ ᐅᖃᕈᓐᓇᕐᓂᕐᒧᑦ, ‘ᐅᓇ ᐱᐅᕗᖅ ᐃᓄᒃᑐᒻᒧᑦ,'” ᑰᑦᑎᖅ ᐅᖃᓚᐅᖅᐳᖅ.
ᐱᐅᓂᐅᔪᒥ, ᒫᓐᓇᓕᓴᒥ ᐅᖃᐅᓯᐅᓚᐅᖅᑐᒥ ᐊᓯᔾᔨᕐᓂᐅᔪᓂ ᓂᕿᑦᑎᐊᕙᓕᕆᓂᕐᒧᑦ ᐅᐊᖕᓇᒥ ᑲᓇᑕᒥ ᐃᓚᓕᐅᔾᔨᓚᐅᖅᐳᑦ ᓄᑖᖑᔪᒥ ᐊᖑᓇᓱᖕᓂᕐᒧᑦ ᓂᕿᒃᓴᖃᖅᑎᑦᑎᓂᕐᒧᑦ ᐃᑲᔪᖅᓱᐃᓂᐅᔪᒥ ᐊᐃᑦᑑᑎᒥᒃ, ᐱᔭᕆᐊᖃᕐᓂᐅᔪᒥ ᑰᑦᑎᖅ ᐊᒻᒪ ᓄᓇᕗᒻᒥ ᑐᙵᕕᒃᑯᓐᓂ ᐋᔩᖃᑎᖃᐃᓐᓇᖅᓯᒪᓂᖏᓐᓂ ᖃᔅᓯᒐᓚᖕᓄᑦ ᐊᕐᕌᒍᓄᑦ. ᐊᕐᕌᓂᐅᓚᐅᖅᑐᒥ ᑕᒪᑐᒪᓂ, ᑰᑦᑎᖅ ᐃᓱᒪᓚᐅᖅᐳᖅ ᐱᓕᕆᑦᑎᐊᖅᓯᒪᙱᓐᓂᖓᓂ ᐅᕙᓂ ᐱᓕᕆᓂᐅᔪᒧᑦ, ᐊᒻᒪ ᐱᓕᕆᑦᑎᐊᖅᓯᒪᓇᓱᒋᙱᖦᖢᓂ “ᐅᖃᓪᓚᒍᓐᓇᑦᑎᐊᕐᓂᕐᒧᑦ ᒐᕙᒪᑐᖃᒃᑯᓐᓄᑦ ᒥᓂᔅᑕᖏᓐᓄᑦ ᖃᓄᐃᒻᒪᑦ ᐊᖑᓇᓱᒃᑎᐅᔪᑦ ᐃᑲᔪᖅᓯᖅᑕᐅᓪᓗᐊᕐᓂᖏᓐᓂ ᐊᒻᒪ ᖃᓄᐃᒻᒪᑦ, ᑕᐅᑐᒃᑎᓪᓗᑕ ᓂᕿᒃᓴᖃᑦᑎᐊᙱᓐᓂᐅᔪᒥ, ᐃᓄᖕᓂ ᖁᕝᕙᖅᓴᐃᓪᓗᐊᖅᐳᒍᑦ ᐱᓕᕆᓂᐅᔪᒥ ᐃᓄᐃᑦ ᓇᖕᒥᓂ ᐱᕙᒡᓗᑎᒃ ᓇᖕᒥᓂᖅ ᓂᕿᑦᑎᐊᕙᐅᔪᓂ ᓂᕿᓂᑦ.”
ᑕᐃᔭᐅᓂᖓᓂ ᓄᑖᖑᔪᒥ ᐊᐃᑦᑑᑎᐅᔪᒥ ᒥᑭᑦᑐᒥ ᑎᑭᐅᒪᑎᑦᑎᐊᕐᓂᐅᓂᖓᓂ, ᑰᑦᑎᖅ ᓱᓕ ᐅᔾᔨᖅᓱᑦᑎᐊᕋᓱᐊᖅᐳᖅ. ᒐᕙᒪᑐᖃᒃᑯᑦ ᑐᓂᓯᓚᐅᙱᓚᑦ ᖃᓄᐃᓕᖓᓂᐅᔪᓂ ᓄᑖᖑᔪᒥ ᐊᐃᑦᑑᑎᐅᔪᒥᒃ.
“ᑭᓯᐊᓂ ᑐᑭᓯᐅᒪᕗᖓ ᒪᑐᐃᖓᓂᖏᓐᓂ ᐊᑐᖁᓇᔭᖅᑕᑦᑎᓐᓂ ᐊᒻᒪ ᐱᕕᒃᓴᖃᕐᓂᑦᑎᓐᓂ ᐊᔭᐅᕆᓂᕐᒧᑦ ᖃᓄᖅ ᑕᐅᑦᑐᖃᕐᓂᐊᕐᓂᖓᓂ. ᑕᐃᒪ ᒫᓐᓇᐅᔪᒥ ᓂᕆᐅᖕᓂᖃᑦᑎᐊᖅᐳᖅ ᑖᔅᓱᒧᖓ,” ᐅᖃᓚᐅᖅᐳᖅ.
ᑕᒫᓂᒐᓚᒃ ᐊᕐᕌᒎᓚᐅᖅᑐᒥ, ᑰᑦᑎᖅ ᖁᕕᐊᓱᒍᑎᖃᕈᒪᕗᖅ ᒐᕙᒪᑐᖃᒃᑯᑦ ᐅᖃᐅᓯᕐᒥ ᒪᓕᒐᙳᖅᑎᑕᐅᓂᐅᔪᒥ ᑭᐅᔪᒥ ᐃᓄᒃᑐᒻᒥ, ᐊᒻᒪ ᑕᑯᓂᐊᕐᓂᖓᓂ ᐃᓄᒃᑐᑦ−ᐅᖃᓪᓚᒃᑐᓂ ᓄᓇᕗᒻᒥ ᐃᓄᐃᑦ ᐱᕙᒃᑐᓂ ᐱᓕᕆᐊᖑᔪᓂ ᐊᒻᒪ ᐱᔨᑦᑎᕋᕐᓂᐅᔪᓂ ᐅᖃᐅᓯᖓᓐᓂ – ᐃᑲᔪᕈᑎᒃᓴᖃᕆᓪᓗᑎᒃ.
“ᐃᓚᒌᒃᑐᑦ, ᑭᓯᐊᓂ ᑎᑭᐅᑎᓂᑦᑎᐊᕚᓘᓇᔭᖅᐳᖅ, ᐃᓕᓐᓂᐊᖅᑐᓕᕆᓂᕐᒧᑦ ᒪᓕᒐᖓ ᑐᕌᖓᓇᔭᖅᑐᒥ ᐃᓄᖕᓄᑦ ᐃᖅᑲᓇᐃᔮᖃᕐᓂᕐᒧᑦ ᐸᕐᓇᐅᑎᖓᓐᓂ ᓈᒻᒪᒋᔭᐅᔪᒥ ᐊᒻᒪ ᐊᑐᖅᑕᐅᔪᓐᓇᕐᓗᓂ ᐃᓄᒃᑐᑦ−ᐅᖃᓪᓚᓲᖑᔪᓄᑦ ᐃᓕᓴᐃᔨᓄᑦ,” ᐅᖃᓚᐅᖅᐳᖅ ᑰᑦᑎᖅ.