Skip to content

ᐹᕙᓐᓛᓐᑯᑦ ᐊᒻᒪ ᐊᖑᓇᓱᒃᑏᑦ ᒥᑭᒋᐊᕐᓂᐊᖅᑎᓪᓗ ᓱᓕ ᐊᖏᖃᑎᒌᒃᓯᒪᙱᓚᑦ

ᐊᕐᕌᒍᒐᓴᓂ ᐅᖃᖃᑎᖃᕐᓂᐅᔪᓂ ᐊᒻᒪ ᑎᑎᕋᖃᑦᑕᐅᑎᖃᑦᑕᕐᓂᖏᓐᓄᑦ, ᐹᕙᓐᓛᓐ ᓴᕕᕋᔭᒃᓴᒧᑦ ᐅᔭᕋᖕᓂᐊᕐᕕᒃ ᐊᒻᒪᓗ ᒥᑦᑎᒪᑕᓕᖕᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖑᔪᑦ (MHTO) ᒥᑦᑎᒪᑕᓕᖕᒥ ᓱᓕ ᐊᖏᖃᑎᒌᒍᓐᓇᙱᓚᑦ ᐃᓄᐃᑦ ᐱᖅᑯᓯᑐᖃᖏᑎᒍᑦ ᖃᐅᔨᒪᓂᖏᓐᓂ ᐊᒻᒪ ᓇᐅᑦᑎᖅᓱᕐᓂᕐᒧᑦ ᐆᒪᔪᓂᑦ.

ᑭᖑᓪᓕᖅᐹᖑᔪᖅ ᑕᑯᒃᓴᐅᓂᐅᔪᒥ ᐊᕕᒃᓯᒪᓂᐅᔪᒥ ᒪᕐᕉᔪᓂ ᐱᓕᕆᖃᑎᒌᖑᔪᓂ ᑎᑭᓚᐅᖅᐳᖅ ᐅᕘᓇ ᓯᑎᐱᕆ 30–ᒥ ᑎᑎᖅᑲᐅᔪᒥ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᒥᑦᑎᒪᑕᓕᖕᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖑᔪᓄᑦ ᐃᒃᓯᕙᐅᑕᖓᓐᓂ ᐃᐊᕆᒃ ᐆᑦᑐᕙᕐᒥ.

ᐹᕙᓐᓛᓐ ᓴᕕᕋᔭᒃᓴᒧᑦ ᐅᔭᕋᖕᓂᐊᕐᕕᖓ ᐅᖃᖅᐳᑦ ᐊᐅᓚᑦᑎᓂᐊᕐᓂᖏᓐᓂ ᑐᕌᖓᓂᖃᖅᑐᒥ ᓇᑦᑎᕐᓂ ᓇᐅᑦᑎᖅᓱᕐᓂᐊᖅᑐᓂ ᐱᓕᕆᐊᖑᔪᒥ ᑭᐅᓂᕐᒧᑦ ᐃᓱᒫᓘᑕᐅᔪᓄᑦ ᐅᖃᐅᓯᐅᔪᓄᑦ ᒥᑦᑎᒪᑕᓕᖕᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖑᔪᓄᑦ. ᐅᔭᕋᖕᓂᐊᕐᕕᖕᒧᑦ ᑲᒻᐸᓂᐅᔪᖅ ᐊᒻᒪᓗ ᒥᑦᑎᒪᑕᓕᖕᒥ ᐊᖑᓇᓱᒃᑏᑦ ᒥᑭᒋᐊᕐᓂᐊᖅᑎᓪᓗ ᓱᓕ ᐊᖏᐸᓗᒃᑐᓂ ᐊᔾᔨᒌᙱᓐᓂᖃᖅᐳᑦ ᐃᓱᒪᒋᔭᒥᓂᑦ ᖄᖏᐅᑎᔭᕆᐊᓕᖕᓂ.

ᐹᕙᓐᓛᓐᑯᑦ ᓴᓇᓯᒪᒐᓗᐊᖅᑎᓪᓗᒋᑦ ᕼᐊᓐᓇᓚᖏᓐᓂ ᐊᖏᖅᓯᒪᓂᐅᔪᓂ – ᐊᒥᓱᑦ ᐋᖅᑭᒋᐊᖅᓯᒪᔪᓂ ᑭᐅᓂᕐᒧᑦ ᐱᔪᒪᔭᐅᓂᐅᔪᓄᑦ ᒐᕙᒪᐅᔪᓂ ᐊᒻᒪᓗ ᐃᓄᖕᓂ ᑲᑐᔾᔨᖃᑎᒌᖑᔪᓄᑦ– ᐅᖓᕙᕆᐊᖅᓯᓂᕐᒧᑦ ᓄᓘᔭᕐᓂ ᐅᔭᕋᖕᓂᐊᕐᕕᖓ ᐱᓕᕆᓂᐅᔪᒥ ᒪᕐᕈᖓᓂ ᐊᖏᒡᓕᒋᐊᖅᑕᐅᓂᖓᓂ ᐸᕐᓇᐅᑎᖏᓐᓂ, ᐆᑦᑐᕙᒃ ᑐᑭᓯᓇᖅᓯᑎᑦᑎᑦᑎᐊᓚᐅᖅᐳᖅ ᒥᑦᑎᒪᑕᓕᖕᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖑᔪᑦ ᓈᒻᒪᒃᓴᖅᓯᒪᙱᓐᓂᖓᓂ ᐹᕙᓐᓛᓐᑯᑦ ᐊᖏᖅᑕᐅᑎᓐᓇᓱᐊᖅᑕᖓᓐᓂ ᐱᓕᕆᓂᖏᓐᓂ ᐱᔾᔪᑎᖃᖅᑐᒥ ᖃᐅᔨᓴᖅᑕᐅᕙᓪᓕᐊᓂᖏᓐᓂ ᐆᒪᔪᓂᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᓐᓂ.

"ᑭᖑᓪᓕᖅᐹᕗᑦ ᑎᑎᕋᖅᓯᒪᔪᒥ ᑐᓂᓯᓂᐅᔪᒥ ... ᑐᒃᓯᕋᓚᐅᖅᐳᖅ ᐹᕙᓐᓛᓐᑯᑦ ᐱᓕᕆᓂᖏᓐᓂ ᐊᖏᓂᖅᓴᒻᒪᕆᐅᔪᒥ ᓇᐅᑦᑎᖅᓱᕐᓂᐅᔪᒥ ᑕᕆᐅᕐᒥ ᐆᒪᔪᓂᑦ ᐊᒻᒪ ᐆᒪᔪᐃᑦ ᓯᓚᑎᖃᑎᒌᑦ ᓯᓚᑖᓗ, ᐊᒻᒪᓗ ᑕᐃᓐᓇ ᐱᓕᕆᓂᐅᔪᖅ ᐃᓚᖃᕐᓗᓂ ᐊᒻᒪ ᐃᓚᓕᐅᔾᔨᓗᓂ ᐃᓄᖕᓂ ᖃᓄᐃᑦᑐᓕᒫᑦᑎᐊᓄᑦ ᐱᓕᕆᐊᖑᔪᓄᑦ. ᐊᓯᐊᒎᖅᑐᒥ ᑐᒃᓯᕋᖅᓯᒪᒋᕗᒍᑦ ᐹᕙᓐᓛᓐᑯᑦ ᐱᓕᕆᓂᖏᓐᓂ ᖄᒃᑲᓐᓂᐊᒍᑦ ᓇᐅᑦᑎᖅᓱᕐᓂᐅᔪᒥ ᐃᖃᓗᖕᓄᑦ ᐊᒻᒪ ᓇᐅᑦᑎᖅᓱᖅᐸᓪᓕᐊᓗᑎᒃ ᓇᑦᑎᕐᓂ," ᐆᑦᑐᕙᒃ ᑎᑎᕋᓚᐅᕆᕗᖅ, ᐅᖃᐅᓯᖃᕆᓪᓗᓂ ᐃᓱᒫᓘᑕᐅᔪᓂ ᐊᒃᑐᐃᓂᐅᔪᓄᑦ ᑐᒃᑐᓄᑦ. "ᓱᓕᒃᑲᓐᓂᖅ, ᐊᒻᒪᓗ ᐱᒻᒪᕆᐅᓛᖑᔪᒥ ᒥᑦᑎᒪᑕᓕᖕᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖑᔪᓄᑦ, MEWG (ᑕᕆᐅᕐᒥ ᐊᕙᑎᖓᓐᓂ ᐱᓕᕆᓪᓗᑎᒃ ᑲᑎᙵᔪᑦ) ᐊᑐᖅᑎᑦᑎᖃᑦᑕᙱᓚᖅ ᑲᑎᖅᓱᐃᓂᐅᔪᒥ ᐅᕝᕙᓘᓐᓃᑦ ᐃᑲᔪᕈᑕᐅᓂᐅᔪᓂ ᐃᓄᐃᑦ ᖃᐅᔨᒪᔭᑐᖃᖏᓐᓂ. ᐅᓇ ᐱᓕᕆᓂᐅᔪᖅ ᐱᓕᕆᐊᖑᔭᕆᐊᖃᖅᐳᖅ ᐃᓄᖕᓂ ᐃᓚᐅᑎᑦᑎᓗᑎᒃ, ᐊᑐᕐᓗᑎᒃ ᖃᐅᔨᒪᔨᐅᔪᓂ ᐱᓕᕆᔨᐅᔪᓄᑦ ᐊᒻᒪᓗ ᐱᕕᒃᓴᖃᖅᑎᑦᑎᓗᓂ ᐅᖃᐅᓯᖃᕐᓂᕐᒧᑦ ᐊᒻᒪᓗ ᓇᓗᓇᐃᖅᓯᓂᖏᓐᓂ ᑐᑭᓯᐅᒪᓂᖏᓐᓂ ... ᓇᓗᓇᐃᖅᓯᓯᒪᑦᑎᐊᕆᐊᖃᖅᐳᒍᑦ ᐹᕙᓐᓛᓐᑯᑦ ᓇᓗᓇᐃᖅᓯᓂᖏᓐᓂ ᐃᓄᐃᑦ ᐃᓱᒫᓘᑎᖏᓐᓂ ᐊᒻᒪ ᖃᐅᔨᒪᓂᖏᓐᓂ ᐱᕙᓪᓕᐊᑎᑕᐅᓂᖓᓂ ᓇᓗᓇᐃᖅᓯᔾᔪᑕᐅᔪᓄᑦ ᐊᒻᒪ ᐊᖏᓂᖓᓄᑦ ... ᐊᒻᒪᓗ ᐃᓱᒫᓘᑎᕗᑦ ᐹᕙᓐᓛᓐᑯᑦ ᓈᒻᒪᒃᑐᒥ ᐃᓱᒪᒋᔭᖃᙱᓐᓂᖏᓐᓂ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐊᒻᒪᓗ ᓄᓇᓕᖕᓂ ᖃᐅᔨᒪᔭᐅᓂᐅᔪᓄᑦ."

ᒪᐃᒐᓐ ᓗᐊᑦ-ᕼᐅᐊᐃᔪᓪ, ᐹᕙᓐᓛᓐᑯᑦ ᐊᖓᔪᖅᑳᑉ ᑐᒡᓕᖓ ᒪᑭᒪᔾᔪᑕᐅᔪᓐᓇᖅᑐᓄᑦ ᐱᕙᓪᓕᐊᑎᑦᑎᓂᐅᔪᒥ, ᐅᖃᓚᐅᖅᐳᖅ ᐹᕙᓐᓛᓐᑯᑦ ᑭᐅᖏᓐᓇᕐᓂᐊᖅᐳᑦ ᒥᑦᑎᒪᑕᓕᖕᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖑᔪᓄᑦ ᐅᖃᐅᓯᖃᕐᓂᕐᒥ ᐅᔭᕋᖕᓂᐊᕐᕕᐅᑉ ᑲᒻᐸᓂᐅᔫᑉ ᐊᖏᖅᓯᒪᓂᕆᔭᖏᓐᓂᑦ.

ᑕᕆᐅᕐᒥ ᐊᕙᑎᖓᓐᓂ ᐱᓕᕆᓪᓗᑎᒃ ᑲᑎᙵᔪᑦ "ᓯᕗᓪᓕᖅᐹᖑᔪᒥ ᐊᐅᓚᓂᐅᙱᓚᖅ ᐊᑐᖅᑕᐅᖏᓐᓇᓲᖑᔪᒥ ᐹᕙᓐᓛᓐᑯᓐᓄᑦ ᑲᑎᖅᓱᐃᓂᕐᒧᑦ ᐃᓄᐃᑦ ᖃᐅᔨᒪᔭᑐᖃᖏᓐᓂ," ᐅᖃᓚᐅᖅᐳᖅ.

ᐅᖃᓚᐅᕆᕗᖅ ᐹᕙᓐᓛᓐᑯᑦ 2019–ᒥ ᑕᕆᐅᕐᒥ ᓇᐅᑦᑎᖅᓱᕐᓂᕐᒥ ᐱᓕᕆᐊᖑᔪᖅ ᐃᓗᓕᖃᓚᐅᖅᐳᖅ ᐅᓄᕐᓂᖅᓴᐅᔪᒥ 50 ᐳᓴᓐᑎᒥ ᐃᓄᖕᓂ ᐃᖅᑲᓇᐃᔭᖅᑎᐅᔪᓂ. ᐃᓄᐃᑦ ᓇᓗᓇᐃᖅᓯᓯᒪᑦᑎᐊᕐᓂᕐᒧᑦ ᐊᖏᕈᑦ, ᐊᑎᓕᐅᖅᑕᐅᓯᒪᔪᒥ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ ᐊᕐᕌᒎᑉ ᐱᒋᐊᕐᓂᐸᓗᐊᓂ, ᐱᔭᕆᐊᖃᖅᑎᑦᑎᕗᖅ ᐹᕙᓐᓛᓐᑯᓐᓂ ᐊᖏᒡᓕᒋᐊᖅᑎᑦᑎᓂᕐᒥ ᐃᓄᖕᓂ ᐃᓚᐅᖃᑕᐅᑎᑦᑎᓂᕐᒧᑦ ᓇᐅᑦᑎᖅᓱᕐᓂᕐᒧᑦ ᐱᓕᕆᐊᖑᔪᓂ ᐊᒻᒪᓗᑦᑕᐅᖅ ᐱᓕᕆᐊᒃᓴᐅᔪᓄᑦ ᐊᐅᓚᑕᐅᓂᖏᓐᓂ, ᐃᓱᒪᓕᐅᕆᓂᕐᓂ ᐊᒻᒪ ᑲᒪᒋᔭᖃᕐᓂᐅᔪᓂ, ᐅᖃᓚᐅᖅᐳᖅ.

ᓗᐊᑦ-ᕼᐅᐊᐃᔪᓪ ᐃᓚᒋᐊᖅᓯᓚᐅᖅᐳᖅ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐃᓕᓐᓂᐊᕐᓂᖃᖅᓯᒪᕗᑦ ᑕᐃᒪᙵᓂ 2006–ᒥ ᐊᒻᒪᓗ ᒫᓐᓇᓕᓴᐅᓛᖑᔪᒥ ᐊᕐᕌᒎᑉ ᐱᒋᐊᕐᓂᐸᓗᐊᓂ.

"ᖄᒃᑲᓐᓂᐊᒍᑦ, ᑲᑎᒪᖃᑎᖃᖅᓯᒪᕗᒍᑦ ᓄᓇᓕᖕᓂ ᐊᒻᒪᓗ ᐃᓄᖕᓂ ᑕᐃᒪᙵᓂ 2015–ᒥ ᐱᓕᕆᓂᐅᔪᒥ ᒪᕐᕈᖓᓂ, ᐊᒻᒪᓗ ᐹᕙᓐᓛᓐᑯᑦ ᐱᓐᓇᕈᓱᒃᐳᑦ ᑕᒪᒃᑭᓂ ᐅᖃᐅᓯᒃᓴᓕᐊᖑᔪᓂ ᐱᓯᒪᔭᖏᓐᓂ ᐃᓄᑐᖃᕐᓂ, ᒪᒃᑯᒃᑐᓂ, ᐊᖑᓇᓱᒃᑐᓕᕆᔨᒃᑯᓐᓂ ᒥᑭᒋᐊᕐᓂᐊᖅᑎᓂᓪᓗ ᑲᑐᔾᔨᖃᑎᒌᖑᔪᓂ, ᐊᒻᒪᓗ ᓄᓇᓕᐅᔪᓂ, ᐊᒻᒪᓗ ᐅᕙᑦᑎᓐᓂ ᐃᑲᔪᖅᓯᒪᕗᖅ ᐱᐅᓯᒋᐊᒃᑲᓐᓂᕐᓂᕐᒧᑦ ᐊᒻᒪᓗ ᐊᓯᔾᔩᓂᕐᒥ ᐱᓕᕆᐊᒃᓴᓄᑦ ᐸᕐᓇᐅᑎᑦᑎᓐᓂ," ᐅᖃᓚᐅᖅᐳᖅ.

ᐅᔭᕋᖕᓂᐊᕐᓂᕐᒧᑦ ᑲᒻᐸᓂᐅᔪᖅ ᐊᐅᓚᑦᑎᓲᖑᕗᖅ ᐊᑕᐅᓯᕐᒥ ᐊᖏᓛᖑᖃᑕᐅᔪᒥ ᑕᕆᐅᕐᒥ ᓇᐅᑦᑎᖅᓱᕐᓂᐅᔪᒥ ᐱᓕᕆᐊᖑᔪᓂᑦ ᑲᓇᑕᒥ ᐊᒻᒪᓗ ᑲᒻᐸᓂᐅᔪᖅ ᐃᓚᓕᐅᔾᔨᓂᐊᖅᐳᖅ ᑐᕌᖓᓂᖃᖅᑐᒥ ᓇᑦᑎᕐᓄᑦ ᓇᐅᑦᑎᖅᓱᕐᓂᐅᔪᒥ ᐱᓕᕆᐊᖑᔪᒥ, ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐃᖃᓗᑦ ᖃᐅᔨᓴᖅᑕᐅᕌᓂᒃᓯᒪᓂᖏᓐᓂ ᐹᕙᓐᓛᓐᑯᓐᓂ ᐊᒻᒪᓗ ᒥᑦᑎᒪᑕᓕᖕᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖑᔪᓄᑦ ᑮᓇᐅᔭᖃᖅᑎᑕᐅᓪᓗᑎᒃ ᐅᕘᓇ ᐹᕙᓐᓛᓐᑯᑎᒍᑦ.

"ᐱᓕᕆᓂᐅᔪᒥ ᒪᕐᕈᖓᓂ ᐱᓕᕆᐊᒃᓴᐅᔪᖅ ᑐᓂᓯᓂᐊᖅᐳᖅ ᒪᑭᒪᒍᑎᒃᓴᐅᔪᓄᑦ ᐊᒻᒪᓗ ᐊᑯᓂᐅᔪᒃᑯᑦ ᐃᓅᖃᑎᒌᖑᔪᓄᑦ ᐊᒻᒪᓗ ᑮᓇᐅᔾᔭᒃᓴᓂᕐᒧᑦ ᐱᕚᓪᓕᕈᑕᐅᔪᓂ ᐃᓄᖕᓄᑦ ᐊᒃᑐᖅᓯᓂᖃᙱᓪᓗᑎᒃ ᓱᓕᑦᑎᐊᕐᓂᐅᔪᒥ ᐆᒪᔪᐃᑦ ᓯᓚᑎᖃᑎᒌᑦ ᓯᓚᑖᓗ ᐅᕝᕙᓘᓐᓃᑦ ᐱᔪᓐᓇᐅᑎᐅᔪᓄᑦ ᓯᕗᓂᒃᓴᒥ ᐱᐅᓯᖃᑎᒌᖑᔪᓄᑦ ᒪᑭᒪᔾᔪᑕᐅᔪᓐᓇᖅᑐᓄᑦ ᐊᑐᕐᓂᖏᓐᓂ ᓄᓇᒥᒃ ᐊᒻᒪᓗ ᓄᓇᐅᙱᑦᑐᒥ ᐃᑲᔪᕈᑎᒃᓴᐅᔪᓄᑦ," ᓗᐊᑦ-ᕼᐅᐊᐃᔪᓪ ᐅᖃᓚᐅᖅᐳᖅ.

ᐅᖓᓯᖕᓂᖅᓴᐅᔪᒥ ᐅᐊᖕᓇᒥ ᐃᒃᐱᐊᕐᔪᖕᓂ, ᕼᐋᒻᓚᒃᑯᑦ ᑲᑎᒪᔨᖏᑦ ᐋᖅᑭᐅᒪᑎᑦᑏᓐᓇᖅᐳᑦ ᖃᓄᐃᓕᖓᓂᐅᔪᓄᑦ ᐃᑲᔪᖅᓱᐃᓂᖏᓐᓂ ᓄᓘᔭᕐᓂ ᐅᔭᕋᖕᓂᐊᕐᕕᖓ ᐱᓕᕆᓂᐅᔪᒥ ᒪᕐᕈᖓᓂ ᐊᖏᒡᓕᒋᐊᖅᑕᐅᓂᖓᓂ. ᐅᒃᑐᐱᕆ 3 –ᒥ ᑎᑎᖅᑲᐅᔪᒥ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᑲᑎᒪᔨᒥ ᕗᕌᖕᒃ ᒪᐃᒥ ᐅᖃᖅᓯᒪᕗᖅ ᐊᑭᕋᖅᑐᕐᓂᖃᓗᐊᙱᓚᖅ ᓄᓇᓕᖕᒥᐅᑕᓂ, ᐹᕙᓐᓛᓐᑯᑦ ᐊᐅᓚᑦᑎᖦᖤᑐᐊᕈᑎᒃ ᐊᕙᑎᒧᑦ ᐊᒻᒪ ᐃᓅᖃᑎᒌᖑᔪᓄᑦ ᑲᒪᒋᔭᖃᑦᑎᐊᕐᓂᐅᔪᒥ.

"ᑕᒪᐅᙵ ᑎᑭᖦᖢᒍ, ᐹᕙᓐᓛᓐ ᓴᕕᕋᔭᒃᓴᒧᑦ ᐅᔭᕋᖕᓂᐊᕐᕕᒃ ᐃᒻᒥᖕᓂᒃ ᐃᑲᔪᖅᓱᐃᓯᒪᓂᖏᓐᓂ ᓄᓇᓕᑦᑎᓐᓂ ᐊᒻᒪᓗ ᓂᕆᐅᒍᓐᓇᖅᐳᒍᑦ ᐆᒪᙵᑦ ᐱᖅᑯᓯᐅᔪᒥ ᑕᐃᒪᐃᖏᓐᓇᕐᓂᐊᕐᓂᖓᓂ ᓯᕗᓂᒃᓴᒧᑦ," ᒪᐃ ᑎᑎᕋᖅᑕᖓ ᐅᖃᓕᒫᕐᓂᖃᖅᐳᖅ, ᐅᖃᐅᓯᖃᖅᖢᓂ ᓄᕕᐱᕆ 2019–ᒥ ᐱᒋᐊᕈᑎᒥᒃ ᖄᖏᖅᑕᐅᓯᒪᔪᒥ ᒪᐃᔭᒧᑦ ᒨᓯᓯ ᐆᔪᑯᓗᖕᒧᑦ ᐃᑲᔪᖅᓱᐃᔪᒥ ᐱᓕᕆᓂᐅᔪᒥ ᒪᕐᕈᖓᓂ. "ᐊᑲᐅᙱᓕᐅᕈᑎᖃᖅᐳᒍᑦ (ᐃᒃᐱᐊᕐᔪᖕᒥ) ᓴᖅᑭᑕᐅᓯᒪᔪᓄᑦ ᑕᐃᔅᓱᒪᓂᐅᓚᐅᖅᑐᒥ ᐱᓂᕐᓗᕐᔪᐊᕐᓂᐅᔪᓄᑦ, ᐃᒡᓗᒃᓴᑭᓗᐊᕐᓂᖓᓄᑦ, ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᔭᕆᐊᓕᖏᓐᓂ ᐊᒻᒪᓗ ᐅᓯᑲᑦᑕᕐᓂᐅᔪᒥ ᑭᖑᕙᕆᐊᖅᑎᑦᑎᓂᐅᔪᓂ ᑭᐅᔭᐅᔭᕆᐊᓕᖕᓂ, ᐊᒻᒪᓗ ᑕᐃᒪᑐᖅ ᑕᒪᒃᑭᑦ ᐅᔭᕋᖕᓂᐊᕐᕕᒃ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᑐᕐᓂᐊᖅᐳᑦ ᑮᓇᐅᔭᖃᖅᑎᑕᐅᓂᐅᔪᓂ ᐃᑲᔪᕈᑎᒃᓴᓂ ᓴᖅᑭᑕᐅᔪᓄᑦ ᐱᓕᕆᓂᐅᔪᒥ ᒪᕐᕈᖓᓂ ᐊᖏᒡᓕᒋᐊᖅᑕᐅᓂᖓᓂ ᐃᑲᔪᕐᓂᕐᒧᑦ ᓄᓇᓕᑦᑎᓐᓂ ᑭᐅᓂᖏᓐᓂ ᐅᑯᓄᖓ ᐊᑲᐅᙱᓕᐅᕈᑕᐅᔪᓄᑦ."

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᓴᖅᑭᑎᑦᑎᓂᐊᖅᐳᑦ ᓯᕗᓂᐊᓂ–ᑐᓵᓂᐅᔪᒥ ᑲᑎᒪᓂᐅᔪᒥ ᐃᓗᐊᓂ ᐅᓪᓗᓂ 30–ᓂᑦ ᒥᐊᓂᕆᓂᕐᒧᑦ ᒪᓕᒃᐸᓪᓕᐊᔪᓄᑦ ᖃᓄᐃᓕᐅᕐᓂᐅᓂᐊᖅᑐᓄᑦ ᐹᕙᓐᓛᓐᑯᑦ ᐱᓕᕆᓂᐅᔪᒥ ᒪᕐᕈᖓᓂ ᐊᖏᒡᓕᒋᐊᖅᑕᐅᓂᖓᓂ ᕿᒥᕐᕈᔭᐅᓂᖓᓄᑦ.