ᐸᕐᓇᒃᓯᒪᕗᑦ ᐱᒋᐊᕐᓂᕐᒧᑦ ᐳᑐᒍᕐᒥ-ᐳᑐᒍᕐᒧᑦ

54

ᑭᓯᐊᓂ ᑭᖑᓪᓕᖅᐹᑦ ᐃᓯᒐᑦ ᒧᒥᐊᓂᒃᐸᑕ, ᐃᓄᒃᑎᑐᑦ ᒧᒥᕐᓂᖅ ᓵᓚᖃᕋᓱᐊᕐᓂᐅᔪᒥ ᐃᖏᕐᕋᐃᓐᓇᕐᓂᐊᖅᐳᑦ. ᖃᓄᐃᓕᐅᕐᓂᐅᔪᖅ, ᐱᓕᕆᐊᖑᓂᐊᖅᑐᒥ ᑕᒪᑐᒪᓂ ᐊᕐᕌᒎᔪᒥ ᐅᖅᓱᖅᑑᒥ, ᐃᓕᓯᓂᐊᖅᐳᖅ ᐃᓄᒃᑎᑐᑦ ᒧᒥᖅᑎᒥ ᓵᓚᖃᕋᓱᐊᕐᓗᓂ ᐃᓄᒃᑎᑐᑦ ᒧᒥᖅᑎᒧᑦ ᐅᓪᓗᓂ-ᑎᓴᒪᓂ ᖃᐅᔨᓴᖅᑕᐅᔪᒥ ᓵᓚᖃᕋᓱᐊᕐᓂᐅᔪᒥ.

ᓯᕗᓪᓕᕐᒥ ᐃᓂᒃᓴᖃᓚᐅᖅᓯᒪᓪᓗᓂ ᓄᕕᐱᕆᒥ, ᐋᖅᑭᒃᓱᐃᔨᐅᔪᖅ ᐃᓕᓴᐱ ᐊᓇᕕᓗᒃ ᐅᖃᓚᐅᖅᐳᖅ ᑭᖑᕙᕆᐊᖅᑎᑕᐅᔪᒪᓕᓚᐅᖅᐳᖅ ᐊᐃᑉᕆᓕᙳᕋᓱᐊᕐᓂᖓᓄᑦ ᓯᓚ ᐱᐅᓂᖅᓴᐅᓕᕈᓂ ᑕᐃᒃᑯᓄᖓ ᐊᐅᓪᓛᖅᑐᓄᑦ ᐊᓯᖏᓐᓂ ᓄᓇᓕᐅᔪᓂ ᓯᑭᑑᒃᑯᑦ. ᐱᓇᓱᐊᕈᓯᐅᑉ ᓯᕗᓂᐊᓂ ᓵᓚᖃᕋᓱᐊᕐᓂᐅᓂᐊᖅᑐᒧᑦ, ᐃᓄᒃᑎᑐᑦ ᒧᒥᖅᑏᑦ ᓇᓗᓇᐃᖅᑕᐅᓚᐅᖅᐳᑦ ᑎᑭᓐᓂᐊᕐᓂᖏᓐᓂ ᐃᖃᓗᒃᑑᑦᑎᐊᒥ, ᑕᓗᕐᔪᐊᖅ, ᐊᒻᒪ ᑰᒑᕐᔪᖕᒥ. ᓇᐅᔮᑦ ᐊᒻᒪ ᑲᖏᖅᖠᓂᖅ ᒧᒥᖅᑎᓂᑦ ᓂᕆᐅᒋᔭᐅᓚᐅᕆᕗᑦ ᓇᓗᓇᐃᖅᓯᓂᐊᕐᓂᖏᓐᓂ.

“ᐱᓕᕆᓲᖑᙱᑕᕗᑦ ᐊᕐᕌᒍᑕᒫᒥ ᐅᖅᓱᖅᑑᒥ ᑭᓯᐊᓂ ᐱᕕᒃᓴᖃᓕᑐᐊᕌᖓᑦᑕ ᐅᓂ ᐊᐅᓚᑦᑎᓂᑦᑎᓐᓄᑦ, ᐊᐅᓚᑦᑎᓲᕆᕙᕗᑦ ᐅᕙᓂ,” ᐅᖃᓚᐅᖅᐳᖅ ᐊᓇᕕᓗᒃ. “ᖁᕕᐊᓇᖅᐳᖅ ᖁᙱᐊᕐᓂᕐᒧᑦ ᐊᒻᒪ ᐊᓕᐊᓇᐃᑉᐳᖅ ᐃᓚᐅᖃᑕᐅᓪᓗᓂ ᓵᓚᖃᕋᓱᐊᕐᓂᐅᔪᒥ.”

ᐅᖅᓱᖅᑑᖅ ᐃᓄᒃᑎᑐᑦ ᒧᒥᖅᑏᑦ ᒧᒥᖅᐳᑦ ᐃᓄᒋᐊᓄᑦ ᐱᒋᐊᕈᑕᐅᔪᒥ ᐅᒥᔭᖅᑐᑦ ᐅᒥᐊᕐᔪᐊᒥ ᐊᓯᐅᓂᐅᔪᒧᑦ ᖁᕕᐊᓱᒍᑕᐅᓂᐅᔪᒥ 2017-ᒥ.

ᒪᒃᑯᓛᖑᔪᖅ ᐃᓚᐅᖃᑕᐅᔪᒥ ᐊᑎᓕᐅᖃᑕᐅᓯᒪᔪᒥ ᑕᒪᑐᒪᓂ ᐊᕐᕌᒎᔪᒥ ᐅᑭᐅᖃᖅᐳᖅ ᑕᓪᓕᒪᓂ ᐊᒻᒪ, ᐊᓇᕕᓗᒃ ᐅᖃᓚᐅᖅᐳᖅ, ᐊᔪᙱᑦᑐᒻᒪᕆᐊᓗᖕᒥ.

“ᖃᐅᔨᓴᖅᑎᖃᕐᓂᐊᖅᐳᒍᑦ ᖃᐅᔨᓴᖅᓯᓂᐊᖅᑐᓂ ᐱᓇᓱᐊᕈᓯᐅᑉ ᓄᙳᐊᓂᓕᒫᒥ, ᓯᕗᓪᓕᕐᒥ ᐅᓪᓗᖓᓂ ᐊᒻᒪ ᐃᓱᐊᓄᑦ ᐅᓪᓗᖓᓄᑦ,” ᐅᖃᓚᐅᖅᐳᖅ. ᖃᐅᔨᓴᖅᑎᐅᔪᑦ ᑎᑭᓐᓂᐊᖅᐳᑦ ᐊᑐᓂ ᓄᓇᓕᐅᔪᓂ ᑭᒡᒐᖅᑐᖅᑕᐅᔪᓂ, ᐊᒻᒪᓗ ᖁᙱᐊᕐᓂᐊᖅᐳᑦ ᒧᒥᑦᑎᐊᒃᑲᐅᓂᖅᐹᖑᔪᓄᑦ ᒪᒃᑯᒃᑐᓂ ᐊᒻᒪ ᐃᓐᓇᕐᓂ ᐊᕕᒃᑐᖅᓯᒪᓂᐅᔪᓄᑦ, ᑐᙵᕕᖃᖅᑐᒥ ᒧᒥᐅᓯᖓᓐᓂ, ᐊᔪᙱᓐᓂᖓᓐᓂ, ᐊᒻᒪ ᐊᓐᓄᕌᖏᓐᓄᑦ.

“ᓵᓚᒃᓴᒐᒃᓴᑦ ᖃᐅᔨᓂᐊᖅᐸᕗᑦ ᐱᓇᓱᐊᕈᓯᐅᓛᖅᑐᒥ, ᐊᒻᒪ ᓯᕗᓪᓕᖃᕐᓂᐊᖅᐳᖅ, ᒪᕐᕈᖓᑦ ᐊᒻᒪ ᐱᖓᔪᖓᓐᓂ ᐃᓂᐅᔪᒦᑦᑐᓄᑦ,” ᐅᖃᓚᐅᖅᐳᖅ. ᑭᓯᐊᓂ $20,000 ᐅᖓᑖᓂ ᓵᓚᒃᓴᒐᒃᓴᐅᔪᓂ. ᐱᓇᓱᐊᕈᓯᐅᓂᐊᖅᑐᒥ, ᐊᓇᕕᓗᒃ ᐊᒻᒪ ᒧᒥᖅᑎᖏᑦ, ᐊᒪᐅᓕᒐᖅ ᒧᒥᖅᑏᑦ, ᐋᖅᑭᒃᓱᐃᓂᐊᖅᐳᑦ ᖃᓄᖅ ᓵᓚᖃᐅᓯᐊᒃᓴᖏᓐᓂ ᑐᓐᓂᖅᓴᖅᑕᐅᓂᐊᕐᓂᖏᓐᓂ ᐊᔾᔨᒌᙱᑦᑐᓄᑦ ᓵᓚᒃᓴᖅᑐᓄᑦ.

ᐃᓄᒃᑎᑐᑦ ᒧᒥᕐᓂᐅᑉ ᐊᓯᐊᒍᑦ, ᓵᓚᖃᕋᓱᐊᕐᓂᐅᔪᖅ ᐃᓚᖃᕐᓂᐊᖅᐳᖅ ᒪᕐᕉᖑᔪᓂ ᒧᒥᕐᓂᕐᒧᑦ ᓵᓚᖃᕋᓱᐊᕐᓂᐅᔪᒥ, ᐃᓄᐃᑦ ᐊᔾᔨᒌᙱᑦᑐᓂ ᓄᓇᓕᖕᓂ ᑕᑯᒃᓴᐅᑎᑦᑎᔪᓐᓇᕐᓂᐊᕐᒪᑕ ᐊᔾᔨᒌᙱᑦᑑᑕᐅᔪᓂ ᒪᕐᕉᓗᑎᒃ ᒧᒥᕈᓯᖏᓐᓂᑦ. ᐊᒻᒪ ᑎᑕᒃᑎᖃᕐᓗᑎᒃ ᐅᖅᓱᖅᑑᒥ ᑎᑕᒃᑎᓄᑦ – ᐊᒻᒪᓗᑦᑕᐅᖅ ᖃᔅᓯᐊᕐᔪᖕᓂ ᐊᒋᐊᒐᖅᑎᓂᑦ ᐊᒻᒪ ᐃᙱᐅᑎᒧᑦ ᐱᙳᐊᖅᑎᓂᑦ ᓄᓇᓕᐅᑉ ᓯᓚᑖᓂᙶᖅᑐᓂ.

10-ᒋᔭᐅᓪᓗᓂ ᐊᕐᕌᒍᖓᓂ ᐃᓄᒃᑎᑐᑦ ᒧᒥᕐᓂᕐᒧᑦ ᓵᓚᖃᕋᓱᐊᕐᓂᐅᔪᒥ, ᐊᒻᒪᓗ ᐱᓕᕆᐊᖑᒃᑲᓐᓂᕐᓂᐊᕐᓂᖓᓂ ᐅᖅᓱᖅᑑᒥ, ᐊᓇᕕᓗᒃ ᐅᖃᓚᐅᖅᐳᖅ ᐅᖃᓪᓚᖕᓂᖃᕐᓂᐊᖅᐳᖅ ᐅᐱᒋᔭᖃᕐᓂᕐᒧᑦ ᐱᒋᐊᖅᑎᑦᑎᔨᐅᓚᐅᖅᑐᓄᑦ.

ᐃᓄᒃᑎᑐᑦ ᒧᒥᕐᓂᖅ ᓵᓚᖃᕋᓱᐊᕐᓂᐅᔪᒥ ᐊᐅᓚᓂᐊᖅᐳᖅ ᐊᐃᑉᕆᓕ 11-ᒥ 14-ᒧᑦ ᖁᒃᓲᓐ ᐃᓕᕼᐊᒃᕕᒃ ᐱᒋᐊᓕᓵᖅᑐᓄᑦ ᐃᓕᓐᓂᐊᕐᕕᖓᑕ ᐱᙳᐊᕐᕕᖓᓂ.