ᐸᕐᓇᒃᐸᓪᓕᐊᓂᖅ ᓂᒡᓚᓱᒃᑐᒧᑦ ᓯᓚᒧᑦ

367

ᓯᓚ ᐊᓯᔾᔨᖅᐸᓪᓕᐊᑎᓪᓗᒍ ᓂᒡᓚᓱᓗᐊᙱᑦᑐᒥ ᓂᒡᓚᓱᒃᑐᒧᑦ, ᐃᓱᒪᔭᕆᐊᖃᖅᐳᒍᑦ ᐆᒧᖓ ᐸᕐᓇᒃᓯᒪᔭᕆᐊᖃᕐᓂᕐᒧᑦ.
ᐊᓐᓄᕌᒃᓴᖃᑦᑎᐊᕐᓂᕐᒧᑦ ᐊᑕᐅᓯᐅᓪᓗᓂ ᐃᓚᒋᔭᐅᕗᖅ ᐸᕐᓇᒃᓯᒪᓂᕐᒧᑦ ᓂᒡᓚᓱᒃᑐᒧᑦ. ᕿᑐᙵᕗᑦ ᐅᓪᓛᕈᒻᒥᑕᖅᓯᒪᑦᑎᐊᕐᓂᖃᕆᐊᖃᖅᐳᑦ ᐃᓕᓐᓂᐊᕆᐊᓚᐅᙱᓐᓂᖓᓐᓂᑦᑕᐅᖅ. ᐊᓂᒍᑎᒃ ᐊᖏᕐᕋᒥᓂᑦ ᐅᓪᓛᒃᑯᑦ ᐊᒻᒪ ᑳᒃᑯᑎᒃ, ᕿᓚᒥᒻᒪᕆᑯᓗᒃ ᐃᒃᐱᒍᓱᖕᓂᐊᖅᐳᑦ ᓂᒡᓚᓱᖕᓂᐅᔪᒥ.
ᐊᒥᓱᓂ ᖃᓄᐃᓐᓂᐅᔪᓂ ᑕᒪᒃᑭᑦ ᐊᖓᔪᖅᑳᖑᔪᑦ ᐃᖅᑲᓇᐃᔭᕆᐊᖃᖅᐳᑦ ᐊᑭᓖᔪᓐᓇᕐᓂᕐᒧᑦ ᑭᓱᓕᒫᓂᑦ ᐊᒻᒪ ᑕᒪᓐᓇ ᓇᓗᓇᒐᓚᒍᓐᓇᖅᐳᖅ.
ᐅᓪᓗᕈᒻᒥᑕᖃᕐᕕᖕᒥ ᐴᖑᔪᒥ ᐸᕐᓇᒃᓯᒪᔭᕆᐊᖃᖅᐳᑦ ᓱᕈᓯᖅ ᐸᓯᓲᖑᒍᓂ ᐃᓕᓐᓂᐊᕐᕕᖕᒧᑦ. ᐅᓪᓗᕈᒻᒥᑕᒃᓴᓕᐅᕆᓲᖑᒍᑦᑕ ᐸᕐᓇᐃᓂᖃᕆᐊᖃᕆᕗᒍᑦ. ᑮᓇᐅᔭᓂᒃ ᓴᓂᕐᕙᐃᓯᒪᔭᕆᐊᖃᖅᐳᒍᑦ ᑕᖁᐊᒃᓴᖏᓐᓂ ᓇᒡᒐᔾᔭᐅᒥ ᐅᓪᓗᑐᐃᓐᓇᕐᒧᑦ.
ᐸᕐᓇᒃᐸᓪᓕᐊᑎᓪᓗᑕ ᐅᔾᔨᕈᓱᖕᓂᐅᔪᒥ ᐅᐃᕆᓯᒪᓂᐅᔪᓄᑦ ᐱᓇᓱᐊᕈᓯᐅᔪᒥ, ᐃᓱᒪᒋᔭᖃᑦᑎᐊᕆᐊᖃᖅᐳᒍᑦ ᓇᖕᒥᓂᑦᑎᓐᓂ ᐃᓅᓯᕆᔭᑦᑎᓐᓂ. ᐃᓄᑑᙱᑦᑐᖓ ᐃᒡᓗᒥ. ᐊᓯᖏᓐᓂ ᐃᓄᒃᑕᖃᖅᐳᖅ ᐃᓱᒪᒋᔭᕆᐊᖃᖅᑕᑦᑎᓐᓂ ᐊᒻᒪ ᓱᕈᓰᑦ ᑐᓐᓂᖅᑯᑎᒻᒪᕆᐅᕗᑦ ᐱᕈᖅᓴᔭᕆᐊᖃᖅᑕᑦᑎᓐᓂ ᐊᒻᒪ ᐸᖅᑭᓗᒋᑦ.
ᐃᒻᒥᒍᑦ ᓴᓂᕐᕙᐃᔭᕆᐊᖃᖅᐳᒍᑦ ᐊᒻᒪ ᑕᑯᓗᒋᑦ ᐅᑯᐊ ‘ᐃᓄᕋᓛᑯᓗᐃᑦ’ ᓇᒡᓕᒋᓗᒋᑦ ᐊᒻᒪ ᓇᒡᓕᖅᑐᕐᓗᒋᑦ. ᑕᑯᒑᖓᒥᒃ ᐊᒻᒪ ᐃᒃᐱᒍᓱᒡᓗᑎᒃ ᐆᒥᖓ ᐃᒃᐱᒍᓱᑦᑎᐊᕐᓂᐅᔪᒥ, ᐱᔪᓐᓇᑦᑎᐊᕐᓂᐊᖅᐳᑦ ᐃᓕᓐᓂᐊᕐᕕᖕᒥ ᐊᒻᒪ ᖃᖓᒃᑲᓐᓂᖅ ᐃᓱᓕᑦᑎᓛᖅᐳᑦ ᐊᒻᒪ ᐸᖅᑭᖔᓛᖅᐳᑦ ᐊᓈᓇᒥᓂᑦ ᐊᑖᑕᒥᓂᓪᓗ ᐅᕝᕙᓘᓐᓃᑦ ᐊᓈᓇᑦᑎᐊᒥᓂᑦ ᐊᑖᑕᑦᑎᐊᒥᓂᓪᓘᓐᓃᑦ.
ᐃᓄᖕᓂ ᖃᓄᐃᓕᐅᖅᐸᖕᓂᕐᓂ ᐃᓕᖕᓄᑦ ᐅᑎᕐᓂᐊᖅᐳᖅ ᑕᐃᒪᐃᓕᐅᕐᓂᕆᓚᐅᖅᑕᕐᓄᑦ.
ᐅᑯᐊ ᐃᓄᕋᓛᑯᓗᐃᑦ ᐃᒃᐱᒍᓱᖕᓂᖃᓲᖑᒋᕗᑦ ᐊᒻᒪ ᐱᐅᔪᒥ ᐃᓕᖅᑯᓯᖃᕐᓂᖃᖅᑎᓪᓗᒍ, ᐱᐅᔪᓂ ᖃᓄᐃᓐᓂᖃᓲᖑᕗᖅ. ᓴᐃᓕᓂᖃᖅᐳᖅ ᐊᒻᒪ ᖁᕕᐊᓱᖕᓂᐅᔪᒥ ᐊᒻᒪ ᐊᖏᕐᕋᖅ ᐃᓗᐊᖅᐳᖅ ᐊᒻᒪ ᑐᙵᓇᖅᐳᖅ.
ᒥᑭᑦᑐᑯᑎᕗᑦ ᐱᒋᐊᖅᑎᑦᑎᐊᓚᐅᕐᓚᕗᑦ ᐱᕈᖅᓴᐃᓂᕐᒥ ᓴᙱᔪᒥ ᐱᐅᔪᒥ ᐱᓕᕆᖃᑎᖃᕐᓂᐅᔪᒥ ᐊᖏᕐᕋᒥ, ᐃᓕᓐᓂᐊᕐᕕᖕᒥ ᐊᒻᒪ ᓄᓇᓕᖕᓂ ᑕᒪᐃᑎᒍᑦ.