ᐱᖓᓱᓂᒃ ᐅᑭᐅᓂᒃ ᐆᒃᑐᖅᑕᐅᓂᐊᖅᑐᖅ ᐱᐊᓂᒃ ᓂᐅᕕᕐᕕᒃ

389

ᑕᒫᓂ ᐊᖏᕐᕋᖃᖏᒃᑲᓗᐊᕈᕕᑦ ᐃᖃᓗᖕᓂ, ᑕᑯᓯᒪᔪᒃᓴᐅᓕᖅᐳᑎᑦ ᑕᑭᔪᓂᒃ ᐅᑕᖅᑭᔪᓂᒃ ᓄᓇᕗᒥ ᓯᕗᓪᓕᖅᐸᒥᒃ ᐱᐊᓂᒃ ᕗᐊᓐᓂᒃᓗ ᓂᐅᕕᕐᕕᐊᑕ ᓯᓚᑖᓂ ᓄᓇᓕᐸᐅᔭᑦᑎᓐᓂ ᑕᑯᒃᓴᐅᑎᑕᐅᔪᓂᒃ ᐃᓅᖃᑎᒌᓄᑦ ᑕᑯᒃᓴᐅᑎᑦᑎᕕᒃᑯᑦ ᑎᓕᕖᓴᒃᑯᓪᓗ.

ᐃᓱᒪᓇᒻᒪᕆᒃᑐᖅ ᑕᑯᓪᓗᒍ ᐱᔪᒪᔭᐅᓂᖓ ᓇᓗᓇᖏᓕᖅᐳᖅ, ᐱᓗᐊᖑᐊᖅᑐᒥᒃ ᓯᕗᓂᖓᓂ ᐊᒃᓱᐊᓗᒃ ᓯᕘᕋᒋᔭᐅᓯᒪᑎᓪᓗᒍ ᑕᒫᓂ ᐃᓚᖏᓐᓄᑦ ᓄᓇᓕᐸᐅᔭᑦᑎᓐᓂ ᓄᖅᑲᖓᑎᑕᐅᒻᒪᕆᓚᐅᖅᑐᖅ ᐅᖃᓪᓚᑲᑕᒍᑕᐅᑎᓪᓗᒍ ᓄᖅᑲᖅᑎᑦᑎᖁᔨᔪᓄᑦ ᐃᒥᐊᓗᖕᒥᒃ ᐱᔭᕆᑐᖏᓕᖅᐹᓪᓕᖅᑎᑦᑎᓇᓱᐊᖅᑐᓂᒃ ᓄᐃᑦᑎᓂᐊᕐᓂᕋᖅᑕᐅᓪᓗᓂ ᐊᑲᐅᖏᓕᐅᕈᑎᒃᓴᓂᒃ.

ᑭᐅᓯᓇᓱᐊᖅᖢᑎᒃ, ᓄᓇᕗᑦ ᒐᕙᒪᖓᓂ ᐅᖃᓚᐅᖅᑐᑦ ᓴᖕᖏᓗᐊᖏᓐᓂᖅᓴᒥᒃ ᐃᒥᐊᓗᖃᖅᑎᑦᑎᒃᐸᑕᖃᐃᒎᖅ – ᐋᖓᔮᕐᓇᖅᑐᖃᖏᓐᓂᖅᓴᒥᒃ ᐱᐊᓂᒃ, ᕗᐊᐃᓐᓂᒃᓗ ᓴᖐᑦᑐᓂᒃ – ᓱᓕᕚ ᐋᕿᒍᑕᐅᓂᐊᖅᐹ?

ᑕᑯᓇᖅᑐᖅ ᑕᐃᒪᓐᓇ ᐱᒋᐊᖅᑎᑦᑎᓯᒪᖕᒪᑕ ᑕᕆᐅᕌᓘᑉ ᐊᑭᐊᓂ ᑏᕕᔅ ᓯᑐᕇᑦ, ᑲᓛᖡᑦ ᓄᓇᖓᓂ ᐱᒋᐊᖓᖅᑎᑦᑎᓯᒪᖕᒥᖕᒪᑕ ᐅᓂᒃᑳᖃᑦᑕᖅᓯᒪᔪᑦ ᐱᔭᕆᑐᔪᓂᒃ ᐱᕋᔭᖃᑦᑕᖅᑐᑦ ᐅᓄᖏᓐᓂᖅᓴᐅᓕᖅᑐᑦ.

ᑕᐃᒪᓐᓇ ᐋᕿᒃᓱᐃᓯᒪᖕᒪᑕ ᐱᒋᐊᖓᕈᓯᖃᖅᖢᑎᒃ ᐊᒃᓲᓗᐊᖑᔪᓐᓃᖁᓪᓗᒋᑦ ᐃᔨᕋᖅᑐᖅᖢᑎᒃ ᓂᐅᕕᐊᒃᓴᖃᖃᑦᑕᖅᑐᑦ ᓄᓇᓕᐸᐅᔭᖓᓂ ᐊᒃᓱᑲᓪᓚᒃ

ᑕᕝᕙᓂᓴᐅᑎᒋ ᑮᓇᐅᔭᒃᓴᕈᑕᐅᖃᑦᑕᕐᒪᑕ ᐊᑐᓂ ᐳᓪᓚᐅᔭᓂᒃ ᕚᑦᑲᓂ ᓂᐅᕕᐊᒃᓴᖃᖃᑦᑕᖅᑐᓄᑦ,$300-ᕌᖅᑎᓪᓗᒋᑦ. ᑐᐊᕕᖅᖢᑎᒃ ᐃᒥᖅᑕᐅᖃᑦᑕᕐᒪᑕ ᐃᖅᑲᖅᑐᐃᕕᒃᑎᒍᑦ ᓇᓗᓇᕈᓐᓃᖅᓯᒪᖕᒪᑕ ᐋᖓᔮᖅᑐᓄᑦ ᐱᔭᕋᒍᑕᐅᖃᑦᑕᖅᑐᑦ.

ᐃᑲᔪᖅᓴᖅᓯᒪᒐᑦᑎᒍ ᒐᕙᒪᑎᒃᑯᑦ ᐊᐃᕙᔪᑎᒋᔭᖓ ᑕᒪᓐᓇ ᐱᐅᓂᖅᓴᐅᓂᕋᖅᑕᐅᓪᓗᓂ ᐅᖃᐅᓯᐅᖃᑦᑕᕐᒪᑦ. ᒥᑭᓐᓂᖅᐹᒥᒃ ᐃᓛᒃ ᑲᒪᒋᔭᐅᓇᓱᐊᕆᐊᖃᓕᕐᒪᑦ.

ᒫᓐᓇ ᑕᕝᕙ ᓂᐅᕕᕐᕕᐅᑉ ᐅᒃᑯᐊᖏᑦ ᒪᑐᐃᖅᑕᐅᓯᒪᓕᖅᑎᓪᓗᒋᑦ. ᓂᐅᕕᕐᕕᐅᒐᔪᖕᓂᖅᐹᖑᓕᕇᒃᑐᖅ ᑕᒪᐃᓐᓂᑦ ᓄᓇᓕᑦᑎᓐᓂ ᓂᐅᕕᕐᕕᖕᓂᑦ.

ᐅᓂᒃᑳᖃᑦᑕᕐᒪᑕᓘᓃᑦ ᐅᑭᐅᓕᒫᒧᒎᖅ ᓂᐅᕕᐊᒃᓴᖏᑕ 10-ᐳᓴᖏᓐᓂᒃ ᓂᐅᕕᖅᑕᐅᑎᑦᑎᕙᒌᖅᓯᒪᓕᖅᑐᑦ ᐅᒥᐊᕐᔪᐊᒃᑯᑦ ᑎᑭᓴᖅᑕᐅᓯᒪᔪᓂᑦ ᐅᓪᓗᓂ ᓯᑕᒪᓂ. ᑕᐃᒪᓐᓇ ᓱᒃᑲᓕᑎᒋᓂᐊᖅᐸᑕ, ᐅᒥᐊᕐᔪᐊᓂᑦ ᐱᔪᑦ ᐱᐊᓂᒃᐸᑕ ᖃᖓᑕᓲᒃᑯᑦ ᑎᑭᓴᐃᒋᐊᖃᕐᓂᐊᓕᖅᑐᑦ ᑕᖅᑭᑕᒫᑦ.

ᐃᓱᒪᓇᖅᑐᖅ ᑕᑭᓗᐊᖅᑐᒥᒃ ᐅᑕᖅᑭᔪᓂᒃ ᐱᑕᖃᕈᓐᓃᕐᓂᐊᕋᓱᒋᓐᓈᓪᓗᑎᒃ ᓄᑖᖑᓂᖓᓂᒃ ᐃᕿᐊᖑᕐᔫᒥᒃᐸᑕ.

ᐃᒻᒪᖄᓕ ᒐᕙᒪᑎᒃᑯᑦ ᓇᓚᐅᑦᑖᕈᑎᖏᑦ ᐃᓄᖅᓴᓗᐊᕐᓂᖅᐸᑕ ᐅᑭᐅᖑᓂᐊᖅᑐᒧᑦ ᓄᓇᓕᖕᒥᐅᑦ ᐱᖃᑦᑕᖅᑕᖏᑕ ᐅᖓᑖᓅᕐᓂᐊᖅᑐᒃᓴᐅᓕᕐᒪᑕ. ᐊᑯᓂ ᐅᑕᖅᑭᔪᖃᐅᕐᓂᖓᓄᑦ ᓇᓗᓇᖏᑦᑐᖅ ᐊᒥᓱᓄᑦ ᐱᒃᑯᒥᒋᔭᐅᖕᒪᑦ ᑭᓯᐊᓂᓕ ᑖᒃᑯᐊ ᓂᐅᕕᕐᕕᖃᖅᑐᑦ ᐋᕿᒃᓯᓇᓱᐊᕆᐊᖃᑦᑐᑦ ᓂᐅᕕᕐᕕᐊᑕ ᓯᓚᑖᓂ ᐅᑕᖅᑭᔪᓄᑦ ᐊᑦᑕᕐᓇᖅᑐᖃᖅᑕᐃᓕᖁᓪᓗᒍ ᐅᕝᕙᓘᓐᓃᑦ ᐋᖓᔮᖅᑐᓄᑦ ᐱᕋᔭᒍᑕᐅᖃᑦᑕᖅᑐᓂᒃ ᐱᓗᐊᖅᑕᐃᓕᒪᑎᑦᑎᓗᑎᒃ ᑕᑯᓪᓗᒋᑦ ᐃᓱᒪᓇᓕᕐᒪᑕ ᐊᒥᓱᐊᓗᐃᑦ ᐋᖓᔮᕋᓱᐊᖅᑐᒃᓴᐅᖕᒪᑕ. ᑕᐃᒪᓐᓇ ᐃᓱᒪᒋᔭᐅᔪᒥᓇᖏᒻᒪᑦ.

ᒐᕙᒪᑎᒃᑯᑦ ᑕᐃᒪᖓᓂᑦ ᓂᐅᕕᖅᑎᐅᓪᓗᑎᒃ ᐊᒃᓱᕈᓗᐊᖃᑦᑕᖅᓯᒪᖏᒻᒪᑕ ᓂᐅᕕᐊᒃᓴᒥᓂᒃ ᓂᐅᕕᖅᑕᐅᑎᑦᑎᓇᓱᐊᖅᖢᑎᒃ. ᐊᑯᓂᑦᑕᐅᖅ ᐅᑕᖅᑭᖃᑦᑕᕐᒥᖕᒪᑕ ᑎᑎᕋᒃᑯᕕᖕᒥ ᑐᓴᐅᒪᓇᖅᑐᑦ ᐊᕐᕌᒍᑕᒫᑦ ᐅᓐᓂᕐᓗᒃᓴᐅᑕᐅᖃᑦᑕᕐᒪᑕ.