ᐱᖁᔭᒃᓴᖅ 37 ᐊᑐᓕᖅᑎᑕᐅᓂᐊᖅᐹ?

600

ᐊᒥᓱᓄᑦ ᑖᓐᓇ ᐱᖁᔭᒃᓴᖅ 37 ᐱᒃᑯᒥᒋᔭᐅᖕᒪᑦ – ᒪᓕᒐᖅ ᐋᕿᒋᐊᖅᓯᔪᑕᐅᔪᖅ ᐃᓕᓴᖅᑐᓕᕆᔨᒃᑯᑦ ᒪᓕᒐᖓᓄᑦ ᐊᒻᒪᓗ ᐃᓄᐃᑦ ᐅᖃᐅᓯᖏᓐᓂᒃ ᓴᐳᔾᔨᓯᒪᔾᔪᑏᑦ ᒪᓕᒐᓄᑦ – ᐱᐊᓂᒃᑕᐅᓚᐅᖏᑎᓪᓗᒍ ᒪᓕᒐᓕᐅᕐᕕᒃ ᐃᓱᓕᑉᐸᑦ ᑐᖁᓂᐊᖅᑐᖅ, ᐱᒋᐊᕐᓂᐊᓕᕐᒥᖕᒪᑕ ᑲᑎᒪᓂᖏᑦ ᓯᑎᐱᕆ 12-ᒥ. ᑭᓯᐊᓂᓕ ᓯᕗᓕᖅᑎ ᓱᓕ ᐊᔪᐃᓐᓇᐅᑎᒋᒃᑲᓐᓂᕈᒪᔭᖓ.

ᓄᓇᕗᒥᐅᑦ ᓯᑕᒻᒥᖓᑦ ᒪᓕᒐᓕᐅᖅᑏᑦ, ᐅᕙᓂ ᑕᑯᒃᓴᐅᔪᑦ ᔫᓐᒥ ᑲᑎᒪᑎᓪᓗᒋᑦ, ᑭᖑᓪᓕᐹᒥ ᑲᑎᒪᓂᕆᓂᐊᖅᑕᒥᓄᑦ ᐸᕐᓇᓕᖅᑐᑦ ᓯᑎᐱᕆᒥ.

ᐅᓐᓃᑦ ᐱᐊᓂᒃᑕᐅᖏᒃᑲᓗᐊᖅᑎᓪᓗᒍ, ᑖᓐᓇ ᐱᖁᔭᒃᓴᖅ ᒪᓕᒐᓕᕆᓂᕐᒧᑦ ᑲᑎᒪᔨᕋᓛᓄᑦ ᐊᒻᒪᓗ ᐃᓄᐃᑦ ᑎᒥᖁᑎᖏᓐᓄᑦ ᐱᐊᓂᒃᑕᐅᖁᔭᐅᓚᐅᕐᒪᑦ (ᑲᑎᒪᔾᔪᑎᒃᓴᖏᓐᓂᑦ ᐱᐊᓂᒃᑕᐅᓯᒪᖏᑦᑐᓃᒻᒪᑦ),” ᐅᖃᓚᐅᖅᑐᖅ ᓯᕗᓕᖅᑎ ᐲᑕ ᑕᑉᑑᓇ, “ᐃᓅᓪᓗᖓ ᐊᒻᒪᓗ ᒥᑭᔪᒥᒃ ᒐᕙᒪᑎᖃᖅᖢᑕ, ᐅᐱᒋᒐᑦᑎᒍ ᓴᕆᒪᒋᓪᓗᑎᒍᓗ ᑲᔪᓯᑎᑕᐅᔪᓐᓇᖁᔭᕗᑦ ᑖᒃᑯᓇᓂ ᒪᓕᒐᓕᐅᖅᑎᐅᓂᑦᑎᓐᓂ ᐱᒋᐊᖅᑎᑕᐅᓚᐅᕐᒪᑦ, ᐅᐱᓐᓇᕐᒪᑦ ᑲᔪᓯᑎᑕᐅᑦᑎᐊᖁᔭᕋ ᐊᒻᒪᓗ ᒐᕙᒪᑎᒋᔭᐅᓂᑦᑎᓐᓂ ᓱᓕᒃᑲᓐᓂᖅ ᐱᔭᕆᑐᒐᓗᐊᖅᑎᓪᓗᒋᑦ ᐋᕿᒋᐊᖅᓯᔪᓐᓇᕋᑦᑕ.

ᐱᖁᔭᒃᓴᖅ 37 ᐊᒃᓱᐊᓗᒃ ᐅᖃᓪᓚᑲᑕᒍᑕᐅᓚᐅᕐᒪᑦ ᑭᖑᓪᓕᕐᒥ ᒪᓕᒐᓕᐅᖅᑎᒃᑯᑦ ᑲᑎᒪᑎᓪᓗᒋᑦ, ᐱᐊᓂᒃᖢᑎᒃ ᐅᓂᒃᑳᕈᑕᐅᓪᓗᓂ ᔫᓐ 7-ᒥ ᐃᓕᓴᖅᑎᓕᕆᔨᒃᑯᑦ ᒥᓂᔅᑕᖓᓄᑦ ᐹᓪ ᖁᐊᓴᕐᒧᑦ. ᑕᐃᓱᒪᓂ ᒥᓂᒃᑕᐅᑉ ᐅᖃᐅᑎᓚᐅᖅᓯᒪᖕᒪᒍ ᓄᓇᕗᑦ ᑲᒥᓯᓇᖓ ᔫᓐ 1, 2015-ᒥ ᒪᑐᐃᖅᓯᔪᑎᖓᓂ ᐅᓂᒃᑳᑦᑎᑕᐅᑎᓪᓗᒍ, ᐅᖃᐅᓯᕆᓪᓗᓂᐅᒃ ᐃᓕᓴᖅᑐᓕᕆᔪᑏᑦ ᒪᓕᒐᖓ, ᐅᖃᐅᓯᓕᕆᔪᑏᓪᓗ ᒪᓕᒐᖓ ᐅᖃᓕᒫᕈᓐᓇᐅᑏᓪᓗ ᓯᕗᓪᓕᐅᑎᑕᐅᓂᐊᖅᑐᖅ ᐱᔨᑦᓯᕋᕈᑏᑦ ᒪᓕᒐᖏᑦ ᑲᒪᒋᔭᐅᓕᖅᐸᑕ, ᓯᑕᒻᒥᖓᓂ ᒪᓕᒐᓕᐅᕐᕕᖕᒥ.

ᖃᓄᑐᐃᓐᓇᖅ ᐊᖓᒃᑯᑎᑐᑦ ᐋᕿᒃᓱᖅᓯᒪᑦᑎᐊᕐᓗᒍ ᐱᐊᓂᑲᐅᒃᑐᕈᓐᓇᒪᑦ, ” ᑕᑉᑑᓇ ᐅᓂᒃᑳᓚᐅᖅᑐᖅ. “ᓄᓇᕗᒥ 25-ᓂᒃ ᓄᓇᓕᖃᕋᑦᑕ ᐃᓚᖏᓪᓗ ᓄᓇᓖᑦ ᑖᓱᒥᖓ ᐱᖁᔭᒃᓴᒥᒃ ᓈᒻᒪᒃᓴᖏᒻᒪᑕ ᓱᓕ ᒪᓕᒐᓕᐅᕐᕕᒃᒥ ᑲᒪᒋᔭᐅᓕᖅᑎᓪᓗᒍ. ᑭᓯᐊᓂᓕ ᑕᒪᑐᒪᓂ ᐅᓪᓗᖅ ᐃᓱᓕᑎᓪᓗᒍ, ᑭᒡᒐᖅᑐᖅᑎᐅᓂᑦᑎᓐᓂ ᐃᓄᖁᑎᑦᑎᓐᓄᑦ ᐅᕙᑦᑎᓐᓂᒃ ᓂᕈᐊᖅᓯᒪᔪᓄᑦ ᓄᓇᕗᒥ ᒪᓕᒐᓕᐅᖅᑎᒋᔭᐅᒐᑦᑕ ᐊᒥᓱᓄᑦ ᑕᐃᒪᓐᓇ ᑕᕝᕙ ᐃᓚᖏᑦ ᓈᒻᒪᒃᓴᖏᒃᑲᓗᐊᖅᑎᓪᓗᒋᑦ ᓂᕈᐊᕈᑎᒋᓗᒍ ᐋᕿᒐᓱᐊᕈᓐᓇᕋᑦᑎᒍ ᐃᓕᓴᖅᑎᓕᕆᔨᒃᑯᑦ ᒪᓕᒐᖓ ᐅᓄᕐᓂᖅᓴᓄᑦ ᐱᒃᑯᒥᒋᔭᐅᔪᒥᒃ ᐋᕿᒃᓱᖅᓯᒪᓗᓂ ᑕᐃᒪᓐᓇ ᐃᓕᓴᐃᔪᑕᐅᔪᓐᓇᕐᓗᓂ ᓄᑕᖅᑲᓂᒃ.”

ᖁᐊᓴᐅᑉ ᐅᓂᒃᑲᐅᓯᕆᓚᐅᕐᒪᒋᑦ ᐃᓕᓴᖅᑎᓕᕆᔨᒃᑯᑦ ᐱᓕᕆᕝᕕᐊᓂ ᓴᓇᔭᐅᓯᒪᔪᖅ ᑎᑎᕋᕆᐅᖅᓴᐅᑏᑦ, ᐅᖃᓕᒫᕆᐅᖅᓴᐅᑏᓪᓗ ᐊᒻᒪᓗ ᐃᓕᓴᓕᕋᑖᖅᑐᓄᑦ ᐃᓕᓴᐃᔪᑏᑦ ᒍᕆᑦ 6-ᒧᑦ ᑎᑭᓪᖢᒍ ᐃᓄᒃᑎᑐᑦ ᐃᓕᓴᖅᑕᐅᔪᓐᓇᖅᓯᓂᕋᖅᖢᓂᒋᑦ. ᐅᓂᒃᑳᓚᐅᕐᒪᑦ ᖃᓄᖅ ᐱᖁᔭᒃᓴᖅ 37 ᐱᕙᓪᓕᐊᑎᑕᐅᔪᓐᓇᕐᒪᖔᑦ, ᑕᐃᓱᒪᓂ ᐅᑎᕐᕕᐅᓪᓗᓂ ᐋᕿᒋᐊᖅᑕᐅᓂᐊᓚᐅᕐᒪᑦ, ᐅᓂᒃᑲᐅᓯᕆᓚᐅᖅᑕᖓ ᖃᓄᑎᒋ ᐃᓄᖕᓄᑦ ᐊᑐᕐᓂᖃᕐᓂᐊᕐᓂᖓᓂᒃ, ᑕᒪᐃᑕᓕᒫᖅ ᓂᑭᑦᑖᕐᓗᒋᑦ ᐃᓄᒃᑎᑐᑦ ᐃᓕᓴᐃᔪᑏᑦ ᐃᖏᕐᕋᓂᕆᓂᐊᖅᑕᖏᓐᓂᒃ ᐅᓂᒃᑲᐅᓯᕆᓪᓗᓂᒋᑦ ᐃᓕᓴᕐᕕᐅᑉ ᐅᓪᓗᖅᓯᐅᑎᖓ ᒪᓕᒃᓗᒍ ᑎᑎᕋᖅᓯᒪᔪᑦ ᑲᒪᒋᔭᐅᓂᐊᕐᓂᕋᖅᑕᐅᓯᒪᓪᓗᑎᒃ ᐅᑭᐅᒥ ᐱᓇᓱᐊᖅᑎᓄᑦ ᐊᑐᐊᒐᖅ ᐃᓕᓴᐃᔪᑎᓄᑦ.

ᒥᑭᓐᓂᖅᐹᒥᒃ ᑕᒪᓐᓇ ᑲᒪᒋᔭᐅᔪᓐᓇᖅᓯᓂᖓᓂᒃ ᑐᓴᖅᑎᑦᑎᔪᓐᓇᖅᓯᔪᒃᓴᐅᒐᑦᑕ ᐃᓄᖁᑎᑦᑎᓐᓂᒃ ᒪᓕᒐᓕᐅᕐᕕᖕᒥ ᐊᒃᓱᕉᑎᒋᓚᐅᕋᑦᑎᒍ ᐃᓕᓴᖅᑎᓕᕆᔪᑎᓄᑦ ᒪᓕᒐᖅ ᑕᒫᓂᕐᒥᐅᓄᑦ ᐃᓗᐊᕐᓂᖅᓴᐅᓕᖁᓪᓗᒍ ᑖᓐᓇ ᒪᓕᒐᖅ,” ᖁᐊᓴᖅ ᐅᖃᕆᓪᓗᓂ.

ᑕᐃᒪᐃᓕᑎᓪᓗᒍ ᓲᕐᓗ ᑭᖑᓪᓕᐹᒥᒃ ᓄᓇᕗᒥᐅᓄᑦ ᑐᒃᓯᕋᐅᑎᒋᓚᐅᕐᒪᒍ ᐃᓄᖕᓄᑦ,” ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᓂᒃᑳᓚᐅᖅᑐᖅ ᓄᓇᕗᒥ ᐱᕙᓪᓕᐊᔪᓕᕆᔨᒃᑯᓐᓂ ᐅᓂᒃᑳᓕᐊᖅᑎᒍᑦ ᑕᐃᓱᒪᓂ. “ᓂᑭᑦᑖᖅᖢᓂᒋᑦ ᑕᒪᐃᑕ ᐃᓗᓕᓕᒫᖏᑦ ᐅᓂᒃᑲᐅᓯᕆᓚᐅᕐᒪᒋᑦ – ᐅᖃᕆᓪᓗᓂ ᐊᒥᓱᐊᓗᖕᓂᒃ ᐃᓄᒃᑎᑐᑦ ᐃᓕᓴᐃᔪᑎᓂᒃ ᐱᑕᖃᕐᓂᐊᓕᖅᑐᖅ, ᐊᒃᓱᑲᓪᓚᒃᓗ ᐅᓂᒃᑲᐅᓯᖃᕆᓪᓗᓂ ᖃᓄᖅ ᑕᓯᐅᖅᑕᐅᓗᑎᒃ ᐃᓕᓴᖅᑕᐅᔪᓐᓇᕐᒪᖔᑕ ᐅᖃᓕᒫᕆᐅᖅᓴᐅᑎᓂᒃ. ᓄᓇᕗᑦ ᑐᓐᖓᕕᒃᑯᓐᓄᑦ ᖁᕕᐊᒋᔭᐅᒐᓗᐊᖅᖢᓂ ᐊᒃᓱᕉᑎᒋᓚᐅᕐᓂᖓᓄᑦ ᑭᓯᐊᓂᓕ, ᑖᓐᓇ ᑕᕝᕙ ᑭᓯᐊᓂᓖᕈᑕᐅᓚᐅᖅᑐᖅ, ᑕᒪᐃᓐᓂ ᐃᓕᓴᕈᑎᓂ ᐱᕙᓪᓕᐊᑎᑕᐅᒋᐊᖃᕐᒪᑦ ᐃᓚᐃᓐᓇᖏᓐᓂᐅᖏᑦᑐᖅ ᐃᓕᓴᕆᐊᓕᕐᕕᖏᓐᓂᑦ ᒍᕇᑦ 12-ᒧᑦ.”

ᑭᓯᐊᓂᓕ ᑰᑦᑎᖅ ᐅᖃᓚᐅᖅᑐᖅ ᐊᔾᔨᒌᖏᒻᒪᑎᒃ ᑖᒃᑯᐊ ᐃᓕᓴᐃᔪᑏᑦ ᐅᖃᐅᓯᕐᓂᒃ ᐃᓄᒃᑎᑐᑦ, ᐊᑕᐅᓯᕐᒥᒃ ᐃᓕᓴᐃᔪᑎᖃᕐᓗᑎᒃ, ᐊᒻᒪᓗ ᐃᓄᒃᑎᑑᓕᖅᑎᑕᐅᓗᑎᒃ ᐊᓯᖏᓐᓂᒃ ᐃᓅᔪᑎᓂᒃ ᐃᓕᓴᐃᔪᑎᖏᑦ.

ᐊᐱᕆᔭᐅᒐᒥ ᒐᕙᒪᑎᒃᑯᓐᓂ ᐃᖅᑲᓇᐃᔭᖅᑎᒧᑦ, ᒪᓕᒐᓕᐅᖅᑏᑦ ᒐᕙᒪᑎᒃᑯᓐᓂᓗ ᐊᐅᓚᑦᑎᔩᑦ ᒥᓂᔅᑕᒃᑯᖖᕕᐊᓂ ᐅᖃᓪᓚᑲᑕᒍᑕᐅᑎᓪᓗᒍ ᑖᓐᓇ ᐱᖁᔭᒃᓴᖅ 37 ᐊᒻᒪᓗ ᕿᒥᕈᔭᐅᑎᓪᓗᒋᑦ ᐃᓗᓕᖏᑦ ᖃᓄᖅ ᑲᒪᒋᔭᐅᓂᕐᒪᖔᑕ ᐊᑯᓐᓂᖓᓂ ᒪᓕᒐᓕᐅᖅᑎᒃᑯᑦ ᑲᑎᒪᖏᓐᓂᖏᓐᓂ, ᑕᑉᑑᓇᐅᑉ ᐅᖃᐅᓯᕆᓚᐅᖅᑕᖓ, ᐊᖏᖅᖢᓂ, “ᐄ, ᑲᒪᒋᔭᐅᓂᐊᖅᑐᑦ ᐃᓕᓴᐃᔪᑎᓂᒃ ᐋᕿᒃᓱᐃᔨᓄᑦ, ᑕᐃᒪᖓᓂᑦ ᑲᒪᒋᔭᐅᖏᓐᓇᐅᔭᕐᒪᑕ ᑕᒪᐃᑕ ᒪᓕᒐᑎᒍᑦ ᑎᑎᕋᖅᓯᒪᔪᑦ ᐊᑐᐊᖅᑕᐅᑦᑎᐊᖁᓪᓗᒋᑦ ᐊᒡᓚᒡᕕᓂ ᐱᐅᓂᖅᐹᒥᒃ ᑲᒪᔪᑎᖃᕆᐊᖃᕋᑦᑕ.”

ᐅᖃᒃᑲᓐᓂᖅᖢᓂ: “ᐅᓪᓗᖅ ᐃᓱᓕᑎᓪᓗᒍ ᐃᖅᑲᓇᐃᔭᕐᕕᑦᑎᓐᓂ, ᐊᒃᓱᕉᑎᒋᓯᒪᒐᑦᑎᒍ ᐱᐅᓂᖅᐹᒥᒃ ᐋᕿᒃᓱᖅᓯᒪᑎᑦᑎᓇᓱᐊᖅᖢᑕ.”

ᓱᓕ ᑕᐃᒪ ᓯᑕᒪᓂᒃ ᐱᖁᔭᒃᓴᓂᒃ ᐱᐊᓂᒃᓯᓯᒪᖏᒻᒪᑕ ᑲᔪᓯᑎᑕᐅᒋᐊᓕᖕᓂᒃ: ᐱᖁᔭᒃᓴᖅ 27 ᐊᒃᑕᕐᓗᑯᓕᕆᔪᑎ ᐊᑐᑲᓐᓂᕈᓐᓇᖅᑐᓂᒃ ᐊᓯᖔᖏᓐᓄᑦ ᒪᓕᒐᖅ, ᐱᖁᔭᒃᓴᖅ 40 ᐊᓄᓪᓚᒃᓰᕕᓕᕆᔪᑏᑦ ᒪᓕᒐᖅ, ᐱᖁᔭᒃᓴᖅ 47 ᒪᓕᒐᖅ ᐋᕿᒋᐊᖅᓯᔪᑕᐅᓂᐊᖅᑐᖅ ᒪᓕᒐᓐᓂᐊᖅᑎᒃᑯᑦ ᒪᓕᒐᖓᓄᑦ ᐊᒻᒪᓗ ᐱᖁᔭᒃᓴᖅ 48 ᒪᓕᒐᖅ ᐋᕿᒋᐊᖅᓯᔪᑕᐅᓂᐊᖅᑐᖅ ᑐᓴᐅᒪᑎᑦᑎᔪᑏᑦ ᑲᖑᓇᖅᑐᓂᒃᓗ ᓴᐳᔾᔨᓯᒪᔪᑏᑦ ᒪᓕᒐᖓ.

ᓄᓇᕗᒥᐅᑦ ᓂᕈᐊᖅᑎᑕᐅᓂᐊᓕᕐᒥᖕᒪᑕ ᐅᒃᑑᐸ 30-ᒥ. ᓇᓗᓇᐃᔭᖅᑕᐅᓯᒪᒋᐊᓖᑦ ᓂᕈᐊᖅᑕᐅᓇᓱᐊᕐᓂᐊᖅᑐᑦ ᑕᒪᑐᒪᓂ ᓯᑎᐱᕆ 25-ᒥᑦ 29-ᒧᑦ ᐃᓱᓕᕝᕕᖃᖅᑐᑦ 2-ᒧᐊᖅᐸᑦ ᐅᓐᓄᒃᓴᒃᑯᑦ ᓄᓇᓕᖓᓂ ᓯᕿᓂᕈᑎ ᒪᓕᒃᓗᒍ, ᐊᒻᒪᓗ ᐃᓱᓕᕝᕕᖃᕐᓂᐊᕆᓪᓗᑎᒃ ᐃᓚᐅᔪᒪᖏᑦᑐᑦ ᑎᑎᕋᒥᒃ ᐲᖅᑕᐅᔪᓐᓇᓚᖓᔪᑦ ᓯᑎᐱᕆ 29-ᒥ 5-ᒧᐊᖅᑎᓪᓗᒍ ᐅᓐᓄᒃᑯᑦ ᓄᖅᑲᖅᑎᑦᑎᒍᓐᓇᕆᓪᓗᑎᒃ, ᑕᐃᒪᓐᓇ ᑎᑎᕋᖅᓯᒪᔪᖅ ᓂᕈᐊᖅᑐᓕᕆᔨᒃᑯᓂ ᓄᓇᕗᒥ.