ᐱᕈᖅᐸᓪᓕᐊᔪᒥ ᐊᔾᔨᒌᙱᓐᓂᐅᔪᒥ ᐃᓕᑦᑎᓂᕐᒧᑦ ᐱᕕᒃᓴᖃᕐᓂᐅᔪᒥ

297

ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ

ᑲᓇᑕ ᐊᓯᔾᔨᖅᐸᓪᓕᐊᓯᒪᕗᖅ ᐊᕐᕌᒍᒐᓴᓂ ᐃᖏᕐᕋᕙᓪᓕᐊᑎᓪᓗᒋᑦ ᐊᒻᒪ ᐱᕈᖅᐸᓪᓕᐊᔪᒥ ᓈᒻᒪᒃᓴᕐᓂᐅᔪᒥ ᐊᔾᔨᒌᙱᓐᓂᖅᓴᐅᔪᒥ ᐃᓄᒋᐊᖕᓂᐅᔪᒥ ᐃᒃᐱᒋᔭᐅᔪᓐᓇᖅᑐᒥ ᓇᒥᑐᐃᓐᓇᖅ ᑎᕆᖅᑰᔪᒥ ᑲᓇᑕᓕᒫᒥ, ᓯᒡᔭᖅᐸᓯᖕᒥ ᓯᒡᔭᖅᐸᓯᖕᒥ ᓯᒡᔭᖅᐸᓯᖕᒧᑦ.

ᓄᓇᕗᑦ ᐊᔾᔨᐅᙱᑦᑑᙱᓚᖅ ᐊᖏᒡᓕᕙᓪᓕᐊᖏᓐᓇᖅᑐᒥ ᑲᑎᙵᓂᖃᖅᐸᓪᓕᐊᑎᓪᓗᒍ ᐊᒥᐊᒃᑯᖓᓂ ᑲᓇᑕᒥ ᐊᒻᒪ ᓄᓇᕐᔪᐊᓕᒫᒧᑦ. ᐊᖏᔪᒻᒪᕆᐊᓗᖕᓂ ᐊᓯᔾᔨᖅᐸᓪᓕᐊᓂᖃᖅᐳᖅ ᐱᔾᔪᑎᖃᖅᑐᒥ ᐅᖃᐅᓯᕐᒥ, ᐃᓕᖅᑯᓯᒥ ᐊᒻᒪ ᐃᓄᒋᐊᖕᓂᐅᔪᓄᑦ.

ᒫᓐᓇ ᐱᓂᖅᓴᒻᒪᕆᐅᔪᒥ ᖃᓪᓗᓈᓂ ᓄᓇᖃᖅᑎᐅᔪᓄᑦ ᐃᓄᖏᑦ ᓇᓂᓯᕙᓪᓕᐊᕗᑦ ᐊᖏᕐᕋᖃᕐᓂᕐᒥ ᐅᑭᐅᖅᑕᖅᑐᒥ ᐊᒻᒪᓗ ᓴᖅᑭᔮᕐᕕᐅᓯᒪᕗᑦ ᐃᓄᐃᑦ ᐃᓕᖅᑯᓯᖓᓐᓄᑦ ᐊᒻᒪ ᐃᓅᓯᕆᔭᒥᓄᑦ.

ᖁᑦᑎᖕᓂᖅᓴᓂ ᐃᓕᓐᓂᐊᖅᑎᐅᔪᓂ ᐃᓄᒃᓱᒃ ᖁᑦᑎᒃᑐᒥ ᐃᓕᓐᓂᐊᕐᕕᖓᓂ ᑕᒪᐃᑎᒍᑦ ᐅᖃᐅᓯᖃᓚᐅᖅᐳᑦ ᐱᐅᔪᒥ ᐊᑐᕐᓂᖃᕐᓂᐅᔪᒥ ᐱᓇᓱᐊᕈᓯᐅᓚᐅᖅᑑᑉ ᑎᑎᕋᖅᑕᐅᓯᒪᓂᖓᓂ, (“ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᖁᑦᑎᖕᓂᖅᓴᓂ ᐃᓕᓐᓂᐊᖅᑏᑦ ᐃᓕᓐᓂᐊᕐᕕᐊᕈᓯᕐᒥ ᐊᔾᔨᒌᙱᓐᓂᐅᔪᓂ,” ᔭᓄᐊᕆ 13) ᐃᓕᓐᓂᐊᖅᑎ ᑭᐅᕐᔅᑎᓐ ᐅᐃᓕᐊᒻᔅ ᐅᖃᐅᓯᖃᓚᐅᖅᐳᖅ ᐊᑲᐅᒃᓴᑦᑎᐊᙱᓐᓂᒐᓚᐅᔪᒥ ᐃᓕᖅᑯᓯᕆᔭᐅᔪᓄᑦ ᐊᑐᖅᑕᐅᓂᐅᕙᒃᑐᓄᑦ.

“ᑭᓇᑐᐃᓐᓇᖅ ᐊᖏᖃᑎᖃᙱᑦᑐᒥ ᐅᕝᕙᓘᓐᓃᑦ ᑐᑭᓯᐅᒪᙱᓐᓂᖓᓂ ᖃᓄᐃᒻᒪᑦ ᐊᒻᒪ ᖃᓄᖅ ᐱᓕᕆᕙᖕᓂᑦᑎᓐᓂ ᑐᙵᕕᖃᖅᑐᒥ ᐃᓕᖅᑯᓯᒧᑦ,” ᐅᖃᓚᐅᖅᐳᖅ ᐅᐃᓕᐊᒻᔅ. “ᐊᒻᒪᓗ ᑕᒪᓐᓇ ᐊᒃᓱᕈᕈᑎᒌᓐᓇᐅᔭᖅᓯᒪᕙᕋ ᐱᕈᖅᓴᑎᓪᓗᖓ ᐅᓂᒃᑳᕆᐊᖃᕐᓂᓐᓂ ᐃᓕᖅᑯᓯᓐᓂ ᐊᒻᒪ ᖃᓄᐃᒻᒪᑦ ᐱᓕᕆᕙᖕᓂᓐᓂ ᖃᓄᖅ ᐱᓕᕆᕙᖕᓂᓐᓂ.”

ᓇᓗᓇᙱᓚᖅ ᐅᓇ ᐃᒃᐱᒋᔭᐅᓂᐅᔪᖅ ᐃᓱᒪᒋᔭᐅᒋᕗᖅ ᐊᒥᓱᓄᑦ ᓄᓇᕗᒻᒥᐅᓄᑦ ᐊᒻᒪ ᖃᓄᐃᓐᓂᐅᓪᓗᓂ ᐃᓕᖅᑯᓯᓂᑦ ᑲᑎᖃᑎᒌᖕᓂᐅᔪᓄᑦ.

ᑭᓱᑐᐃᓐᓇᐃᑦ ᓲᕐᓗ ᓇᑦᑎᕐᓂ, ᐊᐃᕕᕐᓂ ᐅᕝᕙᓘᓐᓃᑦ ᕿᓚᖢᒐᕋᓱᐊᕐᓂᑦ ᐊᔾᔨᐅᙱᑦᑐᐊᓗᖕᒥ ᐃᓱᒪᓂᐅᕗᖅ ᑕᐃᒃᑯᓄᖓ ᑲᓇᑕᒥᐅᑕᐅᒐᔪᒃᑐᓂ ᖃᓪᓗᓈᑦ ᓄᓇᖓᓐᓂ ᑭᓯᐊᓂ ᐅᕙᓂ ᑕᐃᒪᐃᒐᔪᒃᑐᒥ ᐃᓱᓕᑦᑎᓂᐅᕗᖅ ᐃᓕᖅᑯᓯᓂ ᑲᑎᖃᑎᒌᒃᑐᓄᑦ ᐃᓗᓕᖃᖅᐳᖅ ᐃᓕᑦᑎᓂᕐᒧᑦ ᐱᕕᒃᓴᖃᕐᓂᐅᔪᒥ.

ᓄᓇᕗᑦ ᐊᖏᕐᕋᕆᔭᐅᖏᓐᓇᖅᓯᒪᕗᖅ ᐊᒻᒪ ᐊᖏᕐᕋᕆᔭᐅᖏᓐᓇᕐᓂᐊᖅᖢᓂ ᐃᓄᖕᓄᑦ: ᓄᓇᒋᔭᖓᑦ, ᐃᓕᖅᑯᓯᖓᑦ, ᐅᖃᐅᓯᖓᑦ ᐊᒻᒪ ᐃᓕᓐᓂᐊᕐᕕᖏᑦ. ᑐᙵᓵᕆᑎᓪᓗᒋᑦ ᖃᓪᓗᓈᓂ ᓄᓇᖃᖅᑎᐅᔪᓂ ᓄᓇᓕᖏᓐᓄᑦ, ᐅᑯᐊ ᑎᑭᓕᓵᖅᑐᑦ ᐱᕕᒃᓴᖃᖅᐳᑦ ᓴᖅᑭᔮᕐᕕᐅᓂᖏᓐᓂ ᐅᑯᓄᖓ ᐊᒻᒪ ᐃᓕᑦᑎᓂᕐᒧᑦ ᐱᓕᕆᔾᔪᓯᐅᔪᓂ ᐃᓄᖕᓄᑦ ᐊᒻᒪ ᐃᓱᒪᒋᓯᒪᔭᖏᓐᓂᑦ ᐃᓅᓯᕐᒥ ᑲᓇᑕᒥ.

ᐅᑯᐊ ᖃᓪᓗᓈᓂ ᓄᓇᖃᖅᑎᐅᔪᑦ ᓄᓇᕗᒻᒦᖏᓐᓇᕋᓗᐊᕈᑎᒃ ᐊᒻᒪ ᖃᖓᑭᐊᖅ ᓅᓪᓗᑎᒃ ᐊᓯᐊᓄᖔᖅ, ᐃᓅᓯᓕᒫᖓᓐᓂ ᐃᖅᑲᐅᒪᓂᖃᕐᓂᐊᖅᐳᑦ ᐃᓄᐃᑦ ᐱᔾᔪᓯᖏᓐᓂ ᐃᓅᓯᕐᒥ ᐊᒻᒪ ᑐᑭᓯᐅᒪᓂᖅᓴᐅᓂᕐᒥ ᑕᒪᕐᒥᒐᓚᖕᓂ ᑲᓇᑕᒥᐅᑕᓂᑦ.

ᐅᕙᓂ ᐱᑕᖃᖅᐳᖅ ᐊᖏᔪᕐᔪᐊᒥ ᐱᕕᒃᓴᖃᕐᓂᐅᔪᒥ ᓄᓇᕗᒻᒥᐅᓄᑦ ᐃᒻᒥᖕᓄᑦ. ᖄᒃᑲᓐᓂᐊᒍᑦ ᓴᖅᑭᔮᖅᑎᑦᑎᓂᕐᒥ ᖃᓪᓗᓈᑦ ᓄᓇᖓᓐᓂ ᐃᓄᖕᓄᑦ ᐊᔾᔨᒋᙱᑕᖓᓂ ᐃᓱᒪᒋᔭᖃᕐᓂᐅᔪᒥ, ᓄᓇᕗᒻᒥᐅᑦ ᓵᖅᑭᔮᕐᕕᐅᓲᖑᒋᕗᑦ ᐊᔾᔨᒋᙱᑕᖏᓐᓂ ᐃᓱᒪᒋᔭᐅᓂᐅᔪᓂ ᐊᒻᒪᓗᑦᑕᐅᖅ ᐊᓯᖏᓐᓂ ᑎᕆᖅᑰᔪᓄᑦ ᑲᓇᑕᒥ ᐊᒻᒪ ᐅᖓᑖᓄᑦ.

ᐃᓚᖏᑦ ᓄᓇᖃᖅᑎᐅᔪᑦ ᐱᕕᒃᓴᖃᙱᑐᐃᓐᓇᕆᐊᖃᖅᐳᑦ ᐊᐅᓪᓛᕐᓂᕐᒧᑦ ᐅᖓᓯᒃᑐᒧᑦ ᐊᒻᒪ ᓇᒧᕈᓘᔭᖅ ᑭᓯᐊᓂ ᖃᖓᒃᑲᓐᓂᐅᔭᖅ ᐃᓅᓯᖓᓐᓂ ᑭᓯᐊᓂ ᐅᕘᓇ ᓇᖕᒥᓂᖅ ᑲᑎᖃᑎᖃᕐᓂᐅᔪᓂ ᖃᓄᖅ ᐃᓄᐃᑦ ᐆᒪᓂᕆᕙᒃᑕᖏᓐᓂ ᐊᓯᐊᓂ ᐊᔾᔨᒋᙱᑕᖓᓂ ᓯᓚᖃᖅᑐᓂ, ᐃᓕᖅᑯᓯᐅᔪᓂ ᐊᒻᒪ ᐱᓕᕆᔾᔪᓯᖃᖅᑐᓂ ᐃᓅᓯᖏᓐᓂᑦ.

ᑲᑎᙵᓂᖃᕐᓂᐅᔪᒥ ᐃᓱᒪᒋᔭᐅᓂᐅᔪᓂ ᐊᒻᒪ ᐃᓕᖅᑯᓯᐅᔪᓂ ᐱᓕᕆᕙᓪᓕᐊᕗᖅ ᑲᓇᑕᓕᒫᒥ, ᖃᓪᓗᓈᑎᑑᒐᓗᐊᖅᐸᑦ, ᐅᐃᕖᑎᑐᑦ ᐃᓄᒃᑎᑐᓪᓘᓐᓃᑦ–ᐅᖃᓪᓚᖕᓂᐅᔪᓂ ᐃᓕᓐᓂᐊᕐᕕᐊᕈᓯᕐᓂ ᐊᒻᒪ ᐱᕈᖅᐸᓪᓕᐊᓂᕐᒧᑦ ᐋᓐᓂᐊᕈᑕᐅᔪᑦ ᐊᓯᔾᔨᖅᐸᓪᓕᐊᓂᐅᔪᒥ ᐃᓄᒋᐊᖕᓂᐅᔪᒥ ᐃᒃᐱᒋᔭᐅᕗᖅ ᐊᒥᓱᓂ, ᑭᓯᐊᓂ ᐱᓂᖅᓴᐅᔪᒥ ᑲᓇᑕᒥ ᐃᓄᐃᑦ ᐃᒻᒥᖕᓂᒃ ᐅᐱᒋᓂᖃᕈᓐᓇᖅᐳᑦ.

ᐱᔾᔪᑎᒃᓴᖃᒃᑲᓐᓂᐅᔭᖅᐳᑦ ᒫᓐᓇᐅᔪᒥ ᐊᒻᒪ ᑐᑭᖃᖅᐳᖅ ᓇᖏᖅᓯᓂᕐᒧᑦ ᐊᒻᒪ ᐅᓂᒃᑳᕐᓗᓂ ᓇᖕᒥᓂᖅ ᐅᓂᒃᑳᖅᑐᐊᒥᓂᑦ ᐊᒻᒪ ᑐᓂᓯᓗᑎᒃ ᓯᕗᓪᓕᖅᐹᖓᓂ ᐊᑐᖅᑕᐅᓂᑯᓂ ᐃᓕᖅᑯᓯᖓᓐᓂ ᑲᓇᑕ ᑲᑐᔾᔨᓪᓗᑎᒃ ᐱᕙᓪᓕᐊᑎᑦᑎᓂᖏᓐᓂ 21st ᐊᕐᕌᒍᖓᓐᓂ ᑲᓇᑕᒥ ᑭᓇᐅᓂᖓᓐᓂ – ᐊᑕᐅᓯᖅ ᐃᓚᒋᔭᐅᔪᖅ ᓇᓗᓇᙱᑦᑎᐊᖅᑐᒥ ᐃᓄᖕᓂᐅᕗᖅ.