ᑕᐃᒪ ᖃᓄᐃᓕᐅᖅᑎᓪᓗᑕ ᖃᐅᔨᒪᔭᑦᑎᓐᓂᒡᓗ ᖃᓄᐃᓕᐅᖃᑎᖃᕐᓂᑦᑎᓐᓂ, ᖃᐅᔨᒪᒋᐊᖃᖅᐳᒍᑦ ᖃᓄᐃᓕᐅᕈᑎᒋᔭᕗᓪᓗ ᓱᓕᑦᓯᐊᕐᓗᑎᒃ. ᐃᓛᓐᓂᒃᑯᑦ ᐃᓄᐃᑦ ᖃᐅᔨᒪᓪᓚᕆᙱᑕᒥᖕᓂᒃ ᐅᖃᐅᓯᖃᖅᐸᖕᒪᑕ, ᑕᐃᒪᓐᓇᑐᐃᓐᓇᖅ.

ᐃᓱᒪᒐᓕ, ᐊᑕᐅᓯᖅ ᐱᕙᓪᓕᐊᑎᑕᐅᓯᒪᖕᒪᑕ ᐊᑯᓂᐅᓕᖅᑐᖅ ᐊᕐᕌᒍᒐᓴᖕᓂ ᑲᑎᒪᔨᐊᓛᖅᑖᖅᐸᒃᖢᑎᒃ ᐊᒥᓱᓂᒃ. ᐊᕐᕌᒍᑦ ᑮᓇᐅᔭᓕᕆᓐᓇᖅ ᐃᓱᓕᒃᑳᖓᑦ ᐃᓄᐃᑦ ᑕᖃᓯᒪᓕᖅᐸᖕᒪᑕ ᐅᖃᖃᑦᑕᓕᖅᖢᑎᒡᓗ, “ᑲᑎᒪᙳᖅᐳᒍᑦ”. ᖃᖓ ᐱᐊᓂᖕᓂᐊᖅᐱᑕ ᖃᓄᐃᓕᐅᒃᑲᓐᓂᕐᓂᐊᖅᐱᑕᓗ ᐃᓄᓕᒫᓂᒃ ᐃᓚᐅᑎᑦᓯᓇᓱᐊᕐᓂᐊᕈᑦᑕ?

ᐊᕐᕌᒍᒐᓴᐅᓚᐅᖅᑐᓂ ᐊᑯᓂᐅᓕᖅᑐᓂ, ᓄᓇᑎᓐᓂᒥᐅᑦ ᑐᓴᖅᑎᑦᑎᒍᒪᓚᐅᕐᒪᑕ ᐋᓐᓂᐊᖃᕐᓇᙱᓐᓂᐅᑉ ᒥᒃᓵᓄᑦ ᐱᔾᔪᑎᖃᖅᑐᓂᒃ ᐋᖅᑭᐅᒪᑦᓯᐊᖁᓪᓗᒋᓪᓗ ᐃᓄᐃᑦ, ᑲᑎᙵᓪᓗᑎᒃ ᑎᒥᑖᓚᐅᖅᐳᑦ ᑕᒪᐃᓐᓂᒃ ᐃᓚᐅᑎᑦᑎᓇᓱᐊᖅᖢᑎᒃ ᐃᓄᖕᓂᒃ ᓇᓗᓇᐃᒃᑯᑕᖃᖅᖢᑎᒡᓗ ᐋᖅᑭᒃᓱᐃᓪᓗᑎᒃ. ᐊᑲᐅᑦᓯᐊᓚᐅᖅᖢᓂᓗ ᑕᒪᐃᓐᓂᒃ ᐃᓄᖕᓂᒃ ᑭᒡᒐᖅᑐᐃᓚᐅᕐᒪᑕ. ᐱᓇᓱᐊᕈᓯᓪᓗ ᑕᖅᑭᓪᓗ ᐊᓂᒍᖅᑎᓪᓗᒋᑦ, ᓱᓇᓂᑭᐊᖅ ᐱᔾᔪᑎᖃᖅᖢᑎᒃ ᑲᑎᒪᔨᖏᑦ ᓄᖑᑉᐸᓪᓕᐊᓕᓚᐅᖅᐳᑦ. ᐃᓚᖏᑦ ᐊᑲᐅᔪᓂᒃ ᐱᔾᔪᑎᖃᖅᖢᑎᒃ ᐊᐅᓪᓚᓕᕋᒥᒃ ᓄᓇᑎᓐᓂᑦ ᐃᓚᖏᓪᓗ ᐊᓯᖏᓐᓂᒃ ᐱᓕᕆᐊᖃᓕᖅᖢᑎᒃ ᑲᑎᒪᒍᓐᓇᙱᓕᖅᖢᑎᒡᓗ ᐊᒥᓲᙱᓗᐊᓕᓚᐅᕐᒪᑕ ᑲᑎᒪᔨᖏᑦ.

ᑕᐃᒪᓐᓇ ᐅᖃᖅᖢᖓ, ᑖᒃᑯᐊ ᑲᔪᓯᑎᑦᑎᒍᒪᔪᑦ ᑲᔪᓯᓚᐅᖅᐳᑦ ᑲᑎᒪᔨᐅᖏᓐᓇᖅᖢᑎᒃ ᐃᓱᓕᓐᓂᖓᓄᑦ ᑎᑭᖦᖢᒍ ᐊᑲᐅᙱᑦᑐᖅᓯᐅᓕᖅᖢᑎᒃ. ᐅᔾᔨᕈᓱᖃᑦᑕᖅᐳᒍᑦ ᓄᑖᒥᒃ ᐱᒋᐊᖅᑐᖃᕌᖓᑦ, ᐃᓚᐅᓕᖅᑐᑦ ᐊᒥᓱᙳᖅᐸᒃᐳᑦ ᑭᓯᐊᓂ “ᐱᓕᕆᐊᖃᓪᓚᕆᒋᐊᖃᓕᕌᖓᒥᒃ” ᖁᒃᓴᓱᓕᖅᐸᒃᐳᑦ ᐱᒍᒪᙱᓕᖅᖢᑎᒡᓗ.

ᐅᑎᕆᐊᖃᖅᐳᒍᑦ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐊᑐᓪᓚᕆᒡᓗᑎᒍᓗ ᐋᖅᑭᒃᐸᓪᓕᐊᒍᑎᓂᒃ ᓴᖅᑭᑦᑐᖃᖁᓪᓗᒍ; ᐅᐱᒋᔭᖃᕐᓗᑕᓗ ᐊᓯᑦᑎᓐᓂᒃ, ᐱᖃᑎᖃᑦᓯᐊᕐᓗᑕ ᑲᒪᑦᓯᐊᕐᓗᑕᓗ ᐃᓄᖕᓂᒃ; ᒪᑐᐃᖔᑦᓯᐊᕐᓗᑕᓗ ᐃᓅᖃᑎᑦᑎᓐᓄᑦ, ᑐᓐᖓᓱᒃᑎᑦᓯᓗᑕᓗ ᐊᒻᒪ ᐃᓚᐅᑎᑦᓯᓗᑕ; ᐱᔨᑦᓯᕋᕐᓗᑕ ᐊᒻᒪ ᐃᓚᑦᑎᓐᓂᒃ ᐃᓚᒌᓂᒡᓗ/ᐅᕝᕙᓘᓐᓃᑦ ᓄᓇᓕᖕᓂᒃ; ᐃᓱᒪᓕᐅᕈᑎᖃᑦᓯᖃᑦᑕᕐᓗᑕ ᐊᖏᖃᑎᒌᒃᓯᒪᓂᒃᑯᑦ; ᐊᔪᙱᒪᕐᓂᒃᑯᑦ ᐱᓕᒻᒪᒃᓴᖃᑦᑕᕐᓗᑕ, ᐊᒃᓱᕈᕐᓗᑕᓗ ᐊᒻᒪ ᐱᓕᕆᓪᓚᕆᖃᑦᑕᕐᓗᑕᓗ; ᐱᓕᕆᖃᑎᒌᖃᑦᑕᕐᓗᑕ ᐊᑕᐅᓯᕐᒥᒃ ᐱᓇᓱᐊᕈᑎᖃᕐᓗᑕ; ᓄᑖᓂᒃ ᐱᓇᓱᐊᕐᓗᑕ ᐃᑲᔪᕋᓱᐊᕐᓗᑕ; ᐅᐱᒋᔭᖃᕐᓗᑕᓗ ᑲᒪᑦᓯᐊᕐᓗᑕᓗ ᓄᓇᒥᒃ ᐆᒪᔪᖏᓐᓂᒃ ᐊᕙᑎᒥᐅᑕᑦᑎᓐᓂᒡᓗ.

ᑕᐃᒪᓐᓇᐃᓕᐅᕐᓗᑕ ᑲᑎᒪᔨᑖᖃᑦᑕᕈᓐᓇᖅᐳᒍᑦ ᐊᑕᐅᓯᕐᒥᒃ ᐋᖅᑭᒃᓱᐃᓇᓱᐊᕐᓗᑕ ᑕᒪᐃᓐᓂᒃ ᐃᓚᐅᑎᑦᓯᓇᓱᐊᕐᓗᑕᓗ.

Advertisement