Skip to content

ᐱᓇᓱᐊᖃᑎᖃᓕᖅᑐᑦ ᒪᒃᑯᒃᑐᓂᒃ ᐃᓱᒪᓐᓂᐊᖅᑏᑦ

ᐃᒻᒪᖄ ᐅᑭᐅᓂᒃ ᒪᕐᕉᓂᒃ ᑕᒪᑐᒪᓂ ᐱᑕᖃᓕᖅᑐᖅ, ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐃᓕᓯᓚᐅᕐᒪᑕ ᒪᒃᑯᒃᑐᓂᒃ ᓄᓇᕗᒥ ᐆᒃᑐᕋᕈᒪᓪᓗᑎᒃ ᖃᕆᑕᐅᔭᑎᒍᑦ ᐱᖑᐊᕈᑎᒥᒃ I-SPARX-ᒥᒃ, ᑐᕌᖅᑐᒥᒃ ᐃᓱᒪᓐᓂᐊᕈᑎᓄᑦ ᒪᒃᑯᒃᑐᓄᑦ ᐋᕿᒃᓱᖅᑕᐅᔪᕕᓂᕐᒥᒃ ᓄᓇᖃᖅᑳᖅᑐᓄᑦ ᒧᐊᕆᓄᑦ ᓂᐅᔨᓚᓐᒥ ᒪᒃᑯᒃᑐᖏᓐᓄᑦ ᑐᕌᖅᖢᓂ. ᒫᓐᓇ ᑕᐃᒪᐃᑦᑐᓴᐃᓐᓇᒥᒃ ᐋᕿᒃᓱᐃᓇᓱᐊᕐᒪᑕ ᐃᓄᖕᓄᑦ ᒪᒃᑯᑦᑐᓄᑦ ᑐᕌᖅᑐᓂᒃ ᐃᓅᓯᖏᓐᓄᑦ ᐊᔪᕐᓂᖃᖅᑐᓄᑦ ᓄᓇᕗᒥ.

ᐅᓇ ᑕᕝᕙ ᖃᕆᑕᐅᔭᑎᒍᑦ ᑐᕌᕐᕕᖓᑦ ᓄᑖᖅ ᐃᓯᕐᕕᐅᒍᓐᓇᖅᓯᓂᐊᓕᖅᑐᖅ I-SPARX ᐱᖑᐊᕐᕕᒃ ᐃᓄᖃᖅᖢᓂ ᐅᑯᓂᖓ ᑭᕕᓐ ᖃᔮᖅ, ᓴᐅᒥᐊᓂ, ᐊᒻᒪᓗ ᔮᓯᐳ ᐳᑐᒎᖅ, ᐃᓚᐅᖃᑕᐅᓚᐅᕐᒪᑕ ᐅᑯᐊ ᓴᓇᑎᓪᓗᒋᑦ te(a)ch-ᒥᒃ ᖃᒪᓂ’ᑐᐊᒥ ᒫᔨ 2017-ᒥ. ᐱᖑᐊᒃᑯᑦ ᑲᑐᔾᔨᖃᑎᒌᖓᓐᓄᑦ ᐋᕿᒃᓱᖅᑕᐅᓚᐅᖅᑐᖅ, ᐱᖑᐊᕐᕕᐅᔪᓐᓇᖅᑐᖅ te(a)ch-ᒥᒃ, ᖃᕆᑕᐅᔭᑎᒍᑦ ᓴᓇᖅᑯᑎᓂᒃ ᐋᕿᒃᓱᐃᔪᓐᓇᖅᑐᑦ ᐱᓇᓱᐊᖃᑎᖃᓕᕐᒪᑕ I-SPARX-ᑯᓐᓄᑦ ᓴᓇᔭᐅᔪᓂᒃ.

“ᑕᕐᕆᔭᐅᑎᒃᑯᑦ ᑖᓐᓇ ᐱᖑᐊᕈᓯᖅ ᖃᐅᔨᒪᓂᖏᓐᓂᒃ ᐆᒃᑐᕋᐅᑎᐅᓪᓗᓂ ᐱᖅᑯᓯᖏᓐᓂᒃᓗ ᐃᓅᓯᕐᒥᒍᑦ ᐆᒃᑐᕋᐅᑕᐅᓪᓗᓂ ᐃᓚᓯᒪᔪᑦ ᑕᒪᒃᑯᓂᖓ,” ᐅᓂᒃᑳᓚᐅᖅᑐᖅ ᐃᓵᒃᓯᒪᒋᑦ ᐃᓅᓯᕐᒧᑦ ᑲᑐᔾᔨᖃᑎᒌᖓᓂᒥᐅᖅ ᑲᑎᒪᔨᖏᑕ ᐊᐅᓚᑦᑎᔨᖓᑦ ᑭᒻ ᒪᓱᓐ.

“ᐃᓱᒪᓪᓗᑎᒃ ᑭᖑᓂᖓᒍᑦ ᐋᕿᒃᐹᓪᓕᕈᑕᐅᔪᓐᓇᕋᓱᒋᓪᓗᒍ ᒪᒃᑯᒃᑐᓄᑦ ᐊᒃᓱᕉᑎᖃᖅᑐᓄᑦ ᕿᒃᓵᖕᓂᕐᒥᒃ ᐃᓱᒫᓗᖕᓂᕐᒥᒃᓗ ᖃᓄᑐᐃᓐᓇᖅ ᑎᓇᔪᑎᖃᓕᖅᑐᓄᑦ ᐃᓅᓯᕐᒥᒍᑦ, ᐃᓱᒪᒥᓄᑦ ᐊᒃᑐᐊᔪᓂᒃ. ᑖᓐᓇ ᐱᖑᐊᕈᑎ ᐊᑐᖅᑕᐅᔪᓐᓇᖅᑐᖅ ᐃᓗᐊᖅᓴᐃᔪᑕᐅᓗᓂ ᐃᓱᒪᖏᓐᓂᒃ, ᐃᓱᒪᖏᓐᓄᑦ ᐋᕿᒋᐊᖅᓯᔪᑕᐅᓇᓱᐊᖅᑐᖅ ᑕᒪᐃᓐᓂᒃ.

I-SPARX-ᑯᑦ ᑖᓐᓇ ᐊᑎᖓ ᓇᐃᒡᓕᒋᐊᖅᓯᒪᔪᖅ ᐅᑯᓄᖓ Smart, Positive, Active, Realistic, X-factor-ᓄᑦ, ᐊᒻᒪᓗ ᑕᕐᕆᔭᐅᑎᓕᐊᕆᔭᐅᓯᒪᔪᖅ ᐱᖑᐊᕈᑎ ᐃᓚᐅᕕᐅᔪᓐᓇᖅᑐᖅ ᑕᐅᑐᒃᑐᒧᑦ ᐃᖏᕐᕋᖑᐊᕐᓗᑎᒃ ᐊᔾᔨᐅᖏᑦᑐᒥ ᓄᓇᒥ 7-ᓂᒃ ᐊᔾᔨᒌᖏᑦᑐᓄᑦ ᓄᓇᒋᔭᐅᔪᓂ. ᐱᖑᐊᕈᑎ ᑖᓐᓇ ᐋᕿᒋᐊᖅᓯᔪᑕᐅᓇᓱᐊᖅᑐᖅ ᑕᐅᑦᑐᒐᕆᔭᐅᔪᓂᒃ ᒪᒃᑯᒃᑐᓄᑦ ᐃᓗᐊᖅᓯᕚᓪᓕᖁᓪᓗᒋᑦ ᓴᐳᑎᓇᓱᐊᕐᓗᒋᑦ ᑕᕐᕆᔭᐅᑎᑎᒍᑦ ᐊᒃᓱᕉᑕᐅᔪᓂᒃ ᐊᓯᐅᔮᖏᒻᒪᑕ ᕿᒃᓵᕐᓇᖅᑐᒃᑯᕕᖕᒥ.

ᐃᓵᒃᓯᔪᑦ ᐃᓅᓯᕐᒥᒃ, ᔪᐊᒃ ᓯᓚᑦᑐᒃᓴᕐᕕᒃᔪᐊᖓᓂ ᐃᓕᓴᐃᔨ ᐃᕙᓐ ᐴᕐ, ᐱᖑᐊᒃᑯᓪᓗ ᑲᑐᔾᔨᖃᑎᒌᖓᑦ ᖃᐅᔨᒋᐊᖅᑏᑦ ᐃᓱᒪᓐᓂᐊᖅᑎᖏᓐᓄᑦ ᖃᐅᔨᓴᕈᑕᐅᔪᑦ, ᐊᒻᒪᓗ ᓄᓇᕗᒥ ᖃᐅᔨᓴᖅᑏᑦ ᑎᒥᖁᑎᐊᓂ ᐱᓇᓱᐊᖃᑎᒌᒍᑎᖃᕐᒪᑕ ᑖᓱᒥᖓ.

ᐴᕐ ᑐᓂᐅᓯᐊᓚᐅᕐᒪᑦ $1,258,424-ᓂᒃ ᐊᑐᕐᓂᐊᖅᑐᒥᓂᒃ ᐅᑭᐅᓂᒃ ᓯᑕᒪᓂᒃ ᑲᓇᑕᒥ ᑎᒥᖁᑎᒋᔭᐅᔪᒥ ᐃᓱᒪᓐᓂᐊᖅᑎᒃᑯᓐᓄᑦ ᖃᐅᔨᓴᖅᑎᒋᔭᐅᓗᓂ ᑕᐃᔭᐅᔪᒥᒃ ᖃᐅᔨᓴᕈᑎᒥᒃ I-SPARX ᓄᓇᕗᒥᐅᓄᑦ ᓂᐅᕈᑲᑕᖕᓂᐊᕐᒪᑕ.

ᑖᓐᓇ ᐊᕐᓇᖅ ᐋᕿᒃᓱᐃᔪᒪᖕᒪᑦ ᑐᓐᖓᕕᖃᕐᓗᓂ ᖃᐅᔨᓴᕈᑕᐅᓚᐅᖅᑐᒥᒃ 2015-ᒥ ᓯᕗᓪᓕᖅᐹᒥᒃ.

“ᑖᓐᓇ ᖃᐅᔨᓴᕈᑕᐅᓚᐅᖅᑐᖅ ᐊᒃᓱᕉᑎᖃᕐᒪᑦ ᐱᓇᓱᐊᖃᑎᒌᒍᑕᐅᓂᐊᖅᑐᓂᒃ 6-ᓂ ᓄᓇᓕᖕᓂ ᐆᒃᑐᕋᖅᑕᐅᓗᓂ ᓄᓇᕗᒥ ᑕᑎᒋᓗᒋᑦ ᐱᓕᕆᖃᑎᒋᓂᐊᕋᑦᑎᒍ ᐊᐅᓚᑦᑎᔨᐅᓗᑎᒃ ᐱᓕᕆᐊᑦᑎᓐᓂᒃ ᐱᕙᓪᓕᐊᑎᑦᑎᔨᐅᓗᑎᒃ ᑐᓂᐅᖅᑲᐃᔨᐅᓗᑎᒃᓗ ᐅᔾᔨᖅᓱᖅᑎᐅᓗᑎᒃᓗ ᐃᓄᖕᓄᑦ ᑐᕌᖓᔪᓂᒃ ᖃᐅᔨᓴᕈᑎᓂᒃ ᖃᕆᑕᐅᔭᑎᒍᑦ ᐋᕿᒃᓱᑦᑕᐅᓯᒪᔪᓂᒃ ᐱᖑᐊᓂᒃ ᐊᑐᕐᓗᑎᒃ,” ᐅᓂᒃᑳᓚᐅᖅᑐᖅ ᐴᕐ ᖃᕆᑕᐅᔭᑎᒍᑦ ᑎᑎᕋᖅᖢᓂ, ᐃᓚᓪᓗᓂᐅᒃ ᐱᖑᐊᕈᓯᖅ ᑖᓐᓇ ᖃᕆᑕᐅᔭᑎᒍᑦ ᐊᑐᕐᓂᖃᖅᓯᒪᖕᒪᑦ ᒧᐊᕆᓄᑦ ᒪᒃᑯᒃᑐᓄᑦ ᓂᐅᔩᓚᓐᒥ.

“ᐱᖑᐊᖅ ᑖᓐᓇ ᓱᖏᐅᓴᐅᑎᐅᖕᒪᑦ ᒪᒃᑯᒃᑐᓄᑦ ᐃᓅᓯᕐᒥᒃ ᐆᒃᑐᕋᕆᐅᓕᖅᑐᓄᑦ ᖃᓄᖅ ᓇᖕᒥᓂᖅ ᒪᒃᑯᒃᑐᓄᑦ ᐊᒃᓱᕉᑕᐅᕙᒃᑐᓂᒃ ᐸᕐᓇᐃᓯᒪᔪᓐᓇᕐᒪᖔᑕ ᐃᓱᒪᒥᒍᑦ ᕿᒃᓵᓕᕐᓇᖅᑐᓂᒃ ᐃᓱᒫᓗᖕᓇᖅᑐᓂᒃᓗ ᐊᒃᓱᕈᑎᖃᓕᕌᖓᒥᒃ ᖃᓄᖅ ᐋᕿᒃᓯᓇᓱᐊᕈᓐᓇᕐᒪᖔᑕ, ᐊᖅᑯᑎᒋᔭᐅᓱᓂᒃ ᐅᓂᒃᑲᖅᓯᒪᔪᖅ, ᓴᐱᓕᔭᐃᒃᑯᑎᒃᓴᓂᒃ ᐅᐊᑲᓪᓚᓗᐊᒍᓱᒃᑐᓄᑦ ᑲᑉᐱᐊᓇᖅᑐᖅᓯᐅᖅᑐᓄᓪᓗ ᓴᐱᓕᔭᐃᒃᑯᑎᒃᓴᓂᒃ.

ᑐᓴᖅᓯᒪᒐᑦᑕ ᓂᐅᔩᓚᓐᒥᐅᓂᑦ ᖃᐅᔨᓴᕈᑕᐅᓚᐅᖅᓯᒪᔪᓂᑦ, 54-ᐳᓴᖏᑦ ᒪᒃᑯᒃᑐᐃᑦ ᐊᑐᖅᑐᕕᓃᑦ SPARX-ᒥᒃ ᐱᖑᐊᕈᑎᒥᒃ ᐃᑲᔪᖅᐹᓪᓕᕐᓂᕐᒪᑕ ᐃᓅᓯᕐᒥᒍᑦ ᐃᓗᐊᖅᓯᕚᓪᓕᐅᑎᒋᓪᓗᒍ, 62-ᐳᓴᖏᑦ ᐃᑲᔪᕐᓂᕋᐃᓚᐅᕐᒪᑕ ᓇᖕᒥᓂᖅ ᐋᕿᒃᓱᐃᓇᓱᐊᖅᑎᓪᓗᒋᑦ ᐊᑲᐅᖏᓕᐅᕈᑎᒋᔭᒥᓂᒃ ᖁᕕᐊᓱᓕᖅᐹᓪᓕᕈᑎᒋᓪᓗᒍ. 72-ᐳᓴᖏᑦ SPARX-ᒥᒃ ᐃᓱᒪᓂᕋᓚᐅᖅᑐᑦ ᐊᑐᕐᓂᖃᕐᓂᕋᐃᓪᓗᑎᒃ ᐃᓗᐊᕐᓂᓴᖅᒧᑦ ᐃᓱᒪᖏᓐᓂᒃ ᒪᒃᑯᒃᑐᐃᑦ ᓵᖓᖅᑎᑦᑎᔪᓐᓇᕐᒪᑕ.

ᓄᓇᕗᒥ ᖃᐅᔨᓴᕈᑕᐅᔪᑦ ᐃᒻᒪᖄ ᑲᔪᓯᑦᑎᐊᕈᓐᓇᕐᓂᐊᖅᐳᑦ ᒪᒃᑯᒃᑐᓂᒃ ᐃᓐᓇᕐᓄᓪᓗ ᓄᓇᓕᖕᓂ ᐊᑐᖅᑕᐅᓕᖅᐸᑕ 6-ᓂ ᓄᓇᓕᖕᓂ ᐆᒃᑐᖅᑕᐅᖕᒪᑦ ᐃᓄᖕᓄᑦ ᑐᕌᖓᓪᓗᓂ.

ᒦᓱ ᐅᖃᕆᓪᓗᓂ ᐳᕐ ᐊᒻᒪᓗ ᐱᖑᐊᖅ ᑖᒃᑯᐊ ᐃᖅᑲᓇᐃᔭᖅᑎᖃᕐᓂᐊᖅᑐᑦ ᓄᓇᕗᒥ ᐊᐅᓚᑦᑎᔨᒃᓴᒥᒃ, ᐃᖅᑲᓇᐃᔭᖃᑎᖃᕐᓗᑎᒃ ᐃᓅᓯᕐᒥᒃ ᐃᓵᒃᓯᒪᔪᓂᒃ ᐃᖃᓗᖕᓂ ᐊᒡᓚᒡᕕᖓᓂ. ᑕᐃᑲᓂ ᐃᖅᑲᓇᐃᔭᖅᑎᖃᓕᖅᐸᑕ, 6 ᓄᓇᓖᑦ ᖃᐅᔨᓴᕈᑕᐅᔪᓂ ᐃᓚᐅᔪᒪᔪᑦ ᓂᕈᐊᖅᑕᐅᓂᐊᕐᓗᑎᒃ. ᒦᓱ ᐅᖃᕆᓪᓗᓂ ᐱᒋᐊᕐᓂᐊᖅᑐᑦ 2018-ᒥ.

ᐴᕐ ᐅᖃᕆᓪᓗᓂ ᐱᖑᐊᕈᓯᖅ ᑖᓐᓇ “ᐊᔾᔨᒌᖏᑦᑐᓂᒃ ᐃᓗᓕᖃᖅᑐᖅ, ᑐᓐᖓᕕᖃᕐᓗᓂ ᑐᑭᓯᐅᒪᔭᐅᔪᓂᒃ ᐃᓱᒪᓐᓂᐊᖅᑎᓄᑦ ᖃᓄᖅ ᐃᓱᒪᒃᑯᑦ ᐊᒃᓱᕈᑕᐅᔪᑦ ᐋᕿᒃᑕᐅᔪᓐᓇᕐᒪᖔᑕ ᐊᑐᓂ ᐃᓄᖕᓄᑦ ᐃᒃᐱᖕᓇᖃᑦᑕᖅᑐᑦ ᒪᓕᒃᓗᒋᑦ, ᑭᓯᐊᓂᓕ ᐃᒻᒥᓂᒃ ᐃᓚᐅᕕᒋᓇᓱᐊᕆᐊᓕᖏᑦ ᑖᓱᒪ ᐋᕿᒃᑕᐅᓇᓱᐊᖅᑑᑉ ᐊᑐᕐᓂᖃᕈᓐᓇᖅᑐᖅ ᒪᒃᑯᒃᑐᓄᑦ ᐃᓚᐅᔪᓄᑦ ᐃᓅᓯᖏᓐᓄᑦ: ᐃᒫᒃ, ᑕᐃᓱᒪᖓᓂᑦ ᐃᓅᓯᕐᒥᒍᑦ ᓯᐊᓛᖑᑎᑕᐅᖃᖅᑕᖅᓯᒪᖕᒪᑕ ᐊᒃᓱᕉᑎᒋᔭᖏᑦ ᑲᑉᐱᐊᓴᖅᑕᐅᓪᓗᑎᒃ ᐱᑎᑕᐅᖃᑦᑕᖅᑐᕕᓃᑦ, ᒫᓐᓇᓗ ᐱᖅᑯᓯᖏᑎᒍᑦ ᐊᑭᕋᖅᑐᖅᑕᐅᔪᑦ ᐃᓅᓯᕐᒥᒍᑦ, ᑕᒪᒃᑯᓄᖓ ᐃᓱᒪᒃᑯᑦ ᐊᒃᓱᕈᓕᕐᓇᖅᑐᓄᑦ ᐃᑲᔪᖅᑎᖃᐅᖏᓗᐊᖅᑐᑦ ᓄᓇᓕᖓᓂ ᖃᑕᖑᑎᖏᓐᓂᓗ ᐊᓯᖏᓐᓂᓘᓐᓃᑦ …”

ᐴᕐ ᐅᖃᕆᓪᓗᓂ ᖃᐅᔨᓴᕈᑎᒋᔭᖓᒎᑦ ᑕᒪᓐᓇ ᑐᓐᖓᕕᖃᖅᑐᖅ ᓱᓕᔪᓂᒃ ᓄᓇᓕᖕᒥᐅᓄᑦ ᐱᕙᓪᓕᐊᑎᑕᐅᔪᑦ ᑲᔪᓯᑦᑎᐊᕈᓐᓇᕐᓂᖅᓴᐅᖕᒪᑕ ᐱᖅᑯᓯᖏᓐᓂᒃ ᐃᖅᑲᓱᖕᓂᖅᓴᐅᓗᑎᒃ ᓱᖑᓂᖅᓴᐅᔪᓐᓇᕐᒪᑕ ᐃᓅᓯᖏᓐᓄᑦ ᐊᑐᕐᓂᖃᕐᓂᖅᓴᐅᓗᑎᒃ ᐃᓱᒪᓐᓂᐊᕈᑏᑦ ᓄᓇᓕᖕᒥᐅᓄᑦ ᐃᑲᔪᖅᓴᖅᑕᐅᓗᑎᒃ.

ᒥᓱ ᐅᖃᕆᓪᓗᓂ ᑕᐃᒪᖓᓂᑦ ᐃᓱᒪᓐᓂᐊᕈᑎᓂᒃ ᑐᓴᕌᖓᒪ ᐊᐃᑦᑖᕈᓱᓲᖑᒐᒪ ᖃᐅᔨᓴᕈᑕᐅᔪᓂ ᐊᑐᕐᓂᐊᖅᐸᑕ ᓄᓇᕗᒥ, “ᐃᓛᖏᓛᒃ ᓇᓗᓇᖃᑦᑕᕐᒪᑕ ᑕᒫᓂᕐᒥᐅᓄᑦ ᐊᑐᕐᓂᖃᕐᓂᐊᕋᓗᐊᕐᒪᖓᑕ ᓄᓇᓕᖕᒥᐅᓄᑦ ᑐᕌᒐᕆᔭᐅᔪᓄᑦ.”

ᑭᓯᐊᓂᓕ ᐃᓱᒪᒋᔭᖓ ᑖᓐᓇ ᐆᒃᑐᕋᖅᑕᐅᒃᐸᑦ ᑐᓴᖅᓯᒪᓕᕐᒪᑕ “ᑐᑭᓕᐊᖅᑐᒥᒃ ᐊᑐᕐᓂᖃᕐᓂᖓᓂᒃ.”

“ᑖᓐᓇ ᐊᒃᓱᑲᓪᓚᒃ ᐃᒃᐱᖕᓇᕐᓂᖃᕈᓐᓇᕐᒪᑦ ᒪᒃᑯᒃᑐᓄᑦ ᓄᓇᓕᖕᓂ ᐃᓅᓯᖏᓐᓄᑦ ᐅᓪᓗᒥ, ᐃᓗᐊᕐᓂᖅᓴᒧᑦ ᓵᖓᖔᓕᕈᑕᐅᔪᓐᓇᖅᖢᓂ,” ᐅᖃᕆᓪᓗᓂ ᒦᓱᓐ.

ᐴᕐ ᐅᖃᕆᓪᓗᓂ ᓄᓇᓕᖕᓂᑦ ᐱᖔᖅᑐᓂᒃ ᐃᓅᓯᕐᒧᑦ ᐋᕿᒃᓱᐃᔪᑎᓂᒃ ᐱᑕᖃᕆᐊᖃᕐᒪᑦ - ᑐᓐᖓᕕᖃᕐᑐᓂᒃ ᓄᓇᓕᖕᒥᐅᑦ ᐃᓱᒪᒋᔭᖏᓐᓂᑦ ᐃᓱᒪᓐᓂᐊᕈᑏᑦ ᐱᔾᔪᑎᒋᓪᓗᒋᑦ, ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᓚᓕᐅᑎᓯᒪᒋᐊᖃᖅᖢᑎᒃ.

ᑖᓐᓇ ᓴᓇᔭᐅᔪᖅ ᐱᒋᐊᓚᖓᔪᖅ 6-ᓂ ᓄᓇᓕᖕᓂ, ᑭᓯᐊᓂᓕ ᒦᓱᓐ ᐅᖃᕆᓪᓗᓂ ᐱᖑᐊᕈᓯᖅ ᓇᒥᑐᐃᓐᓇᖅ ᖃᕆᑕᐅᔭᑎᒍᑦ ᐱᔭᐅᔪᓐᓇᕐᓂᐊᖅᑐᖅ ᑕᒪᐃᓐᓄᑦ ᓄᓇᕗᒥᐅᓄᑦ ᒪᒃᑯᒃᑐᓄᑦ ᓴᓇᖅᑯᑎᖃᖅᑐᓄᑦ ᓇᓕᐊᖕᓄᑐᐃᓐᓇᖅ ᖃᕆᑕᐅᔭᑎᒎᖅᑐᓄᑦ.