ᐊᖁᒍᓐᓇᑎᐅᑎᑦ ᐃᓱᒪᖅᓲᑎᒋᔭᐅᖏᑉᐳᑦ

356

ᐊᖁᒍᓐᓇᐅᑎᒥᒃ ᓚᐃᓯᓐᓯᑖᖅᓯᒪᔪᒍᑦ, ᐊᖁᒍᓐᓇᖃᑦᑕᕐᓂᐊᓕᖅᐳᒍᑦ ᑕᕆᐅᒧᑦ ᒪᑐᐃᖅᓯᒪᓕᖅᐸᑦ ᐊᖅᑯᑦ, ᓯᓚᒥᓘᓐᓃᑦ ᐃᓚᔮᕗᓪᓗ ᓂᕆᔭᖅᑐᖃᑎᒋᖃᑦᑕᕐᓗᒋᑦ ᓄᓇᒥ ᓂᐅᕕᕐᕕᓕᐊᕈᓐᓇᖅᖢᑕᓗ ᓂᕿᓂᒃ ᐊᓯᖏᓐᓂᒡᓗ. ᖃᐅᔨᒪᓕᕐᓗᓂ ᖃᓄᐃᓕᐅᕆᐊᒃᓴᖅ ᐊᖁᓪᓗᓂ ᒪᓕᒋᐊᖃᖅᐳᒍᑦ ᒪᓕᒃᑕᐅᒋᐊᖃᖅᑐᓂᒃ, ᑕᐃᒪᓐᓇᓗ ᐃᓕᓐᓂᐊᓚᐅᕐᓗᑎᑦ Class4−ᒥᒃ, 5ᒥᒡᓘᓐᓃᑦ ᓚᐃᓯᓐᓂᖃᓚᐅᕐᓗᑎᑦ ᐅᕙᓘᓐᓃᑦ ᐊᓯᖏᓐᓂᒃ ᐊᖁᒍᓐᓇᐅᑎᑖᕈᓐᓇᕐᓂᐊᓕᖅᐳᑎᑦ ᐅᖁᒪᐃᑦᑐᓕᕆᒍᑎᓂᒃ ᐊᖁᖃᑦᑕᓕᕐᓗᑎᑦ.

ᓄᓇᓕᖕᓂ ᒐᕙᒪᒋᔭᐅᔪᑦ ᑎᑎᕋᖃᑦᑕᖅᐳᑦ ᓇᓗᓇᐃᒃᑯᑕᓂᒃ ᑎᑎᕋᖅᓯᒪᔪᓂᒃ ᑕᑯᒃᓴᐅᑎᑎᓪᓗᑎᒃ ᐊᖁᑎᓄᑦ ᒪᓕᒃᑕᐅᒋᐊᖃᖅᑐᓂᒃ. ᐊᖅᑯᑎᐅᑉ ᓴᓂᐊᓂ ᑕᑯᔪᓐᓇᕐᓂᐊᖅᐳᑎᑦ ᓇᓗᓇᐃᒃᑯᑕᒥᒃ ᑎᑎᕋᖅᓯᒪᔪᒥᒃ ᖁᖅᓱᖅᑕᒥᒃ ‘ᐅᑕᕿᒋᐊᖃᖅᑐᑦ’ ᐊᓯᖏᑦ ᓄᓇᓯᐅᑎᑦ ᐃᖏᕐᕋᓯᖅᑳᕆᐊᖃᖅᖢᑎᒃ ᒪᓕᒋᐊᖃᖅᐸᐃᓪᓗ ᐊᒻᒪᓗ ᑕᒪᒃᑯᐊ ᐊᐅᐸᖅᑐᑦ ᑎᑎᕋᖅᓯᒪᓪᓗᑎᒃ ‘ᓄᖅᑲᕆᑦ’. ᐊᑯᓐᓂᖏᓐᓂ ᓇᓗᓇᐃᒃᑯᑕᐃᑦ ᑖᒃᑯᐊ ᓈᓴᐅᑎᓂᒃ ᑎᑎᕋᖅᓯᒪᓪᓗᑎᒃ ᖃᓄᑎᒋ ᓱᒃᑲᓕᓴᕆᐊᖃᕐᓂᕐᓄᑦ ᓄᓇᓕᖕᒥ. ᑕᒪᒃᑯᓇᓂᓗ ᐃᓕᓐᓂᐊᕐᕕᑦ ᓴᓂᐊᓂ, ᐅᔾᔨᖅᑐᖁᔨᒍᑎᑦ ᐅᔾᔨᖅᑐᕆᐊᖃᖅᑕᑎᑦ ᐅᓗᕆᐊᓇᖅᑐᒦᑦᑕᐃᓕᒋᐊᖃᕐᓂᖏᓐᓄᑦ ᓱᕈᓯᑦ ᐱᓱᒃᑐᑦ ᐅᓪᓚᕋᔭᒃᑐᓪᓗ ᐊᖅᑯᑎᐅᑉ ᓴᓂᐊᓂ ᐃᓕᓐᓂᐊᕐᕕᖕᒥᖔᖅᖢᑎᒃ ᐃᓕᓐᓂᐊᕐᕕᖕᒧᖓᐅᓪᓗᑎᒡᓗ.

ᐃᓄᒋᐊᖕᓂᖅᓴᓂ ᓄᓇᓕᖕᓂ ᓄᓇᓕᐸᐅᔭᓂᓗ ᐊᓯᖏᓐᓂᒃ ᒪᓕᖁᔨᒍᑎᖃᖅᐳᑦ ᒪᓕᖏᑦᑐᑦ ᐊᖁᒍᓐᓇᐅᑎᖏᑦ ᓚᐃᓯᓐᓯᖏᑦ ᐊᖅᓵᖅᑕᐅᔪᓐᓇᖅᖢᑎᒃ ᐊᑭᓖᓗᑎᒡᓗ ᑮᓇᐅᔭᓂᒃ ᐊᑐᖅᐸᑕ ᐅᖄᓚᐅᑎᕋᓛᒥᖕᓂᒃ ᐊᖁᑦᖢᑎᒃ ᑕᒪᒃᑯᐊᓗ ᒪᓕᖁᔭᐅᓯᒪᓕᖅᖢᑎᒃ ᓄᓇᕗᒥ.

ᑕᒪᒃᑯᐊ ᐅᔾᔨᖅᑐᑦᓯᐊᕆᐊᖃᕐᓂᖅᓴᐃᑦ ᐊᖅᑯᑎᒥ ᐅᖁᒪᐃᑦᑐᓕᕆᒍᑎᓂᒃ ᐊᖁᑦᑐᑦ ᐅᓯᖃᑦᑕᐅᑎᓕᖕᓂᒡᓗ. ᑕᑯᖃᑦᑕᖅᓯᒪᕗᖓ ᓄᓇᓕᖕᓂ ᐃᖅᑲᓇᐃᔭᖅᑎᓄᑦ ᐊᑯᑕᐅᔪᑦ ᓄᓇᓯᐅᑎᑦ ᑖᒃᓯᓪᓗ ᓄᖅᑲᖅᑕᕐᕕᖕᒧᐊᕌᖓᒥᒃ ᓯᑕᒪᓄᑦ ᓄᓇᓯᐅᑎᓄᑦ ᓄᖅᑲᕐᕕᐅᒋᐊᖃᖅᑐᓂ ᓱᒃᑲᐃᓕᒋᐊᖃᑦᑕᖅᐳᑦ ᑭᓯᐊᓂ ᓄᖅᑲᖏᑦᖢᑎᒃ ᑕᒪᒃᑯᐊ ᐊᓯᖏ ᓄᓇᓯᐅᖅᑐᑦ ᐅᑕᕿᑎᓪᓗᒋᑦ ᓄᖅᑲᖏᑦᑐᒥᒃ.

ᑕᐃᒪᓐᓇᐃᓕᐅᖃᑦᑕᖅᐸᑕ, ᐋᓐᓂᖅᑐᖃᑐᐃᓐᓇᕆᐊᖃᖅᐳᖅ ᐱᕐᓗᐊᕿᔪᖃᕐᓗᓂᓗ ᓱᕋᒃᑐᖃᕐᓗᓂᓗ ᓄᓇᓯᐅᑎᓂᒃ. ᖃᐅᔨᒪᒋᐊᖃᖅᐳᒍᑦ ᐊᖁᒍᓐᓇᐅᑎᖃᕐᓂᖅ ᐃᓱᒪᖅᓲᑕᐅᖏᒻᒪᑦ ᓚᐃᓯᓐᓯᑖᕆᐊᖃᕐᒪᑕ ᐊᖁᒍᒪᔪᑦ ᐃᓱᒪᖅᓱᑐᐃᓐᓇᕐᓗᓂ ᓚᐃᓯᓐᓯᑖᕈᓐᓇᖏᒻᒪᑕ ᑭᒃᑯᑐᐃᓐᓇᐃᑦ. ᑕᒪᒃᑯᐊᓗ ᐊᖁᑦᑐᑦ ᓯᑭᑑᓂᒃ ᕼᐋᓐᑕᓂᒡᓗ ᒪᓕᒋᐊᖃᕆᓪᓗᑎᒃ ᐊᖁᒍᓐᓇᕐᓂᐊᕈᑎᒃ.

ᐃᓕᓐᓂᐊᕐᓂᕋᓂ Class3−ᑖᕋᓱᐊᖅᖢᖓ, ᖃᐅᔨᒪᒋᐊᖃᓚᐅᖅᐳᒍᑦ ᐃᓕᓐᓂᐊᖅᑎᑕᐅᓚᐅᖅᐳᒍᓪᓗ ᐃᖅᑲᐃᑎᑕᐅᓪᓗᑕᓗ ᐅᓯᔪᖅ ᐅᓯᖃᑦᑕᐅᑎᓕᒃ ᓄᓇᓯᐅᑦ ᓱᒃᑲᐃᓪᓗᓂ ᐊᐅᓪᓛᕆᐊᖃᖅᐳᖅ ᓱᒃᑲᐃᓴᕆᐊᕐᓗᓂᓗ 100 ᕖᑦ (ᐃᓯᒐᐃᑦ) ᐊᖅᑯᑎᐅᑉ ᐃᓱᐊᓂᑦ ᐃᖏᕐᕋᓕᕈᓂ. ᑕᐃᒪ ᐳᓪᓚᐅᔭᒃᑯᑦ ᓄᖅᑲᖅᑕᕈᑎᖃᕋᓗᐊᕐᓗᓂ, ᐊᐅᓚᐅᑎᖏᑦ ᖃᓄᐃᓕᐅᕐᓂᖏᑦ ᒪᓕᑦᓯᐊᕆᐊᖃᕐᓇᖅᐳᑦ ᑭᓯᐊᓂ ᐅᖃᓕᒫᖃᑦᑕᕐᓗᖓ ᑎᑎᕋᖅᓯᒪᔪᓂᒃ ᖃᐅᔨᓴᐃᓐᓇᕐᓗᖓ ᑭᓱᑕᖃᕐᓂᖓᓄᑦ ᓯᕗᓂᓐᓂ.

ᐊᖁᓕᕌᖓᑦᑕ ᐃᓱᒪᐃᓐᓇᕆᐊᖃᖅᐳᒍᑦ ‘ᐅᔾᔨᖅᑐᑦᓯᐊᕆᐊᖃᕐᓂᕐᒧᑦ’ ᖃᐅᔨᒪᐃᓐᓇᕐᓗᓂᓗ ᐃᓱᒪᖅᓲᑎᒋᔭᐅᖏᒻᒪᑦ ᓚᐃᓯᓐᓯᑖᕐᓂᖅ.