ᐊᕐᕕᐊᕐᒥ ᐊᖑᑦ ᐃᓱᒪᒋᔭᐅᕗᖅ ᑲᑉᐱᐊᑦᑕᐅᙱᓐᓂᖓᓂ

881

ᐊᕐᕕᐊᕐᒥᐅᑕᖅ ᐊᖑᑦ ᑕᐃᔭᐅᕗᖅ ᑲᑉᐱᐊᑦᑕᐅᙱᓐᓂᖓᓂ ᑐᖁᓚᐅᖅᑎᓪᓗᒍ ᓴᐳᔾᔨᓯᒪᓪᓗᓂ ᕿᑐᙵᒥᓂᑦ ᓇᓄᕐᒧᑦ ᐹᖅᑕᐅᓂᐅᔪᒧᑦ.

ᒫᓐᓇᐅᔪᒥ ᐅᖃᐅᓯᐅᔪᓐᓇᑐᐃᓐᓇᖅᐳᖅ ᑲᑉᐱᐊᑦᑕᐅᙱᓐᓂᖓᓂ,” ᐅᖃᓚᐅᖅᐳᖅ ᐋᓐᑐᕆᐊ ᐄᓴᓗ.

ᓄᓇᓕᖕᒥᐅᑕᐃᑦ ᐅᑕᖅᑭᕗᑦ ᐃᐊᕋᓐ ᒋᐱᓐᔅ ᑎᒥᖓᓐᓂ ᐅᑎᖅᑎᑕᐅᓂᐊᕐᓂᖓᓂ ᐊᕐᕕᐊᒧᑦ ᑐᖁᓚᐅᖅᑎᓪᓗᒍ ᓴᐳᔾᔨᓯᒪᓪᓗᓂ ᕿᑐᙵᒥᓂᑦ ᓇᓄᕐᒧᑦ ᐹᖅᑕᐅᓂᖓᓂ ᔪᓚᐃ 3-ᖑᑎᓪᓗᒍ.
People in Arviat wait for the return of Aaron Gibbons on the shore of the commuity after he died saving his children from a polar bear attack. photo courtesy of Gordy Kidlapik

ᐄᓴᓗᒃ, ᐅᖓᓯᒃᑐᒥ ᐃᓚᒋᔭᐅᔪᖅ ᑐᖁᔪᒥ, ᐅᖃᓚᐅᖅᐳᖅ ᐃᓚᒥᓂᑦ ᐸᖅᑭᒃᑳᓘᓂᖓᓂ ᐆᒻᒪᑎᕐᔪᐊᖃᖅᖢᓂ.

ᐃᓄᑦᑎᐊᕙᒻᒪᕆᐅᓚᐅᖅᐳᖅ ᓇᒡᓕᒍᓱᐃᓐᓇᐅᔭᖅᑐᒥ ᕿᑐᙵᒥᓂᑦ,” ᐅᖃᓚᐅᖅᐳᖅ.

ᐃᐊᕋᓐ ᒋᐱᓐᔅ, 31, ᐱᑭᐅᑕᕆᐊᖅᓯᒪᓚᐅᖅᐳᖅ ᕿᑐᙵᒥᓂᑦ Sentry ᕿᑭᖅᑕᖓᓂ, 10 ᑭᓛᒥᑕᐸᓘᔪᒥ ᐅᖓᓯᖕᓂᓕᖕᒥ ᓄᓇᓕᖕᓂ ᔪᓚᐃ 3-ᖑᑎᓪᓗᒍ ᓇᓄᖅ ᐱᒋᐊᖅᑎᓪᓗᒍ.

ᖁᑭᐅᑎᖃᕐᓇᓂ, ᒋᐱᓐᔅ ᐃᒻᒥᓂ ᐃᓕᓚᐅᖅᐳᖅ ᓇᓅᑉ ᐊᒻᒪ ᕿᑐᙵᖏᑕ ᕿᑎᐊᓄᑦ ᐊᒻᒪ ᐅᖃᐅᑎᓪᓗᓂᒋᑦ ᐅᒥᐊᕐᒧᑦ ᐅᓪᓚᖁᓪᓗᓂᒋᑦ ᐊᒻᒪ ᐆᕚᑎᒍᑦ ᐃᑲᔪᖅᑕᐅᔪᒪᓗᑎ.

ᒋᐱᓐᔅ ᓇᓂᔭᐅᓚᐅᖅᐳᖅ ᑐᖁᖓᓪᓗᓂ ᐱᒋᐊᕐᕕᐅᓂᐅᔪᒥ ᐊᒻᒪ ᑲᑎᙵᓂᐅᔪᓂ ᖃᓂᒋᔭᖓᓐᓃᑦᑐᓂ ᐊᖑᓇᓱᒃᑎᓂᑦ ᑭᖑᓂᐊᒍᑦ ᖁᑭᖅᓯᓚᐅᖅᐳᑦ ᐊᒻᒪ ᑐᖁᑕᐅᓪᓗᓂ ᓇᓄᖅ.

ᒪᕐᕈᒋᔭᐅᓪᓗᓂ ᑐᖁᑕᐅᔪᖃᖅᖢᓂ ᐹᖅᓯᓂᐅᓚᐅᖅᐳᖅ ᑭᕙᓪᓕᕐᒥ ᑕᐃᒪᓐᓇᑎᒋ ᐊᕐᕌᒎᔪᓂᑦ. ᐊᐃᑉᐸᖓ ᖃᓄᐃᓐᓂᐅᓚᐅᖅᐳᖅ 2000-ᒥ ᐊᖑᒻᒥ ᐹᖅᑕᐅᔪᖃᖅᑎᓪᓗᒍ ᑲᖏᖅᖠᓂᐅᑉ ᖃᓂᒋᔭᖓᓂ.

ᑕᖅᑭᐅᓚᐅᖅᑐᒥ, ᓇᓄᕐᒥ ᖁᑭᖅᑕᐅᔭᕆᐊᖃᓚᐅᖅᐳᖅ ᑲᖏᖅᖠᓂᕐᒥ ᓄᓇᓕᖕᓄᑦ ᖃᓂᒡᓕᓗᐊᖅᑎᓪᓗᒍ.

ᒪᓕᒃᑐᒥ ᐱᓂᕐᓗᕐᔪᐊᕐᓂᐅᓚᐅᖅᑐᒥ ᒍᐊᑎ ᑭᓪᓛᐱᒃ, ᒋᐱᓐᔅ ᐃᓚᖓ ᓈᓚᓚᐅᖅᑐᒥ ᐸᓂᖓᑕ ᐅᖃᓗᖕᓂᖓᓂ ᐃᑲᔪᖅᑕᐅᔪᒪᔪᒥ ᐆᕚᑎᒍᑦ, ᑐᕕᑐᒃᑰᓚᐅᖅᐳᖅ ᑭᐅᓘᑎᖃᕐᓂᕐᒧᑦ ᓇᓄᕐᓄᑦ ᐳᓚᕋᖅᑎᑕᐅᓂᐅᕙᒃᑐᓄᑦ, ᐱᓗᐊᖅᑐᒥ ᑰᒡᔪᐊᕌᓘᑉ ᖃᓂᒋᔭᖓᓂ, ᐊᔭᐅᕆᓂᐅᔪᓂ ᓇᓄᕐᓂ ᐃᓗᐊᕐᓂᖅᓴᐅᑎᑕᐅᓇᓱᐊᕐᓂᖏᓐᓂ ᐃᓄᖕᓃᑎᓪᓗᒋᑦ.

ᑭᓪᓛᐱᒃ ᐅᖃᓚᐅᖅᐳᖅ ᑕᒪᓐᓇ ᐊᒃᑐᐃᓯᒪᓂᖓᓂ ᓇᓄᐃᑦ ᐃᓕᖅᑯᓯᖃᕐᕕᒋᔭᖓᓐᓂ ᑭᕙᓪᓕᕐᒥ, ᓇᓄᐃᑦ ᐅᑎᖅᑕᓲᖑᖕᒪᑕ ᑕᑉᐸᐅᖓ ᑕᐅᓄᖓᓗ ᓯᒡᔭᖅᐸᓯᒃᑯᑦ ᑲᖏᖅᓱᐊᓗᖕᒥ.

ᐄᓴᓗᒃ, ᐊᐅᓚᑦᑎᔨᐅᔪᖅ ᐊᕐᕕᐊᓂ ᐊᖑᓇᓱᒃᑐᓕᕆᔨᒃᑯᓐᓂ ᒥᑭᒋᐊᕐᓂᐊᖅᑎᓂᓪᓗ ᑲᑐᔾᔨᖃᑎᒌᖑᔪᓄᑦ, ᐅᖃᓚᐅᖅᐳᖅ ᐃᓄᐃᑦ ᑭᕙᓪᓕᕐᒥ ᑐᓂᔭᐅᒃᑲᓐᓂᓪᓗᐊᖅᐳᑦ ᓇᓐᓄᒍᓐᓇᐅᑎᓂ ᓇᓗᓇᐃᒃᑯᑕᐅᔪᓂ.

ᐅᓄᖅᓯᒋᐊᕋᓱᐊᖅᑕᕗᑦ ᑰᑕᖓ ᑭᓯᐊᓂ ᐊᔪᕐᓇᕐᒪᑦ ᐃᓅᓪᓗᑕ,” ᐅᖃᓚᐅᖅᐳᖅ.

ᔭᓄᐊᕆᒥ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᖏᖅᓯᓚᐅᖅᐳᑦ ᐅᓄᖅᓯᒋᐊᖅᓯᓂᖏᓐᓂ ᑲᑎᓪᓗᒍ ᐱᔪᓐᓇᖅᑎᑕᐅᔪᒥ ᐊᖑᓇᓱᒃᑕᐅᓂᖏᓐᓂ ᐱᓇᖕᓇᒥ ᑲᖏᖅᓱᐊᓗᖕᒥ 28-ᓂ 34-ᓄᑦ ᓇᓄᕐᓄᑦ ᐊᒥᐊᒃᑯᖓᓄᑦ 2017-18 ᐊᖑᓇᓱᖕᓂᕐᒧᑦ ᐊᕐᕌᒍᖓᓄᑦ.

2016-ᒥ ᐅᓂᒃᑳᓕᐊᒥ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᓐᓄᑦ ᑲᑎᒪᔨᖏᓐᓄᑦ ᓇᓂᓯᓚᐅᖅᐳᑦ 842-ᐸᓗᖕᓂ ᓇᓄᖅᑕᖃᕐᓂᖓᓂ ᓄᓇᖃᖅᑐᓂ ᐱᓇᖕᓇᒥ ᑲᖏᖅᓱᐊᓗᖕᒥ ᐊᕕᒃᓯᒪᓂᐅᔪᒥ ᕿᑎᐊᓂ ᐃᒡᓗᓕᒑᕐᔪᖕᒥ ᐊᒻᒪ ᑰᒡᔪᐊᕌᓗᖕᒧᑦ, ᒫᓂᑑᐸᒥ. ᐅᓄᕐᓂᕆᔭᖓ ᑲᑖᕐᔪᒃᓯᒪᓕᖅᐳᖅ 2011-ᒥ ᖃᖓᑕᓲᒃᑯᑦ ᓇᐃᓴᐃᓂᐅᓚᐅᖅᑐᒥ, ᓇᐃᓴᐃᓚᐅᖅᑐᓂ 949-ᓂ ᓇᓄᕐᓂᑦ.