ᐊᕐᕌᒍᐸᓗᖕᓂ 50−ᓄᑦ ᐊᓯᔾᔨᕐᓂᐅᔪᒥ ᐃᓅᓯᖓᓐᓂ ᐸᖕᓂᖅᑑᒥᐅᑕᒧᑦ ᐊᖑᒻᒧᑦ

by Michele LeTourneau- November 7, 2018

ᓵᓕ ᖁᒻᒧᐊᖅᑐᖅ, ᓄᓕᐊᖓ ᓇᐃᐆᒥ, ᐊᒻᒪ ᕿᑐᙵᖏᑦ ᐅᑭᐅᓖᑦ ᐱᖓᓱᓂ 19−ᒧᑦ ᐱᒋᐊᓚᐅᖅᐳᑦ ᓄᑖᖑᔪᒥ ᐃᓅᓯᕆᓂᐊᖅᑕᒥᓂᑦ ᑕᒪᑐᒪᓂ ᐊᕐᕌᒎᔪᒥ ᐸᖕᓂᖅᑑᕐᒥ ᐃᖃᓗᖕᓄᑦ.

ᓵᓕ ᖁᒻᒧᐊᖅᑐᖅ, ᑕᓕᖅᐱᖕᒥ, ᑕᑯᒃᓴᐅᖃᑎᖃᖅᑐᖅ ᐃᓕᓐᓂᐊᖃᑎᒥᓂ ᐊᕙᑎᓕᕆᓂᕐᒧᑦ ᓄᑖᙳᖅᐸᓪᓕᐊᔪᓄᑦ ᐃᓕᓐᓂᐊᖅᑎᒥ ᒪᐃᑯᓪ ᓵᓚᒨᓂᒥ, ᐸᖕᓂᖅᑑᕐᒥ ᕿᒪᒃᓯᕗᖅ, ᐊᑭᓂᐅᔪᒥ ᐊᖏᕐᕋᖓᓂ, ᐊᒻᒪ ᐊᕐᕌᒍᑦ 20-ᐅᖓᑖᓂ ᐃᖅᑲᓇᐃᔮᕆᔭᒥᓂᑦ ᐃᓕᓴᖅᓯᒪᓂᕐᒥ ᐱᓕᕆᐊᒥᓄᑦ ᐸᐃᑉᐹᖃᖅᖢᓂ ᓱᓪᓗᐊᓗᓕᕆᔨᐅᓪᓗᓂ ᐊᒻᒪ ᐅᖅᑰᓴᐅᒻᒧᑦ ᐊᐅᓚᐅᓯᕆᔨᐅᓪᓗᓂ ᐱᓕᕆᐊᕆᔪᒪᐃᓐᓇᖅᑕᒥᓂᑦ ᐱᓇᓱᐊᖅᖢᓂ.

“50−ᑲᓴᐅᓕᖅᖢᓂ,” ᖁᒻᒧᐊᖅᑐᖅ, ᐃᓕᓴᖅᓯᒪᓂᕐᒥ ᐱᓕᕆᐊᒥᓄᑦ ᐸᐃᑉᐹᖃᖅᖢᓂ ᓱᓪᓗᐊᓗᓕᕆᔨᐅᓪᓗᓂ ᐊᒻᒪ ᐅᖅᑰᓴᐅᒻᒧᑦ ᐊᐅᓚᐅᓯᕆᔨᐅᓪᓗᓂ ᐊᕐᕌᒍᑦ 20 ᐅᖓᑖᓂ, ᐱᓯᒪᑦᑎᓚᐅᖅᐳᖅ ᐱᓕᕆᐊᕆᔪᒪᐃᓐᓇᖅᑕᒥᓂᑦ.
“ᐊᒃᑲᖃᓚᐅᖅᐳᖓ ᐆᒪᔪᓐᓂᐊᖅᑎᐅᑉ ᐃᑲᔪᖅᑎᒋᓚᐅᖅᑕᖓᓂ. ᐅᐱᒋᕙᓚᐅᖅᐸᕋ ᐱᓕᕆᐊᕆᔭᖓᓂ. ᐊᐅᓪᓛᖃᑎᖃᖅᐸᓚᐅᖅᐳᖅ ᐆᒪᔪᓕᕆᔨᒥ, ᐊᒻᒪ ᐊᐅᓪᓛᖅᐸᒃᖢᑎᒃ ᐊᐅᔭᒃᑯᑦ ᐊᒻᒪ ᐅᑭᐊᒃᓵᒃᑯᑦ, ᐅᑭᐅᒃᑯᑦ ᐊᒻᒪ ᐅᐱᕐᙶᒥ. ᐊᐅᓪᓚᖅᓯᒪᕙᓚᐅᖅᐳᑦ ᐅᓪᓗᓄᑦ ᐱᖓᓱᓄᑦ, ᑎᓴᒪᓄᓪᓘᓐᓃᑦ,” ᐅᖃᓚᐅᖅᐳᖅ ᖁᒻᒧᐊᖅᑐᖅ.
“ᐊᒃᑲᒐ ᓴᓂᓕᕆᓚᐅᕋᒃᑯ ᐊᒻᒪ ᐊᖏᕐᕋᕌᖓᒥ ᐅᖃᐅᑎᕙᓚᐅᖅᐹᖓ ᐊᑖᑕᒐᓘᓐᓃᑦ ᐊᐃᒃᓯᖁᔨᓪᓗᓂ ᑐᒃᑐᒥ ᓇᑦᑎᕐᒥᓪᓘᓐᓃᑦ. ᑕᒪᓐᓇ ᐅᕙᓐᓂ ᑲᔪᖏᖅᓴᐃᓚᐅᖅᐳᖅ.”
ᑕᐃᒪᙵᓂ ᐃᓱᒪᒋᕙᓚᐅᖅᐸᖓ – ᐃᖅᑲᓇᐃᔭᕐᓂᖅ ᑕᒪᒃᑭᓂ ᐃᒡᓘᑉ ᐃᓗᐊᓂ ᐊᒻᒪ ᓯᓚᒥ – ᑭᓯᐊᓂ ᐃᓕᓐᓂᐊᓯᓐᓇᕐᓗᓂ ᐃᖅᑲᓇᐃᔭᖅᑎᐅᓂᕐᒥ ᐱᕕᒃᓴᖃᕐᓂᐅᔪᒥ ᓴᖅᑭᑦᑐᖃᓚᐅᖅᐳᖅ, ᐊᑐᐃᓐᓇᐅᑎᑕᐅᓪᓗᓂ ᒐᕙᒪᒃᑯᓐᓄᑦ.
“ᐱᓚᐅᖅᐸᕋ. ᐊᕐᕌᒍᑦ 20 ᐅᖓᑖᓂ ᐅᔾᔨᓱᑕᐃᓐᓇᓚᐅᖅᐳᖓ, ‘ᑕᑯᒋᑦ, ᓱᓕ ᐱᔪᒪᓂᖃᖅᑐᖓ ᐱᓕᕆᔪᒪᔭᓐᓂᑦ.'”
ᖁᒻᒧᐊᖅᑐᖅ ᐱᒋᐊᕋᓱᓚᐅᖅᐳᖅ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᐊᕙᑎᓕᕆᓂᕐᒧᑦ ᓄᑖᙳᖅᐸᓪᓕᐊᔪᓄᑦ ᐱᓕᕆᐊᖑᔪᒥ, ᐊᒻᒪ ᐅᖃᖃᑎᖃᓚᐅᖅᑎᓪᓗᒍ ᓇᐃᐆᒥᒥ, ᐃᓱᒪᓕᐊᖑᓚᐅᖅᐳᖅ ᓅᓐᓂᐊᕐᓂᖏᓐᓂ ᐊᖓᔪᖅᑳᖃᕐᕕᖕᒧᑦ. ᓇᐃᐆᒥᑕᐅᖅ ᐊᓯᐊᓅᕈᒪᓯᒪᓚᐅᖅᐳᖅ.
“ᖃᐅᔨᒪᓗᐊᓚᐅᙱᓚᖓ ᓂᕈᐊᖅᑕᐅᓂᐊᕐᓂᓐᓂᑦ. ᒪᒃᑯᒃᑐᐃᓐᓇᐸᓘᓚᐅᕐᒪᑕ,” ᐅᖃᓚᐅᖅᐳᖅ ᖁᒻᒧᐊᖅᑐᖅ.
ᑭᓯᐊᓂ ᓂᕈᐊᖅᑕᐅᓚᐅᖅᐳᖅ. ᐃᓚᒌᓕᒫᑦ ᖁᕕᐊᓚᐅᖅᐳᑦ ᓅᓐᓂᐊᕐᓂᖏᓐᓂ, ᓱᖏᐅᔾᔨᓂᖃᕆᐊᖃᓚᐅᖅᐳᑦ ᐸᖕᓂᖅᑑᒥᐅᑕᐅᓚᐅᕐᒪᑕ ᑕᐃᒪᙵᓂ 1999−ᐸᓗᖕᒥ. ᐃᓕᓐᓂᐊᕐᕕᖓ ᐊᔪᕐᓇᓚᐅᖅᐳᖅ ᓱᕈᓯᓄᑦ, ᐊᔪᕐᓇᕐᓂᖅᓴᐅᒐᓚᒃᖢᓂ, ᐱᓗᐊᖅᑐᒥ ᓇᐃᓴᐅᓯᕆᓂᕐᒧᑦ ᐊᒻᒪ ᖃᐅᔨᓴᕐᓂᕐᒧᑦ, ᐊᒻᒪ ᖃᓪᓗᓈᑎᑑᕐᓂᖅᓴᒻᒪᕆᐅᓪᓗᑎᒃ.
“ᐊᒃᓱᕉᓴᓚᐅᑲᓚᐅᑲᒃᑐᑦ ᓯᕗᓪᓕᖅᐹᒥ ᑕᖅᑭᐸᓗᖕᒧᑦ, ᐊᒻᒪ ᒫᓐᓇ ᐃᓕᑦᑎᕙᓪᓕᐊᓕᖅᑐᑦ ᐊᒻᒪ ᐊᙳᑎᕙᓪᓕᐊᓕᖅᖢᑎᒃ ᐃᓕᓐᓂᐊᕐᕕᐊᕈᓯᖕᒥᖕᓂᑦ,” ᐅᖃᓚᐅᖅᐳᖅ ᖁᒻᒧᐊᖅᑐᖅ.
ᐊᑖᑕᑦᑕᐅᖅ ᓱᖏᐅᔾᔨᓇᓱᒋᐊᖃᓚᐅᕆᕗᖅᑕᐅᖅ, ᖃᐅᔨᓴᕐᓂᕐᒧᑦ ᐱᓕᕆᓂᕐᒧᑦ.
“ᐃᓱᒪᒐ ᐋᖅᑭᒋᐊᑦᑎᐊᕆᐊᖃᓚᐅᖅᐸᕋ ᐃᓕᓐᓂᐊᖅᑎᓃᖃᑕᐅᒐᒪ ᐅᕙᓐᓂᑦ ᓄᑲᖅᖠᐅᓂᖅᓴᐅᔪᓂᑦ. ᐊᖑᒻᒪᑎᔪᓐᓇᔾᔮᕋᓱᒋᓚᐅᙱᑦᑐᖓ. ᐃᓕᑦᑎᔪᓐᓇᕐᓂᐊᖅᐳᖓ ᐊᒻᒪ ᐃᖅᑲᐅᒪᓗᒍ? ᑲᒪᓇᖅᑐᒥ, ᓱᓕ ᐃᓕᑦᑎᔪᓐᓇᖅᑐᖓ.” ᐅᖃᓚᐅᖅᐳᖅ ᖁᒻᒧᐊᖅᑐᖅ, ᐃᓚᒋᐊᖅᓯᓪᓗᓂ ᐃᓕᑦᑎᕙᓪᓕᐊᕗᖅ ᑕᒪᒃᑭᓂ ᓄᑖᖑᔪᒥ ᐅᖃᐅᓯᕐᒥ ᖃᐅᔨᓴᕐᓂᕐᒧᑦ.
ᐃᓱᒪᕗᖅ ᐊᓯᐊᓂ ᐃᓐᓇᐅᓂᖅᓴᒥ ᐃᓕᓐᓂᐊᖅᑎᐅᔪᒥ, ᒪᐃᑯᓪ ᓵᓚᒨᓂ, ᑐᑭᓯᐅᒪᓂᖅᓴᐅᓂᖓᓂ.
“ᐃᓚᑰᓂᐅᔪᖅ ᐅᕙᓂ ᐃᖃᓗᖕᓃᓯᒪᕗᖅ ᐊᑯᓂᐅᔪᒥ ᐊᒻᒪ ᐃᖅᑲᓇᐃᔭᓚᐅᖅᖢᓂ CBC−ᑯᓐᓂ, ᐊᒻᒪ ᐅᖃᐅᓯᕐᓂ ᑐᑭᓯᐅᒪᓂᖅᓴᐅᔭᖏᓐᓂᑦ. ᐅᕙᖓ, ᐸᖕᓂᖅᑑᒥᓛᐅᕋᒪ, ᐊᒻᒪ ᓯᕗᓪᓕᖅ ᐅᖃᐅᓯᕗᑦ ᐃᓄᒃᑎᑑᖅᐳᖅ. ᐃᓛᓐᓂᒃᑯᑦ ᐊᐱᕆᔭᕆᐊᖃᓲᖑᕗᖓ, ‘ᖃᓄᐃᓕᖕᒪᑦ? ᐅᓇ ᖃᓄᖅ ᑐᑭᖃᕐᒪᑦ?’ ᖃᓪᓗᓈᑎᑐᑦ ᐅᖃᕈᓐᓇᖅᓯᕚᓪᓕᓕᖅᐳᖓ,” ᖁᒻᒧᐊᖅᑐᖅ ᐅᖃᓚᐅᖅᐳᖅ.
ᕿᑐᙵᖏᑦ ᐅᖃᕈᓐᓇᖅᓯᕚᓪᓕᓕᕆᕗᑦ ᖃᓪᓗᓈᑎᑐᑦ, ᐃᓚᖃᖅᑐᒥ ᐅᑭᐅᓕᖕᒥ ᐱᖓᓱᓂᑦ ᖃᓪᓗᓇᐅᔭᕈᓐᓇᙱᑦᑎᐊᒻᒪᕆᒃᑐᒥ. ᑭᓯᐊᓂ, ᐃᓄᒃᑎᑐᑦ ᐅᖃᐅᓯᕇᓐᓇᖅᐸᖓ ᐊᖏᕐᕋᒥ.
“ᐅᖃᐅᓯᓪᓗᐊᑕᕗᑦ ᐱᓯᒪᐃᓐᓇᕋᓱᐊᖅᐸᕗᑦ ᐊᖏᕐᕋᑦᑎᓐᓂ.  ᕿᑐᙵᒃᑲ ᐅᖃᐅᑎᕙᒃᑕᒃᑲ, ‘ᐃᓕᓐᓂᐊᖅᑎᓪᓗᓯ ᐅᖃᓪᓚᒃᐸᒡᓗᓯ ᖃᓪᓗᓈᑎᑐᑦ, ᑭᓯᐊᓂ ᐊᖏᕐᕋᒥ ᐅᖃᓪᓚᖕᓂᐊᖅᐳᒍᑦ ᐅᖃᐅᓯᑦᑎᓐᓂ, ᑕᒪᓐᓇ ᓯᕗᓪᓕᖅᐸᐅᓪᓗᓂ ᐅᖃᐅᓯᕆᒐᑦᑎᒍᑦ,’ ᐅᖃᓚᐅᖅᐳᖅ ᖁᒻᒧᐊᖅᑐᖅ.
ᐃᓕᓐᓂᐊᕌᓂᒃᑳᖓᑕ ᐅᓪᓗᕐᒥ, ᖁᒻᒧᐊᖅᑐᖅ ᑕᐃᑲᓃᖏᓐᓇᓲᖑᕗᖅ ᖃᔅᓯᐊᕐᔪᖕᓂ ᐃᓕᓐᓂᐊᖃᑎᒥᓂᑦ ᐱᔭᕇᖅᓯᓂᕐᒧᑦ ᐃᓕᓐᓂᐊᕐᕕᖕᒧᑦ ᐱᓕᕆᐊᕆᔭᕆᐊᖃᖅᑕᒥᓂᑦ ᐊᖏᕐᕋᓚᐅᖅᑳᕋᓂ ᑕᐅᑐᒃᑕᑐᐊᖃᑲᐃᓐᓇᕈᓐᓇᕐᓂᕐᒧᑦ ᐊᑖᑕᐅᓂᕐᒧᑦ ᐊᒻᒪ ᐅᐃᖑᓂᕐᒧᑦ.
ᐃᓕᓐᓂᐊᕐᕕᐊᕈᓯᖕᒦᙱᑎᓪᓗᒍ ᐊᖏᕐᕋᒥᓪᓘᓐᓃᑦ, ᖃᐅᔨᓇᓱᐊᒃᑲᓐᓂᓲᖑᕗᖅ ᐊᕙᑎᖓᓐᓂ.
“ᓄᓇ ᖃᐅᔨᒋᐊᓲᕆᕙᖓ ᐃᕐᓂᕋ ᒪᓕᒃᖢᓂ, ᕿᒥᕐᕈᓇᒋᐊᖅᑐᖅᖢᑎᒃ. ᓯᑯᒍᓂ, ᓯᑯᒃᑰᓛᖅᐳᒍᑦ. ᑕᒪᓐᓇ ᓄᑖᖑᓪᓗᓂ ᐊᖑᓇᓱᒡᕕᒋᓂᐊᖅᐸᕗᑦ, ᑕᐃᒪᓐᓇ ᕿᒥᕐᕈᓇᒋᐊᖃᖅᐳᒍᑦ ᐊᒻᒪ ᐊᐅᓪᓛᖃᑎᖃᖅᐸᒡᓗᑕ ᐊᑐᕐᓂᑯᖃᑦᑎᐊᖅᑐᒥ, ᐅᕙᑦᑎᓐᓂ ᑕᑯᑎᑦᑎᓂᐊᖅᑐᒥ,” ᐅᖃᓚᐅᖅᐳᖅ.
“ᒫᓐᓇᐅᔪᖅ, ᖁᕕᐊᒋᔭᕋ ᑕᒪᓐᓇ. ᐊᔾᔨᐅᙱᑦᑎᐊᖅᑐᖅ, ᓄᑖᖑᓪᓗᓂ ᐱᓕᕆᓂᐅᓪᓗᓂ ᐅᕙᓐᓄᑦ. ᓇᐃᓴᐅᓯᕆᒃᑲᓐᓂᓕᕐᒥᔪᖓ, ᐊᓯᐅᔨᒐᓚᓚᐅᖅᑕᓐᓂ. ᐊᓕᐊᓇᐃᒻᒪᕆᒃᑐᖅ, ᐃᓚᖃᖅᖢᓂ ᖃᐅᔨᓴᕐᓂᕐᒧᑦ ᐱᓕᕆᓂᐅᔪᒥ. ᑭᐱᙳᓇᔮᙱᑦᑐᖅ. ᓇᒡᒐᔾᔭᐅᙳᕐᓂᐊᕐᓂᖓᓂ ᐊᑯᓂᒐᓱᒐᓚᒃᑐᖓ ᐱᓇᓱᐊᕈᓯᐅᑉ ᓄᙳᐊᓂᐅᓚᐅᖅᑎᓪᓗᒍ. ᑭᓱᒥ ᐃᓕᑦᑎᓂᐊᖅᐳᒍᑦ ᐅᓪᓗᒥ, ᐃᓛᒃ?”
50−ᖑᕆᐊᖅᓯᓂᖓᓂ, ᖁᒻᒧᐊᖅᑐᖅ ᐅᖃᓚᐅᖅᐳᖅ ᓲᕐᓗ ᐱᓱᖕᓂᐅᖔᓕᖅᐳᖅ, ᐅᓪᓚᙱᖔᖅᖢᓂ.
“ᐃᔅᓴᐃᕙᓪᓕᐊᔪᑎᑦ ᐊᒻᒪ ᑭᓱᑐᐃᓐᓇᓂᒃ ᐅᔾᔨᕆᓪᓗᑎᑦ. ᓄᖅᑲᖅᖢᑎᑦ ᐊᒻᒪ ᐃᓱᒪᓪᓗᑎᑦ. ᐃᓱᒪᕗᖓ ᑕᐃᑲᓃᑦᑐᖓ.”

Leave a Comment: