ᐅᖁᒪᐃᑦᑐᓂ ᐅᖅᓱᐊᓗᖕᓂ ᓄᖅᑲᖅᑎᑕᐅᓂᐅᔪᒥ ᐊᑲᐅᙱᓕᐅᕈᑕᐅᔪᖅ ᐊᕙᑎᓕᕆᓂᕐᒧᑦ ᓵᙵᓪᓗᓂ ᑮᓇᐅᔭᓕᕆᓂᕐᒧᑦ ᐱᕙᓪᓕᐊᓂᖓᓄᑦ

375

ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ
ᓄᓇᕗᑦ ᓵᙵᖃᑎᖃᓕᖅᐳᖅ ᓇᓗᓇᖅᑐᒥ ᐊᑲᐅᙱᓕᐅᕈᑕᐅᔪᒥ ᐃᒃᐱᒋᔭᐅᔪᒥ ᖃᓄᑐᐃᓐᓇᑦᑎᐊᒃᑯᑦ, ᓄᓇᓕᐅᔪᓂ ᑲᓇᑕᓕᒫᒥ: ᓇᓕᒧᑎᑦᑎᓇᓱᐊᕐᓂᕐᒥ ᐊᕙᑎᒧᑦ ᓴᐳᔾᔨᓯᒪᓇᓱᐊᕐᓂᕐᒥᑦ ᑮᓇᐅᔭᓕᕆᓂᕐᒧᑦ ᓱᓕᓂᐅᔪᓄᑦ.

ᖃᓪᓗᓈᑦ ᓄᓇᖓᓐᓂ ᑲᓇᑕᒥ ᒫᓐᓇᐅᔪᒥ ᑐᐊᕕᕐᓇᖅᑐᖅᑕᖃᓕᖅᐳᖅ ᑎᒍᒥᐊᖅᑐᓂ ᑲᓇᑕᒥ ᓄᓇᓯᐅᑎᑯᑖᓄᑦ ᐊᖅᑯᑎᖏᑦ ᐊᒻᒪ ᒪᓕᒐᕆᔭᐅᔪᑦ ᓯᒥᒃᑎᑕᐅᓯᒪᕗᑦ ᑕᐃᒃᑯᓄᖓ ᐊᑭᕋᖅᑐᖅᑐᓂ ᑲᑎᙵᖃᑎᖃᖅᑐᓂ ᐊᓪᓚᓂᑦ ᐊᖓᔪᖅᑳᕆᔭᐅᔪᓄᑦ ᐳᕆᑎᔅ ᑲᓚᒻᐱᐊᒥ ᐊᑭᕋᖅᑐᖅᑐᓂ ᐅᖅᓱᐊᓗᖕᒧᑦ ᓱᓪᓗᑯᑖᒥ ᐊᖅᑯᓯᐅᖅᑕᐅᔪᒥ ᓄᓇᖓᒍᑦ.

ᐊᔾᔨᒋᙱᕐᔪᐊᕋᓗᐊᖅᑎᓪᓗᒍ, ᐊᕙᑎᒧᑦ ᓈᒻᒪᒃᓴᙱᓐᓂᐅᔪᒥ ᓴᖅᑭᑉᐸᓪᓕᐊᔪᖃᖅᐳᖅ ᐱᖅᑯᓯᑐᖃᖅᑎᒍᑦ ᐃᓄᖕᓄᑦ ᐃᒪᖓᒍᑦ ᐊᒻᒪ ᓄᓇᓕᐅᔪᓂ ᐅᖁᒪᐃᑦᑐᑦ ᐅᖅᓱᐊᓗᒃᓴᓂᑦ ᐊᑐᖅᑕᐅᒐᔪᒃᑐᓂ ᐅᒥᐊᕐᔪᐊᒃᑯᑦ ᓵᙵᓂᖏᓐᓄᑦ ᓄᖅᑲᖅᑎᑕᐅᓂᖓᓂ ᐊᕙᑎᒧᑦ ᓴᐳᔾᔨᓯᒪᓂᕐᒧᑦ ᐱᑎᑦᑎᓂᐊᖅᑐᒥ ᐊᑭᖓᓂ ᐆᒪᓇᓱᐊᕐᓂᕐᒧᑦ ᐊᖏᒡᓕᒋᐊᖅᑐᒥ ᓄᓇᕗᒻᒥᐅᓄᑦ.

ᓄᖅᑲᖅᑎᑕᐅᓂᖓᓂ ᓵᓪᕗᕐᒥ-ᐅᖁᒪᐃᑦᑐᓂ ᑕᕆᐅᕐᒥ ᐅᖅᓱᐊᓗᒃᓴᒥ ᐊᑐᓕᖅᑎᑕᐅᓯᒪᕗᖅ ᐊᒻᒪ ᐃᑲᔪᖅᓯᖅᑕᐅᕐᔪᐊᓚᐅᖅᖢᓂ ᓄᓇᕗᒻᒥ ᑐᙵᕕᒃᑯᓐᓄᑦ, ᐃᓄᐃᑦ ᓯᓚᕐᔪᐊᓕᒫᒥ ᑲᑎᒪᔨᕐᔪᐊᖏᓐᓂ, ᓄᓇᕐᔪᐊᒥ ᑕᕆᐅᕐᒥ ᑲᑐᔾᔨᖃᑎᒌᖑᔪᓄᑦ ᐊᒻᒪ ᑲᑎᒪᔨᕐᔪᐊᖑᔪᓄᑦ ᓲᕐᓗ ᓄᓇᕗᒻᒥ ᒪᓕᒐᓕᐅᖅᑎᖓ ᑕᓂᔅ ᐹᑐᓴᓐᒧᑦ.

ᑕᒪᐃᑎᒍᑦ ᐅᖃᓪᓚᖕᓂᕐᒧᑦ, ᓄᖅᑲᖅᑎᑕᐅᓂᖓᓂ ᓱᕈᕈᑕᐅᔪᓂᒃ ᐊᒻᒪ ᐊᓂᐊᑎᑦᑎᕙᓪᓕᐊᔪᒥ–ᐅᖁᒪᐃᑦᑐᓂ ᐅᖅᓱᐊᓗᖕᓂ ᐊᖏᔪᒥ ᐱᐅᔪᒧᑦ ᐱᕙᓪᓕᐊᑎᑕᐅᓂᐅᕗᖅ. ᓴᙱᓪᓗᓂ ᐱᓕᕆᓂᐅᕗᖅ ᐃᕕᐅᔭᐅᓂᖅᓴᒥ ᓯᕗᓂᒃᓴᖃᕐᓂᕐᒧᑦ ᐊᒻᒪᓗ ᑭᖑᓪᓕᖅᐹᖑᓪᓗᓂ ᐱᓕᕆᓂᐅᕗᖅ ᒐᕙᒪᑐᖃᑦᑎᓐᓂ ᖃᓄᐃᓕᐅᕐᓂᖏᓐᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ.

ᑭᖑᒻᒧᑦ ᐃᖅᑲᐅᒪᓪᓗᓂ, ᑲᓇᑕ ᐃᖏᕐᕋᓂᖃᕐᔪᐊᖅᓯᒪᕗᖅ ᑕᐃᒃᑯᓇᓂ ᐅᓪᓗᓂ ᐅᔭᕋᖕᓂᐊᕐᓂᕐᓄᑦ ᑲᒻᐸᓂᐅᔪᓂ ᐊᖕᒪᔪᕐᓂ ᖄᖅᑎᕆᓂᖏᓐᓂ ᒪᓂᖅᑲᒥ ᐃᓱᒪᓇᑎᒃ ᐆᒪᔪᓂᑦ ᐊᒻᒪ ᓇᔪᖓᖃᕐᕕᖏᓐᓂᑦ. ᐅᖓᓯᓗᐊᙱᑦᑐᒥ ᑕᐃᔅᓱᒪᓂᐅᓚᐅᖅᑐᒥ, ᐊᕙᑎᓕᕆᓂᕐᒧᑦ ᐱᖁᔭᖅᑕᖃᓚᐅᙱᓚᖅ ᐅᔭᕋᖕᓂᐊᕐᕕᖕᓄᑦ, ᐅᑎᖅᑎᕆᓂᐅᔪᒥ ᑕᐃᒪᐃᓕᖓᓂᕆᓚᐅᖅᑕᖓᓂ ᐋᖅᑭᒃᓯᒪᓂᖃᕐᓇᓂ, ᓄᓇᖃᖅᑳᖅᓯᒪᔪᓄᑦ ᐃᓄᖕᓄᓪᓗ ᐃᓚᐅᑎᑦᑎᓂᖃᕐᓇᓂ, ᑭᓯᐊᓂ ᕿᒻᒪᑯᓂ ᑕᓯᕋᓛᓂᑦ ᑕᑖᖅᑐᓂ ᐃᓚᐅᕈᑎᒃᓴᓂ ᐊᒻᒪ ᐅᓗᕆᐊᓇᖅᑐᓂ ᓴᕕᕋᔭᖕᓂᑦ ᐃᒃᓯᓐᓇᖅᑕᐅᔪᓂ ᑯᑐᖕᓂᖓᓂ ᐊᒻᒪ ᓱᕈᖅᑎᕆᓗᓂ ᓇᐹᖅᑐᖃᕈᓐᓇᙱᑦᑐᒥ ᓄᓇᒥᑦ. ᐅᑯᐊ ᐊᕙᑎᒧᑦ ᐱᕋᔭᖕᓂᐅᔪᑦ, ᐱᕋᔭᒃᑕᐅᓂᐅᔪᓂ ᑲᓇᑕᓕᒫᒥ, ᐱᐅᙱᕐᔪᐊᓚᐅᖅᐳᑦ ᐊᒻᒪ ᐊᒥᓱᐊᓗᐃᑦ ᓱᓕ ᐊᑭᓖᕗᑦ ᐊᑭᖓᓂ ᒫᓐᓇᒧᑦ ᑎᑭᖦᖢᒍ.

ᖁᔭᓕᓪᓗᐊᖅᐳᒍᑦ ᑕᒪᐅᖓ ᑎᑭᐅᑎᓯᒪᓂᑦᑎᓐᓄᑦ, ᑭᓯᐊᓂ ᑲᑐᑎᔭᕗᑦ ᐊᕙᑎᒧᑦ ᐊᑐᕈᒪᓂᑦᑎᓐᓂ ᑭᐅᒪᓂᖓᓂ ᓱᓕᓂᐅᔪᒥ ᐊᑦᑎᓛᖓᓃᖦᖢᓂ.

ᐅᖁᒪᐃᑦᑐᓄᑦ ᐊᖅᓱᐊᓗᖕᒥ ᓄᖅᑲᖅᑎᑕᐅᓂᖓᓂ ᓂᕆᐅᒋᔭᐅᕗᖅ ᐊᖏᒡᓕᒋᐊᖅᓯᓂᖓᓂ ᐊᑭᖓᓂ ᐃᒡᓗᖃᖅᑎᐅᔪᓄᑦ ᐱᖁᑎᖏᓐᓂ, ᓄᓇᓯᐅᑎᓂᑦ ᐊᒻᒪᓘᓐᓃᑦ ᐆᒻᒪᖅᑯᑎᓄᑦ ᐊᖏᑎᒋᔪᓐᓇᖅᑐᒥ 11 ᐳᓴᓐᑎᒧᑦ ᑲᑎᓪᓗᒍ ᑐᑭᖃᖅᑐᒥ $679–ᐸᓗᖕᓂ ᐊᑐᓂ ᐃᒡᓗᒋᔭᐅᔪᓄᑦ ᐊᕐᕌᒍᑕᒫᒥ. ᓄᓇᕐᔪᐊᒥ ᓵᓪᕗᕐᒧᑦ ᓄᖅᑲᖅᑎᑕᐅᓂᖓ, ᐊᑐᓕᓚᐅᖅᑐᒥ ᔭᓄᐊᕆ 1–ᒥ, ᓂᕆᐅᒋᔭᐅᕗᖅ ᐊᖏᒡᓕᒋᐊᖅᓯᓂᖓᓂ ᑐᓂᓯᒃᑲᓐᓂᕐᓂᐅᔪᒥ ᐊᑭᖏᓐᓂ 9–ᓂ 12–ᓄᑦ ᐳᓴᓐᑎᒥᑦ.

ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᒥ ᓂᕿᒃᓴᖃᑦᑎᐊᙱᓐᓂᐅᔪᒥ ᐊᒻᒪ ᐊᔪᖅᓴᕐᓂᐅᔪᒥ ᖁᕝᕙᖅᐸᓪᓕᐊᓂᖃᖅᑐᒥ, ᐊᖏᒡᓕᒋᐊᕐᓂᐅᔪᖅ ᐊᖏᕐᔪᐊᖅᐳᖅ ᐊᒻᒪᓗ ᐱᑎᑦᑎᓂᖃᕐᓂᐊᖅᐳᖅ ᐊᒃᓱᕈᕐᓇᕐᓂᖅᓴᐅᔪᒥ ᐃᓚᒌᖑᔪᓄᑦ ᐱᓕᕆᐊᖃᖅᐸᒃᑐᓂ ᐃᓚᖏᓐᓂ ᓄᓇᕐᔪᐊᑉ ᖁᑦᑎᓛᖓᓐᓂ ᐊᑭᐅᔪᒥ ᐆᒪᓇᓱᐊᕐᓂᕐᒧᑦ.

ᐃᓱᒪᓕᐊᖑᔪᑦ ᐃᒪᐃᑦᑐᒐᓚᖕᓄᑦ ᐃᓚᐃᓐᓇᖓᐅᕗᖅ ᑎᑭᓐᓂᐊᖅᑐᓄᑦ, ᐱᓗᐊᖅᑐᒥ ᑲᓇᑕᒥ ᐊᖓᔪᖅᑳᕐᔪᐊᖓ ᐸᕐᓇᒃᑯᓂ ᑭᐅᒪᓂᕐᒥ ᐊᑐᕐᓂᐊᕐᓂᕋᖅᑕᒥᓂᑦ ᓄᓇᓕᖕᓂ ᐊᑐᕈᓐᓃᖅᑎᑦᑎᓂᖓᓂ ᐅᖅᓱᐊᓗᑐᐃᓐᓇᕐᒥ ᐆᒻᒪᖅᑯᑎᓄᑦ.

ᑕᐃᒪᐃᑦᑕᕆᐊᖃᖅᑰᔨᒐᓗᐊᖅᑎᓪᓗᒍ, ᐅᑯᐊ ᐊᑭᐅᔪᑦ ᓱᒃᑲᔪᒥ ᐃᒋᑕᐅᑐᐃᓐᓇᓪᓗᐊᙱᓚᑦ ᓄᓇᕗᒻᒥᐅᓄᑦ, ᐱᓗᐊᖅᑐᒥ ᑐᑭᓯᓇᑦᑎᐊᙱᑎᓪᓗᒍ ᐅᖃᖃᑎᖃᕐᓂᐅᔪᑦ ᐱᓕᕆᐊᖑᓚᐅᕈᑎᒃ ᓯᕗᓪᓕᕐᒥ. ᖃᓄᐃᒻᒪᑦ ᒫᓐᓇᐅᓕᖅᑐᒥ ᑐᓴᒐᒃᓴᓕᐊᖑᔪᑦ ᐅᖅᓱᐊᓗᖕᒥ ᓄᖅᑲᖅᑎᑦᑎᓂᐅᔪᒥ ᓴᖅᑭᓕᑕᐃᓐᓇᖅᐸ? ᓄᓇᕗᒻᒥ ᑐᙵᕕᒃᑯᑦ ᐊᒻᒪ ᐃᓄᐃᑦ ᓯᓚᕐᔪᐊᓕᒫᒥ ᑲᑎᒪᔨᕐᔪᐊᖏᑦ ᐅᖃᖃᑎᖃᓚᐅᖅᐸᑦ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ ᐊᖏᕈᑎᖃᓚᐅᖅᑳᕋᑎᒃ ᐊᒃᓱᕈᕐᓂᐅᔪᒥ ᐊᔪᕐᓇᖅᑎᑦᑎᒃᑲᓐᓂᕐᓂᐊᖅᑐᒥ ᑮᓇᐅᔭᓕᐊᖏᓐᓂ ᓈᒻᒪᒃᑎᑦᑎᓇᓱᐊᕐᓂᕐᒧᑦ?

ᒫᓐᓇᓕᓴᒥ ᐃᓄᐃᑦ ᓯᓚᕐᔪᐊᓕᒫᒥ ᑲᑎᒪᔨᕐᔪᐊᖏᑦ ᐊᒻᒪ ᓄᓇᕗᒻᒥ ᑐᙵᕕᒃᑯᑦ ᓴᖅᑭᑎᑦᑎᓚᐅᖅᐳᑦ ᑲᑐᔾᔭᐅᔪᒥ ᐅᖃᐅᓯᒃᓴᓕᐊᒥ ᖃᐃᖁᔨᓂᖃᖅᑐᒥ ᒐᕙᒪᐅᔪᓂ ᐃᑲᔪᕐᓂᕐᒧᑦ ᐃᑲᔫᓯᕐᓂᐅᔪᒥ ᐊᖏᒡᓕᒋᐊᖅᑐᓄᑦ ᐊᑭᐅᔪᓄᑦ, ᐊᒻᒪᓗ ᑕᐃᒪᐃᑦᑕᕆᐊᖃᖅᐳᑦ, ᑭᓯᐊᓂ ᐅᑯᐊ ᑲᑐᔾᔨᖃᑎᒌᖑᔪᑦ ᐊᖏᖅᓯᒪᑦᑎᐊᕈᑎᒃ ᐃᑲᔪᖅᓯᕐᓂᖏᓐᓂ ᐆᒪᙵᑦ ᒪᓕᒐᓕᐊᖑᔪᒥ, ᐃᓚᒋᔭᐅᖃᑕᐅᓪᓗᐊᖅᐳᑦ ᐊᒃᓱᕈᕈᑕᐅᔪᓂ ᐋᖅᑭᒋᐊᖅᓯᓂᕐᒥ ᖃᓄᐃᓐᓂᐅᓂᐊᖅᑐᓄᑦ.

ᐊᕐᕌᒎᔪᒥ ᑲᑐᔾᔨᓂᐅᔪᒥ ᑲᓇᑕᓕᒫᒥ ᐊᒃᓱᕈᕐᓂᐅᔪᒥᑦ ᑭᓯᐊᓂ ᓄᖅᑲᖅᑎᑦᑎᓂᕐᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ, ᐊᒃᑐᖅᑕᐅᓯᒪᔪᑦ ᓄᓇᓕᐅᔪᑦ ᓯᕗᓪᓕᖅᐹᒥ ᐅᖃᐅᔾᔨᖅᑐᖅᑕᐅᓪᓗᐊᖅᐳᑦ ᐊᒻᒪ ᐅᖃᖃᑎᒋᔭᐅᓗᑎᒃ ᖃᓄᖅ ᐋᖅᑭᒍᑎᒃᓴᓂ ᐊᒃᑐᐃᓂᐊᕐᓂᖏᓐᓂ.