‘ᓱᓕ ᐱᓕᕆᐊᒃᓴᖅᑕᖃᖅᐳᖅ ᓄᓇᓕᖕᓂ, ᑭᓯᐊᓂ ᑎᑭᐅᑎᓂᐊᖅᑕᕗᑦ,’ ᐅᖃᖅᐳᖅ ᓄᓇᓕᖕᓂ ᐊᐅᓚᑦᑎᔨᒻᒪᕆᖓ

ᐅᒥᐊᕐᔪᐊᒃᑯᑦ ᐅᓯᔭᐅᓂᐅᔪᒥ ᓇᒃᓴᓚᐅᖅᐳᖅ $2 ᒥᓕᐊᓐ ᐅᖓᑖᓂ ᓱᓇᒃᑯᑖᓂ ᐊᒻᒪ ᐱᖁᑎᓂᑦ ᐃᑲᔪᕐᓂᐊᖅᑐᓂ ᐱᕙᓪᓕᐊᑎᑦᑎᒃᑲᓐᓂᕐᓂᕐᒧᑦ ᓄᓇᓕᐅᔪᒥ ᒥᑦᑎᒪᑕᓕᖕᒥ ᐊᒻᒪ ᑐᓂᓯᓗᓂ ᐱᓪᓚᕆᐅᔪᓂ ᐱᔨᑦᑎᕋᕐᓂᐅᔪᓂ.

ᖃᑦᑎᕆᔨᒃᑯᑦ ᐊᖓᔪᖅᑳᖓ ᔮᓕ ᐃᓄᒍ ᒪᑐᐃᖅᓯᕗᖅ ᒥᑦᑎᒪᑕᓕᐅᑉ ᓯᕗᓪᓕᖅᐹᖓᓂ ᐋᓐᓂᖅᑐᖃᖅᐸᑦ ᐊᐃᒃᓯᕈᑎᒥᒃ ᓄᓇᓯᐅᒻᒥ, ᑎᑭᓚᐅᖅᑐᒥ ᐅᒥᐊᕐᔪᐊᒃᑯᑦ ᐋᒍᔅᑎ 28−ᒥ. Norman Koonoo photo courtesy of the Hamlet of Pond Inlet.

ᒥᑦᑎᒪᑕᓕᐅᑉ ᓯᕗᓪᓕᖅᐹᖓᓂ ᐋᓐᓂᖅᑐᖃᖅᐸᑦ ᐊᐃᒃᓯᕈᑎᒥᒃ ᓄᓇᓯᐅᒻᒥ ᐃᓚᒋᔭᐅᖃᑕᐅᓚᐅᖅᐳᖅ ᐊᒥᓱᓂ ᐱᔭᐅᔭᕆᐊᖃᖅᑐᓂ ᐱᖁᑎᓂᑦ ᑎᑭᓚᐅᖅᑐᓄᑦ ᐅᖓᓯᒃᑐᒧᑦ ᓄᓇᓕᐅᔪᒧᑦ ᐋᒍᔅᑎ 28–ᒥ.

ᑕᐃᕕᑦ ᔅᑖᒃᓕ, ᒥᑦᑎᒪᑕᓕᐅᑉ ᓄᓇᓕᖕᓂ ᐊᐅᓚᑦᑎᔨᒻᒪᕆᖓ (CAO), ᐱᔪᓐᓇᖅᑎᑦᑎᓚᐅᖅᐳᖅ ᑐᓐᓂᖅᑯᓯᐊᖑᔪᒥ ᐋᓐᓂᖅᑐᖃᖅᐸᑦ ᐊᐃᒃᓯᕈᑎᒥᒃ ᓄᓇᓯᐅᒻᒥ ᓄᓇᓕᖓᓐᓄᑦ. ᐋᓐᓂᖅᑐᖃᖅᐸᑦ ᐊᐃᒃᓯᕈᑎᒥᒃ ᓄᓇᓯᐅᒻᒥ ᓂᐅᕕᖅᑕᐅᓐᓂᖅᐸᑦ, ᐊᑭᖃᕋᔭᓚᐅᖅᐳᖅ $160,000–ᓂ, ᐅᓂᒃᑳᖅᐳᖅ ᔅᑖᒃᓕ.

“ᐊᑭᓕᕆᐊᖃᖅᑕᑐᐊᕆᓚᐅᖅᑕᕗᑦ ᐅᓯᔭᐅᓂᖓᓂ,” ᐃᓚᒋᐊᖅᓯᓚᐅᖅᐳᖅ.

“ᐱᕕᒃᓴᖃᑦᑎᐊᖅᑐᒻᒪᕆᐊᓘᓚᐅᖅᐳᒍᑦ,” ᐅᖃᓚᐅᖅᐳᖅ ᓄᓇᓕᖕᓂ ᐊᐅᓚᑦᑎᔨᒻᒪᕆᖓ, ᐅᖃᕆᐊᓪᓚᒃᖢᓂ ᐋᓐᓂᖅᑐᖃᖅᐸᑦ ᐊᐃᒃᓯᕈᑎᒥᒃ ᓄᓇᓯᐅᑎ “ᖃᓄᐃᓐᓂᖓ ᐱᐅᑦᑎᐊᖅᐳᖅ.”

12–ᒐᓚᖕᓂ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᓂᑦ, ᐱᓕᒻᒪᒃᓴᖅᓯᒪᔪᓂ ᐊᒻᒪ ᐸᐃᑉᐹᖅᑎᑕᐅᓪᓗᑎᑦ ᐋᓐᓂᖅᑐᖃᖅᐸᑦ ᐊᐃᒃᓯᕈᑎᒥᒃ ᓄᓇᓯᐅᒻᒥ ᐱᔨᑦᑎᕋᕐᓂᕐᒧᑦ, ᖁᕕᐊᕐᔪᐊᖅᐳᑦ ᐊᖁᓐᓂᕐᒥ ᓄᓇᓯᐅᒻᒥ ᐊᒻᒪᓗ ᑐᓂᓯᓂᕐᒧᑦ ᐱᔭᐅᔭᕆᐊᖃᕐᔪᐊᖅᑐᒥ ᐱᔨᑦᑎᕋᕐᓂᐅᔪᒥ ᓄᓇᓕᐅᔪᓂ

ᒥᑦᑎᒪᑕᓕᐅᑉ ᓯᕗᓪᓕᖅᐹᖓ ᐅᐊᔭᒨᖅᑐᒥ ᓯᖃᓪᓕᕈᑎᒥᒃ ᐊᑐᖅᑕᐅᓂᐊᖅᐳᖅ ᐊᖅᑯᑎᓂᑦ ᐋᖅᑭᒃᓱᐃᓂᕐᒧᑦ, ᐃᓕᓯᓗᓂ ᐅᔭᖅᑲᓂ ᓇᑎᒃᓴᒥᒃ ᐊᒻᒪ ᐱᕙᓪᓕᐊᑎᑦᑎᓗᓂ ᓄᓇᓂᑦ ᐃᒡᓗᓕᕆᔨᒃᑯᓐᓄᑦ. Norman Koonoo photo courtesy of the Hamlet of Pond Inlet.

ᒥᑦᑎᒪᑕᓕᒃ ᐱᓚᐅᕆᕗᑦ ᓯᕗᓪᓕᖅᐹᖓᓂ ᐅᐊᔭᒨᖅᑐᒧᑦ ᓯᖃᓪᓕᕈᑎᒥᒃ. ᐅᓇ ᐱᓕᕆᔾᔪᑕᐅᔪᖅ, ᐊᑭᖃᐸᓗᒃᑐᒥ $650,000–ᒥ, ᐊᑐᖅᑕᐅᓂᐊᖅᐳᖅ ᐃᑲᔪᕐᓂᕐᒧᑦ ᐋᖅᑭᒃᓱᐃᓂᕐᒥ ᐊᖅᑯᑎᐅᔪᓄᑦ.

“ᐊᖅᑯᑎᑦ ᒥᑦᑎᒪᑕᓕᖕᒥ ᓱᕋᑦᑎᕙᓪᓕᐊᕐᔪᐊᖅᐳᑦ,” ᐅᖃᓚᐅᖅᐳᖅ ᔅᑖᒃᓕ.

ᕿᓚᓗᒃᑲᑦ ᐃᓂᐊᓂ, ᐅᐸᒃᑕᐅᒐᔪᒃᑐᒥ ᐳᓚᕋᖅᑐᓄᑦ ᐅᒥᐊᕐᔪᐊᒃᑯᑦ ᐃᑭᒪᔪᓄᑦ, ᐊᖅᑯᑎᖓ ᐊᖏᐸᓗᒃᑐᒥ ᓄᑖᙳᕆᐊᖅᑎᑕᐅᔭᕆᐊᖃᖅᐳᖅ ᐸᓯᖃᕈᓐᓇᕐᓂᕐᒧᑦ. ᐊᓯᖏᓐᓂ ᐸᕐᓇᒃᑕᐅᓯᒪᔪᓂ ᐱᓕᕆᐊᒃᓴᐅᔪᓂ ᐃᓚᖃᖅᐳᖅ ᐱᕙᓪᓕᐊᑎᑦᑎᓂᕐᒥ ᓄᓇᓂ ᓴᓇᔭᐅᓂᐊᖅᑐᓄᑦ ᓄᑖᓄᑦ ᐃᒡᓗᒃᓴᓄᑦ, ᐅᖃᓚᐅᖅᐳᖅ ᓄᓇᓕᖕᓂ ᐊᐅᓚᑦᑎᔨᒻᒪᕆᖓ. ᓂᕆᐅᒃᐳᖅ ᓄᓇᓕᐅᔪᖅ ᐱᓪᓗᐊᕐᓂᐊᕐᓂᖏᓐᓂ 6–ᓂ ᑕᓪᓕᒪᓂ-ᐃᒡᓗᓄᑦ ᑲᑎᙵᔪᓂᑦ ᓴᓇᔭᐅᓂᐊᕐᓂᖏᓐᓂ 2021–ᒥ. ᐸᕐᓇᐅᑎᒃᓴᖃᕆᕗᖅ ᐃᓕᓯᓂᕐᒥ ᐅᔭᖅᑲᒥ ᓇᑎᒃᓴᒥ ᐃᓗᐊᓂ ᐱᑕᖃᖅᐸᒌᖅᑐᒥ ᓄᓇᓯᐅᑎᖃᕐᕕᖕᒥ ᒍᓛᔾᔪᒥ ᐊᑐᕐᓗᑎᒃ ᓯᖃᓪᓕᕈᑎᒥᒃ.

“ᐱᐅᔪᒻᒪᕆᐊᓘᕗᖅ ᐊᐅᓚᐅᑎᓕᖕᒥ ᐊᒥᓱᐊᓗᖕᓄᑦ ᐊᕐᕌᒍᓄᑦ ᐊᑐᖅᑕᐅᓂᐊᖅᑐᒥ” ᐅᖃᖅᐳᖅ ᑕᐃᕕᑦ ᔅᑖᒃᓕ, ᒥᑦᑎᒪᑕᓕᐅᑉ ᓄᓇᓕᖕᓂ ᐊᐅᓚᑦᑎᔨᒻᒪᕆᖓ, ᓄᑖᖑᔪᒥ ᓯᑯᓕᐅᕈᑕᐅᔪᒥ ᑎᑭᓚᐅᖅᑐᒥ ᐅᒥᐊᕐᔪᐊᒃᑯᑦ. Norman Koonoo photo courtesy of the Hamlet of Pond Inlet.

ᐊᓯᖏᑦ ᓄᓇᓯᐅᑏᑦ ᑎᑭᑎᑕᐅᔪᓂ ᐅᒥᐊᕐᔪᐊᒃᑯᑦ ᐃᓚᖃᓚᐅᖅᐳᖅ ᐃᒥᖅᑕᐅᒻᒥ, ᑯᕕᖅᑕᐅᒻᒥ, ᐊᒃᑕᐅᑎᒥᒃ, ᓴᓇᔨᓄᑦ ᐊᖓᔪᖅᑳᖓᓐᓂ ᓄᓇᓯᐅᑎᒃᓴᖓᓂ ᐊᒻᒪ ᐅᐊᔭᒨᖅᑐᒥ ᓯᑯᓕᐅᕈᒻᒥ.

ᑕᒪᕐᒥᒐᓚᑦ ᓄᓇᓯᐅᑏᑦ “ᓄᑕᐅᙱᑦᑐᒻᒪᕆᐅᓚᐅᖅᐳᑦ” ᐊᒻᒪ “ᓱᕐᕋᑯᐸᓘᓪᓗᑎᒃ,” ᐅᖃᓚᐅᖅᐳᖅ ᔅᑖᒃᓕ, ᓅᓚᐅᖅᑐᒥ ᒥᑦᑎᒪᑕᓕᖕᒧᑦ ᓄᕕᐱᕆ 2018–ᒥ. ᑮᓇᐅᔭᓂ ᐊᑐᙱᖔᖅᖢᑎᒃ ᐋᖅᑭᒃᓱᐃᓂᐅᔪᓄᑦ, ᓈᒻᒪᒃᓯᓚᐅᖅᐳᖅ ᐃᓇᖏᖅᓯᓂᕐᒥ ᐱᖁᑕᐅᔪᓂᑦ, ᐅᓂᒃᑳᓚᐅᖅᐳᖅ.

ᓄᑕᐅᙱᑦᑐᖅ ᓯᑯᓕᐅᕈᑎ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓱᒫᓘᑎᙳᓚᐅᖅᐳᖅ ᐳᔪᕐᓗᖕᓄᑦ ᐊᒻᒪ ᐊᐅᓚᔪᓐᓇᓚᐅᙱᓚᖅ ᓇᑉᐸᖓᓂ ᐊᑐᖅᑕᐅᓇᓱᐊᖅᑎᓪᓗᒍ.

ᐊᕐᕌᒍᓕᖕᒥ-7-ᓂ ᐊᒃᑕᐅᑎ ᐱᔭᕆᐊᖃᓚᐅᖅᐳᖅ “ᐊᖏᔫᑎᒻᒪᕆᐊᓗᖕᓂ ᐋᖅᑭᒃᓱᖅᑕᐅᓂᐅᔪᓂ” ᐊᒻᒪ “ᒥᑭᓗᐊᖅᖢᓂ” ᐱᕈᖅᐸᓪᓕᐊᔪᒧᑦ ᓄᓇᓕᐅᔪᒧᑦ 1700–ᐸᓗᖕᓄᑦ ᐃᓄᖕᓄᑦ, ᐅᖃᓚᐅᖅᐳᖅ.

ᓄᓇᓯᐅᑏᑦ ᓴᓂᐊᓂ ᐊᒻᒪ ᐊᐅᓚᐅᑎᓕᖕᓂ, ᓱᓇᒃᑯᑖᓂ ᓄᑖᙳᕆᐊᖅᑎᑦᑎᓂᕐᒧᑦ 3000 ᑭᑉᐹᕆᒃᑐᒥ ᐃᓯᒐᓪᓗᐊᓂ ᐃᒡᓗᕐᔪᐊᒥ ᑎᑭᓚᐅᖅᐳᑦ. ᐃᓗᐊᓂ ᒪᓕᒃᑐᓄᑦ ᑕᖅᑭᓄᑦ ᒪᕐᕉᖕᓄᑦ ᐱᖓᓱᓄᓪᓘᓐᓃᑦ ᓄᑖᙳᕆᐊᖅᑎᑕᐅᓯᒪᔪᖅ ᐃᒡᓗᕐᔪᐊᖅ ᐱᔨᑦᑎᕋᕐᓂᐊᖅᐳᖅ ᒥᑦᑎᒪᑕᓕᐅᑉ ᓯᕗᓪᓕᖅᐹᖓᓂ ᖃᓄᐃᙱᑦᑎᐊᕐᓂᕐᒧᑦ ᒪᒥᓴᕐᕕᐅᔪᒧᑦ.

“ᐊᕐᕌᒍᑦ, ᐱᓕᕆᓛᖅᑐᒃᓴᐅᕗᒍᑦ ᐃᒡᓗᕐᔪᐊᑉ ᐃᓗᖓᓐᓂ,” ᐃᓚᒋᐊᖅᓯᓚᐅᖅᐳᖅ ᔅᑖᒃᓕ.

$250,000–ᐸᓗᖕᓂ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓗᑎᒃ ᓴᓇᓂᕐᒧᑦ ᒪᒥᓴᕐᕕᐅᔪᒧᑦ.

ᒪᒥᓴᕐᕕᒃ ᐃᓗᓪᓕᖅᑕᐅᓂᐊᖅᐳᖅ ᐃᒐᓂᑦ ᐊᒻᒪ ᖁᐊᒃᑯᕕᖕᓂ ᐊᒻᒪ ᐃᖅᑲᓇᐃᔭᖅᑎᐅᔪᑦ ᑲᒪᒋᔭᖃᖃᑦᑕᕐᓂᐊᖅᐳᑦ ᓂᖅᖠᐅᕐᓂᕐᒥ ᐃᓕᓐᓂᐊᕐᓂᐅᔪᓂ ᐊᓈᓇᐅᔪᓄᑦ ᐊᒻᒪ ᐃᓚᖏᓐᓂ ᐊᓯᖏᓐᓂ ᐱᓕᕆᐊᖑᓂᐊᖅᑐᓄᑦ ᐃᓄᑐᖃᕐᓄᑦ ᐊᒻᒪ ᓯᖓᐃᔪᓄᑦ ᐊᕐᓇᓄᑦ.

ᒪᒥᓴᕐᕕᒃ ᐃᓗᓕᖃᕐᓂᐊᕆᕗᖅ ᐳᖅᑐᔪᒥ ᐱᕈᖅᓯᐊᖃᕐᕕᖕᒥ. “ᑭᓱᑐᐃᓐᓇᒥᒃ ᐱᕈᓲᖑᔪᒥ ᓄᓇᐅᑉ ᖁᓛᓂ ᐱᕈᖅᓯᐊᖑᔪᓐᓇᖅᐳᑦ ᐅᑯᓇᓂ ᐳᖅᑐᔪᒥ ᐱᕈᖅᓯᐊᖃᕐᕕᐅᔪᓂᑦ. ᐃᔾᔪᖃᕆᐊᖃᙱᓚᖅ,” ᐅᖃᓚᐅᖅᐳᖅ ᔅᑖᒃᓕ.

ᐊᑯᕐᓗᑎᒃ LED ᐃᑯᒪᓂᑦ ᐊᒻᒪ ᐃᒪᕐᒥ, ᐅᑯᐊ ᐳᖅᑐᔪᑦ ᐱᕈᖅᓯᐊᖃᕐᕕᐅᔪᑦ ᐱᕈᖅᓴᐃᔪᓐᓇᖅᐳᑦ ᓂᕿᓂᑦ ᓲᕐᓗ ᐸᐸᓂᑦ, ᔅᐱᓂᑦᔅ, ᓚᑎᔅ, ᐲᔅ, ᐲᓐᔅ ᐊᒻᒪ ᔅᑐᕌᐱᐅᕆᓂᑦ, ᐅᓂᒃᑳᓚᐅᖅᐳᖅ ᓄᓇᓕᖕᓂ ᐊᐅᓚᑦᑎᔨᒻᒪᕆᖓ.

ᐸᕐᓇᐅᑎᖓ ᐱᒋᐊᕐᓗᓂ 12–ᓂ ᐳᖅᑐᔪᓂᑦ ᐱᕈᖅᓯᐊᖃᕐᕕᐅᔪᓂᑦ.

ᑭᖑᓪᓕᖅᐹᖑᔪᒥ, ᑕᓚᕖᓴᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᐅᔪᒥ ᑐᓂᔭᐅᓂᐊᖅᐳᑦ ᓄᓇᓕᖕᒥᐅᑕᓄᑦ ᒪᒥᓴᕐᕕᖕᒥ. ᐃᓄᐃᑦ ᐊᑐᐃᓐᓇᖃᕈᓐᓇᕐᓂᐊᖅᐳᑦ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐃᓅᓯᓕᕆᓂᑐᐃᓐᓇᐅᔪᒥ ᐱᔨᑦᑎᕋᕐᓂᕐᒧᑦ. ᖄᒃᑲᓐᓂᐊᒍᑦ, ᐃᓄᐃᑦ ᓂᕈᐊᕈᓐᓇᕐᓂᐊᖅᐳᑦ ᐊᑯᓂᐅᔪᒃᑯᑦ ᐃᓅᓯᓕᕆᔨᐅᔪᒥ ᐅᑕᖅᑭᕕᐅᔪᒥ ᑎᑎᕋᖅᓯᒪᓂᐅᔪᒥ.

“ᐊᑐᕈᓐᓇᕐᓂᐊᖅᐳᑦ ᐃᓅᓯᓕᕆᔨᐅᔪᒥ ᐊᕐᕌᒍᒧᑦ ᒪᕐᕉᖕᓄᓪᓘᓐᓃᑦ,” ᐅᖃᓚᐅᖅᐳᖅ ᓄᓇᓕᖕᓂ ᐊᐅᓚᑦᑎᔨᒻᒪᕆᖓ, ᐃᓚᒋᐊᖅᓯᓪᓗᓂ “ᐊᖏᓛᖑᔪᖅ” ᐊᑲᐅᙱᓕᐅᕈᑕᐅᔪᖅ ᐱᑕᖃᐃᓐᓇᖅᑐᒥ ᐃᓅᓯᓕᕆᔨᖃᕐᓂᕐᒥᑦ.

ᐃᓚᒋᐊᖅᓯᓚᐅᖅᐳᖅ, “ᐊᔪᕐᓇᖅᑐᑯᓘᙱᓚᖅ ᐃᓅᓯᓕᕆᔨᑖᕆᐊᒃᓴᖅ ᖃᖓᓕᒫᒥ. ᑕᐃᒫᒃ ᑕᒪᓐᓇ ᑲᒪᒋᔭᖃᕐᓂᐊᖅᐳᖅ ᐊᖏᔪᐊᓗᖕᒥ ᐱᔭᕆᐊᖃᕐᓂᐅᔪᒥ ᐊᒥᓱᓄᑦ ᐃᓄᖕᓄᑦ.”

ᕼᐋᒻᓚᒃᑯᑦ ᐱᐊᓂᒃᓯᒪᕗᑦ $30,000–ᒥ ᐃᓅᓯᓕᕆᓂᕐᒧᑦ ᐱᔨᑦᑎᕋᕐᓂᐅᔪᒧᑦ ᐊᒻᒪ ᐸᕐᓇᒃᐳᖅ ᑐᒃᓯᕋᒃᑲᓐᓂᓛᕐᓂᖓᓂ ᑮᓇᐅᔭᒃᑲᓐᓂᕐᓂ.

“ᐱᓕᕆᕐᔪᐊᖅᓯᒪᕗᒍᑦ ᑕᐃᒪᙵᓂ ᐊᕐᕌᒍᒥ ᐊᒻᒪ ᓇᑉᐸᓪᓗᐊᖓᓂ,” ᐅᖃᓚᐅᖅᐳᖅ ᔅᑖᒃᓕ, ᐅᖃᐅᓯᖃᖅᖢᓂ ᑕᒪᒃᑭᓄᑦ ᐱᐅᓯᒋᐊᕐᓂᐅᔪᓄᑦ ᒥᑦᑎᒪᑕᓕᖕᒥ.

“ᐊᒻᒪᓗ ᓱᓕ ᐱᔭᒃᓴᖃᕐᔪᐊᖅᐳᒍ, ᓲᖃᐃᒻᒪ.. ᓱᓕ ᐱᓕᕆᐊᒃᓴᖅᑕᖃᖅᐳᖅ ᓄᓇᓕᖕᓂ, ᑭᓯᐊᓂ ᑎᑭᐅᑎᓂᐊᖅᑕᕗᑦ.”

Advertisement

Rajnesh Sharma

Rajnesh Sharma is a Canadian journalist, who has extensively travelled the world to experience various cultures. She has lived and worked internationally over the past decade, meeting and interviewing...