ᐅᑎᕐᓂᐅᔪᖅ ᓯᕗᓪᓕᐅᔪᓄᑦ ᐃᓄᒃᑎᑐᑦ ᑎᑕᒃᑎᐅᔪᓂᑦ

149

“ᐃᑦᑐᕈᓕᖅᑐᖓ.”
ᑕᐃᒪᐃᓲᖑᕗᑦ ᐊᕐᕌᒍᑦ 33−ᓂ ᐊᓂᒍᖅᑎᓪᓗᒍ ᐊᑕᐅᓯᕐᒥ ᓂᔾᔮᑎᑦᑎᓂᐅᔪᒥ ᐊᒻᒪ ᐊᐃᑉᐸᖓᓄᑦ.

ᐊᑐᓚᐅᖅᐳᒍᑦ ᑲᓇᑕᒥ ᐱᓕᕆᐊᖑᔪᒪᓯᒪᔪᒥ. ᑮᓇᐅᔭᖃᙱᓚᒍᑦ ᑭᓯᐊᓂ ᖁᕕᐊᓱᒃᐳᒍᑦ,” ᐅᖃᓚᐅᖅᐳᖅ ᐃᙱᖅᑎᓪᓚᕆᐅᔪᖅ ᔭᐃᒥᓯ ᐅᖔᓛᖅ. ᓴᐅᒥᖕᒥ, ᑎᑕᒃᑎᓂᑦ ᐃᓚᒋᔭᐅᔪᑦ ᔮᓐ ᐃᓅᔭ, ᐋᓕᓐ ᖃᙳᖅ, ᐅᖔᓛᖅ, ᑎᐊᕆᒃ ᐊᕿᐊᕈᖅ ᐊᒻᒪ ᓇᐃᓴᓇ ᖃᒪᓂᖅ.

ᓄᕕᐱᕆ 23−ᒥ, ᐱᓐᓇᕆᔭᐅᔪᑦ ᐃᒡᓗᓕᖕᒥ−ᑐᙵᕕᓕᖕᓂ ᑎᑕᒃᑎᐅᔪᑦ Northern Haze, ᑐᕌᖅᑎᑕᐅᔪᓂ ᐃᑦᑐᕈᖅᐸᓪᓕᐊᔪᒥ ᓯᕗᓂᐊᓃᑦᑐᒥ ᔭᐃᒥᓯ ᐅᖔᓛᕐᒧᑦ, ᓴᖅᑭᑎᑦᑎᓂᐊᖅᐳᑦ ᓯᕿᓐᓈᕈᒻᒥ, ᓯᕗᓪᓕᖅᐹᖓᓂ ᓂᔾᔮᑎᑦᑎᓂᖓᓐᓂ ᑕᐃᒪᙵᓂ 1980−ᖏᓐᓂ−ᕿᑎᖅᐸᓯᐊᓂ.
ᑕᐃᒪᙵᓂ ᐊᓯᔾᔨᖅᓯᒪᓂᖃᕐᔪᐊᖅᐳᖅ ᐊᑯᓂᐅᓂᐅᔪᒥ. ᓯᕗᓪᓕᖅᐸᐅᔪᑦ ᑎᑕᒃᑎᓂ ᐃᓚᒋᔭᐅᔪᓂ ᐃᓚᐃᔾᔭ ᑯᓄᒃ ᐊᒻᒪ ᖁᓕᑦᑕᓕᒃ ᐃᓄᒃᓱᒃ ᑐᖁᔪᐃᓐᓇᐅᓚᐅᖅᐳᑦ Northern Haze-ᑯᑦ ᓇᖕᒥᓂᖅ−ᐊᑦᑎᖅᓯᒪᔪᒥ ᓂᔾᔮᑎᑦᑎᓂᐅᔪᒥ ᓴᖅᑭᓚᐅᖅᑎᓪᓗᒍ 1985−ᒥ. ᐋᓕᓐ ᖃᙳᖅ ᐊᒻᒪ ᑎᐊᕆᒃ ᐊᕿᐊᕈᖅ, ᐅᖔᓛᑉ ᐃᕐᓂᖓ, ᐃᓚᐅᓕᓚᐅᖅᐳᑦ ᐃᓗᓪᓕᖅᓯᓂᕐᒧᑦ ᐃᓚᑰᓂᐅᔪᓄᑦ.
ᑕᐃᒪᐃᒃᑲᓗᐊᖅᑎᓪᓗᒍ, ᑯᓄᒃ ᐊᒻᒪ ᐃᓄᒃᓱᒃ ᑎᓕᐅᕆᓂᖓ ᓱᓕ ᓴᙱᔪᐊᓘᕗᑦ, ᐅᖃᐅᓯᐅᓪᓗᓂ ᐅᖔᓛᕐᒧᑦ.
“ᑕᐅᑐᙳᐊᕐᓗᒍ ᐊᓯᐅᔨᓪᓗᑎᑦ ᒪᕐᕉᖕᓂ ᖃᐅᔨᒪᔭᐅᕐᔪᐊᖅᑐᓄᑦ ᐃᓄᖕᓂ ᑎᑕᒃᑎᐅᖃᑎᒋᔭᕐᓂᑦ. ᓲᖃᐃᒻᒪ, ᐊᓯᐅᓪᓚᕆᒍᓐᓇᙱᒻᒪᑕ,” ᐅᖃᓚᐅᖅᐳᖅ. “ᑎᒥᒃᑯᑦ ᐱᑕᖃᕈᓐᓃᖅᑐᑦ ᑭᓯᐊᓂ ᑕᕐᓂᖏᑦ ᓱᓕ ᐅᕙᑦᑎᓐᓄᑦ ᖃᓂᕕᒡᔪᐊᕐᒪᑕ ᐅᕙᑦᑎᓐᓄᑦ ᑕᐅᕗᖓᓕᒫᖅ… ᐱᕈᖅᓴᖃᑎᒋᓚᐅᖅᑕᒃᑲ. ᐃᓚᒋᓚᐅᖅᑕᒃᑲ. ᓇᒥᑐᐃᓐᓇᑦᑎᐊᖅ ᑎᑕᒋᐊᖅᓯᒪᑎᓪᓗᑕ ᐃᓱᒪᒋᓲᕆᕙᕗᑦ.”
ᐊᖓᔪᒃᓴᑯᓗᒐ, ᐊᑕᐅᓯᐅᔪᖅ Northern Haze−ᑯᑦ ᖃᐅᔨᒪᔭᐅᓛᖑᖃᑕᐅᔪᒥ ᐃᙱᐅᓯᐅᔪᒥ, ᑲᔪᖏᖅᓴᖅᑕᐅᓚᐅᖅᐳᖅ ᑯᓅᑉ ᐅᓇᑕᕐᓂᕆᔭᖓᓄᑦ ᒪᒥᒐᒃᓴᐅᙱᑦᑐᒥ ᑳᓐᓱᒧᑦ. ᐃᙱᐅᓯᖅ ᐃᙱᐅᓯᙳᓚᐅᖅᐳᖅ ᑲᔪᖏᖅᓴᐃᓂᕐᒧᑦ ᐊᒥᓱᓄᑦ ᐃᓄᖕᓄᑦ, ᐅᖔᓛᖅ ᓇᓗᓇᐃᖅᓯᓚᐅᖅᐳᖅ.
“ᑭᓇᓕᒫᑦᑎᐊᓄᑦ ᑐᓴᕐᓂᕆᕐᔪᐊᓚᐅᖅᐸᖓᑦ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᖁᑦᑎᖕᓂᖅᐹᖑᖃᑕᐅᓚᐅᕐᓂᖓᓂ ᑎᑕᒃᑎᐅᓂᕐᒧᑦ ᐱᓕᕆᐊᕆᔭᒥᓄᑦ.
ᐋᑯᓗᒃ ᑐᓴᕐᓈᕐᓂᐅᔪᒥ ᓇᓗᓇᐃᖅᓯᓪᓗᑎᒃ ᐃᓄᐃᑦ ᐱᐅᒃᓴᖅᑐᓂ Black Sabbath, The Misfits ᐊᒻᒪᓗ Blue Oyster Cult ᐱᐅᒃᓴᕋᔭᖅᑐᒃᓴᐅᕗᑦ Northern Haze−ᑯᑦ ᓂᐱᕐᓗᒐᓚᒃᑐᒥ ᐃᙱᐅᓯᐅᓂᐅᔪᒥ, ᐅᖔᓛᖅ ᑕᑯᒃᓴᐅᑎᑦᑎᓂᖃᖅᖢᓂ ᑐᓴᐅᒪᔭᐅᑦᑎᐊᖅᑐᓂ ᑎᑕᒃᑎᐅᔪᓄᑦ.
“ᐅᑯᐊ ᑎᑕᒃᑏᑦ ᓂᔾᔮᑎᑦᑎᒃᑲᒻᒪᕆᐊᓘᕗᑦ. ᐅᕙᑦᑎᓐᓂ ᖁᑦᑎᒃᓂᖅᓴᒻᒪᕆᐊᓘᕗᑦ, ᐄᓪᓚᕆᒃ,” ᐅᖃᓚᐅᖅᐳᖅ, ᑭᓯᐊᓂ ᓇᓗᓇᐃᖅᓯᓚᐅᖅᐳᖅ ᐃᒡᓗᓕᖕᒥ ᑎᑕᒃᒡᑎᑦ ᐱᙳᐊᕋᓱᐊᖏᓐᓇᐅᔭᖅᐳᑦ ᒋᑖᒥᑦ Jimi Hendrix−ᑎᑐᑦ.
ᐊᑕᐅᓯᖅ ᐊᔪᙱᓐᓂᖃᕐᓂᖏᓐᓂ Northern Haze−ᑯᑦ ᐊᓕᐊᓇᐃᒋᔭᖃᕐᓂᖏᓐᓂ ᑕᐅᑐᒃᖢᒍ ᓄᓇᕐᔪᐊᓕᒫᒥ−ᖃᐅᔨᒪᔭᐅᕐᔪᐊᖅᑐᓄᑦ ᖁᙱᐊᖅᑕᐅᓂᐅᔪᓄᑦ ᐃᙱᓲᖑᓂᖏᓐᓂ ᐃᓄᒃᑎᑐᑦ, ᓴᖅᑭᑎᑦᑎᓲᒥ ᑲᑎᙵᓂᖃᑦᑎᐊᕐᓂᐅᔪᒥ ᐊᒥᓱᓄᑦ ᓄᓇᕗᒻᒥᐅᓄᑦ.
“ᐃᓱᒪᕗᖓ ᐱᐅᒋᔭᐅᓛᖑᖃᑦᑕᕐᓂᖓᓂ Northern Haze−ᒥ ᐃᙱᓲᖑᒐᑦᑕ ᐅᖃᐅᓯᑦᑎᓐᓂ,” ᐅᖃᓚᐅᖅᐳᖅ ᐅᖔᓛᖅ. “ᐸᐸᑦᑏᓐᓇᓲᖑᕗᒍᑦ ᐅᖃᐅᓯᑦᑎᓐᓂ – ᐅᕙᑦᑎᓐᓂ ᓴᐳᔾᔨᕗᒍᑦ. ᐆᒪᓂᐅᕗᖅ.”
ᓄᓇᕗᒻᒥ ᑐᓴᕐᓈᕐᓂᐅᔪᒥ ᑕᑯᒃᓴᐅᓂᖓᓂ ᐱᕈᖅᓯᒪᕗᖅ ᐊᒻᒪ ᐋᖅᑭᒃᐸᓪᓕᐊᕗᖅ ᐊᖏᔪᒻᒪᕆᐊᓗᖕᒥ ᑕᐃᒪᙵᓂ Northern Haze ᐋᖅᑭᒃᑕᐅᓚᐅᖅᑎᓪᓗᒍ. ᐅᖔᓛᖅ ᐅᖃᓚᐅᖅᐳᖅ ᑲᒪᕐᔪᐊᖅᓯᒪᕗᖅ ᓴᖅᑭᑉᐸᓪᓕᐊᔪᓄᑦ ᐊᔪᙱᓐᓂᐅᔪᓂ ᐊᒻᒪ ᐱᕈᖅᐸᓪᓕᐊᔪᒥ ᐃᑲᔪᕈᑎᒃᓴᓂᑦ ᐅᑭᐅᖅᑕᖅᑐᒥᐅᓄᑦ ᐃᙱᖅᑎᐅᔪᓄᑦ.
“ᑲᒪᓇᑦᑎᐊᖅᑐᖅ,” ᐅᖃᓚᐅᖅᐳᖅ. “ᐅᐱᒍᓱᑦᑎᐊᖅᐳᖓ. ᖁᕕᐊᓱᑦᑎᐊᖅᐳᖓ ᖃᓄᖅ ᐱᕈᖅᐸᓪᓕᐊᓂᖓᓂ ᓱᒃᑲᔪᒻᒪᕆᐊᓘᔪᒥ ᒫᓐᓇᐅᔪᒥ.”
ᐊᐱᕆᔭᐅᒐᒥ ᖃᓄᖅ ᐃᓱᒪᓂᖓᓂ ᐃᓄᖕᓂ ᑐᓴᕐᓈᕐᓂᕐᒧᑦ ᐱᐅᒃᓴᕐᓂᐅᓂᕐᒧᑦ, ᐅᖃᓚᐅᖅᐳᖅ ᐃᓚᒋᔭᐅᖏᓐᓇᐅᔭᖅᓯᒪᖕᒪᑦ ᐃᓕᖅᑯᓯᖓᓐᓂ ᐊᔮᔮᕐᓂᕐᒧᑦ ᐊᒻᒪ ᕿᓚᐅᔾᔭᕐᓂᕐᒧᑦ, – ᐱᔾᔪᓯᐅᒃᑲᓐᓂᖅᑐᖅ ᖁᕕᐊᓱᒍᑎᖃᕐᓂᕐᒧᑦ ᓄᓇᒥᒃ ᐊᒻᒪ ᓯᕿᓂᕐᒥᑦ. ᐃᒻᒪᖄ ᐱᔮᖅᑯᒥᐅᙱᑦᑐᒥ, ᓯᕿᓐᓈᕈᑦ ᐃᓄᒃᑎᑐᑦ ᐅᖃᐅᓯᐅᕗᖅ ᖁᕕᐊᓱᒍᑎᖃᖅᑐᒥ ᓯᕿᓂᐅᑉ ᐅᑎᕐᓂᖓᓂ ᑕᖅᑭᒐᓴᖕᓄᑦ ᑖᖅᑐᒦᓚᐅᖅᑎᓪᓗᒋᑦ.
ᑭᓯᐊᓂ ᖁᕕᐊᓱᖕᓃᓐᓇᐅᙱᑦᑐᖅ. ᐃᓚᖏᑦ ᐃᙱᐅᓰᑦ ᐋᔩᖃᑎᖃᖅᐳᑦ ᐊᑲᐅᙱᓕᐅᕈᑕᐅᔪᓂ ᐊᒻᒪ ᐃᒻᒪᖄ ᓇᓚᐅᑦᑖᕆᓂᐅᔪᓐᓇᖅᐳᖅ ᓇᓂᓯᓂᕐᒧᑦ ᐋᖅᑭᒍᑎᒃᓴᐅᔪᓐᓇᖅᑐᓂ ᐊᔾᔨᒌᙱᑦᑐᓄᑦ ᐊᒃᓱᕈᕈᑕᐅᔪᓄᑦ, ᐅᖔᓛᖅ ᐅᖃᓚᐅᖅᐳᖅ.
ᐱᒋᐊᕈᑕᐅᔪᖅ ᐃᙱᐅᓯᖅ ᓯᕿᓐᓈᕈᒻᒥ ᑕᐃᔭᐅᔪᒥ ᐃᓄᒃ, ᐅᖃᐅᓯᖃᖅᐳᖅ ᐃᓗᐊᒍᑦ ᓂᙵᐅᒪᕐᔪᐊᕐᓂᐅᔪᒥ, ᐅᖔᓛᖅ ᐃᕆᐊᓛᒐᓚᓚᐅᖅᖢᓂ ᐃᓄᒃᑎᑐᑦ ᓯᕗᓪᓕᐅᔪᓄᑦ ᖃᒡᓯᐊᕐᔪᖕᓄᑦ ᓴᑲᓐ−ᖑᔪᓄᑦ.
“ᓇᓗᓇᐃᖅᓯᓂᖃᖅᐳᖅ ᐊᒃᓱᕉᓴᖕᓂᕆᔭᓐᓂᑦ. ᐃᓛᒃ, ᐃᓄᓪᓚᕆᐅᒐᒪ. ᐊᔾᔨᐅᙱᓐᓂᖃᖅᐳᖓ, ᐊᒻᒪ ᐊᕐᕌᒍᒐᓴᓄᑦ ᓄᖑᑉᐸᓪᓕᐊᕗᖅ ᐊᔾᔨᒌᓕᖅᑎᑕᐅᓇᓱᖕᓂᕐᒧᑦ, ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ, ᑐᒃᓯᐊᕐᕕᓄᑦ ᐊᒻᒪ ᒪᓕᒐᓕᕆᓂᕐᒧᑦ ᐊᒻᒪ ᑭᓱᓕᒫᑦᑎᐊᓂᒃ,” ᐅᓂᒃᑳᕆᓚᐅᖅᐳᖅ. “ᑎᑎᕋᓚᐅᖅᐸᕋ ᐃᙱᐅᓯᖅ ᐅᕙᓐᓂᑦ ᑕᑯᒃᓴᐅᑎᑦᑎᓇᓱᐊᖅᖢᖓ ᐃᓄᓪᓚᕆᐅᓂᓐᓂᑦ ᐱᐅᙱᓐᓂᖅᓴᐅᙱᖦᖢᖓ ᑭᓇᑐᐃᓐᓇᒥᑦ – ᐅᓇᑕᕐᓂᕐᒧᑦ ᐊᔾᔨᒌᒃᑎᑦᑎᓇᓱᐊᕐᓂᐅᔪᒥ, ᐅᓇᑕᕐᓂᕐᒧᑦ ᐊᐅᓚᑦᑎᓂᖃᕋᓱᐊᕐᓂᐅᔪᒥ. ᐊᑭᐅᒪᓂᐅᕗᖅ… ᑕᐃᒪᑐᖅ ᑕᑯᒃᓴᐅᑎᑦᑎᓂᐊᖅᐳᖅ ᑭᓱᓕᒫᓂᒃ ᐊᓯᐅᔨᓯᒪᙱᓐᓂᑦᑎᓐᓂ.”
ᐃᓄᒃ ᐊᑕᐅᓯᐅᕗᖅ 10−ᖑᔪᓂ ᐃᙱᐅᓯᐅᔪᓂ ᓄᑖᖑᔪᒥ ᑐᓴᕐᓈᒐᒃᓴᐅᔪᒥ, ᓂᐱᓕᐅᖅᑕᐅᓚᐅᖅᑐᒥ ᐃᖃᓗᖕᓂ ᔭᓄᐊᕆᐅᑎᓪᓗᒍ.
54−ᖑᓕᖅᖢᓂ, ᐅᖔᓛᖅ ᐅᖃᓚᐅᖅᐳᖅ ᐃᒻᒥᓂᒃ ᑕᐅᑐᖕᓂᖓᓂ ᑎᑕᖕᓂᕐᒧᑦ ᓄᑖᖑᔪᓂ ᐊᒻᒪ ᓄᑕᐅᙱᑦᑑᑕᐅᓂᖅᓴᓂ ᐃᙱᐅᓯᓂᑦ ᖁᙱᐊᖅᑕᐅᓗᑎᒃ ᖃᓄᐃᓐᓂᐅᔪᓄᑦ ᐃᒡᓗᓕᖕᒥ, ᑭᓯᐊᓂ ᐊᓯᐊᓄᙵᐅᓂᖓᓂ ᓄᓇᓕᖕᓄᑦ ᐃᙱᕆᐊᕐᓗᑎᒃ ᐊᓂᒍᖅᐳᖅ.
“ᐱᔭᕇᖅᐳᖓ. ᐱᐊᓂᒃᐳᖓ… ᐱᓕᕆᐊᕆᔪᓐᓇᙱᓚᕋ ᑕᐅᕗᖓᓕᒫᖅ,” ᐅᖃᓚᐅᖅᐳᖅ ᑎᑕᒃᑎᐅᓂᕐᒧᑦ ᐃᓕᖅᑯᓯᕆᔭᖓᓐᓄᑦ. “ᐊᐅᓪᓚᖃᑦᑕᔾᔮᕈᓐᓃᖅᑐᖓ. ᑐᓂᓂᐊᓕᖅᐸᕋ ᐱᐅᔫᑎᐅᔪᑦ, ᐳᓚᕋᕐᓂᖅ ᐊᒻᒪ ᑎᑕᒋᐊᕐᓗᑎᒃ, ᐃᕐᓂᓐᓄᑦ (ᑎᐊᕆᒃᒧᑦ) ᐊᒻᒪ ᐱᖃᓐᓇᕆᔭᖏᓐᓄᑦ… ᓇᖕᒥᓂᖅ ᐃᓅᓯᖃᕈᒪᕗᖓ ᐃᕐᙳᑕᓐᓃᓪᓗᖓ. ᐊᒥᓱᓂ ᐊᕐᕌᒍᓂ ᑕᒫᓃᖏᓐᓇᔾᔮᕈᓐᓃᕋᒪ. ᐊᐅᓪᓚᖅᓯᒪᕗᖓ ᐊᕐᕌᒍᓄᑦ 33−ᓄᑦ, ᕿᑐᙵᒃᑲ ᕿᒪᒃᓯᒪᓪᓗᒋᑦ, ᐃᕐᙳᑕᒃᑲᓗ. ᖁᕕᐊᓱᖕᓇᐅᓕᖅᐸᑦ, ᐸᕐᓇᒋᐊᖃᖅᐸᓚᐅᖅᐳᒍᑦ. ᐊᐅᓪᓚᖅᓯᒪᒐᔪᓚᐅᖅᐳᖓ.
“ᐊᖏᕐᕋᐅᓐᓇᖅᓯᔪᖅ ᐊᒻᒪ ᐃᑦᑐᕈᕐᓗᖓ. ᖃᔅᓯᐊᕐᔪᖕᓂ ᐊᕐᕌᒍᓂ ᖃᓂᒋᑦᑎᐊᕐᓗᒋᑦ ᐃᓚᓐᓃᑦᑐᒪᕗᖓ.”