ᐅᐃᓂᐱᐊᒡᒥ ᓴᓇᙳᐊᒐᖃᕐᕕᖓ (WAG) ᖁᕕᐊᓱᒍᑎᖃᖅᐳᑦ ᓇᓚᐅᑦᑖᕆᔭᐅᔪᒥ ᕕᕈᐊᕆ 2021–ᒥ ᒪᑐᐃᓛᕐᓂᖓᓂ ᐃᓄᐃᑦ ᓴᓇᐅᒐᓄᑦ ᐱᓕᕆᕝᕕᖕᒥ ᑲᒪᒋᔭᖃᕐᓗᑎᒃ ᑲᑎᖅᓱᖅᑕᐅᓯᒪᔪᓂ ᐊᑐᒐᒃᓴᐅᔪᓂ ᓴᓇᐅᒐᓂᑦ ᐃᓄᐃᑦ ᐊᑐᖅᐸᓚᐅᖅᑕᖏᓐᓂ: ᐃᓄᒃᓯᐅᑎᑦ, ᐊᑦᑎᖕᓂᖅᓴᐅᔪᒥ ᐃᓚᖓᓐᓂ ᑕᑯᔭᒐᖃᕐᕕᖕᒥ.
ᐅᓪᓛᖓᓂ ᐅᒃᑐᐱᕆ 28–ᒥ ᐅᐃᓂᐱᐊᒡᒥ ᑲᓱᖅᓯᒪᓂᖃᕐᓂᐊᕐᓂᖏᓐᓂ ᐱᓕᕆᐊᖃᓚᐅᖅᐳᑦ ᖃᕋᓴᐅᔭᑎᒍᑦ ᓄᓇᖃᖅᑳᖅᓯᒪᔪᓄᑦ ᐊᑦᑎᖅᓯᓂᐅᔪᒥ ᐅᖃᐅᓯᖃᕐᓂᐅᔪᒥ ᐃᓄᐃᑦ ᓴᓇᐅᒐᓄᑦ ᐱᓕᕆᕝᕕᖓᓄᑦ, ᓴᖅᑭᑎᑦᑎᓪᓗᑎᒃ ᓂᕈᐊᖅᑕᐅᔪᒥ ᐃᓄᒃᑎᑐᑦ ᐊᑎᖓᓐᓂ ᖃᐅᒪᔪᖅ, ᑐᑭᖃᖅᑐᒥ ‘it is bright, it is lit’ ᖃᓪᓗᓈᑎᑐᑦ.

ᐃᒡᓗᓄᑦ ᓴᓇᔨᐅᔫᑉ ᓴᓇᐅᒐᖓᓂ ᖃᐅᒪᔪᖅ ᐃᒡᓗᕐᔪᐊᖓᓂ ᐊᖅᑯᒻᒥ. ᐃᒡᓗᕐᔪᐊᖅ ᒪᑐᐃᖅᑕᐅᓂᐊᖅᐳᖅ ᕕᕈᐊᕆ 2021–ᒥ ᐊᒻᒪ ᑲᒪᒋᔭᖃᕐᓂᐊᖅᐳᖅ ᑕᒪᒃᑭᓂ ᓄᓇᕗᒻᒥ ᒐᕙᒪᒃᑯᓐᓂ ᓴᓇᐊᒐᑦᑎᐊᕙᖕᓂ ᑲᑎᖅᓱᖅᑕᐅᓯᒪᔪᓄᑦ ᐊᒻᒪᓗ ᐅᐃᓂᐱᐊᒡᒥ ᓴᓇᙳᐊᒐᖃᕐᕕᖓᑕ ᓇᖕᒥᓂᖅ ᑲᑎᖅᓱᖅᓯᒪᔭᖏᓐᓂ ᐃᓄᐃᑦ ᓴᓇᓂᑯᖏᓐᓂ ᓴᓇᐅᒐᓂᑦ. Michael Maltzan Architecture image courtesy of Winnepeg Art Gallery

“ᖃᐅᒪᔪᖅ ᐃᓂᐅᓂᐊᖅᐳᖅ ᖃᓄᐃᑦᑐᑐᐃᓐᓇᑦᑎᐊᓂ ᐃᓅᓯᕆᔭᐅᔪᓂ ᓴᓇᙳᐊᒐᖃᕐᕕᒃ ᓴᖅᑭᑎᑦᑎᓂᐅᔪᒥ ᐃᓄᐃᑦ ᓴᓇᐅᒐᖏᓐᓂ ᐊᒃᓱᕈᕐᓂᑯᑦᑎᓐᓂ, ᐆᒪᔪᓐᓇᕐᓂᑦᑎᓐᓂ ᐊᒻᒪ ᓴᙱᓂᑦᑎᓐᓂ,” ᐅᖃᓚᐅᖅᐳᖅ ᑎᕇᓯ ᑐᖏᓕᒃ ᑲᖏᖅᖠᓂᕐᒥᐅᑕᓪᓚᕆᒃ, ᐃᓚᒋᔭᐅᖃᑕᐅᔪᒥ ᐅᐃᓂᐱᐊᒡᒥ ᓴᓇᐅᙳᐊᒐᖃᕐᕕᒃ ᓄᓇᖃᖅᑳᖅᓯᒪᔪᓄᑦ ᐅᖃᐅᔾᔨᔨᐅᔪᓄᑦ ᑲᑎᒪᔨᕋᓛᖑᔪᓄᑦ.

ᐃᑲᔪᕐᓂᕐᒧᑦ ᖁᕕᐊᓱᒍᑎᖃᕐᓂᕐᒧᑦ ᐊᖏᒡᓕᕙᓪᓕᐊᔪᒥ ᐱᔪᒪᓂᐅᔪᒥ ᐃᓄᐃᑦ ᒥᖅᓱᒐᖏᓐᓂ ᓄᓇᕐᔪᐊᓕᒫᒥ, ᐃᓄᒃᓯᐅᑎᓄᑦ ᓇᓗᓇᐃᖅᓯᕗᑦ ᐊᓐᓄᕌᓕᐊᖑᔪᓂ ᓴᓇᓯᒪᔪᓂ ᐱᖅᑯᓯᑐᖃᖅᑎᒍᑦ ᓱᓇᒃᑯᑖᓂ ᓇᓂᔭᐅᕙᒃᑐᓂ ᓄᓇᕗᒻᒥ ᓇᑦᑎᐅᑉ ᕿᓯᖏᓐᓂ ᐊᒻᒪ ᑐᒃᑑᑉ ᐊᒥᖏᓐᓂ ᓴᓇᓯᒪᔪᓂ ᓴᓇᙳᐊᖅᓯᒪᔪᓄᑦ ᑐᒃᑑᑉ ᓇᒡᔪᖏᓐᓂ ᓴᐸᖓᓕᐊᓂ, ᑑᒑᕐᒥ ᐃᓪᓚᐃᒍᑎᓂᑦ ᐊᒻᒪ ᑲᑭᖅᑯᐊᓄᑦ.

“ᑕᐃᔅᓱᒪᓂᑐᖃᖅ, ᐊᒥᓱᑦ ᒥᖅᓱᖅᑎᐅᔪᑦ ᐃᓕᑦᑎᕙᓚᐅᖅᐳᑦ ᒪᒃᑯᕐᔪᐊᖅᑎᓪᓗᒋᑦ ᒥᖅᓱᕐᓂᕐᒧᑦ ᐊᒻᒪᓗ ᓴᓇᓂᕐᒧᑦ ᓇᖕᒥᓂᖅ ᐊᓐᓄᕌᒃᓴᖏᓐᓂ ᑐᒃᑐᓂ ᐊᒥᕐᓂᑦ ᐊᒻᒪ ᓇᑦᑎᐅᑉ ᕿᓯᖓᓐᓂ. ᐅᓇ ᑕᑯᒃᓴᐅᑎᑕᐅᓂᐅᔪᖅ ᑕᑯᒃᓴᐅᑎᑦᑎᕗᖅ ᓂᕈᐊᖅᑕᐅᓯᒪᔪᓂ ᓴᓇᐅᒐᓂ ᓴᓇᔭᐅᓯᒪᔪᓂ ᐸᖅᑭᔭᐅᑦᑎᐊᖅᑐᒻᒪᕆᐅᓪᓗᑎᒃ ᐊᒻᒪᓗ ᐱᓕᕆᑦᑎᐊᕐᓂᐅᔪᒥ ᐊᑐᖅᖢᑎᒃ ᒥᖅᓱᕐᓂᕐᒧᑦ ᐊᔪᙱᓐᓂᐅᔪᓂ ᑐᓂᔭᐅᓯᒪᔪᓄᑦ ᐊᒥᓱᓄᑦ ᐱᐅᓯᖃᑎᒌᖑᔪᓄᑦ.” ᐅᖃᓚᐅᖅᐳᖅ ᐅᐃᓂᐱᐊᒡᒥ ᓴᓇᙳᐊᒐᖃᕐᕕᖓ.

ᐊᑕᐅᓯᖅ ᓴᓇᓯᒪᔪᖅ ᐊᑐᖅᑐᐊᖅᑕᐅᔪᒥ ᓄᓇᕗᒻᒥ ᒐᕙᒪᒃᑯᓐᓂ ᓴᓇᐊᒐᑦᑎᐊᕙᖕᓂ ᑲᑎᖅᓱᖅᑕᐅᓯᒪᔪᓄᑦ ᐅᑯᐊᖑᕗᑦ ᐳᐊᓗᐃᑦ ᓴᓇᔭᐅᓂᑯᓂ 1976–ᒥ ᒨᓇ ᕇᐱᑲ ᐃᑎᑕᖅᑖᑕᕐᒧᑦ ᑕᓗᕐᔪᐊᕐᒥᐅᑕᒧᑦ.  Lianed Marcoletta photo courtesy of the Winnipeg Art Gallery

ᑕᑯᒃᓴᐅᑎᑦᑎᓪᓗᓂ ᓴᓇᐅᒐᐅᔪᓂ ᓄᓇᕗᒻᒥ ᒐᕙᒪᒃᑯᓐᓂ ᓴᓇᐊᒐᑦᑎᐊᕙᖕᓂ ᑲᑎᖅᓱᖅᑕᐅᓯᒪᔪᓄᑦ ᐊᒻᒪᓗ ᐅᐃᓂᐱᐊᒡᒥ ᓴᓇᙳᐊᒐᖃᕐᕕᖓᑕ ᓇᖕᒥᓂᖅ ᑲᑎᖅᓱᖅᓯᒪᔭᖏᓐᓂ ᐃᓄᐃᑦ ᓴᓇᐅᒐᖏᓐᓂ, ᐃᓄᒃᓯᐅᑎᓂᑦ ᓇᒃᓴᖅᐳᖅ ᐊᔾᔨᒌᙱᕈᓘᔭᖅᑐᓂ ᐃᓚᒋᐊᕈᑕᐅᔪᓂ, ᑕᑯᒥᓴᐅᑏᑦ, ᓴᐸᖓᐃᑦ, ᐳᐊᓗᐃᑦ ᐊᒻᒪ ᐊᓯᖏᓐᓂ ᐊᓐᓄᕌᓂᑦ ᓄᓇᕘᑉ ᑕᐃᔅᓱᒪᓂᐅᓚᐅᖅᑐᒥ ᐊᒻᒪ ᒫᓐᓇᐅᔪᒥ ᑕᑯᒃᓴᐅᑎᑕᐅᓂᖓᓄᑦ.
ᓴᓇᐅᒐᐃᑦ ᐅᕙᙶᖅᓯᒪᕗᑦ ᐊᔾᔨᒌᙱᕈᓘᔭᖅᑐᓂ ᐊᑦᑎᖅᓯᒪᔪᓂ ᓴᓇᐅᒐᓕᕆᔨᐅᔪᓄᑦ ᐊᒻᒪᓗᑦᑕᐅᖅ ᖃᔅᓯᒐᓚᖕᓂ ᐊᔾᔨᒌᙱᑦᑐᓂ ᓇᓗᓇᐃᖅᑕᐅᓯᒪᙱᑦᑐᓄᑦ ᓴᓇᐅᒐᓕᕆᔨᐅᔪᓄᑦ ᐃᓄᐃᑦ ᑕᐃᔅᓱᒪᓂᑐᖃᕐᒥ ᐃᑲᔪᓚᐅᖅᑐᓄᑦ ᐱᕙᓪᓕᐊᑎᑦᑎᓂᕐᒥ ᐅᓇᙳᕋᔭᓚᐅᖅᑐᒥ ᑲᑎᖅᓱᐃᓂᐅᔪᒥ ᓴᓇᐅᒐᓂᑦ.

ᔮᔅᓕᓐ ᐲᕋᐃᓂᓐ, ᑕᑯᔭᒐᖃᕐᕕᖕᒥ ᐸᖅᑭᔨᐅᔫᑉ ᐃᑲᔪᖅᑎᖓ ᐃᓄᐃᑦ ᓴᓇᐅᒐᖏᓐᓂ ᐅᐃᓂᐱᐊᒡᒥ ᓴᓇᙳᐊᒐᖃᕐᕕᖕᒥ ᐊᒻᒪᓗ ᑕᑯᔭᒐᖃᕐᕕᖕᒥ ᐸᖅᑭᔨᐅᔪᖅ ᐅᖃᓚᐅᖅᐳᖅ, “ᐃᓄᐃᑦ ᓴᓇᐃᓐᓇᐅᔭᖅᓯᒪᕗᑦ ᓇᖕᒥᓂᖅ ᐊᓐᓄᕌᒃᓴᖏᓐᓂ. ᐃᓄᒃᓯᐅᑎᓄᑦ ᖁᕕᐊᓱᒍᑎᖃᖅᐳᑦ ᑕᐃᔅᓱᒪᓂᑐᖃᖅ ᐊᔾᔨᒌᙱᕈᓘᔭᕐᓂᖓᓂ ᓴᓇᓯᒪᓂᐅᔪᓂ ᐊᓐᓄᕌᓂᑦ ᐊᒻᒪ ᑕᑯᒥᓴᐅᑎᓂᑦ, ᐊᒻᒪᓗ ᖃᓄᖅ ᒫᓐᓇᐅᓕᖅᑐᒥ ᓴᓇᐅᒐᓕᕆᔨᐅᔪᑦ ᐱᓕᕆᒃᑲᓐᓂᓕᕐᓂᖏᓐᓂ ᐱᖅᑯᓯᑐᖃᖅᑎᒍᑦ ᓱᓇᒃᑯᑖᓂ, ᖃᐅᔨᒪᓂᐅᔪᒥ, ᐊᒻᒪ ᒥᖅᓱᕐᓂᐅᔪᒥ ᐊᔪᙱᓐᓂᐅᔪᓂ ᓴᖅᑭᑎᑦᑎᓂᕐᒧᑦ ᐊᔾᔨᐅᙱᑦᑐᓂ ᐊᑐᒐᒃᓴᐅᔪᓂ ᓴᓇᐅᒐᐅᔪᓂᑦ.”

Advertisement