ᐃᖏᕐᕋᓂᖃᖅᓯᒪᕗᖅ, ᑭᓯᐊᓂ ᐊᑐᐃᓐᓇᖃᕐᓂᖅᓴᐅᓂᕐᒧᑦ ᐃᔨᓕᕆᓂᕐᒧᑦ ᐊᒻᒪ ᑭᒍᑎᓕᕆᓂᕐᒧᑦ ᐸᖅᑭᓂᐅᔪᒥ ᓱᓕ ᐱᔭᐅᔭᕆᐊᖃᖅᐳᑦ

228

ᓄᓇᕗᒻᒥᐅᑦ ᐊᑐᐃᓐᓇᖃᕈᓐᓇᖅᐳᑦ ᑕᒪᒃᑭᐅᒪᔪᒥ ᐊᔾᔨᒌᙱᓐᓂᐅᔪᓂ ᐃᔨᓕᕆᓂᕐᒧᑦ ᐊᒻᒪ ᑭᒍᑎᓕᕆᓂᕐᒧᑦ ᐸᖅᑭᔭᐅᓂᕐᒧᑦ ᓄᓇᒋᔭᖏᓐᓂ ᓄᓇᕗᒻᒥ, ᑭᓯᐊᓂ ᐊᔪᕐᓇᙱᓐᓂᖓ ᐊᑐᐃᓐᓇᖃᕐᓂᕐᒥ ᓱᓕ ᐊᒡᕕᐊᕈᑕᐅᕗᖅ ᐃᓚᖏᓐᓄᑦ ᒪᓕᒐᓕᐅᖅᑎᓄᑦ.

ᑭᒍᑎᓕᕆᕝᕖᑦ ᓲᕐᓗ ᐆᒪᙵᑦ ᐃᓂᖃᖅᐳᑦ ᐊᑐᓂ ᓄᓇᕗᒻᒥ ᓄᓇᓕᐅᔪᓂ, ᐊᒻᒪ ᖄᖏᖅᓯᒪᓕᖅᑐᓂ ᖃᔅᓯᐊᕐᔪᖕᓂ ᐊᕐᕌᒍᓂᑦ ᑕᒪᕐᒥᒃ ᐱᓕᕆᔾᔪᑎᐅᔪᑦ ᓄᑖᙳᕆᐊᖅᑎᑕᐅᓯᒪᓕᖅᐳᑦ. ᑭᒍᑎᓕᕆᓂᕐᒧᑦ ᑲᑎᙵᓂᐅᔪᑦ, ᑲᑎᓪᓗᒍ 15-ᓂ 20-ᓄᑦ ᑭᒍᑎᓕᕆᔨᑦ ᖃᖓᑐᐃᓐᓇᑦᑎᐊᖅ, ᐅᑎᖅᑕᕋᐅᔭᓲᖑᕗᑦ ᓄᓇᓕᐅᔪᓄᑦ ᒥᑭᓛᖑᔪᒥ ᑎᓴᒪᓂ ᐊᕕᒃᑐᖅᓯᒪᓂᐅᔪᓄᑦ ᐳᓚᕋᕐᓂᐅᔪᓄᑦ ᐊᑐᓂ ᓄᓇᓕᐅᔪᒧᑦ.

ᐃᖃᓗᖕᓂ-ᓂᐊᖁᙴᒧᑦ ᒪᓕᒐᓕᐅᖅᑎ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᒥᓂᔅᑕᐅᓚᐅᖅᑐᖅ ᐹᑦ ᐊᕐᓇᒃᑲᖅ ᐅᖃᓚᐅᖅᐳᖅ ᓄᓇᓕᖕᓂ ᐃᓱᒫᓘᑎᑕᖃᖅᓯᒪᕗᑦ ᐊᑯᓂᐅᓂᖓᓂ ᑕᑯᔭᐅᕝᕕᒃᓴᓕᐅᕐᓂᕐᒧᑦ ᑭᒍᑎᓕᕆᔨᒧᑦ.
“ᑭᒍᑎᓕᕆᔨ ᓄᓇᓕᖕᓃᒐᔪᒃᐳᖅ ᐅᓪᓗᓄᑦ ᑕᓪᓕᒪᓄᑦ ᑕᐃᒪᓐᓇᒐᓚᒃ ᐊᒻᒪ ᐊᒥᓱᑦ ᓄᓇᖃᖅᑎᐅᔪᑦ ᑕᑯᔪᓐᓇᖅᓯᕙᙱᓚᑦ ᑭᒍᑎᓕᕆᔨᒥ ᓈᒻᒪᖕᓂᐅᔪᒥ ᐱᔾᔪᑎᖃᖅᖢᓂ ᐱᔪᒪᓂᐅᔪᒧᑦ. ᐃᓱᒪᕗᖓ ᓄᓇᓕᐅᔪᑦ ᓵᙵᔪᓂ ᐊᑯᓂᐊᓗᖕᒥ ᐅᑕᖅᑭᔭᕆᐊᖃᕐᓂᐅᔪᒥ ᒪᓕᒐᓕᐅᖅᑎᖏᓐᓂ ᒪᐃᔭᖓᓘᓐᓃᑦ ᑎᑎᕋᕐᓗᑎᒃ ᒥᓂᔅᑕᒧᑦ ᑐᒃᓯᕋᕐᓂᕐᒧᑦ ᐅᓄᕐᓂᖅᓴᓂ ᑭᒍᑎᓕᕆᓂᕐᒧᑦ ᐅᓪᓗᓂᑦ ᓄᓇᓕᖏᓐᓄᑦ,” ᐅᖃᓚᐅᖅᐳᖅ.
“ᑕᐃᒪᐃᒃᑭᕗᖅ ᐃᔨᓕᕆᔭᐅᓂᕐᒧᑦ. ᐅᑕᖅᑭᔭᕆᐊᓕᖕᓂ ᑎᑎᕋᖅᑕᐅᓯᒪᓂᖃᖅᐳᑦ ᐊᒻᒪ ᐱᔨᑦᑎᕋᕐᓂᐅᔪᖅ ᑭᒡᓕᖃᖅᐳᑦ ᓄᓇᓕᖕᓂ ᑕᐃᒪᐃᑦᑐᓄᑦ ᐱᔨᑦᑎᕋᕐᓂᐅᔪᓄᑦ ᐊᒻᒪ ᑕᑯᓲᖑᕗᒍᑦ ᐊᒥᓱᓂ ᓄᓇᕗᒻᒥᐅᓂ ᐊᐅᓪᓛᖅᑐᓄᑦ ᐊᕕᒃᑐᖅᓯᒪᓂᐅᔪᓄᑦ ᐱᓕᕆᕝᕕᖕᓄᑦ ᑕᐃᒪᐃᑦᑐᓂ ᐱᔨᑦᑎᕋᖅᑕᐅᓂᕐᓄᑦ. ᐃᓱᒫᓘᑕᐅᔪᓂ ᑕᐃᒪᐃᑦᑐᓄᑦ ᐊᐅᓪᓛᕆᐊᖃᕐᓂᐅᔪᒥ ᐱᓕᕆᓂᖃᕆᐊᖃᕐᓂᖓᓂ ᐊᐅᓪᓛᕐᓂᕐᒧᑦ ᐊᑐᖅᑕᐅᓂᑯᓂ ᐃᒻᒥᓂᒃ ᐅᕝᕙᓘᓐᓃᑦ ᓱᓕᓂᐅᔪᒥ ᐊᖓᔪᖅᑳᑦ ᕿᒪᒃᓯᔭᕆᐊᖃᕐᓂᖏᓐᓂ ᕿᑐᕐᙵᒥᓂᑦ ᐊᒻᒪ ᐃᓚᖏᓐᓂ ᐱᔨᑦᑎᕋᕐᓂᖅᑖᕐᓂᕐᒧᑦ.”
ᐅᑕᖅᑭᔭᕆᐊᖃᕐᓂᐅᔪᒥ ᑎᑎᕋᖅᓯᒪᓂᐅᔪᓄᑦ ᓱᕈᓯᕐᓄᑦ ᑭᒍᑎᓕᕆᓂᕐᒧᑦ ᐱᔨᑦᑎᕋᕐᓂᐅᔪᒥ ᑕᑯᔫᒋᕗᖅ.
“ᑭᓯᐊᓂ ᑐᑭᓯᐅᒪᓂᕐᒧᑦ, ᖃᐅᔨᒪᔭᕆᐊᖃᖅᐳᑎᑦ ᖃᓄᖅ ᑐᑭᖃᕐᓂᖓᓂ. 600-ᐸᓗᖕᓂ ᓱᕈᓯᐅᒐᔪᒃᐳᑦ. ᑭᓯᐊᓂ ᐅᓄᕐᓂᐅᔪᓂ ᓱᕈᓯᕐᓂᑦ ᐃᓅᓕᓴᖅᑕᐅᔪᓐᓇᖅᑐᓂ ᓄᓇᕗᒻᒥ ᐱᓕᕆᓂᑦᑎᓐᓄᑦ ᓇᑉᐸᓪᓗᐊᕆᔭᒃᓴᕆᕙᐅᒃ. ᐊᓯᖏᑦ ᐃᓂᓕᐅᖅᑕᐅᓯᒪᕗᑦ ᐱᔨᑦᑎᕋᕐᓂᕐᒧᑦ ᖃᓪᓗᓈᑦ ᓄᓇᖓᓐᓂ ᐊᒻᒪ ᐋᖅᑭᒃᓱᖅᑕᐅᓲᓂᖏᓐᓂ ᐊᐅᓚᑕᐅᓪᓗᑎᒃ ᖃᓪᓗᓈᑦ ᓄᓇᖓᓐᓂ ᐱᓕᕆᕝᕕᐅᔪᓂᑦ,” ᐅᖃᓚᐅᖅᐳᖅ ᕌᓐ ᑲᓕ, ᓄᓇᕗᒻᒥ ᒐᕙᒪᒃᑯᑦ ᑐᑭᒧᐊᒃᑎᑦᑎᔨᖓ ᖃᓂᕐᒧᑦ ᖃᓄᐃᙱᑦᑎᐊᕐᓂᐅᔪᒧᑦ.
ᐊᒡᒍ ᒪᓕᒐᓕᐅᖅᑎ ᐹᓪ ᖁᐊᓴ ᐅᖃᐅᓯᖃᖅᐳᖅ ᖁᑦᑎᒃᑐᒥ ᐊᑭᐅᔪᓂ ᐃᓚᒋᔭᐅᔪᒥ ᓇᒃᓯᐅᔾᔨᓂᕐᒥ ᓱᕈᓯᕐᓂᑦ ᓄᓇᕘᑉ ᓯᓚᑖᓄᑦ.
“ᖃᐅᔨᒪᕗᖓ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᐅᓪᓚᖅᑎᑦᑎᓲᖑᓂᖏᓐᓂ ᑕᐅᓄᖓ ᑰᒡᔪᐊᕌᓗᒃ, ᒫᓂᑑᐸᒧᑦ, ᑭᒍᑎᓕᕆᓂᕐᒧᑦ ᐸᖅᑭᔭᐅᓂᕐᒧᑦ, ᐊᖓᔪᖅᑳᑦ ᑲᒪᔨᒋᔭᐅᔪᓪᓘᓐᓃᑦ ᒪᓕᒃᑎᒋᔭᐅᓪᓗᑎᒃ ᐊᒻᒪ ᐆᒪ ᐊᑭᖓ ᐊᖏᔪᒻᒪᕆᐊᓘᕗᖅ. ᐅᑯᐊ ᐊᑭᐅᔪᑦ ᓴᖑᑎᑕᐅᔪᓐᓇᕋᔭᖅᐳᑦ ᓄᓇᓕᖕᓂ ᐋᓐᓂᐊᕕᐅᔪᓄᑦ,” ᐅᖃᓚᐅᖅᐳᖅ.
ᑲᖏᖅᖠᓂᕐᒧᑦ ᐅᐊᖕᓇᒧᑦ-ᐃᒡᓗᓕᒑᕐᔪᖕᒧᑦ ᒪᓕᒐᓕᐅᖅᑎ ᑳᑎ ᑕᐅᑐᙱᐅᑉ ᐃᓱᒫᓘᑎᖏᑦ ᐅᕙᙶᖅᐳᑦ ᓇᖕᒥᓂᖅ ᐊᑐᓚᐅᖅᓯᒪᓂᑯᖏᓐᓂᑦ.
“ᖃᐅᔨᒪᕗᖓ ᑭᒍᑎᓕᕆᓂᕐᒧᑦ ᐸᖅᑭᓂᐅᔪᒧᑦ, ᓇᓪᓕᐅᒃᑯᒫᖃᙱᓐᓂᐅᔪᓄᑦ ᐱᕚᓪᓕᕈᑎᑦ ᐊᑭᓖᓲᖑᙱᓚᑦ ᐱᔭᕆᐊᖃᕐᔪᐊᖅᑐᓂ ᑭᒍᑎᓄᑦ ᓴᕕᕋᔭᓕᖅᑕᐅᓂᕐᓄᑦ ᑐᑭᓕᐊᖅᑎᑦᑎᔾᔪᑕᐅᔪᓄᑦ ᓱᕈᓯᕐᓄᑦ. ᒪᕐᕉᒃ ᐃᕐᙳᑕᒃᑲ ᐊᖏᖅᑕᐅᓯᒪᙱᓚᑦ ᖃᔅᓯᐊᖅᓱᖅᑕᐅᒐᓚᒃᖢᑎᒃ,” ᐅᖃᓚᐅᖅᐳᖅ.
“ᐸᓂᒐ ᑭᒍᑎᒥᓂᑦ ᐊᒃᓱᐊᓗᒃ ᐸᖅᑭᑦᑎᐊᓲᖑᕗᖅ, ᑭᓯᐊᓂ ᑭᒍᑎᖏᑦ ᐸᖕᒥᐅᓗᐊᖅᐳᑦ. ᑕᒪᓐᓇ ᐊᑲᐅᙱᓕᐅᕈᑕᐅᕗᖅ. ᐊᒥᓲᓗᐊᖅᑐᑦ ᓱᕈᓰᑦ ᑭᒍᑕᐃᔭᖅᑕᐅᓲᖑᖔᖅᐳᑦ ᑭᒍᑎᓄᑦ ᓴᕕᕋᔭᓕᖅᑕᐅᓂᕐᓄᑦ ᑐᑭᓕᐊᖅᑎᑦᑎᔾᔪᑕᐅᔪᓄᑦ ᐱᑎᑕᐅᙱᖔᖅᖢᑎᒃ.”
ᐱᔾᔪᑎᖃᖅᑐᒥ ᑭᒍᑎᓄᑦ ᓴᕕᕋᔭᓕᖅᑕᐅᓂᕐᓄᑦ ᑐᑭᓕᐊᖅᑎᑦᑎᔾᔪᑕᐅᔪᓄᑦ, ᑲᓕ ᐅᖃᓚᐅᖅᐳᖅ ᓇᓪᓕᐅᒃᑯᒫᖃᙱᓐᓂᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᕚᓪᓕᕈᑕᐅᔪᒥ ᐱᓕᕆᐊᖑᔪᒥ ᒐᕙᒪᑐᖃᒃᑯᑦ ᐱᓕᕆᐊᕆᕙᖓ, ᑭᓯᐊᓂ ᓄᓇᕗᒻᒥ ᒐᕙᒪᒃᑯᑦ ᐅᖃᕈᓐᓇᖅᑎᑕᐅᙱᓚᑦ ᐃᓱᒪᓕᐊᖑᓂᐅᔪᓄᑦ. ᑭᓯᐊᓂ ᐅᖃᖅᐳᖅ, ᐱᔪᒪᓂᐅᔪᒥ ᑭᒍᑎᓄᑦ ᓴᕕᕋᔭᓕᖅᑕᐅᓂᕐᓄᑦ ᑐᑭᓕᐊᖅᑎᑦᑎᔾᔪᑕᐅᔪᓄᑦ ᐱᔾᔪᑎᖃᒐᔪᒃᐳᖅ ᐱᐅᔪᒪᓂᐅᔪᒥ ᐅᓇᐅᙱᖔᖅᑐᒥ ᐱᔭᕆᐊᖃᕐᓂᐅᔪᒥ.
ᐊᑐᓂ ᓄᓇᓕᐅᔪᖅ ᐋᖅᑭᒃᓱᖅᑕᐅᓯᒪᓂᖃᖅᐳᑦ ᓄᓇᕗᒻᒥ ᒐᕙᒪᒃᑯᓐᓄᑦ-ᓇᖕᒥᓂᕆᔭᐅᔪᒥ ᑭᒍᑎᓕᕆᕝᕕᖕᒥ, ᑲᓕ ᐅᖃᖅᖢᓂ ᑕᒪᕐᒥᒐᓚᑦ ᐊᖏᐸᓗᒃᑐᒥ ᓄᑖᙳᕆᐊᖅᑎᑕᐅᓯᒪᓂᖏᓐᓂ. ᐱᔭᕆᑐᙱᑦᑐᓂ ᑭᒍᑎᓕᕆᓂᕐᒧᑦ ᐱᔨᑦᑎᕋᕐᓂᐅᔪᑦ – ᐃᓛᖅᑕᐅᓂᕐᒧᑦ, ᑭᒍᑕᐃᖅᑕᐅᓂᕐᒧᑦ, ᐱᑎᑦᑎᑦᑕᐃᓕᒪᓂᕐᒧᑦ ᐱᔨᑦᑎᕋᕐᓂᐅᔪᑦ, ᑭᒍᑎᐅᑉ ᐊᑕᔾᔪᑎᖓᑕ ᐃᓗᖓ ᐊᒻᒪ ᑭᒍᑎᙳᐊᑦ – ᐊᑐᐃᓐᓇᐅᔪᐃᓐᓇᐅᕗᑦ ᑕᒪᒃᑭᓂ ᓄᓇᓕᐅᔪᓂ.
“ᑕᒪᕐᒥᒃ ᓄᑖᖏᓐᓇᐸᓘᕗᑦ. ᑕᐃᒪᐃᖏᓐᓇᖅᓯᒪᕗᖅ ᐊᕐᕌᒍᓄᑦ ᒪᕐᕉᖕᓄᑦ, ᐱᖓᓱᓄᓪᓘᓐᓃᑦ. ᐊᒻᒪ ᐊᒥᓱᓂᑦ ᓄᑖᖑᔪᓂ ᑭᒍᑎᓕᕆᕝᕕᖃᓕᖅᐳᒍᑦᑕᐅᖅ,” ᐅᖃᓚᐅᖅᐳᖅ ᑲᓕ.
ᑲᓕ ᐅᖃᓚᐅᖅᐳᖅ ᐃᓚᖏᑦ ᐅᑕᖅᑭᔭᕆᐊᖃᕐᓂᐅᔪᓄᑦ ᑎᑎᕋᖅᓯᒪᓂᐅᔪᑦ ᑭᒍᑎᓕᕆᓂᕐᒧᑦ ᐸᖅᑭᔭᐅᓂᕐᒧᑦ ᐊᑯᓂᐅᔪᓐᓇᖅᐳᖅ, ᐊᒻᒪᓗᑦᑕᐅᖅ ᖃᓂᒃᑯᑦ ᐱᓚᒃᑕᐅᔭᕆᐊᖃᕐᓂᐅᔪᒥ. ᐃᓄᒃᑐᒃᓴᐃᑦ ᓯᕗᓪᓕᐅᔾᔭᐅᑎᑕᐅᓯᒪᓂᖃᖅᐳᑦ.
“ᐅᓄᕐᓂᖅᓴᓂ ᐊᒻᒪ ᐱᐅᓂᖅᓴᒥ ᐱᔨᑦᑎᕋᕐᓂᑖᕈᓐᓇᕈᑦᑕ ᓄᓇᓕᖕᒥ, ᐃᑲᔪᕐᓂᖃᕐᓂᐊᖅᐳᖅ ᐃᓚᒌᖑᔪᓂ ᐊᖏᕐᕋᖅᓯᒪᐃᓐᓇᕈᓐᓇᕐᓂᖏᓐᓂ ᐊᒻᒪ ᐊᐅᓪᓛᕆᐊᖃᙱᓪᓗᑎᒃ. ᐊᑭᑭᓐᓂᖅᓴᐅᓂᐊᖅᐳᖅ ᓄᓇᕗᒻᒥ ᒐᕙᒪᒃᑯᓐᓄᑦ ᓇᓂᓯᔪᓐᓇᕈᑎᑦ ᐱᔪᓐᓇᑦᑎᐊᕐᓂᐅᔪᓂ ᐱᔪᒪᓇᔭᖅᑐᓂ ᐊᑯᓂᐅᓂᖅᓴᒥ ᓄᓇᓕᖕᓃᑦᑐᓐᓇᕐᓂᖏᓐᓂ,” ᐊᕐᓇᒃᑲᖅ ᐅᖃᓚᐅᖅᐳᖅ.
ᐃᓱᒻᒥᖅᑐᐃᔨ ᐃᖃᓗᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᐅᔪᒥ ᑕᓂᔅ ᔅᑖᕝᕈ ᐅᓂᒃᑳᖅᐳᖅ ᐃᔨᓕᕆᔨᐅᔪᑦ ᐸᐃᑉᐹᖃᖅᑐᓂ ᐃᓅᓕᓴᐃᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ ᐋᓐᓂᐊᕐᓇᓂᓪᓗ ᐃᔨᓄᑦ ᐱᓕᕆᔨᕐᔪᐊᖑᔪᑦ ᑐᓂᓯᔪᓐᓇᖅᐳᑦ ᑕᒪᒃᑭᐅᒪᔪᒥ ᑕᐃᒪᐃᒐᔪᒃᑐᓂ ᖃᐅᔨᓴᖅᑕᐅᓂᐅᔪᓂ, ᑐᓂᓯᓗᑎᒃ ᐃᒡᒐᒃᑖᕈᑎᒃᓴᓂᑦ, ᖃᐅᔨᓴᐃᓗᓂ ᑕᒪᒃᑭᓄᑦ ᖃᐅᔨᓴᕐᓂᐅᔪᒥ ᐱᔾᔪᑕᐅᔪᓄᑦ ᐊᒻᒪ ᐊᒃᑐᐃᓂᐅᔪᓄᑦ ᐋᓐᓂᐊᕐᓇᓄᑦ, ᐃᓅᓕᓴᐃᓗᓂ ᐊᔪᕐᓇᙱᑐᐊᕌᖓᑦ ᐊᒻᒪ ᑕᑯᔭᐅᔪᒃᓴᐅᑕᐅᑎᑦᑎᓗᑎᒃ ᐃᓅᓕᓴᐃᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ ᐋᓐᓂᐊᕐᓇᓂᓪᓗ ᐃᔨᓄᑦ ᐱᓕᕆᔨᐅᔪᒧᑦ ᐱᔭᕆᐊᖃᕌᖓᑦ. ᐱᓕᕆᓲᖑᒋᕗᑦ ᑕᑯᔪᓐᓇᕐᓂᓕᒫᖓᓐᓂ ᖃᐅᔨᓴᕐᓂᐅᔪᒥ, ᑎᒥᖓᓂ ᓱᑲᖃᓗᐊᓲᒥ ᖃᐅᔨᓴᖅᑕᐅᓂᖓᓂ, ᐊᒻᒪ ᑕᒪᒃᑭᓂ ᐊᓯᖏᓐᓂ ᐃᓅᓕᓴᖅᑕᐅᓂᕐᒧᑦ ᖃᐅᔨᓴᖅᑕᐅᓂᐅᔪᒥ ᐱᔭᕆᐊᖃᕐᓂᐅᔪᓂ ᐃᓅᓕᓴᐃᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ ᐋᓐᓂᐊᕐᓇᓂᓪᓗ ᐃᔨᓄᑦ ᐱᓕᕆᔨᐅᔪᒧᑦ.

Previous articleKeeping elders healthy is ongoing effort
Next articleInuktut absent from proposed federal languages legislation
Michele LeTourneau first arrived at NNSL's headquarters in Yellowknife in1998, with a BA honours in Theatre. For four years she documented the arts across the Northwest Territories and Nunavut. Following a very short stint as a communications officer with the Government of the Northwest Territories, Michele spent a decade at a community-based environmental monitoring board in the mining industry, where she worked with Inuit, Chipewyan, Tlicho, Yellowknives Dene and Metis elders to help develop traditional knowledge and Inuit Qaujimajatuqangit contributions for monitoring and management plans. She rejoined NNSL and moved to Iqaluit in May 2014 to write for Nunavut News. Michele has received a dozen awards for her work with NNSL.