ᐃᖃᓗᖕᓂ ᑎᑎᖅᑲᒃᑯᕕᒃ ᑕᑕᓗᐊᓕᕐᒪᑦ ᓯᕐᓗᐊᒨᖔᓕᓚᐅᖅᑐᑦ

1562

ᐊᑕᐅᓯᖅ ᐃᓯᖅᑐᕕᓂᖅ ᐅᓂᒃᑳᓚᐅᖅᑐᖅ ᓄᑖᒧᑦ ᑲᓇᑕ ᑎᑎᖅᑲᒃᑯᕕᐊᓂ ᐃᖅᑲᓇᐅᔭᖅᑎᓂᒃ ᑕᐃᓯᒻᒪᕆᓚᐅᖅᑐᖅ “ᓵᓐᑕᑲᓛᓯᐅᑉ ᐃᑲᔪᖅᑎᖏᑦ” ᑎᓯᐱᕆ 5-ᒥ.

ᐳᕆᓐᓴᔅ ᑖᐸᓇᐅ, ᑲᓇᑕᒥ ᑎᑎᖅᑲᓕᕆᔨᒃᑯᓐᓂ ᐃᖅᑲᓇᐃᔭᖅᑎ ᓄᑖᒥ ᓇᒃᓯᐅᔾᔭᐅᔪᓄᑦ ᐃᓕᐅᖅᑲᐃᕕᖕᒥ ᐃᖃᓗᖕᓂ, ᐃᓂᖏᓐᓄᑦ ᐃᓕᐅᖅᑲᐃᔪᖅ ᑎᑭᑉᐸᓪᓕᐊᔪᓂᒃ, ᑕᒪᑐᒪᓂᓴᐃᓐᓇᖅ ᑐᖑᔪᖅᑐᑉ ᑐᐱᒃᓴᔭᐅᑉ ᑐᓄᐊᓂ ᕼᐊᓇᓚᖏᓐᓂᑦᑐᑦ ᓇᒃᓯᐅᑕᐅᔪᑦ ᐃᓕᐅᖅᑲᕆᐊᓕᖏᑦ ᑲᒪᒋᔭᐅᑎᓪᓗᒋᑦ ᐱᖓᓲᔪᖅᑐᓄᑦ ᑎᑎᖅᑲᓕᕆᔨᓄᑦ.

“ᐃᓛᒃ ᑕᐃᒪᐃᒻᒪᑕ ᓱᓕᔪᖅ, ᓵᓐᑕᑲᓛᓯᐅᑉ ᐃᑲᔪᖅᑎᖏᑦ,” ᐊᖏᖅᖢᓂ ᐃᓚᓐᓈᖓ ᐅᖃᓚᐅᖅᑐᖅ.

ᐃᓛᒃ ᑕᐃᒪᐃᒻᒪᑕ ᐃᓯᖅᖢᒋᑦ ᓄᑖᒦ ᐃᖅᑲᓇᐃᔭᖅᑎᖏᑦ ᑕᐃᓱᒪᓂᑐᖃᖅᑎᑐᑦ ᓴᓇᔪᑦ ᐃᖃᓗᖕᒥᐅᑦ ᐃᑲᔪᖅᑎᐅᓕᖃᑦᑕᖅᑐᑦ ᖁᕕᐊᓲᑎᒃᓴᓂᒃ ᓴᓇᔪᓂ ᖁᕕᐊᓱᒃᕕᒃ ᖃᓂᒃᓕᒑᖓᑦ. ᑭᓯᐊᓂᓕ ᓱᓕᔪᒥᒃᑕᐅᖅ ᑕᑯᓪᓗᒋᑦ ᑲᓇᑕᒥ ᑎᑎᖅᑲᓕᕆᔩᑦ ᐊᒃᓱᐊᓗᒃ ᐱᔭᒃᓴᖃᖃᑦᑕᕐᒪᑕ ᐃᖅᓯᕕᓂᒃ ᓇᒃᓯᐅᔭᐅᔪᓂᒃ ᐃᓕᐅᖅᑲᐃᔨᐅᓪᓗᑎᒃ, ᐊᒻᒪᓗ ᐊᖓᒃᑰᓂᑯᒧᖏᑦᑐᖅ ᐱᓕᕆᐊᕆᔭᐅᓗᑎᒃ ᑭᓯᐊᓂᐅᖕᒪᑦ ᐃᖅᑲᓇᐃᔭᖅᑎᓄᑦ.

ᑲᓇᑕᒥ ᑎᑎᖅᑲᓕᕆᔨᒃᑯᑦ ᓄᒃᑎᓚᐅᕐᒪᑕ ᐊᒡᓚᒡᕕᒋᓂᐊᓕᖅᑕᒥᓄ, ᐃᒡᓗ 760-ᒥᑦ, ᓯᕐᓗᐊᒥᓄᑦ ᑎᓯᐱᕆ 5-ᒥ. ᓯᕐᓗᐊᖓ ᑕᑕᑦᑐᖅ ᐃᖅᓯᕕᓂᒃ ᓇᒃᓯᐅᔾᔭᐅᔪᓂᒃ ᐃᓗᓕᓕᒃ ᓱᓕ, ᐅᓄᕐᓂᖅᓴᐃᑦ ᑕᐃᒪ ᑐᖑᔪᖅᑑᑉ ᑕᓕᒐᐅᑉ ᑐᓄᐊᓂ, ᐃᔨᖅᓯᒪᔭᐅᔪᑦ.

ᓄᓇᓕᐸᐅᔭᒥᐅᓄᑦ ᑎᑎᖅᑲᒃᑯᕕᖕᒥ ᐊᐅᓚᑦᑎᔨᖓᑦ ᓲ ᐳᕋᐅᓂᖕ ᐅᖃᓚᐅᖅᑐᖅ ᑲᓇᑕᒥ ᑎᑎᖅᑲᒃᑯᕕᓕᕆᔩᑦ ᑲᒪᑦᑎᐊᕋᓱᐊᖅᑐᑦ ᐃᖏᕐᕋᕙᓪᓕᐊᑎᑦᑏᓐᓇᖅᖢᑎᒃ ᑎᑭᑉᐸᓪᓕᐊᔪᓂᒃ ᐃᓄᖏᓐᓄᑦ ᐱᔭᐅᔪᓐᓇᕐᓂᐊᕐᒪᑕ ᓱᒃᑲᓕᓂᖅᐹᒥ ᐊᑦᑕᕐᓇᖏᑦᑐᓂᒃ ᐊᑐᕋᓱᐊᖅᑐᑦ ᑲᔪᓯᑦᑎᐊᕈᓐᓇᕐᓂᖅᐹᒥᒃᓗ.

“ᓇᓚᐅᑦᑖᕈᓐᓇᖏᑦᑐᖓᓘᓐᓃᑦ,” ᐅᖃᕆᓪᓗᓂ ᐳᕋᐅᓂᖕ ᖃᓄᑎᒋ ᐅᓄᖅᑎᒋᔪᓂᒃ ᐃᖅᓯᕕᓂᒃ ᐱᓂᐊᕐᒪᖔᑦᑕ ᐃᖃᓗᖕᓂ ᑎᑎᖅᑲᓕᕆᔨᓄᑦ ᐋᕿᒃᓱᖅᑕᐅᒋᐊᓕᖕᓂᒃ ᐊᕙᑏᑦ ᐅᖓᑖᓂ ᖃᐅᑕᒫᑦ ᑎᑭᕝᕕᐅᖃᑦᑕᕋᑦᑕ. ᖁᕕᐊᓱᒃᕕᖕᒥᓕ, ᖃᐅᔨᒪᑦᑎᐊᖅᑐᓂᒃ ᐃᖅᑲᓇᐃᔭᖅᑎᑖᒻᒪᕆᓚᐅᖅᑐᖓ ᑕᖅᑭᓕᒫᒧᑦ ᖃᓪᓗᓈᓂᑦ, ᐃᖅᑲᓇᐃᔭᒃᑎᒃᓴᑭᒃᓴᕋᑦᑕ ᐃᖃᓗᖕᓂ.

ᐳᕋᐅᓂᖕ` ᐅᖃᕆᓪᓗᓂ ᑕᐃᒪᖓᓂᑦ ᐃᑲᔪᖅᑎᒃᓴᓂᒃ ᕿᓃᓐᓇᖅᑐᒍᑦ.

“ᐊᒥᓱᐊᓗᖕᓂᒃ ᕼᐊᓐᓇᓚᓃᑦᑐᓂᒃ ᖃᐅᑕᒫᑦ ᐃᖅᓯᕕᓂᒃ ᑎᑭᑦᑐᖃᐃᓐᓇᐅᔭᕐᒪᑦ ᐃᓛᓐᓂᒃᑯᑦ ᑕᐅᓴᖏᓐᓂᓃᓕᖃᑦᑕᕐᒪᑕ ᐃᖅᓯᕖᑦ ᑎᑎᕋᐃᓪᓗ ᖃᖓᑕᓱᖅ ᑎᑭᓵᖅᑎᓪᓗᒍ.” ᐅᖃᕆᓪᓗᓂ, ᑕᐃᒪᓐᓇ ᐱᓗᐊᖑᐊᓕᖅᑐᑦ ᖃᕆᑕᐅᔭᑎᒍᑦ ᑎᑭᓴᐃᖃᑦᑕᓕᕐᒪᑕ.

“ᐃᖃᓗᖕᓂᑐᐊᖑᖏᑦᑐᖅ ᑕᐃᒪᐃᑦᑐᑦ. ᑲᓇᑕᓕᒫᒥ.”

ᑲᓇᑕᓕᒫᒥ ᑎᑎᖅᑲᓕᕆᔩᑦ ᖃᐅᑕᒫᑦ ᐃᒻᒪᖄ 1.3-ᒥᓕᐊᓂᒃ ᐃᖅᓯᕕᓂᒃ ᓇᒃᓯᐅᑕᐅᔪᓂᒃ ᑲᒪᖃᑦᑕᕐᒪᑕ.

“ᖃᕆᑕᐅᔭᑎᒍᑦ ᑎᑭᓴᐃᔪᓐᓇᖅᓯᑎᓪᓗᒋᑦ ᐊᓯᔾᔨᕐᒪᑕ ᐃᓄᐃᑦ ᐱᖅᑯᓯᖏᑦ, ᐃᓅᓯᖏᓪᓗ.” ᐅᖃᕆᓪᓗᓂ.

ᖃᐅᑕᒫᑦ ᐃᖅᓯᕕᓂᒃ ᑲᒪᔨᐅᓂᖅᓴᐅᓕᖅᐸᓪᓕᐊᔪᒍᑦ ᐊᕐᕌᒍᑕᒫᑦ ᐅᓄᖅᓯᕙᓪᓕᐊᖏᓐᓇᖅᑐᑦ ᐃᓄᒋᐊᓕᖅᐸᓪᓕᐊᓂᕗᑦ ᒪᓕᒃᖢᒍ 17-ᐳᓴᒥᒃ ᐊᕐᕌᓂᓂᑦ ᐅᓄᖅᓯᕚᓪᓕᖅᐸᒃᖢᑎᒃ ᖁᕕᐊᓱᒃᕕᖕᒥ. ᐳᕋᐅᓂᖕ ᐅᖃᕆᓪᓗᓂ ᐃᖅᓯᕖᑦ ᓇᒃᓯᐅᔭᐅᔪᑦ ᐅᓄᖅᓯᕙᓪᓕᐊᖏᓐᓇᖅᑐᑦ ᓄᓇᓕᖕᓂᑦ ᐱᔪᑦ ᐃᖃᓗᐃᑦ ᓯᓚᑖᓂᑦ, ᐊᒻᒪᓗ, ᓇᒧᖓᐅᒋᐊᖏᑦ ᐋᕿᒃᓱᑦᑕᐅᖃᑦᑕᖅᖢᑎᒃ ᖃᖓᑕᓲᓄᑦ ᐅᓯᓕᐅᑎᔭᐅᖏᓐᓂᖏᓐᓂ. ᑕᒪᐃᑕ ᐃᖅᓯᕖᑦ ᕿᑭᖅᑖᓗᖕᒧᖓᐅᔪᑦ ᖃᖓᑕᓲᒃᑯᑦ ᑭᓯᐊᓂ ᐅᓯᔭᐅᖃᑦᑕᕐᒪᑕ ᐋᑐᕚᒥ ᐋᕿᒃᓱᖅᑕᐅᓚᐅᖅᖢᑎᒃ.

ᓯᓚ ᐱᐅᖏᑐᐊᕌᖓᑦ ᑭᖑᕙᕆᐊᖃᑦᑕᖅᑐᑦ ᐅᓪᓗᓂᒃ ᒪᕐᕉᖕᓂᒃ ᓯᑕᒪᓂᒃᓘᓐᓃᑦ, ᑭᓯᐊᓂᓕ ᑕᒪᒃᑯᐊ ᓄᓇᓕᖕᓄᑦ ᑎᑭᑦᑐᑦ ᓄᓇᓕᖕᒥᐅᓄᑦ ᑳᓐᑐᕌᒃᑎᑕᐅᓯᒪᔪᓄᑦ ᑲᒪᒋᔭᐅᖃᑦᑕᕐᒪᑕ ᐃᖅᓯᕖᑦ ᑎᑭᕝᕕᐊᓂᑦ ᐱᔭᐅᓪᓗᑎᒃ, ᖃᕆᑕᐅᔭᑎᒍᑦ ᑎᑎᖅᑕᐅᓪᓗᑎᒃ ᐃᓕᐅᖅᑲᖅᑕᐅᖃᑦᑕᖅᑐᑦ.

ᐳᕋᐅᓂᖕ ᑐᓄᒥᓄᑦ ᕿᒥᕈᓚᐅᖅᖢᓂ ᓄᑖᒥ ᓯᕐᓗᐊᒥ ᐃᖅᑲᓇᐃᔭᕐᕕᒃᑖᒥᓂᒃ. ᐅᖃᓚᐅᖅᑐᖅ ᑖᒃᑯᐊ ᐃᖅᓯᕖᑦ ᑕᒪᐃᑕ ᐱᑕᖃᕈᓐᓃᕐᓂᐊᕐᒥᔪᑦ ᐅᓪᓗᓂ 15-ᓂ. ᑕᐃᒪᐃᖃᑦᑕᖅᑐᑦ ᖁᕕᐊᓱᒃᕕᖕᒥ ᐅᓪᓗᓂᒃ 15-ᓂᒃ ᑕᒫᓂ ᐅᑕᖅᑭᑎᖃᑦᑕᕋᑦᑕ ᐃᓄᖏᓐᓄᑦ ᐊᐃᔭᐅᓂᐊᕐᒪᖔᑕ. (ᐳᕋᐅᓂᖕ ᐊᔾᔨᓕᐅᕆᖁᔨᓚᐅᖏᒻᒪᑦ ᑐᓄᐊᓃᑦᑐᓂᒃ ᑕᑯᔭᐅᖁᔭᐅᖏᑦᑐᓂᒃ ᐱᑕᖃᑐᐃᓐᓇᕆᐊᖃᕐᒪᑦ.)

“ᑕᐃᒫᒃᑕᐅᖅ ᐅᓄᖅᑎᒋᔪᓂᒃ ᐱᑕᖃᐃᓐᓇᖅᑐᖅ ᑕᐃᒪᖓᓂᑦ,” ᐅᖃᕆᓪᓗᓂ.

“ᐊᒃᓱᓗᐊᖅ ᑕᑕᓕᖃᑦᑕᕋᑦᑕ. ᑕᐃᒪᖓᓂᑦ ᓄᓇᓕᖕᒥᐅᑦ ᐊᔪᐃᓐᓇᕋᓱᐊᖃᑦᑕᖅᑕᕋᓗᐊᕗᑦ ᑎᑎᖅᑲᖁᑎᒥᓂᒃ ᐊᐃᒃᓯᓴᓕᖃᑦᑕᖁᓪᓗᒋᑦ ᐱᔪᓐᓇᖅᓯᑐᐊᕌᖓᒥᒃ.

ᓄᑖᖅ ᑖᓐᓇ 1057-ᒥ ᒪᑭᕝᕕᐅᑉ ᐊᖅᑯᑎᑕ ᐃᓱᐊᓂ ᐊᖏᓂᖅᓴᒻᒪᕆᐊᓗᒃ ᐃᓂᒋᓚᐅᖅᑕᑦᑎᓐᓂᑦ 12-ᐃᖅᓱᖅᖢᒍ ᐃᓂᒃᓴᖃᕐᓂᖅᓴᖅ ᐃᖅᓯᕕᓄᑦ. ᑕᐃᓐᓇ ᑎᑭᑉᐸᓪᓕᐊᔪᓂᒃ ᐋᕿᒃᓱᐃᔪᓂᒃ ᐅᖃᐅᔾᔪᐃᔨᐅᖕᒪᑦ ᑎᑎᖅᑲᐃᑦ ᑲᑎᖅᓱᖅᑕᐅᓚᑎᓪᓗᒋᑦ ᓇᒧᖓᐅᓂᐊᕐᒪᖔᑕ. ᐃᓂᒋᖃᑦᑕᖅᑕᖓ ᒐᕙᒪᑎᑐᖃᒃᑯᑦ ᐊᖅᑯᑎᐊᓂ ᑕᑕᓗᐊᓕᕐᒪᑦ. ᐊᖓᔪᖅᑳᕆᔭᐅᔪᖅ ᑕᕝᕙᓂ ᐋᓐᔨᓚ ᑎᐊᓪ ᐃᓱᒪᓕᐅᖅᑎᐅᖃᑦᑕᖅᑐᑦ ᓇᒧᖓᐅᓂᐊᕐᒪᖔᑕ.

ᐃᑲᕐᕋᖏᑦ ᒪᑐᐃᖓᕝᕕᖏᑕ ᓇᒡᒐᔾᔭᒥᑦ ᑕᓪᓕᒻᒥᕐᒧᑦ 8:30-ᒥᑦ ᐅᓪᓚᒃᑯᑦ 6:00-ᒧᑦ ᐅᓐᓄᒃᑯᑦ ᐊᒻᒪᓗ ᑕᒪᐃᓐᓂ ᑎᑎᖅᑲᖅᑖᕐᕕᓂ ᒪᑐᐃᖓᖃᑦᑕᕆᓪᓗᑎᒃ ᓈᑦᑏᖑᔭᓛᕐᓂᐊᒥ 10:00-ᒥᑦ ᐅᓪᓛᒃᑯᑦ 2:00-ᒧᑦ ᐅᓐᓄᒃᓴᒃᑯᑦ ᑎᑭᓵᕕᓂᕐᓂᒃ ᐊᐃᒃᖠᕈᓐᓇᖅᖢᑎᒃ ᑕᒪᑐᒪᓂ ᖁᕕᐊᓱᒃᕕᖕᒥ.

Previous articleStudents vote in Naujaat
Next articleIqaluit post office moves overflow to warehouse
Michele LeTourneau first arrived at NNSL's headquarters in Yellowknife in1998, with a BA honours in Theatre. For four years she documented the arts across the Northwest Territories and Nunavut. Following a very short stint as a communications officer with the Government of the Northwest Territories, Michele spent a decade at a community-based environmental monitoring board in the mining industry, where she worked with Inuit, Chipewyan, Tlicho, Yellowknives Dene and Metis elders to help develop traditional knowledge and Inuit Qaujimajatuqangit contributions for monitoring and management plans. She rejoined NNSL and moved to Iqaluit in May 2014 to write for Nunavut News. Michele has received a dozen awards for her work with NNSL.