ᓇᓪᓕᐅᕐᒃᓂᖅᓯᐅᕐᓂᐊᓕᕆᕗᖓ ᐅᑭᐅᖃᓕᕐᓗᖓ 69–ᓂᒃ ᐃᓱᒪᒃᓴᖅᓯᐅᕈᑎᖃᖅᖢᖓᓗ ᖃᓄᐃᓕᐅᕈᑎᒋᓯᒪᔭᓐᓂᒃ ᓂᕆᐅᓂᖃᖅᖢᖓᓗ ᐊᑲᐅᓯᕚᓪᓕᕈᑎᒃᓴᖏᓐᓂᒃ ᓱᕈᓯᕐᒪ, ᐃᕐᙳᑕᕐᒪ ᐊᒻᒪ ᐊᔭᐅᑉᐱᐊᕐᒪ. ᒪᒃᐱᒐᒃᑲᓐᓂᕐᓂᒃ ᐱᑕᖃᕆᐊᖃᕐᓂᐊᖅᐳᖅ ᖃᓄᐃᓕᐅᖅᓯᒪᓂᓐᓂᒃ ᐅᓂᒃᑳᖃᑎᖃᕈᑎᖃᕈᒪᒍᒪ ᐃᓂᒃᓴᖃᖏᑐᐃᓐᓇᖅᐳᑦ ᐊᒥᓲᓗᐊᕐᓂᖏᓐᓄᑦ ᐅᖃᐅᓯᕆᒍᒪᔭᒃᑲ.

ᐊᑖᑕᒋᓚᐅᖅᑕᕋ ᔮᓐ ᒪᒃᓴᒐᒃ ᐃᓕᓐᓂᐊᕆᐊᖅᐸᓚᐅᖅᖢᓂ ᓄᓇᒋᙱᑕᒥᓂ ᐅᖃᐅᑎᔭᐅᓪᓗᓂᓗ ᐅᑭᐅᖏᑦ ᓈᒻᒪᖕᓂᖏᓐᓄᑦ ᓇᖕᒥᓂᖅᓱᕆᐊᒃᓴᖅ ᐃᖅᑲᓇᐃᔭᕈᓐᓇᖅᓯᓂᕋᖅᑕᐅᓪᓗᓂᓗ ᐸᕐᓇᒡᓗᓂᓗ ᓯᕗᓂᒃᓴᕆᓂᐊᖅᑕᒥᓄᑦ.

ᐱᖃᑎᖃᖅᖢᓂᓗ ᒪᒃᑯᒃᑑᖃᑎᒥᓂᒃ ᐊᖑᑎᓂᒃ ᓇᖕᒥᓂᖅᓱᕈᓐᓇᖅᓯᓪᓗᓂᓗ ᖃᐅᔨᓴᕈᓐᓇᖅᓯᓪᓗᓂᓗ ᕿᖓᐅᓂᒃ ᒐᕙᒪᑐᖃᓄᑦ ᑲᒪᒋᔭᐅᖁᔭᐅᔪᓂᒃ ᑕᐃᑦᓱᒪᓂ ᐃᓄᕕᐊᓗᐃᑦ ᐱᕐᓕᓕᓚᐅᕐᒪᑕ ᑐᖁᖃᑦᑕᖅᖢᑎᒡᓗ ᑐᒃᑐᖃᕈᓐᓃᖅᓯᒪᓂᖏᓐᓄᑦ ᓄᓇᖓᓐᓂ.

ᐊᓈᓇᓐᓂᒃ ᑲᑎᑦᓯᓕᖅᖢᓂᓗ ᕼᐊᓚᓐ ᒪᒃᓴᒐᕐᒥᒃ ᕕᓐᒋᒃ ᑲᑎᑎᑕᐅᓚᐅᖅᓯᒪᓪᓗᑎᒡᓗ ᕕᕗᐊᕆ 23, 1950-ᒥ.

ᐃᓅᖃᑎᒌᓕᖅᖢᑎᒡᓗ. ᐃᓅᓚᐅᖅᓯᒪᒐᒪ ᔫᓐ 19, 1951-ᒥ ᐃᖅᑲᐅᒪᓪᓗᖓᓗ ᑐᐱᕐᒥᐅᑕᐅᕙᓚᐅᕋᑦᑕ ᐊᒻᒪ ᐃᒡᓗᕋᓛᓂ ᐃᖏᕐᕋᔭᖃᑦᑕᖅᖢᑕᓗ ᑰᖕᒥ ᒪᑲᓐᓯ ᕆᕗᒥ, ᑐᒃᑐᔭᖅᑐᑉ ᑕᕆᐅᖓᓂᓗ, ᐃᒪᕐᔪᖕᒥᓗ
(Husky Lakes) ᐊᒻᒪᓗ Sandy Hills ᑲᓇᖕᓇᖅᐸᓯᖓᓂ ‘ᑰᒡᔪᐊᕌᓘᑉ’ ᕿᖓᐅᓂᒃ ᑲᒪᒋᔭᖃᖅᖢᑕ. ᐊᒃᑐᐱᕆᒥᑦ ᐄᐳᕈ ᐱᒋᐊᓕᕐᓂᖓᓄᑦ ᐃᖏᕐᕋᔭᒃᐸᓚᐅᖅᐳᒍᑦ ᕿᒧᒃᓯᒃᑯᑦ ᐊᒻᒪ ᕿᖓᐅᓄᑦ ᐅᓂᐊᖅᑕᐅᓪᓗᑕ. ᐊᑖᑕᒐ ᐱᓪᓗᓂ ᕿᖓᐅᓂᒃ ᐊᓄᓕᖅᑐᕈᓐᓇᖅᓯᓪᓗᒋᓪᓗ ᖃᒧᑎᓂᒃ ᐅᓂᐊᖅᑎᑉᐸᒃᓗᒋᑦ ᐅᖁᒪᐃᑦᑐᓂᒃ ᑕᒪᒃᑯᓂᖓᓗ ᕿᔪᒃᑕᖅᐸᒃᖢᓂ ᑕᐃᑲᓂ ᐊᑎᖃᖅᑐᒥ ᕿᖓᐅᓕᕆᕕᖕᒥ Reindeer Station–ᖑᓂᕋᖅᑕᐅᔪᒥ.

ᐃᓅᓯᖃᑦᓯᐊᓚᐅᖅᓯᒪᕗᒍᑦ ᓱᓇᖃᓗᐊᖏᒃᑲᓗᐊᖅᖢᑕ ᐃᑲᔪᖅᑎᒌᖃᑦᑕᐅᑎᓪᓗᑕ. ᖃᓄᐃᓕᔪᖃᖅᐸᑦ ᕿᖓᐅᓕᕆᔨᐅᖃᑕᐅᔪᓂᒃ ᑲᒪᖃᑦᑕᐅᑎᕙᓚᐅᖅᐳᒍᑦ ᐃᖢᕐᕆᔮᖅᑎᑦᓯᓪᓗᑕᓗ ᐃᓚᒌᓂᒃ. ᐊᓈᓇᒋᔭᐅᔪᑦ, ᐊᓈᓇᑦᓯᐊᒋᔭᐅᔪᓪᓗ ᐋᓐᓂᕐᓂᖅᐸᑕ ᐱᓕᕆᓪᓗᑎᒃ ᒪᒃᑯᖕᓂᖅᓴᐃᑦ ᐱᓕᕆᓂᖅᓴᐅᓕᖅᐸᒃᖢᑎᒃ ᒪᒥᓴᕐᓂᖏᓐᓂ. ᒪᒃᑯᒃᑐᑦ ᐃᓅᓱᒃᑐᑦ ᐃᒥᖅᑕᕆᐊᖅᑎᑕᐅᕙᒃᖢᑎᒃ ᕿᔪᒃᓯᐅᖅᑎᑕᐅᕙᒃᖢᑎᒡᓗ ᐊᒡᒍᐃᑎᑕᐅᕙᒃᖢᑎᒡᓗ ᓇᐹᖅᑐᓕᕆᑎᑕᐅᓪᓗᑎᒃ ᕿᔪᒃᓴᓂᒃ ᐊᑖᑕᖏᑦ ᕿᖓᐅᓕᕆᑎᓪᓗᒋᑦ. ᒪᒃᑯᒃᑐᓪᓗ ᓄᑕᖃᑦ ᖃᒧᑎᒃᑯᑦ ᐊᑐᖅᑕᐅᖏᑦᑐᓂᒃ ᐊᑐᖅᖢᑕ ᒪᔪᕋᖅᐸᓚᐅᖅᐳᒍᑦ ᓯᑐᕋᖃᑦᑕᖅᖢᑕᓗ. ᐊᓈᓇᕗᑦ ᑐᓴᕌᖓᑦᑎᒍ ᓂᕆᔭᖅᑐᖁᔭᐅᓕᖅᐸᒃᖢᑕ ᑕᐃᒪᓐᓇ ᐆᓇᖅᑐᖅᑐᖅᑎᑕᐅᓪᓗᑕ ᐆᔪᕐᓂᒃ ᖃᔪᕐᓂᒡᓗ ᐸᓚᐅᒑᓂᒡᓗ ᑏᑐᖅᑎᑕᐅᓪᓗᑕᓗ.

Advertisement