ᐃᓐᓇᑐᖃᖅ ᖁᕕᐊᓱᒃᑐᖅ ᕿᖓᐅᓕᐊᓚᐅᕋᒥ

1023

ᐅᓪᓗᐃᑦ ᓯᑕᒪᑦ ᐊᓂᒍᖅᑎᓪᓗᒋᑦ ᐅᑎᓚᐅᖅᖢᑎᒃ ᕿᖓᐅᒥᑦ, ᐃᓐᓇᑐᖃᖅ ᐄᕙ ᑲᑯᓚᒃ ᖁᕕᐊᓱᒃᑐᒻᒪᕆᐅᓚᐅᖅᐳᖅ ᓱᓕ ᐃᖅᑲᐅᒪᓪᓗᓂᓗ ᐅᖃᐅᓯᖃᖅᖢᓂ ᑕᐃᑦᓱᒪᓂ ᐊᖏᕐᕋᖃᓚᐅᖅᓯᒪᓪᓗᓂ ᕿᖓᐅᒥ.

ᐄᕙ ᐊᔭᓕᒃ ᐸᐅᖓᖅᓯᐅᖅᑐᖅ ᖁᕕᐊᓱᑦᓯᐊᖅᖢᓂ ᕿᖓᐅᒧᐊᖅᓯᒪᓪᓗᓂ ᑕᒡᕙᓂ ᑕᖅᑭᒥ. ᕿᑎᕐᒥᐅᑦ ᐃᖅᑯᓯᑐᖃᓕᕆᔨᒃᑯᑦ ᑲᑐᔾᔨᖃᑎᒌᒃᑯᖏᑦ ᑮᓇᐅᔭᑎᒍᑦ ᐃᑲᔪᓚᐅᖅᐳᑦ ᑖᕗᖓᐅᓂᖏᓐᓂ.

“ᐃᓗᐃᑦᑑᓕᖅᐳᖓ. ᐆᒻᒪᑎᒻᓄᑦ ᐱᐅᕗᖅ ᒫᓐᓇ ᓱᓕ,” ᐅᖃᓚᐅᖅᐳᖅ. “ᑕᐃᒪᖓᓗᒃᑖᖅ ᓱᓕ ᐃᓅᔪᓐᓇᓕᖅᐳᖓ ᒎᑎᒧᑦ ᐊᐃᔭᐅᓚᐅᖏᓐᓂᒻᓂ. ᖁᕕᐊᓱᑦᓯᐊᕋᒪ.”
ᑲᑯᓚᒃ ᓯᑕᒪᒋᔭᐅᓪᓗᓂ ᐃᓐᓇᑐᖃᖅ ᐊᐅᓪᓚᖅᓯᒪᓚᐅᖅᐳᑦ ᓯᑉᑕᐱᕆ 9-13-ᒧᑦ ᓄᓇᓕᐊᓛᑐᖃᒥ − ᐃᑲᕋᖅ ᑎᑭᑕᐅᔪᓐᓇᖅᖢᓂ ᖃᖓᑕᔫᒃᑯᑦ ᐃᖃᓗᒃᑑᑦᓯᐊᒥ − ᑕᒪᓐᓇ ᐊᐅᓪᓚᕐᓂᖏᑦ ᐊᑐᓕᖅᑎᑕᐅᓯᒪᓪᓗᑎᒃ ᕿᑎᕐᒥᐅᑦ ᐃᑦᓴᕐᓂᑕᓕᕆᔨᒃᑯᑦ ᑲᑐᔾᔨᖃᑎᒌᒃᑯᖏᓐᓄᑦ.
“ᓄᓇᒋᕙᓚᐅᕋᑦᑎᒍᑦ ᐃᓚᒌᒃᑐᒍᑦ ᐊᑯᓂ ᐅᑭᐅᓂ ᑕᐃᑦᓱᒪᓂᑐᖃᖅ,” ᑲᑯᓚᒃ ᐅᖃᓚᐅᖅᐳᖅ ᐅᖃᐅᓯᖃᖅᖢᓂ Arctic Sound, ᖃᓂᒋᔭᖓᓂ ᕿᖓᐅᑉ. “ᕿᐊᓱᖑᓇᓚᐅᖅᐳᖅ… ᑖᕗᖓᒃᑲᓐᓂᓚᐅᖅᓯᒪᓂᐊᕋᓱᒋᓚᐅᖏᓐᓇᒪ ᐊᖏᕐᕋᕕᓂᓐᓄᑦ. ᓲᕐᓗ ᓯᓐᓇᒃᑑᒪᒋᔭᕋ ᐱᓚᐅᖅᐸᕋ.”
ᕿᖓᐅᑦ ᐃᓐᓇᑐᖃᖏᒃ ᒪᕐᕉᒃ ᑭᖑᓪᓕᖅᐹᖑᓕᖅᑐᒃ − ᐊᖓᔪᒌᒃ ᓄᑲᕇᒃ ᓖᓇ ᑲᒧᐊᔪᒃ ᐊᒻᒪ ᒥᐅᕆ ᑲᓂᐊᒃ − ᐊᐅᓪᓚᓚᐅᕐᒪᑎᒃ 2005-ᒥ, ᐅᖃᓚᐅᖅᐳᖅ ᐸᒥᓚ ᒍᕉᔅ, ᑐᑭᒧᐊᒃᑎᑎᔨ ᕿᑎᕐᒥᐅᑦ ᐃᑦᓴᕐᓂᑕᓕᕆᔨᒃᑯᑦ ᑲᑐᔾᔨᖃᑎᒌᒃᑯᖏᓐᓄᑦ. ᑲᒧᐊᔪᒃ ᐊᒻᒪ ᑭᓂᐊᒃ ᐊᐱᕆᔭᐅᓚᐅᖅᐳᒃ ᐊᐅᓪᓚᖃᑕᐅᒍᒪᒋᐊᒃᓴᖏᓐᓄᑦ ᕿᖓᐅᓕᐊᖃᑕᐅᔪᓐᓇᕐᓂᕋᖅᑕᐅᓪᓗᑎᒡᓗ, ᑮᓇᐅᔭᑎᒍᑦ ᐊᑭᓕᖅᑕᐅᓪᓗᓂ ᑕᒪᓐᓇ ᒐᕙᒪᒃᑯᓐᓂᑦ ᓇᖕᒥᓂᖃᖅᑐᓂᓪᓗ. ᑲᒥᐅᔭᒃ ᑲᑎᒪᔨᐅᖃᑕᐅᓚᐅᖅᐳᖅ ᑲᓂᐊᒃ ᐃᓚᐅᔪᓐᓇᓚᐅᖏᑦᖢᓂ. ᐃᓕᖁᓯᑐᖃᖃᕐᓂᖏᓐᓄᑦ ᖃᐅᔨᒪᔭᑐᖃᖏᑦ ᐊᑐᖅᑕᐅᑦᓯᐊᓚᐅᖅᐳᑦ,” ᐅᖃᓚᐅᖅᐳᖅ ᒍᕉᔅ.
“ᐱᓕᕆᖃᑎᖃᕈᒪᓚᐅᕋᑦᑕ (ᐃᓐᓇᑐᖃᓂᒃ) ᓄᓇᒥ ᑕᐃᒪᓐᓇ ᓄᓇᑐᖃᒥᓄᐊᕈᓐᓇᓚᐅᕐᒪᑕ,” ᐅᖃᓚᐅᖅᐳᖅ ᒍᕉᔅ. “ᐃᖅᑲᐅᒪᔭᑐᖃᒥᓂᒃ ᐊᑐᕈᓐᓇᖅᓯᓚᐅᖅᐳᑦ. ᓱᓇᑐᐃᓐᓇᕐᓂᒡᓗ ᐃᖅᑲᐅᒍᑎᖃᖅᖢᑎᒃ… ᐊᔪᕐᓇᖏᓐᓂᖅᓴᐅᖕᒪᑦ ᐅᕿᓐᓂᖅᓴᐅᓪᓗᓂᓗ ᐃᓐᓇᑐᖃᓄᑦ ᓄᓇᒥᓂ ᓄᓇᑐᖃᒥᓂᓗ.”
ᑲᑯᓚᒃ ᖁᕕᐊᓱᑦᓯᐊᖁᓚᐅᖅᐳᖅ “ᓄᓇᒥ” ᐱᓱᒍᓐᓇᕆᐊᒃᓴᖅ, ᒪᒃᑯᒃᖢᓂ ᐃᓂᒋᓯᒪᔭᒥᓂ 1960-ᓂ. ᑕᐃᑲᓃᓐᓂᕐᒥᖕᓂ, ᐸᐅᖓᖅᑕᓚᐅᖅᐳᖅ ᐃᖅᑲᐅᒪᓪᓗᓂᒋᓪᓗ ᑕᒪᒃᑯᐊ ᓰᖅᑯᖓᑎᒍᑦ ᐳᖅᑐᑎᒍᓚᐅᖅᑐᑦ ᓄᓇᐃᑦ ᐊᖏᓂᖅᓴᐅᓕᖅᖢᑎᒃ ᐳᖅᑐᓂᖅᓴᐅᓕᖅᖢᑎᒃ ᐱᕈᖅᓯᒪᓂᖅᓴᐅᓕᖅᖢᑎᒃ.
“ᓱᓇᓗᒃᑖᑦ ᐱᕈᖅᓯᒪᓕᖅᐳᑦ. ᓱᓕ ᐱᐅᕗᖅ,” ᐅᖃᓚᐅᖅᐳᖅ. “ᑐᒃᑐᓯᐊᕈᒪᓐᓇᓚᐅᕋᓗᐊᖅᐳᖅ ᐅᒥᖕᒪᖕᒥᒡᓘᓐᓃᑦ ᐊᒪᕈᓕᒻᒪᕆᐊᓘᓚᐅᖅᐳᖅ.”
ᑲᑯᓚᒃ ᐊᐅᓪᓚᓚᐅᖅᐳᖅ ᐃᖃᓗᒃᑑᑦᓯᐊᒥᑦ 1968-ᒥ ᐊᓈᓇᑦᓯᐊᖓ ᐋᓐᓂᐊᓕᕐᒪᑦ. ᐅᑎᓚᐅᖅᓯᒪᒐᓗᐊᖅᖢᓂ 2005-ᒥ ᑐᓵᔨᐅᔭᖅᑐᖅᖢᓂ ᒪᓕᒐᓕᐅᖅᑎᓄᑦ ᐃᑲᕋᒐᓴᖕᓄᑦ.
ᒍᕉᔅ ᐅᖃᓚᐅᖅᐳᖅ ᐃᑦᓴᕐᓂᑕᓕᕆᔨᒃᑯᑦ ᑲᑐᔾᔨᖃᑎᒌᒃᑯᖏᑦ ᑕᐃᒪᓐᓇ ᐊᐅᓪᓚᖅᑎᑦᓯᖃᑦᑕᕈᒪᕗᑦ ᐊᕐᕌᒍᑕᒫᑦ ᓄᓇᒋᔭᐅᕙᓚᐅᖅᑐᓄᑦ. ᐊᕐᕌᒍᒃ ᒪᕐᕉᓚᐅᖅᑐᓂ ᐱᐅᕆ ᕆᕗᓕᐊᓚᐅᖅᓯᒪᕗᑦ ᐊᕐᕌᓂᓗ ᐱᐅᕆ ᐲᒧᑦ.
“ᑕᐃᒪ (ᐊᐅᓪᓚᖅᓯᒪᑎᑎᓂᖅ) ᐱᔾᔪᑎᖃᕐᒪᑦ ᑕᒪᒃᑯᐊ ᐃᓄᐃᑦ ᓄᓇᖃᖅᐸᓚᐅᖅᑐᑦ ᐅᑎᖅᑎᑕᐅᔪᓐᓇᖁᓪᓗᒋᑦ ᐊᒻᒪ ᐱᓕᕆᖃᑎᒋᓗᒋᑦ ᐊᔾᔨᒌᖏᑦᑐᓂᒃ,” ᐅᖃᓚᐅᖅᐳᖅ ᒍᕉᔅ. “ᒫᓐᓇ ᐊᐱᖅᓱᓚᐅᖅᐳᒍᑦ ᐃᓐᓇᑐᖃᓂᒃ ᐊᔾᔨᒌᖏᑦᑐᓂᒃ ᐃᓕᖁᓯᖏᓐᓂᒃ ᖃᐅᔨᒍᒪᒍᑎᒋᓚᐅᖅᑕᑦᑎᓐᓂᒃ, ᓄᓇᐃᓪᓗ ᐊᑎᑐᖃᖏᓐᓂᒃ ᐊᒻᒪ ᐱᑐᖃᐅᑎᖏᓐᓂᒃ ᓄᓇᒦᑦᑐᓂᒃ.”