ᐃᓄᐃᑦ ᐳᑭᖅᑕᓖᑦ ᐅᓄᖏᓐᓂᖅᓴᐅᓕᖅᑐᑦ

1161

ᑯᐊᐳᕈᓪ ᕼᐃᓐᓄᕆ ᑰᒪᓐ ᓄᖅᑲᖅᑎᓪᓗᒍ ᒪᐃᒥ,. ᓄᓇᕗᒥ ᐳᑭᖅᑕᓖᑦ ᐊᓯᐅᔨᓚᐅᕐᒪᑕ ᐅᑭᐅᓂᒃ 25-ᓂᒃ ᑕᒫᓂ ᐳᑭᖅᑕᓕᐅᓯᒪᔪᒥᒃ ᐊᒻᒪᓗ ¼-ᒋᔭᐅᓪᓗᓂ ᑕᒫᓂ ᐃᓄᖕᓂ ᐳᑭᖅᑕᓕᓂ.

“ᑕᐃᒪᑑᖅ ᐅᓄᕐᓂᖅᓴᐅᓕᕐᓂᐊᖅᐳᑦ ᐃᖅᑲᓇᐃᔮᖅᑖᕈᒪᔪᑦ ᐳᑭᖅᑕᓕᐅᓂᕐᒥᒃ ᐃᓕᓴᕈᒪᔪᑦ ᐃᓛᒃ ᐊᒃᓱᐊᓗᒃ ᐱᑕᖃᕆᐊᖃᒃᑲᓐᓂᕐᒪᑕ ᐃᓄᐃᑦ ᐳᑭᖅᑕᓕᒃᑯᓐᓂ, ᓱᓕᔪᖅ ᑕᒪᓐᓇ,” ᐅᖃᓚᐅᖅᑐᖅ ᕼᐃᓐᓄᕆ ᑰᒪᓐ, ᐃᓱᒪᓂᕋᖅᖢᓂ ᓄᓇᕗᒥᐅᑦ ᓇᖕᒥᓂᖅ ᐸᓖᓯᖃᕆᐊᓖᑦ ᓄᓇᕗᒥᐅᓂᒃ ᐱᒃᑯᒥᓵᕆᖔᖅᑐᓂᒃ.

ᐱᖓᓱᐃᓐᓇᐅᓕᖅᑐᑦ ᐃᓄᐃᑦ ᐳᑭᖅᑕᓖᑦ ‘V’ ᐊᕕᒃᑐᖅᓯᒪᓂᖓᓂ, ᑕᒫᓂ ᐸᓖᓯᖃᕐᒪᑕ ᑲᑎᓪᓗᒍᑦ 120-ᓄᑦ ᑎᑭᓯᒪᔪᓂᒃ.
ᑰᒪᓐ, ᑭᖑᓪᓕᖅᐹᒥ ᐅᓪᓗᒥ ᐳᑭᖅᑕᓕᐅᔪᓯᐊᓂ ᐊᓐᓄᕌᓂ ᐊᑐᓚᐅᕐᒪᒋᑦ ᒪᐃ 4-ᒥ, ᓄᒃᑎᓚᐅᖅᑐᖅ ᒪᓕᒐᓐᓂᐊᖅᑎᐅᓂᕐᒥᒃ ᐃᖅᑲᓇᐃᔭᖅᑖᖅᖢᓂ ᑲᓇᑕᒥ ᐃᖅᑲᖅᑐᐃᕕᓕᕆᔨᒃᑯᓐᓂ. ᐅᑭᐅᓂᒃ ᒪᕐᕉᖕᓂ ᐃᖅᑲᓇᐃᔮᖃᕐᓂᕋᒥ ᐳᑭᖅᑕᓕᒃᑯᓐᓂ ᐃᖅᑲᓇᐃᔭᖅᑎᑖᕐᕕᖓᓐᓂ, ᑕᐃᒪᓐᓇ ᖃᐅᔨᒪᓂᖃᖅᑐᖅ ᖃᓄᑎᒋ ᐱᔭᕆᑐᓂᖓᓂ ᐱᒋᐊᓕᓵᖅᑐᓄᑦ.

“ᑕᐃᒪᑑᖅ ᐅᓄᕐᓂᖅᓴᐃᑦ ᐃᓄᐃᑦ ᐳᑭᖅᑕᓕᒃᑯᓐᓂ ᐃᖅᑲᓇᐃᔭᖅᑖᕋᓱᐊᕐᓂᐊᖅᐳᑦ ᐃᓄᖕᓂᒃ ᐱᑕᖃᒃᑲᓐᓂᕆᐊᖃᕐᒪᑕ, ᓇᓗᓇᖏᒻᒪᑦ,” ᐅᖃᕆᓪᓗᓂ.

ᐃᓚᓪᓗᓂᐅᒃ ᐸᓖᓯᐅᓂᕐᒥᒃ ᐃᓕᓴᕈᑎᓂᒃ ᐱᑕᖃᕆᐊᓕᒃ ᐅᑭᐅᓂᒃ ᒪᕐᕉᖕᓂᒃ ᐃᓕᓴᕈᑎᖃᕐᒪᑕ ᐸᓖᓰᑦ ᓯᓚᑦᑐᒃᓴᕐᕕᒃᔪᐊᖓᓂ ᐊᑯᓂᓗᐊᖅ ᐱᔭᕆᑐᔪᓂᒃ ᖃᐅᔨᓴᖅᑕᐅᔪᑎᓂᒃ ᑎᑎᕋᕆᐊᖃᓲᖑᖕᒪᑕ ᐃᓯᕈᒪᔪᑦ ᐳᑭᖅᑕᓕᒃᑯᓐᓄᑦ, ᑕᐃᒪᓐᓇᖔᖅ ᐱᔪᓐᓇᖅᐸᑕ ᐃᓗᐊᕐᓂᖅᓴᐅᓇᔭᖅᑐᖅ ᐳᑭᖅᑕᓕᒃᑯᓐᓂ ᐃᓚᐅᔪᒪᔪᓄᑦ.

ᒫᓐᓇ 7-ᐅᖕᒪᑕ ᐃᓄᐃᑦ ᐳᑭᖅᑕᓕᒃᑯᓐᓂ ᐃᖅᑲᓇᐃᔭᖅᑎᐅᔪᑦ ᐃᖃᓗᖕᓂ ᓄᕕᐱᕆ 2016-ᒥ ᑕᐃᓱᒪᓂ “ᐅᓐᓄᐊᓕᒫᖅ ᐃᓄᐃᓐᓇᐅᓪᓗᑎᒃ” ᐃᖅᑲᓇᐃᔭᖅᑎᓪᓗᒋᑦ ᓄᓇᓕᖓᓂ ᐱᓚᐅᖅᑎᓪᓗᒋᑦ. ᒪᓐᓇᒧᑦ ᑎᑭᖢᒍ ᐅᓄᖏᓐᓂᖅᓴᐅᓕᕐᒪᑕ ᓄᖅᑲᕐᕕᒃᓴᖏᓐᓄᑦ ᑎᑭᔪᔭᐅᔪᓄᑦ ᓄᒃᑎᖅᑐᓄᓪᓗ.
ᑰᒪᓐ, ᐃᓕᓴᕐᓂᑰᔪᖅ ᐊᑭᑦᓯᕋᒃᑯᑦ ᒪᓕᒐᓐᓂᐊᖅᑎᐅᓂᕐᒥᒃ ᐃᓕᓴᕐᕕᐊᓂ 2005-ᒥ, ᑕᐃᒪᖓᓂᑦ ᐃᓱᒪᒋᔭᖃᐃᓐᓇᐅᔭᕋᒥ ᒪᓕᒐᓐᓂᐊᖅᑎᖑᕈᒪᓪᓗᓂ ᐳᑭᖅᑕᓕᒃᑯᓐᓂ ᓄᖅᑲᕈᓂ.

“ᑖᓐᓇ ᓯᕕᑐᔪᒧᑦ ᑐᕌᒐᕆᓚᐅᖅᑕᕋ ᐅᕙᓐᓄᑦ,” ᐅᓂᒃᑳᕆᓪᓗᓂ.

ᐊᔪᐃᓐᓇᖅᑕᐅᖃᑦᑕᕐᓂᕋᒥ ᐊᑖᑕᑦᑎᐊᒥᓄᑦ, ᔪᐊᓇᓯ ᑎᐊᓚᒧᑦ, ᐃᒻᒥᒃᑰᖅᑐᓂ ᐳᑭᖅᑕᓕᖕᓂ ᐃᓚᐅᓚᐅᖅᓯᒪᖕᒪᑦ ᐸᖕᓂᖅᑑᒥ ᐸᓖᓯᐅᓪᓗᓂ, ᑰᒪᓐ ᐊᑎᓕᐅᖅᑕᐅᓕᖅᑐᕕᓂᖅ ᐸᓖᓯᒃᑯᓐᓂ ᐃᖃᓗᖕᓂ ᐊᒻᒪᓗ ᐸᓖᓯᐅᓯᒪᓪᓗᓂ ᔭᓗᓇᐃᕝᒥ, ᕿᑭᖅᑕᕐᔪᐊᒥ, ᑲᖏᖅᖠᓂᕐᒥ ᐊᒻᒪᓗ, ᑭᖑᓪᓕᖅᐹᒥ ᐅᑎᕐᓂᖅᖢᓂ ᐃᖃᓗᖕᓄᑦ ᐃᓅᓂᑰᔪᖅ ᐸᖕᓂᖅᑑᒥ ᐊᒻᒪᓗ ᐱᕈᖅᓴᓯᒪᓪᓗᓂ ᓄᓇᕗᓕᒪᑲᓴᖕᒥ ᐊᒃᓱᐊᓗᒃ ᐱᒃᑯᒥᓇᕐᓂᕐᒪᑦ ᐊᔾᔨᒌᖏᑦᑐᓂ ᓄᓇᓕᖕᓂ ᐊᖏᕐᕋᖃᖅᓯᒪᓪᓗᓂ. ᑰᒪᓐ ᐅᓂᒃᑳᕆᓪᓗᓂ.

“ᐅᖃᖃᑦᑕᓚᐅᖅᓯᒪᔪᖓ, ᑕᒪᐃᑕ, ᖁᕕᐊᓇᓚᐅᖅᑐᑦ ᐅᕙᓐᓄᑦ ᐃᓅᓪᓗᖓ ᐊᒻᒪᓗ ᐸᓖᓯᐅᓪᓗᖓ. ᑕᐃᒪᓐᓇ ᐃᖅᑲᓇᐃᔮᕋ ᐃᓱᒪᒋᓪᓗᒍ ᐊᒃᓱᕈᕐᓇᓗᐊᖏᓐᓂᖅᓴᐅᕙᓚᐅᖅᑐᖅ,” ᐅᖃᕆᓪᓗᓂ, ᐃᓄᒃᑎᑐᑦ ᐅᖃᓪᓚᒍᓐᓇᖅᖢᖓ ᐃᑲᔪᓚᐅᖅᑐᖅ ᐅᖃᐅᓯᒃᑯᑦ ᐋᓪᓚᔪᐊᕐᓇᖏᓐᓂᖅᓴᐅᓪᓗᓂ ᐃᓄᒃᑎᑐᑦ ᐅᖃᓪᓚᒍᓐᓇᖏᑦᑐᓂᑦ ᐳᑭᖅᑕᓕᖕᓂᑦ ᓄᓇᓕᖕᓂ. “ᑭᓯᐊᓂᓕᑦᑕᐅᖅ, ᑕᐃᒪᖓᓂᑦ ᓲᖃᐃᒻᒪ, ᐃᓄᖃᐅᓱᖑᖕᒥᖕᒪᑦ ᐸᓖᓯᓂᒃ ᐱᐅᒃᓴᖏᑦᑐᓂᒃ ᖃᓄᐃᑦᑐᑐᐃᓐᓇᐅᒐᓗᐊᖅᐸᑕ, ᓇᒥᖔᕋᓗᐊᖅᐸᑕ, ᖃᓄᕐᓗ ᑕᐅᑦᑐᖃᕋᓗᐊᖅᐸᑕ. ᐃᓅᓪᓗᖓ ᑕᒪᓐᓇ ᖃᐅᔨᓯᒪᔭᕋ ᐱᓗᐊᑐᒥᒃ.”

ᐅᓂᒃᑳᕆᓪᓗᓂ ᐸᓖᓯᐅᓪᓗᓂ ᐃᓱᒪᒃᑯᑦ ᐊᒃᓱᕈᖅᐸᒃᖢᓂ “ᓱᖏᐅᓯᒪᓕᕐᓇᕐᒪᑦ ᐱᕋᔭᖃᑦᑕᖅᑐᓂᒃ ᑲᐅᖃᕐᓂᖅᓴᐅᓕᕐᓇᕐᒪᑦ” ᖀᓕᖑᔪᓂᒃ ᑲᒪᔨᐅᓪᓗᓂ.
“ᑕᒪᒃᑯᓂᖓᓕ ᓇᖕᒥᓂᖅ ᐃᓕᓴᕆᐊᖃᕐᓇᖅᑐᖅ ᐃᓱᒫᓗᒋᒋᐊᖃᖏᑕᓐᓂᒃ,” ᐅᓂᒃᑳᕆᓪᓗᓂ.

ᐊᑕᐅᓯᖅ ᐃᓱᒪᒃᑯᑦ ᐳᐃᒍᓴᐅᑎᒋᔪᓐᓇᖏᒻᒥᔭᖓ ᐊᑐᖅᓯᒪᖕᒥᔭᖏᓐᓂ ᖁᑭᐅᓯᔭᖅᑐᓂᒃ ᓴᒡᕕᐊᖃᖅᖢᑎᒃ ᐃᒡᓗᒥᓄᑦ ᐃᓯᖅᑕᐃᓕᒪᑎᑦᑎᔪᓂᒃ ᑲᒪᒋᐊᖃᖃᑦᑕᖅᓯᒪᖕᒪᑦ ᐅᑭᐅᓂ ᐸᓖᓯᐅᓪᓗᓂ ᐃᓛᓐᓂᒃᑯᑦ ᖁᑭᖅᓴᖅᑕᐅᓚᐅᕐᓇᖅᐸᒃᑭᓪᓗᓂ ᐊᒻᒪᓗ ᑐᖁᔪᖃᐅᒻᒪᕆᓚᐅᖅᓯᒪᔪᖅ ᑭᓐᖓᓂ.
“ᑕᒪᒃᑯᐊ ᑕᕝᕙ ᐃᓱᒪᒧᑦ ᐃᓯᖁᖏᒃᑲᓗᐊᖅᖢᒋᑦ ᓂᐱᓯᒪᐃᓐᓇᐅᔭᕐᓂᐊᓕᖅᑐᑦ ᓇᓗᓇᖏᑦᑐᑦ ᐃᓱᒪᒃᓴᖅᓯᐅᓚᐅᑲᖕᓇᖅᑐᑦ ᓱᓕᓪᓗᓂ ᐸᓖᓯᐅᓂᕐᒥᒃ ᐃᖅᑲᓇᐃᔮᖃᕈᒪᖕᒪᖔᖅᐱᑦ. “ᑭᒃᑯᑐᐃᓐᓇᐃᑦ ᐆᒃᑐᕋᕈᒪᓲᖑᖕᒪᑕ ᑭᒃᑯᑐᐃᓐᓇᓂᒃ ᐸᓖᓰᑦ ᐊᓐᓄᕌᖏᓐᓂᒃ ᐊᓐᓄᕌᖅᓯᒪᔪᓂᒃ … ᑕᒪᔾᔭ ᑕᒪᔾᔭ ᐱᑦᓱᒃᑐᑦ ᐅᔾᔨᖅᓱᐃᓐᓇᕆᐊᖃᖃᑦᑕᖅᑕᕗᑦ ᐃᓱᒪᑦᑕ ᑐᓄᐊᓂ.”

ᓄᓇᕗᒥᐅᑦ ᐅᖃᐅᓯᐅᖃᑦᑕᕐᒪᑕ ᑐᖓᓕᖓᓂ ᑭᖑᓪᓕᐅᓪᓗᑎᒃ ᖁᑦᑎᖕᓂᖅᐹᖑᖕᒪᑕ ᐋᓐᓂᖅᑎᕆᔪᓂᒃ ᑲᒪᒋᐊᖃᖃᑦᑕᖅᖢᑎᒃ ᐊᒻᒪᓗ ᐃᖅᑲᖅᑐᐃᕕᖕᓂ ᐃᖅᑲᖅᑐᐃᔪᑕᐅᒐᔪᖕᓂᖅᐹᖑᒋᓪᓗᓂ ᑲᓇᑕᓕᒫᒥ, ‘V’ ᐊᕕᒃᑐᖅᓯᒪᓂᖏᓐᓂ ᐳᑭᖅᑕᓕᒃᑯᓐᓂ ᑲᒪᒋᔭᐅᒋᐊᖃᖃᑦᑕᖅᑐᑦ ᐊᖓᔪᖅᑲᖓᑦ ᒪᐃᑯᓪ ᔨᕗᕆ ᐅᓂᒃᑳᓚᐅᖅᑐᖅ ᐊᕐᕌᓂ. ᓄᓇᕗᒥ ᐅᓄᕐᓂᖅᐹᖑᖕᒥᔪᑦ ᐃᓱᒪᓐᓂᐊᖅᑕᐅᒋᐊᖃᖅᑐᓂᒃ ᐅᖃᓘᑎᖃᖃᑦᑕᖅᑐᑦ ᐳᑭᖅᑕᓕᒃᑯᓐᓄᑦ ᑲᓇᑕᒥ. ᑖᒃᑯᐊ ᑕᕝᕙ ᐱᔾᔪᑎᒋᓪᓗᒋᑦ, ᑰᒪᓐ ᐅᖃᓚᐅᖅᑐᖅ ᑕᑯᒃᑲᓐᓂᕈᒪᓂᕋᖅᖢᓂ ᐸᓖᓯᓂᒃ ᐅᓄᕐᓂᖅᓴᐅᒋᐊᖃᕐᒪᑕ ᐃᓄᐃᑦ ᑕᒪᐃᓐᓂᓕᒫᖅ ᓄᓇᓕᖕᓂ.

ᐃᓛᒃ ᐊᑕᐅᓯᑯᓗᖕᒥᒃ ᐊᑐᖅᓯᒪᔭᒥᓂᒃ ᐸᓖᓯᐅᓪᓗᓂ ᑎᒃᑯᐊᖅᓯᔪᓐᓇᖏᑦᑑᒐᓗᐊᖅ, ᑭᓯᐊᓂᓕ ᑰᒪᓐ ᐅᖃᓚᐅᖅᑐᖅ ᖁᕕᐊᒋᔪᑎᒋᔭᖓ ᐃᑲᔪᖅᑕᒥᓄᑦ ᓱᕚᓪᓕᐅᑕᐅᖃᑦᑕᕐᓂᕐᓂ ᑕᕝᕙ ᒪᑭᒪᔪᑎᒌᓐᓇᖅᑕᖓ ᐊᒥᓱᓄᑦ ᐊᕐᓇᓄᑦ ᐊᐃᑉᐸᒥᓄᑦ ᐃᓂᖓᖅᑕᐅᖃᑦᑕᖅᑐᓄᑦ ᐅᖃᐅᔭᐅᖃᑦᑕᖅᓯᒪᒐᒥᒍᖅ ᖁᔭᓕᔭᐅᓪᓗᓂ.

“ᐊᑦᑕᕐᓇᖅᑐᖅᓯᐅᖅᑐᑦ ᓄᒃᑎᖅᑕᐅᒋᐊᖃᓲᖑᖕᒪᑕ ᐃᑲᔪᖅᑕᐅᕕᒃᓴᖏᓐᓄᑦ ᖃᓄᐃᖏᑦᑐᓃᒋᐊᖃᕋᓗᐊᕐᒪᑕ.” ᐅᖃᕆᓪᓗᓂ ᐃᖅᑲᐅᒪᔭᒥᓂᒃ ᐅᓂᒃᑳᖅᖢᓂ.

ᐊᒻᒪᓗ ᑰᒪᓐ ᑕᒪᓂᕐᒥᐅᓄᑦ ᑭᖑᓂᖃᕐᓂᐊᖅᑐᖅ. ᑳᓯᑕᐳᓪ ᔩᒥ ᓴᕕᑲᑖᑉ ᐃᖅᑲᓇᐃᔭᖃᑎᒋᓯᒪᖕᒪᒍ ᐊᒥᓱᓂᒃ ᐅᑭᐅᓂᒃ.
“ᕼᐃᓐᓄᕆ ᐸᓖᓯᐅᓚᐅᕐᒪᑦ ᐅᒃᐱᕆᔭᖃᖅᖢᓂ ᐳᑭᖅᑕᓖᑦ ᒪᓕᒐᖏᓐᓂᒃ. ᐃᖅᑲᓇᐃᔮᒥᓂᒃ ᑲᒪᑦᑎᐊᕐᓂᖓᓄᑦ ᐊᒻᒪᓗ ᓱᓕᔪᕐᓇᖅᑐᒥᒃ ᐃᓅᓯᖃᕐᓂᖓᓄᑦ ᐱᒻᒪᕆᐅᑎᑕᐅᔪᖅ ᑲᔪᓯᑦᑎᐊᓚᐅᕐᒪᑦ ᐃᖅᑲᓇᐃᔭᖅᑎᐅᓪᓗᓂ 25-ᓂᒃ ᐅᑭᐅᓂᒃ ᐳᑭᖅᑕᓕᒃᑯᓐᓂ,” ᐅᖃᓚᐅᖅᑐᖅ ᓴᕕᑲᑖᖅ. “ᑕᒪᑐᒪᓂ ᐆᒻᒪᑎᒐ ᖃᓂᑦᑐᒦᑎᓪᓗᒍ ᖁᕕᐊᓱᖁᕙᕋ ᕼᐃᓐᓄᕆ. ᓄᖅᑲᓕᖅᑎᓪᓗᒍ ᕿᒪᐃᓂᐊᕐᒪᑦ ᐅᓪᓗᒥ ᐱᖓᓱᐃᓐᓇᐅᓕᖅᑎᓪᓗᒋᑦ ᐃᓄᐃᑦ ᐳᑭᖅᑕᓕᑦ ᑕᒪᓂ ᓇᓗᓇᖏᓕᖅᑐᖅ ᐊᔪᐃᓐᓇᖅᑕᐅᒋᐊᖃᕐᒪᑕ ᐃᓄᐃᑦ ᐸᓖᓯᐅᓂᕐᒥᒃ ᐃᖅᑲᓇᐅᔭᖅᑖᕋᓱᐊᖁᓗᒋᑦ ᐳᑭᖅᑕᓕᒃᑯᓐᓂ.”