ᖃᓱᒋᐊᖅᑕᐅᓯᑎᓪᓗᒋᑦ ᓄᕙᒡᔪᐊᕐᓂᖅ-19−ᑯᑦ ᒪᓕᒃᑕᐅᔭᕆᐊᓖᑦ ᑲᖏᖅᖠᓂᕐᒥ ᐃᓐᓇᐃᑦ ᐊᖑᑎᑦ Hᐊᑭᖃᑦᑕᕐᓂᖏᑦ ᐅᑎᓚᐅᖅᑐᑦ ᑎᓯᐱᕆ 14-ᒥ ᐊᒻᒪᓗ Hᐊᑭᖃᑦᑕᕐᓂᐅᔪᑦ Rankin Rock-ᑯᓐᓄᑦ ᓄᑕᖅᑲᓄᑦ.

ᐃᓕᓐᓂᐊᕈᑎᒥᒃ ᐃᓕᓐᓂᐊᖅᑎᑦᑎᔨ ᑕᐃᕕᑎ ᑲᓛᒃ ᑐᑭᓯᑎᑦᑎᒋᐊᖅᑐᖅ ᓯᑯᒥ ᖃᓄᐃᓕᐅᕈᑕᐅᓂᐊᖅᑐᒥᒃ 11 ᑐᖔᓂ ᐅᑭᐅᓕᖕᓄᑦ Hᐊᑭᖅᑎᓄᑦ ᐅᖃᓘᑎᓕᕆᔨᒃᑯᑦ Rankin Rock-ᑯᓐᓂᒃ Hᐊᑭᕐᓂᒃᑯᑦ ᐃᓕᓐᓂᐊᖅᑎᑦᑎᑎᓪᓗᒋᑦ ᑲᖏᖅᖠᓂᕐᒥ ᐅᑐᐱᕆ 22-ᒥ. ᓄᕙᒡᔪᐊᕐᓂᖅ -19 ᐱᔾᔪᑎᒋᑉᓗᒍ Hᐊᑭᕐᓂᕐᒧᑦ ᒥᐊᓂᖅᓯᔨᐅᔪᑦ ᐃᓱᒪᒃᓴᖅᓯᐅᕆᐊᖃᓕᓚᐅᕐᒪᑕ ᖃᓄᐃᓕᐅᖅᑎᑦᑎᔭᕆᐊᒃᓴᖅ ᐊᓯᐊᒍᑦ Hᐊᑭᕐᓇᐅᔪᒃᑯᑦ.

ᐱᙳᐊᖅᑏᑦ ᒥᐊᓂᖅᓯᔨᖏᑦ, Hᐊᑭᖅᑐᓕᕆᓂᒃᑯᓪᓗ ᐊᖓᔪᒃᖠᕐᓄᑦ ᐊᖓᔪᖅᑳᑦ ᐊᒻᒪᓗ Hᐊᑭᖅᑐᓕᕆᔨᒃᑯᑦ ᓄᑲᖅᖠᕐᓄᑦ ᐊᐅᓚᑦᑎᔨᖓ ᑕᐃᕕᑎ ᑲᓛᒃ ᐅᖃᖅᖢᓂ Hᐊᑭᕐᓂᒃᑯᑦ ᖃᓄᐃᓕᐅᕈᑏᑦ ᑲᔪᓯᑎᓪᓗᒋᑦ ᔭᓄᐊᕆ 1-ᒥ, ᖃᓄᐃᓕᐅᕈᑕᐅᖃᑦᑕᕐᓂᐊᖅᑐᑦ ᕿᒥᕐᕈᔭᐅᒃᑲᓐᓂᖅᓯᒪᔪᑦ. ᑕᐃᒪᓐᓇ ᐅᖃᖅᑳᖅᖢᓂ, ᐅᖃᒃᑲᓐᓂᖅᖢᓂ ᓇᓗᓇᖅᑐᕉᖅ ᑲᖏᖅᖠᓂᕐᒥ Hᐊᑭᕐᓂᒃᑯᑦ ᐱᒡᒍᓴᐅᔾᔪᐊᖅᑐᖃᕋᔭᕐᒪᖔᑦ.

“ᓄᓇᓕᖕᒥ ᖃᓄᐃᓕᐅᖅᑎᑦᑎᒃᑲᓐᓂᕆᐊᖃᕐᓂᐊᖅᑐᒃᓴᐅᔪᒍᑦ ᖃᓄᖅᑑᒃᑲᓐᓂᕋᓱᒡᓗᑕᓗ ᑕᒡᕘᓇ,” ᑕᐃᒪᓐᓇ ᐅᖃᖅᖢᓂ ᑲᓛᒃ.

“ᓯᕗᓪᓕᖅᐹᖅ ᐱᔾᔪᑕᐅᓯᒪᔪᖅ ᓄᑲᖅᖠᕐᓄᑦ Hᐊᑭᖅᑎᓄᑦ ᑮᓇᐅᔭᖅᑖᖅᓯᒪᑎᒻᒪᑕ ᓱᓕ ᐱᒡᒍᓴᐅᔾᔪᐊᖅᑎᑦᑎᓇᔭᕐᓂᕐᒧᑦ ᒫᓐᓇᐅᔪᖅ, ᑕᒪᓐᓇ ᐊᓯᔾᔨᙱᑉᐸᑦ, ᓇᓗᓇᕈᓐᓃᑲᐅᑎᒋᕗᖅ.

ᐅᑕᖅᑭᔪᖓ ᓱᓕ ᑐᓴᕈᒫᕐᓂᑉᑎᓐᓄᑦ ᓄᓇᕗᑦ Hᐊᑭᒃᑯᑦ ᑲᑎᒪᔨᖏᓐᓂᒃ Hᐊᑭᕐᓂᒃᑯᑦ ᐱᒡᒍᓴᐅᔾᔪᐊᖅᑎᑦᑎᓇᔭᕐᒪᖔᑉᑕ ᐊᒻᒪᓗ, ᐱᑎᑦᑎᓂᐊᕈᑉᑕ, ᑮᓇᐅᔭᖅᑖᖅᑎᑕᐅᓂᐊᖅᐱᑖ?

ᑕᒡᕙ ᐊᑑᑎᖃᕈᑎᒋᓕᖃᑦᑕᕐᒪᒍ ᑕᒪᐃᓐᓄᑦ ᓄᓇᓕᖕᓄᑦ ᑲᑎᑦᑐᓐᓇᖁᑉᓗᒋᑦ ᐊᒻᒪᓗ ᑭᕙᓪᓕᕐᒥᐅᑦ ᐱᒡᒍᓴᐅᔾᔪᐊᕈᓐᓇᖁᑉᓗᒋᑦ.”

ᑲᓛᒃ ᐅᖃᖅᖢᓂ Hᐊᑭᖅᑎᐊᓛᒃ ᒥᒃᓵᓄᑦ, ᐃᓚᖏᑦ ᐅᑭᐅᖃᑎᒌᒃᑐᑦ ᐊᕕᒃᑐᕆᐊᖃᓚᐅᕐᒪᑕ ᒪᓕᒍᓐᓇᖁᑉᓗᒋᑦ ᓄᕙᒡᔪᐊᕐᓂᒃᑯᑦ ᒪᓕᒃᑕᐅᔭᕆᐊᓕᖕᓂᒃ ᕿᓚᒥᐅᔪᒃᑯᑦ.

25-ᖏᓐᓇᐅᔪᑦ ᓯᑯᒦᑦᑕᕆᐊᖃᖃᑦᑕᓚᐅᕐᒪᑕ ᐊᑕᐅᑦᑎᒃᑯᑦ ᐊᒻᒪᓗ 25-ᑲᓐᓃᑦ ᑕᐅᑐᒡᓗᑎᒃ ᑕᖅᑭᒥ ᒪᕐᕉᖕᓂᒡᓘᓐᓃᑦ.

ᑲᓛᒃ ᐅᖃᖅᖢᓂ ᐊᒥᓲᓂᖅᐹᒃᑯᑦ 25-ᖑᔭᕆᐊᓖᑦ ᐊᑯᓂᐅᓗᐊᙱᑦᑐᖅ ᑕᐃᒪᐃᓚᐅᖅᑐᑦ ᐊᒻᒪᓗ ᓄᑖᒥ ᐅᑭᐅᒥ 50-ᐅᔪᓐᓇᖅᓯᒋᑉᓗᑎᒃ.

Hᐊᑭᕕᒡᔪᐊᖅᑎᑦᑎᓂᖅ ᓄᓇᓕᖕᓂᒃ ᐊᕕᒃᑐᖅᓯᒪᔪᓂᒃ ᐅᐃᒪᓇᖅᑐᖅ.

“ᕿᓄᐃᓵᕆᐊᖃᖅᓯᒪᔪᒍᑦ ᐃᓛᒃ ᐃᓄᐃᑦ ᐅᔾᔨᕈᓱᖃᑦᑕᙱᒻᒪᑕ, ᑲᖏᖅᖠᓂᕐᒥ Hᐊᑭᕕᒡᔪᐊᖅᑎᑦᑎᔭᕌᖓᑉᑕ, ᐃᓄᐃᑦ ᑎᑭᑦᑐᑦ ᑐᔪᕐᒥᕕᒃᑖᕆᐊᖃᖃᑦᑕᕐᒪᑕ.

“ᑕᒪᓐᓇ ᐊᒃᓱᕈᕐᓇᖅᑐᒃᑰᕈᑕᐅᓲᖅ ᐊᖏᕐᕋᕆᔭᐅᔪᓄᑦ ᓄᓇᓕᖕᓂᒃ ᓯᓂᒃᑕᕐᕕᒃᑎᑐᑦ ᐊᑐᖅᑕᐅᑐᐃᓐᓇᓕᖃᑦᑕᕐᒪᑕ.

ᑲᓛᒃ ᐅᖃᖅᖢᓂ ᐅᖃᖃᑎᒌᒋᐊᖃᓕᖅᐸᑕ ᑭᕙᓪᓕᕐᒥ Hᐊᑭᕕᒡᔪᐊᖅᑎᑦᑎᓂᐊᕐᓂᕐᒧᑦ, ᑕᒪᕐᒥᒃ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᖏᓐᓄᑦ ᐋᓐᓂᐊᖃᕐᓇᙱᑦᑐᓕᕆᔨᕐᔪᐊᑉᓗ ᐊᖓᔪᖅᑳᖓᓄᑦ ᐊᖏᖅᑕᐅᔭᕆᐊᖃᕋᔭᕐᒪᑕ.

ᕿᓄᐃᓵᑦᑎᐊᕆᐊᖃᖅᑐᒍᑦ ᓱᓇᓗᒃᑖᑦ ᑲᔪᓯᑦᑎᐊᕈᓐᓇᖁᑉᓗᒋᑦ ᓄᓇᑉᑎᓐᓂᒃ, ᐊᓯᐊᒍᒃᑲᓐᓂᖅ ᐱᓕᕆᔭᕆᐊᖃᕈᑉᑕᓘᓐᓃᑦ ᐅᑭᐅᖅ.”

ᑲᓛᒃ ᐅᖃᖅᖢᓂ Hᐊᑭᖅᑎᖏᒡᒎᖅ ᖃᑉᓗᓈᑦ ᓄᓇᖓᓄᑦ ᐊᐅᓪᓚᖅᑎᓐᓇᓱᖃᑦᑕᕐᒪᒋᑦ ᐅᑭᐅᑕᒫᒃᑯᑦ, ᑭᓯᐊᓂ ᑕᐃᒪᐃᔾᔮᙱᑦᑐᑦ ᐅᑭᐅᖅ.

ᐅᖃᖅᖢᓂ ᐱᒻᒪᕆᐊᓗᒎᖅ Hᐊᑭᖅᑎᓂᒃ ᒥᐊᓂᖅᓯᔩᑦ ᐱᓕᕆᑦᑎᐊᕋᓱᒋᐊᖃᕐᓂᖏᓐᓄᑦ ᖁᕕᐊᓱᒃᑎᑦᑎᓗᑎᒡᓗ ᓄᑕᖅᑲᓂᒃ.

“ᐊᓯᐊᒍᑦ ᐱᓕᕆᔭᕆᐊᖃᕈᑉᑕ, ᑕᐃᒪᐃᓕᐅᕐᓂᐊᖅᐳᒍᑦ.

“ᖁᕕᐊᓱᒃᑎᑦᑎᔪᒪᓂᖅ ᓄᑕᖅᑲᓂᒃ ᑕᐃᒪᐅᖕᒪᑦ, Hᐃᓖ?”

Advertisement

Darrell Greer

Darrell Greer is Editor of Kivalliq News

Leave a comment

Your email address will not be published. Required fields are marked *