ᓄᓇᖅᑲᑎᒥᓄᑦ ᐅᖃᓘᑕᐅᓚᐅᖅᑳᖅᖢᓂ ᐳᑭᖅᑕᓕᖕᓄᑦ 18-ᓂᒃ ᐅᑭᐅᓕᒃ ᐊᓕᕝ ᑯᕕᐅ ᐊᐅᐸᔮᖅᑐᖅ ᖁᑭᐅᑎᙳᐊᖓ ᐳᑉᓚᓕᒃ ᓴᙱᔪᐊᓘᙱᑦᑐᒃᓴᐅᔫᒐᓗᐊᖅ ᑭᓯᐊᓂ ᐱᑕᖅᓯᖃᑦᑕᖅᑐᖅ.
ᐅᑉᓗᑕᒫᖅᑲᔭᖅ ᓯᓚᑦᑕᐅᔭᕌᖓᑦ, ᖃᒪᓂ’ᑐᐊᕐᒥ ᐊᖑᓇᓱᒃᑏᑦ ᑕᑯᔪᓐᓇᖃᑦᑕᖅᑐᑦ ᑐᕕᐅ ᑎᕐᓕᐊᖅᓯᑎᓪᓗᒍ ᐱᑕᕈᒪᔭᒥᓂᒃ ᓄᓇᓕᐅᑉ ᓯᓚᑖᓂ.
ᐊᖑᓇᓱᒍᒪᒃᑲᐅᔪᖅ ᓱᓇᓂᒡᓖ? ᐊᕿᒡᒋᕐᓂᒃ.
“ᐊᓕᐊᓇᐃᓛᑦᑎᐊᑦ ᖁᑭᐅᑎᙳᐊᑦ ᐊᑐᖅᖢᒋᑦ ᑭᓯᐊᓂ ᐊᑑᑎᖃᙱᓐᓂᖅᐹᖑᔪᑦ,” ᑕᐃᒪᓐᓇ ᑐᕕᐅ ᐅᖃᐅᔾᔨᑉᓗᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ. “ᐃᖅᑯᒃᓱᒋᐊᖃᕐᓇᖅᑐᖅ ᓂᐊᖁᒃᑯᑦ ᖁᖓᓯᓂᒃᑯᓪᓘᓐᓃᑦ ᐱᑕᕐᓗᒋᑦ.”
ᐊᕿᒡᒌᑦ ᓯᕗᓪᓕᖅᐸᐅᒐᔪᙱᑦᑐᑦ ᐃᓱᒪᒃᓴᖅᓯᐅᖅᖢᓂ ᐃᓄᒃᓯᐅᑎᑐᕈᒪᓂᕐᒧᑦ ᓂᕿᓂᒃ. ᑭᓯᐊᓂ ᑐᕕᐅᒧᑦ ᐃᒃᖠᖕᓇᖅᑑᔪᖅ ᐊᕿᒡᒋᖅᓯᐅᖃᑦᑕᖅᓯᒪᓕᕋᒥ 13-ᓂᒃ ᐅᑭᐅᖃᖅᖢᓂ.
“ᐳᑉᓚᓅᖅᑐᒥᒃ ᖁᑭᐅᖅᑖᖅᑳᕐᓇᖓ ᒥᓪᓗᑐᐃᓐᓇᖃᑦᑕᓚᐅᖅᓯᒪᔭᒃᑲ ᐊᖑᓇᓱᒃᖢᒋᑦ,” ᑕᐃᒪᓐᓇ ᐅᖃᖅᖢᓂ. “ᐊᒥᓱᑦ ᓄᑕᖅᑲᑦ ᑕᐃᒪᐃᓕᐅᖃᑦᑕᕐᒪᑕ ᐱᕈᖅᓴᖅᖢᑎᒃ.”
ᕿᓚᒥᐅᔪᒃᑯᑦ ᐳᓪᓚᓅᖅᑐᒥᒃ ᖁᑭᐅᑎᖃᖅᓯᒪᓕᕋᓗᐊᖅᑐᖅ ᑭᓯᐊᓂ ᐊᑯᓂ ᐃᒐᖃᑦᑕᓕᖅᑕᖏᑦ ᐊᕿᒡᒌᑦ.
“ᓯᕗᓪᓕᖅᐹᒥ ᐆᒃᑐᕋᒃᑭᑦ ᐃᒐᓚᐅᖅᓯᒪᔭᒃᑲ ᐃᒐᑉᑕ ᐃᓗᐊᒍᑦ ᐊᒻᒪᓗ ᒪᒪᕈᓘᔭᓚᐅᖅᑐᖅ,” ᑕᐃᒪᓐᓇ ᐅᖃᖅᖢᓂ.
ᐅᑭᐅᓂᒃ ᖄᖏᖅᓯᒪᔪᓂᒃ ᐆᒃᑐᕋᖃᑦᑕᖅᓯᒪᔪᖅ ᐊᔾᔨᐅᙱᑦᑐᒃᑯᑦ ᐃᒐᓇᓱᒃᐸᒃᖢᓂᒋᑦ ᐊᕿᒡᒌᑦ. ᐊᕿᒡᒋᓕᐅᖅᓯᒪᔪᖅ Stir Fry-ᖅᖢᓂᒋᑦ, ᐃᒐᒃᑯᑦ ᐃᒐᑉᓗᓂᒋᑦ ᐊᒻᒪᓗ ᓯᓚᒥᓘᓐᓃᑦ ᐃᑭᑎᑦᑎᑉᓗᓂ ᐃᒐᖃᑦᑕᖅᓯᒪᔭᖏᑦ, ᑕᐃᒪᐃᑦᑐᒃᑯᑦ ᐃᒐᑉᓗᒋᑦ ᒪᒪᕆᓂᖅᐹᕆᑉᓗᓂᒋᑦ.
ᐃᒐᖃᑦᑕᕐᒥᔭᖏᑦ Montreal Steak Spice-ᓕᖅᖢᓂᒋᑦ, bacon-ᓕᖅᖢᒋᓪᓗ ᐊᒻᒪᓗ ᐱᕈᖅᑐᓂᒃ ᐃᓚᑉᓗᒋᑦ ᐃᒐᒃᑯᑦ ᐃᒐᒋᐊᖅᑳᕐᓇᒋᑦ.
“ᑕᐃᒪᓐᓇ ᒪᒪᕆᔭᕋ,” ᑕᐃᒪᓐᓇ ᐅᖃᖅᖢᓂ.
ᐊᐅᑦᑖᖑᒐᓗᐊᖅ ᐳᑭᖅᑕᓕᓕᕆᓕᓚᐅᕐᒪᑕ
ᐊᖑᓇᓱᒍᒪᒃᑲᐅᑉᓗᓂ ᐊᕿᒡᒋᕐᓂᒃ ᒥᓪᓗᖅᖢᒋᑦ, ᑐᕕᐅ ᐅᖃᖅᖢᓂ ᖁᑭᐅᑎᙳᐊᖅᑖᖅᖢᓂᒎᖅ ᐳᑉᓚᓅᖅᑐᒥᒃ ᐊᓕᐊᓇᐃᓐᓂᖅᓴᐅᓕᖅᑐᖅ ᐊᖑᓇᓱᖕᓂᒃᑯᑦ.
“ᓯᕗᓪᓕᖅᐹᖑᖕᒪᑦ ᓱᒋᐅᑎᑖᕆᓯᒪᔭᒃᑯᑦ − ᓱᒋᐅᑎᖃᖃᑦᑕᓕᖅᖢᖓ,” ᑕᐃᒪᓐᓇ ᐅᖃᖅᖢᓂ. “ᑕᒪᓐᓇ ᐃᓕᑉᐸᓪᓕᐊᔭᕋ ᐊᑐᖃᑦᑕᖅᑕᒃᑯᑦ.”
ᐊᐃᑦᑖᖑᒐᓗᐊᖅ ᓱᒋᐅᑎᑖᖓ ᓯᕗᓪᓕᖅᐹᖅ ᐅᔾᔨᕆᔭᐅᓕᓚᐅᕐᒪᑦ ᖃᑉᓗᓈᒧᑦ ᐃᓕᓐᓂᐊᖅᑎᑦᑎᔨᒧᑦ ᐅᖃᐅᔾᔨᒐᓱᒃᑐᒥᒃ ᑐᕕᐅᒥᒃ ᖁᑭᐅᑎᒥᒃ ᐳᑉᓚᓅᖅᑐᒥᒃ ᐊᑐᕆᐊᖃᙱᓐᓂᖓᓄᑦ ᓄᓇᓕᐅᑉ ᖃᓂᒋᔭᖓᓂᒃ ᒪᓕᒐᓂᒃ ᓯᖁᒥᑦᑎᓯᒪᓂᖓᓄᑦ ᑕᐃᒪᐃᖃᑦᑕᖅᐸᑦ. “ᐅᕙᒻᓄᑦ ᐅᖃᓚᐅᖅᑐᖅ ᓯᕗᓪᓕᖅᐹᒃᑯᑦ ᐅᕙᒻᓂᒃ ᑕᑯᒐᒥ ᐊᑐᕆᐊᖃᖃᑦᑕᙱᑕᕋᒎᖅ ᐳᑉᓚᓅᖅᑐᖅ ᖁᑭᐅᑎ ᓄᓇᓕᖕᒥ. ᑭᓯᐊᓂ ᖃᐅᖕᒪᑦ ᐊᖑᓇᓱᒋᐊᖅᖢᖓ. ᐊᑖᑕᒐ ᐅᖃᐅᑎᑉᓗᒍ. ᐃᓱᒪᒋᖁᙱᒥᐊᖅᖢᒍ ᑕᐃᒪᐃᒻᒪᒡᒎᖅ ᑕᐃᒻᓇ ᖃᑉᓗᓈᖅ.”
ᑭᓯᐊᓂ ᑕᐃᑲᓂ ᐃᓱᓕᑐᐃᓐᓇᓚᐅᙱᑦᑐᖅ. ᐳᑭᖅᑕᓖᑦ ᐅᖃᓗᒡᕕᐅᓚᐅᖅᑐᑦ ᖃᐅᔨᓴᕆᐊᖅᑐᖁᔭᐅᑉᓗᑎᒃ ᑐᕕᐅᒥᒃ ᐊᒻᒪᓗ ᖁᑭᐅᑎᖓ ᐳᑉᓚᓅᑦᑐᖅ ᒪᕐᕈᐃᖅᑕᖅᖢᑎᒃ ᑕᐃᑲᓂ ᐱᓇᓱᐊᕈᓯᕐᒥ.
ᑐᕕᐅ ᐅᖃᖅᖢᓂ ᖃᐅᔨᒪᐃᓐᓇᓚᐅᖅᑐᕉᖅ ᖁᑭᐅᑎᖓ ᖁᕕᐊᒋᔭᐅᔾᔮᙱᑦᑐᒃᓴᐅᓂᖓᓄᑦ ᓄᓇᓕᖕᒥ. ᑕᐃᒪᐃᒃᑲᓗᐊᖅᑎᓪᓗᒍ ᐳᑭᖅᑕᓕᓕᕆᓕᕐᓂᖏᑦ ᖁᕕᐊᒋᓚᐅᙱᑕᖏᑦ.
“ᖁᒡᕕᐅᓕᓚᐅᖅᑐᖓ ᑭᓯᐊᓂ ᑕᐃᒪᓐᓇ ᓂᙵᐅᒪᓂᖃᖃᑦᑕᕋᒪ,” ᑕᐃᒪᓐᓇ ᐅᖃᖅᖢᓂ.
ᖁᕕᐊᒋᔭᕋᓕ ᐳᑭᖅᑕᓖᑦ ᑐᒡᓕᐊᒍᑦ ᐅᖃᓗᒡᕕᐅᑎᓪᓗᒋᑦ, ᐳᑭᖅᑕᓕᖕᓄᑦ ᐅᖃᐅᑎᔭᐅᓕᓚᐅᕐᒪᑦ ᖁᑭᐅᑎᓂ ᐊᑐᕈᓐᓇᕐᒪᒍ ᐊᕿᒡᒋᖅᓯᐅᕐᓂᒃᑯᑦ ᓄᓇᓕᖕᒥ.
“ᑕᒪᓐᓇ ᑐᓴᕆᐊᙱᑦᑎᐊᓚᐅᖅᑕᕋ. ᐃᓕᓐᓂᐊᖅᑎᑦᑎᔨ ᐅᖃᖅᖢᓂ ᒪᓕᒐᕐᒥᒃ ᓯᖁᒥᑦᑎᓂᐅᖕᒪᒡᒎᖅ ᐊᒻᒪᓗ ᐳᑭᖅᑕᓖᑦ ᐅᕙᒻᓂᒃ ᐅᖃᐅᔾᔨᓕᖅᖢᑎᒃ ᓈᒻᒪᖕᓂᖓᓄᑦ,” ᑕᐃᒪᓐᓇ ᐅᖃᖅᖢᓂ ᑐᕕᐅ.
ᑐᕕᐅ ᐅᖃᖅᖢᓂ ᐊᕿᒡᒋᖅᓯᐅᕈᒪᒃᑲᐅᒐᒥ ᒥᑦᑕᕐᕕᐅᑉ ᖃᓂᒋᔭᖓᓂᒃ ᐅᑉᓛᒃᑯᑦ ᐃᓄᐃᑦ ᑐᐸᖅᑳᖅᑎᓐᓇᒋᑦ.
“ᐱᑕᖅᓯᓇᓱᒍᓐᓇᙱᑦᑐᖓ ᓄᓇᓕᐅᑉ ᐃᓗᐊᓂ. ᐃᓄᖕᓂᒃ ᐅᖓᓯᒐᓱᖃᑦᑕᕋᒪ,” ᑕᐃᒪᓐᓇ ᐅᖃᖅᖢᓂ. “ᐊᖁᑦᑐᓐᓇᙱᓐᓇᒪᓘᓐᓃᑦ. ᓇᒧᓗᒃᑖᖅ ᐱᓱᓗᖃᑦᑕᖅᑐᖓ.”
ᐅᔾᔨᖅᑐᕋᓗᐊᖅᖢᓂ ᑐᕕᐅ, ᐳᑭᖅᑕᓖᑦ ᐅᖃᓗᒡᕕᐅᓚᐅᖅᑳᖅᑎᓪᓗᒋᑦ ᑐᒡᓕᐊᒍᑦ ᐊᓈᓇᐅᔪᖅ Facebook-ᑯᑦ ᑎᑎᕋᓕᓚᐅᖅᑐᖅ ᖃᒪᓂ’ᑐᐊᕐᒥᐅᑦ ᓄᓇᖓᑕ ᐃᑭᐊᖅᑭᕕᖓᒍᑦ ᑐᓴᖅᑎᑦᑎᔪᒪᑉᓗᓂ ᐃᓄᖕᓂᒃ ᖃᓄᐃᓕᐅᖅᑕᐅᓚᐅᕐᒪᖔᑦ ᐸᓂᓂ ᖁᑭᐅᑎᖓᓗ ᐳᑉᓚᓅᖅᑐᖅ ᐊᐅᐸᔮᖅᑐᑯᓗᒃ ᐱᔾᔪᑎᒋᑉᓗᒍ.
“ᖃᓄᐃᓕᒋᐊᕆᐊᖃᓚᐅᕋᒪ ᐊᓈᓇᐅᑉᓗᖓ,” ᑕᐃᒪᓐᓇ ᐅᖃᖅᖢᓂ. “ᒫᓐᓇᓕ ᐃᓱᒪᖅᓱᓕᖅᑐᖅ ᖁᕕᐊᒋᔭᖓ ᐊᑐᖅᖢᒍ ᐃᓱᒪᒋᔭᐅᙱᓪᓗᓂ ᐱᓱᓗᕋᕐᓂᖓᓄᑦ ᖁᑭᐅᓯᔭᖅᖢᓂ.”
ᐊᓈᓇᖓ ᐅᖃᒃᑲᓐᓂᓚᐅᖅᑐᖅ ᓴᕆᒪᓱᑦᑎᐊᕐᓂᕐᒥᓄᑦ ᐸᓂᓂ ᐊᖑᓇᓱᒃᑎᒋᒐᒥᐅᒃ ᐊᒻᒪᓗ ᓂᕿᑖᖅᑎᒋᕙᒃᖢᒍ.
“ᐃᖕᒥᓂᒃ ᓂᕈᐊᖅᖠᖅᓯᒪᖕᒪᑦ ᑕᒪᑐᒥᙵ ᐊᒻᒪᓗ ᐃᑲᔪᖅᑐᑦᑎᐊᖅᑕᕋ ᐱᓇᓱᐊᖃᑦᑕᕐᓂᖓᓄᑦ,” ᑕᐃᒪᓐᓇ ᐅᖃᖅᖢᓂ. “ᒪᒃᑯᒃᑐᖁᑎᕗᑦ ᖃᕆᑕᐅᔭᓕᕆᓗᐊᖃᑦᑕᓕᕐᒪᑕ ᐳᐃᒍᖅᓯᒪᓕᖅᑐᑦ ᓯᕗᓪᓕᕕᓂᑉᑕ ᐃᓅᓯᕆᓚᐅᖅᑕᖏᓐᓂᒃ ᑕᐃᒪᙵᓂᐊᓗᒃ.”
ᑕᐃᒪᐅᒐᓗᐊᖅᑎᓪᓗᒍ ᐃᓕᓐᓂᐊᖅᑎᑦᑎᔨ ᐱᑎᑦᑎᑦᑕᐃᓕᓇᓱᓚᐅᖅᑐᖅ, ᑐᕕᐅ ᐅᖃᖅᖢᓂ ᓄᓇᖅᑲᑎᒥᓄᑦ ᐃᑲᔪᖅᑐᖅᑕᐅᑦᑎᐊᖅᓯᒪᖕᒪᑦ ᐊᖑᓱᖕᓂᕆᕙᒃᑕᖓ.
“ᐊᕐᓇᖅ ᐊᖑᓇᓱᒃᐸᑦ ᐊᒻᒪᓗ ᑕᑯᑎᑦᑎᒃᐸᑦ ᓱᓇᒥᒃ ᐱᑕᖅᓯᓯᒪᓂᖓᓄᑦ Facebook−ᑯᑦ, ᐃᓄᐃᑦ ᐃᑲᔪᖅᑐᐃᑦᑎᐊᓲᑦ ᐊᕐᓇᐅᒃᐸᑦ ᐊᖑᑕᐅᒃᐸᓪᓘᓐᓃᑦ.”