ᕿᓚᒥᐅᔪᒃᑯᑦ, ᓄᕙᒡᔪᐊᕐᓂᖅ-19 ᓘᑭ ᓴᒻᒧᖅᑑᑉ ᐃᓅᓯᖓᓂᒃ ᑎᒍᓯᓚᐅᖅᑐᖅ ᐃᓚᖏᓐᓂᒃ ᑕᑯᒃᑲᓐᓂᔾᔮᕈᓐᓃᖅᖢᑎᒃ ᓘᑭᒥᒃ. 59-ᓂᒃ ᐅᑭᐅᓕᒃ ᐊᕐᕕᐊᕐᒥᐅᑕᖅ ᐃᓅᔪᓐᓃᓚᐅᖅᑐᖅ ᑎᓯᐱᕆ 19-ᒥ, ᒪᕐᕉᒃ ᐱᓇᓱᐊᕈᓰᒃ ᐅᖓᑎᑦᑎᐊᖓᓂᒃ ᓄᕙᒡᔪᐊᕐᓂᖅᑖᕐᓂᕋᖅᑕᐅᒃᑳᖅᑎᓪᓗᒍ.
“ᐊᒃᓱᕈᕐᓇᖅᑐᒻᒪᕆᐊᓘᓚᐅᖅᑐᖅ ᐅᕙᑉᑎᓐᓄᑦ ᑕᑯᔪᒪᓚᐅᕋᓗᐊᕋᑉᑕ ᖃᓄᐃᒍᓐᓃᑦᑎᐊᖅᑎᓪᓗᒍ,” ᑕᐃᒪᓐᓇ ᐅᖃᖅᖢᓂ ᓇᔭᖓ ᓯᓯᓕᐊ ᒪᑲᓚᒻ. “ᐃᓄᑦᑎᐊᕙᒻᒪᕆᐊᓘᓚᐅᖅᑐᖅ ᐃᓅᓯᓗᒃᑖᒥᓂᒃ ... ᐃᓅᓚᐅᖅᑐᖅ ᐃᑲᔪᕈᒪᒃᑲᐅᑉᓗᓂ ᐃᓅᖃᑎᒥᓂᒃ. ᓇᒡᓕᒍᓱᒃᑳᓘᓚᐅᖅᑐᖅ, ᐃᓄᑦᑕᐅᓪᓚᕆᒃᖢᓂᓗ, ᐃᓅᖃᑎᒥᓂᒃ ᐃᖅᑲᖅᑐᐃᔪᓐᓇᓚᐅᙱᑦᑐᖅ. ᐃᑲᔪᒃᑲᐅᓚᐅᖅᑐᖅ, ᖁᖓᔮᒃᑲᐅᑉᓗᓂ ᐊᒻᒪᓗ ᐱᓕᕇᓐᓇᖃᑦᑕᓚᐅᖅᑐᖅ, ᓴᓗᒻᒪᖅᓴᐃᓂᒃᑯᑦ ᐅᕝᕙᓘᓐᓃᑦ ᐃᒡᓗᖓᓂᒃ ᐱᖁᑎᓂᒃ ᓅᑎᕆᕙᒃᖢᓂ. ᓄᓕᐊᕐᒥᓂᒃ ᓇᒡᓕᒍᓱᓪᓚᕆᓚᐅᖅᑐᖅ ᐊᒻᒪᓗ ᐊᖓᔪᒥᓂᒃ/ᓄᑲᕐᒥᓂᒃ, ᓇᔭᖕᒥᓂᒃ, ᐊᐃᑉᐸᖏᓐᓂᒃ, ᖃᖏᐊᖏᓐᓂᒃ ᐊᒻᒪᓗ ᐅᔪᕈᖏᓐᓂᒃ.”
ᒫᑦᓯ 11-ᒥ, ᑲᓇᑕᒥ ᐅᔾᔨᕈᓱᒃᑎᓪᓗᒋᑦ ᓄᕙᒡᔪᐊᕐᓂᖅ−19-ᒥᒃ, ᐊᐅᓚᖁᑎ ᒪᓕᒐᓕᐅᕐᕕᐅᑉ ᓯᓚᑖᓃᑦᑐᖅ ᐊᑦᑎᒃᓯᒋᐊᖅᑕᐅᓯᒪᓚᐅᖅᑐᖅ. ᐃᓗᐊᓂ, ᓄᓇᕗᒥ ᒪᓕᒐᓕᐅᖅᑏᑦ ᓂᐸᐃᓚᐅᐱᓪᓚᓚᐅᖅᑐᑦ ᐃᖅᑲᐅᒪᑉᓗᑎᒃ 1000-ᖏᓐᓃᑦᑐᓂᒃ ᑲᓇᑕᒥᐅᑕᓂᒃ ᓄᕙᒡᔪᐊᕐᓂᒃᑯᑦ ᐃᓅᔪᓐᓃᖅᓯᒪᔪᓂᒃ, ᐃᓚᐅᖃᑕᐅᑉᓗᒍ ᓴᒻᒧᖅᑐᖅ.
ᔮᓐ ᒪᐃᓐ, ᒪᓕᒐᓕᐅᖅᑎ ᐊᕐᕕᐊᑦ ᐅᐊᖕᓇᖓᓄᑦ − ᑎᑭᕋᕐᔪᐊᕐᒧᓪᓗ, ᐃᒃᐱᒍᓱᖕᓂᕋᓚᐅᖅᑐᖅ ᐃᓚᒋᔭᐅᔪᓂᒃ ᕿᒪᒃᑕᐅᓯᒪᔪᓂᒃ − ᓴᒻᒧᖅᑑᑉ ᓄᓕᐊᖓᓂᒃ ᐊᒻᒪᓗ ᓯᑕᒪᐅᔪᓂᒃ ᓇᔭᖏᓐᓂᒃ ᐊᒻᒪᓗ ᒪᕐᕉᖕᓂᒃ ᐊᖓᔪᖏᓐᓂᒃ ᐊᓯᖏᓐᓂᒡᓗ.
“ᒫᓐᓇᐅᔪᖅ, ᐊᒃᓱᕈᕐᓇᖅᑐᒃᑰᕈᑕᐅᔪᑦ ᑕᒡᕘᓇ ᓄᕙᒡᔪᐊᕐᓂᒃᑯᑦ ᓇᓗᓇᙱᑦᑐᑦ, ᐊᒻᒪᓗ ᐃᓱᒪᒋᑉᓗᒍ ᓄᓕᐊᕆᓚᐅᖅᑕᖓ ᒫᓐᓇᐅᔪᖅ, ᑕᐃᔮᓐ ᓴᒻᒧᖅᑐᖅ, ᐃᑲᔪᖅᓯᒪᔪᒻᒪᕆᐊᓗᒃᑕᐅᖅ ᐅᐃᖓ ᓘᑭ ᐃᓅᔪᓐᓃᓚᐅᕋᓗᐊᖅᑎᓪᓗᒍ, ᐊᒻᒪᓗ ᕿᒃᓵᓚᐅᕋᓗᐊᖅᑎᓪᓗᒍ ᐆᒻᒪᑎᖓᓗ ᓈᒻᒪᒍᓐᓃᖅᓯᒪᓚᐅᕋᓗᐊᖅᑎᓪᓗᒍ, ᒪᓕᑦᑎᐊᖏᓐᓇᓚᐅᖅᑐᖅ ᒪᓕᒃᑕᐅᔭᕆᐊᓕᖕᓂᒃ ᐊᒻᒪᓗ ᐃᓅᖃᑎᒥᓂᒃ ᐅᖃᐅᔾᔨᕙᒃᖢᓂ ᒪᓕᑦᑎᐊᖁᔨᑉᓗᓂ ᒪᓕᒃᑕᐅᔭᕆᐊᓕᖕᓂᒃ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᓴᖅᑭᑎᑕᐅᔪᓂᒃ ᐋᓐᓂᐊᖃᕐᓇᙱᑦᑐᓕᕆᔨᕐᔪᐊᕐᒧᑦ,” ᑕᐃᒪᓐᓇ ᐅᖃᖅᖢᓂ ᒪᐃᓐ, ᐅᖃᖅᖢᓂᓗ ᑕᐃᔮᓐ ᓴᒻᒧᖅᑐᖅ ᐊᔭᐅᖅᑐᐃᖃᑦᑕᓚᐅᕐᒪᑦᑕᐅᖅ ᐊᕐᕕᐊᕐᒥᐅᓂᒃ ᓄᓇᕗᒥᐅᓂᒡᓗ ᑲᐱᔭᐅᖁᑉᓗᒋᑦ.
ᒪᑲᓚᒻ ᐅᖃᐅᔾᔨᓚᐅᖅᑐᖅ ᓄᓇᕗᒥ ᑐᓴᒐᒃᓴᓕᕆᔨᒃᑯᓐᓄᑦ ᐃᑲᔫᑎᒃᓴᓂᒃ ᐱᑕᖃᕐᒪᑦ ᐊᓂᖓᑕ ᐃᓅᔪᓐᓃᕐᓂᕆᓚᐅᖅᑕᖓᒍᑦ.
“ᐅᖃᕈᒪᔭᕋ ᐸᓂᖕᒪ ᓂᐅᒥ ᒪᑲᓚᒻ ᐅᖃᐅᓯᕆᓚᐅᖅᑕᖓ Facebook-ᑯᑦ: ‘ᖃᐅᔨᒪᔪᖓ ᐊᖓᒋᓚᐅᖅᑕᕋ ᓘᑭ ᐃᓅᔪᓐᓃᓚᐅᕐᓂᕐᒥᓂᒃ ᓄᕙᒡᔪᐊᕐᓂᒃᑯᑦ ᐃᓕᑦᑎᔾᔪᑕᐅᖁᓇᔭᕐᒪᒍ ᑕᒪᐃᓐᓄᑦ. ᐅᖃᐅᔾᔨᓇᔭᖅᑐᖅ ᑕᒪᐃᓐᓄᑦ ᖃᓄᖅ ᐅᓗᕆᐊᓇᖅᑎᒋᖕᒪᖔᑦ ᓄᕙᒡᔪᐊᕐᓂᖅ ᐊᒻᒪᓗ ᐊᖏᕐᕋᐅᒪᖁᔨᓇᔭᓚᐅᖅᑐᖅ ᐊᑦᑕᓇᖅᑐᒦᑦᑕᐃᓕᖁᓗᒋᑦ,” ᑕᐃᒪᓐᓇ ᐅᖃᖅᖢᓂ ᒪᑲᓚᒻ.
ᒪᐃᓐ ᐅᖃᓚᐅᖅᑐᖅ ᒪᓕᒐᓕᐅᖅᑎᐅᖃᑎᒥᓄᑦ ᐊᕐᓱᕈᕐᓇᖅᑐᒃᑰᕈᑕᐅᔪᖅ ᓄᕙᒡᔪᐊᕐᓂᒃᑯᑦ ᐊᓯᖏᓐᓂᙶᕐᒪᑦ ᑲᒪᒋᔭᐅᔭᕆᐊᓕᖕᓂᒃ.
“ᐱᕚᓪᓕᖅᑎᑦᑎᔾᔮᖅᑰᖏᑦᑐᒍᑦ ᐅᖃᐅᓯᖃᑐᐃᓐᓇᖃᑦᑕᕈᑉᑕ ᓄᕙᒡᔪᐊᕐᓂᕐᒥᒃ ᐋᖅᑭᒋᐊᖅᓯᙱᓪᓗᑕ ᐃᒡᓗᑭᒃᓴᖅᑐᓂᒃ ᑕᒪᓐᓇ ᐊᒃᑐᖅᓯᓯᒪᖕᒪᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ, ᐊᒻᒪᓗ ᐱᕙᓪᓕᐊᔪᓕᕆᓂᒃᑯᑦ, ᒐᕙᒪᖁᑎᒋᔭᖅᐳᑦ ᐊᑐᓕᖅᑎᕆᔭᕆᐊᖃᕐᒪᑕ ᐱᐅᓯᕚᓪᓕᕈᑎᓂᒃ,” ᑕᐃᒪᓐᓇ ᐅᖃᖅᖢᓂ. “ᐱᐅᓯᕚᓪᓕᖅᑎᑦᑎᙱᒃᑯᑉᑕ ᐱᖁᑎᒋᔭᐅᔪᒃᑯᑦ, ᐊᓯᔾᔨᖅᑐᖃᔾᔮᙱᑦᑐᖅ, ᑭᓯᐊᓂ ᐃᖅᑲᐅᒪᔪᒪᓗᐊᓚᐅᖅᑕᕋ (ᓴᒻᒧᖅᑐᖅ) ᑕᒡᕙᓂ ᐅᑉᓗᕐᒥ.”