1000 ᐸᐅᓐ ᐅᖓᑖᓃᑦᑐᑦ ᓂᖀᑦ ᓱᕈᖅᑐᑦ ᑖᒻᓇ ᑕᖅᑭᖅ ᐱᒋᐊᓕᓵᓚᐅᖅᑎᓪᓗᒍ ᖃᒪᓂ’ᑐᐊᕐᒥ ᖁᐊᖅᓯᐅᕝᕕᐊᓗᒃ ᓯᖁᒥᓚᐅᖅᑎᓪᓗᒍ.
“ᑕᒪᓐᓇ ᐊᒃᑐᖅᓯᓂᖃᕐᓂᐊᖅᑐᖅ ᓄᓇᓕᓗᒃᑖᒧᑦ ᐊᒥᓱᑦ ᐃᓄᐃᑦ ᖁᐊᖅᓯᐅᕝᕕᖃᑦᑎᐊᕈᓐᓇᙱᒻᒪᑕ ᐊᖏᕐᕋᒥᓂᒃ,” ᑕᐃᒪᓐᓇ ᐅᖃᖅᖢᓂ ᕕᓕᐱ ᐳᑐᒥᕋᖅᑐᖅ, ᐃᒃᓯᕙᐅᑕᕆᔭᐅᔪᖅ ᐊᖑᓇᓱᒃᑎᒃᑯᑦ ᑲᑎᒪᔨᖏᓐᓄᑦ.
ᐊᔾᔨ ᕕᓕᐱ ᐳᑐᒥᕋᖅᑐᕐᒥᙶᖅᑐᖅ
“ᐊᑐᒐᒃᓴᖅᑕᖃᔮᙱᑦᑐᖅ ᐊᓯᐊᓂᒃ ᒫᓐᓇᐅᔪᖅ.”
ᖁᐊᖅᓯᐅᕝᕕᐊᓗᒃ ᓯᖁᒥᓚᐅᖅᓯᒪᔪᖅ ᔪᓚᐃ 16 ᐱᓇᓱᐊᕈᓯᖓᓂᒃ. ᓂᖀᑦ ᐅᖁᒪᐃᓐᓂᖅᓯᐅᖅᑕᐅᓚᐅᙱᒃᑲᓗᐊᖅᑎᓪᓗᒋᑦ, ᓇᓚᐅᑦᑖᖅᓯᒪᔪᒃᑯᑦ ᐅᑭᐅᖑᓚᐅᖅᑐᓂᒃ ᐳᑐᒥᕋᖅᑐᖅ ᐅᒃᐱᕈᓱᒃᑐᖅ ᐃᒻᒪᖄ 5,000 ᐸᐃᙱᓐᓃᓐᓇᓱᒋᑉᓗᒋᑦ ᓂᕿᑦ ᓱᕈᖅᑐᑦ.
“ᓂᒡᓕᓇᙱᓗᐊᓚᐅᕐᒪᑦ. ᒪᑐᔭᕆᐊᖃᓕᓚᐅᕋᑉᑎᒍᑦ. ᓴᓗᒻᒪᖅᓴᖅᑕᐅᔭᕆᐊᖃᖅᖢᓂᓗ,” ᑕᐃᒪᓐᓇ ᐅᖃᖅᖢᓂ
“ᐅᖃᓗᑲᑕᒋᐊᖃᓕᓚᐅᖅᑐᒍᑦ ᐃᓄᖕᓄᑦ ᓂᕿᖏᓐᓂᒃ ᐊᐃᒃᖠᖁᑉᓗᒋᑦ ᑭᓯᐊᓂ ᓱᕈᐊᓘᓕᐊᓂᓚᐅᖅᑐᑦ.”
ᐳᑐᒥᕋᖅᑐᖅ ᐅᖃᖅᖢᓂ ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᐅᔾᔨᕈᓱᓚᐅᕐᒪᑕ ᖁᐊᖅᓯᐅᕝᕕᐊᓗᒃ ᓈᒻᒪᙱᓕᕐᓂᖓᓄᑦ ᐅᐱᕐᖔᖅ.
“ᓯᕗᓪᓕᖅᐹᖑᙱᒻᒪᑦ ᐃᖢᐊᖏᓕᐅᕈᑎᖃᕐᓂᖅ ᖁᐊᖅᓯᐅᕝᕕᐊᓗᖕᒥᒃ. ᑲᒪᒋᔭᐅᑦᑎᐊᕐᓂᖅᓴᐅᔭᕆᐊᖃᓚᐅᖅᑑᒐᓗᐊᖅ.”
ᓄᓇᓕᖕᒥ ᖁᐊᖅᓯᐅᕝᕕᐊᓕᒃ ᑮᓇᐅᔭᓕᖅᑐᖅᑕᐅᓯᒪᖃᑦᑕᕐᒪᑦ ᓄᓇᓕᖕᓂ ᒐᕙᒪᒃᑯᓐᓂᓗ ᐱᔨᑦᓯᕋᖅᑎᒃᑯᓐᓄᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᑲᒪᒋᔭᐅᕙᒃᖢᓂ ᐊᖑᓇᓱᒃᑎᒃᑯᑦ ᑲᑎᒪᔨᖏᓐᓄᑦ.
ᑭᕙᓪᓕᕐᒥ ᓂᐱᖓᓄᑦ ᖃᕆᑕᐅᔭᒃᑯᑦ ᑎᑎᕋᖅᓯᒪᔪᒃᑯᑦ, ᒪᔅᑕᕙ ᐃᐅᕆᒃ, ᑐᓴᐅᒪᖃᑦᑕᐅᑎᓕᕆᔨ ᒐᕙᒪᒃᑯᓐᓄᑦ, ᐅᖃᓚᐅᖅᑐᖅ ᖁᐊᖅᓯᐅᕝᕕᐊᓗᒎᖅ ᓈᒻᒪᒍᓐᓃᓚᐅᖅᑐᖅ ᐃᑯᒪᒃᑯᑦ, ᐱᖓᓱᑦ ᓯᑕᒪᐅᔪᓂᒃ ᐳᑉᓚᒃᓴᐅᑏᑦ ᓈᒻᒪᒍᓐᓃᓚᐅᕐᒪᑕ.
“ᐋᖅᑭᒃᓱᕋᓱᒃᖢᒋᑦ ᐅᐃᒪᓇᖅᓯᓚᐅᖅᑐᑦ ᓄᕙᒡᔪᐊᕐᓂᖅ-19 ᐱᔾᔪᑎᒋᑉᓗᒍ ᐃᓚᒃᓴᖏᑦ ᑎᑭᑦᑐᓐᓇᐃᓪᓕᖃᑦᑕᓚᐅᕐᒪᑕ ᐊᒻᒪᓗ ᓴᓇᔨᑦᑎᐊᕙᐅᓇᔭᖅᑐᑦ ᑎᑭᑦᑐᓐᓇᐃᓪᓕᑉᓗᑎᒃ ᓄᓇᕗᒧᑦ,” ᑕᐃᒪᓐᓇ ᐅᖃᖅᖢᓂ.
ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᓴᓗᒻᒪᖅᓴᐃᒋᐊᖃᓚᐅᖅᑐᑦ ᓱᕈᖅᑐᓂᒃ ᓂ
ᕿᓂᒃ ᐃᒋᑦᑎᓗᑎᒃ ᖁᐊᖅᓯᐅᕝᕕᐊᓗᖕᒦᑦᑐᓂᒃ. ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᓴᓇᑎᑦᑎᓕᓚᐅᖅᑐᑦ ᒪᕐᕈᖕᓂᒃ ᓄᓇᖅᑲᑎᒥᓂᒃ ᐃᒋᐅᖅᑲᐃᑎᑦᑎᑉᓗᑎᒃ ᓂᕿᓂᒃ ᓱᕈᔪᓂᒃ ᐱᖓᓱᓂᒃ ᐅᑉᓗᓂᒃ.
“ᓱᓇᓂᒃ ᐱᑕᖃᕈᓐᓃᖅᖢᓂ ᐊᓕᐊᓇᐃᙱᒻᒪᑦ. ᑕᐃᒪᐃᒻᒪᑦ ᐱᑕᖃᕈᓐᓃᖅᓯᒪᔪᒍᑦ ᐱᒻᒪᕆᐊᓗᖕᓂᒃ,” ᑕᐃᒪᓐᓇ ᐅᖃᖅᖢᓂ Hᐊᒻᓚᒃᑯᑦ ᑎᑎᕋᕐᕕᖓᓂᒃ ᑐᑭᒧᐊᒃᑎᑦᑎᔨ ᓯᐅᑕᓐ ᑐᐊᕆ.
ᑐᐊᕆ ᐅᖃᖅᖢᓂ ᓄᑕᐅᙱᑦᑐᖅ ᖁᐊᖅᓯᐅᕝᕕᐊᓗᒃ ᐊᑐᖅᑕᐅᔪᓐᓃᕐᓗᓂ ᓄᑖᒥᒃ ᐱᑖᕐᓂᐊᓚᐅᖅᑐᑦ ᐅᑭᐅᖅ. ᒫᓐᓇᐅᔪᖅ ᓄᑖᒥᒃ ᑎᑭᓴᐃᓯᒪᓕᖅᑐᑦ ᐊᒻᒪᓗ ᑎᑭᓐᓇᔭᖅᑐᖅ ᐅᑭᐊᒃᓵᖅ ᐅᒥᐊᕐᔪᐊᒃᑯᑦ. ᑭᓯᐊᓂᓕ, ᐅᖃᖅᖢᓂ ᒐᕙᒪᒃᑯᑦ ᓄᓇᓕᖕᓂᒃ ᒐᕙᒪᒃᑯᓐᓂᓗ ᐱᔨᑦᓯᕋᖅᑎᒃᑯᖏᑦ ᐋᖅᑭᒃᓱᐃᔭᕆᐊᖃᕐᓂᐊᖅᑐᑦ ᓯᖁᒥᓚᐅᖅᑐᒥᒃ ᑕᐃᒻᓇ ᓄᑖᖅ ᑎᑭᖅᑳᖅᑎᓐᓇᒍ.
“ᓄᓇᖅᑲᑎᒌᑦ ᐃᓂᖃᖅᑎᑕᐅᔭᕆᐊᖃᕐᒪᑕ ᓂᕿᖏᑦ ᖁᐊᖅᓯᖅᑕᐅᔪᓐᓇᖃᑦᑕᖁᑉᓗᒋᑦ ᐃᒡᓗᖏᓐᓂᒃ ᐃᓂᖃᙱᓗᐊᕐᒪᑕ,” ᑕᐃᒪᓐᓇ ᐅᖃᖅᖢᓂ.
ᑐᐊᕆ ᐃᓕᑕᖅᓯᓯᒪᔪᖅ ᓄᓇᓕᖕᓂ ᒐᕙᒪᒃᑯᓐᓂᓗ ᐱᔨᑦᓯᕋᖅᑎᒃᑯᑦ ᑎᑭᑎᑦᑎᓇᓱᖕᓂᖏᓐᓄᑦ ᐋᖅᑭᒃᓱᐃᓇᔭᖅᑐᒥᒃ ᑭᓯᐊᓂ ᐅᑕᖅᑭᒃᑲᓐᓂᕆᐊᖃᕋᔭᖅᑐᒃᓴᐅᔪᑦ ᐱᓇᓱᐊᕈᓯᒃᑲᓐᓂᕐᒥᒃ.
“ᓂᕆᐅᒃᑐᒍᑦ ᐊᔪᕈᓐᓃᒃᑲᓐᓂᕐᓂᐊᕐᓂᖓᓄᑦ. ᖃᖓᓪᓚᑦᑖᖑᓇᔭᕐᒪᖔᑦ ᓇᓗᓇᖅᑐᖅ.”