ᔫᒪᓂᒥ ᑕᕐᕆ.ᓕᐅᖅᑏᑦ ᐊᕐᕕᐊᓃᑉᐳᑦ ᐱᓕᕆᓂᕐᒧᑦ ᐱᓪᓚᕆᐅᔮᖅᑐᒥ (ᐱᓪᓚᕆᐅᔮᖅᑐᒥ) ᐊᑐᖅᑕᐅᓪᓚᕆᒃᓯᒪᔪᒥᒃ ᑕᕐᕆᔮᕈᑎᖕᒥ ᑲᑎᙵᓂᐅᔪᒥ, ᒪᓐᓂᑦ, ᐅᔭᖅᑲᑦ, ᐃᓄᐃᑦ.
ᑕᕐᕆ.ᓕᐅᖅᑏᑦ ᐃᓚᖃᖅᐳᑦ ᑐᑭᒧᐊᒃᑎᑦᑎᔨᒥ ᕕᓕᑉ ᓴᐃᕗᕐ, ᑕᕐᕆᔮᒃᓴᓕᐅᕆᔨ ᕙᐃᐱᐊᓐ ᒃᓚᐃᓐ ᐊᒻᒪ ᐃᓱᒪᑐᔪᒥ ᑐᑭᒧᐊᒃᑎᑦᑎᔨ ᒥ ᓚᕕᓐ ᕼᐊᑉᓄᕐᒥ.
ᓴᐃᕗᕐ ᐅᖃᓚᐅᖅᐳᖅ ᐱᓪᓚᕆᐅᔮᖅᑐᒥ ᑲᑎᙵᓂᐅᔪᒥ ᐃᓚᖃᕐᓂᐊᖅᐳᖅ ᑕᓪᓕᒪᓂ ᐊᔾᔨᒌᙱᑦᑐᓂ ᑕᕐᕆᔭᓕᐊᖑᔪᓂ ᑲᑎᙵᓂᖃᖅᑐᓂ ᐅᖃᐅᓯᐅᓂᐅᔪᒥ ᐊᒻᒪ ᐅᓂᒃᑳᖅᑐᐊᓂ ᒪᒃᑯᒃᑐᓄᑦ ᐊᕐᕕᐊᓂ.
“ᐱᓕᕆᓇᓱᐊᓪᓚᕆᒃᑕᑦᑎᓐᓂ ᓇᓂᓯᓂᕐᒧᑦ ᑭᓖᖃᙱᓪᓚᕆᒃᑐᓂ ᐅᓂᒃᑳᓂᑦ ᒪᒃᑯᒃᑐᓂ ᐊᕐᕕᐊᓂ ᑐᓴᕈᒥᓇᑦᑎᐊᖅᑐᓂ ᐊᒻᒪ ᓂᐱᑖᖅᑎᓪᓗᒋᑦ,” ᐅᖃᓚᐅᖅᐳᖅ ᓴᐃᕗᕐ.
ᑐᑭᒧᐊᒃᑎᑦᑎᔨ ᐅᖃᓚᐅᖅᐳᖅ ᐊᑐᓂ ᐅᓂᒃᑳᖅᑕᐅᔪᖅ ᓇᖕᒥᓂᖓᓂ ᑐᕌᖅᑎᑦᑎᓂᖃᖅᐳᖅ ᐊᒻᒪ ᐆᒻᒪᕆᒃᑐᒥ ᒪᓕᒃᑐᒥ ᐃᓅᓯᕆᔭᐅᔪᒥ ᐃᓄᖕᒧᑦ ᓵᙵᔭᖓᓐᓂ, ᑭᓯᐊᓂ ᑕᒪᕐᒥᒃ ᐃᓚᒋᔭᐅᔪᐃᓐᓇᐅᕗᖅ ᐊᑕᐅᓯᕐᒥ ᑕᑯᒃᓴᐅᑎᑦᑎᓂᐅᔪᒥ ᑲᑎᙵᔪᒥ ᐊᒻᒪ, ᐃᒻᒥᓄᑦ, ᑕᑯᔪᒥᒋᔭᒥᓂ ᑕᓪᓕᒪᐅᔪᓂ ᐊᔾᔨᒌᙱᑦᑐᓂ ᐃᓚᒋᔭᐅᔪᓂ ᐊᑕᐅᓯᙳᖅᑎᑕᐅᓂᖓᓂ ᑲᑎᙵᓗᑎᒃ.
“ᐱᓕᕇᓐᓇᕆᕗᒍᑦ ᐊᑐᖅᑕᐅᓪᓚᕆᒃᓯᒪᔪᒥᒃ ᑕᕐᕆᔮᕈᑎᖕᒥ ᐱᓕᕆᕙᓪᓕᐊᓕᓚᐅᖅᑕᓐᓂ ᓯᕗᓂᐊᓂ ᐅᕙᓃᑎᓪᓗᖓ 2017−ᒥ, ᐊᒻᒪ ᐱᓕᕆᖃᑎᖃᖅᐳᒍᑦ ᒍᐊᑦ ᐱᓗᑦᒥ ᐊᒻᒪᓗ (ᐊᕐᕕᐊᓂ) ᑕᕐᕆᔭᓕᐅᕐᓂᕐᒧᑦ ᑲᑐᔾᔨᖃᑎᒌᖑᔪᓄᑦ ᓴᖅᑭᑎᑦᑎᓂᕐᒧᑦ ᐊᑕᐅᓯᕐᒥ ᓇᐃᑦᑐᒥ ᑕᕐᕆᔭᓕᐊᖑᔪᒥ ᐃᓕᓐᓂᐊᖅᑎᓂᑦ ᓴᖅᑭᑎᑦᑎᖃᑕᐅᓪᓗᑎᒃ ᑎᑭᐅᑎᓂᕐᒧᑦ ᐃᓱᒪᑐᔪᒥ−ᐊᒻᒪ−ᐱᔭᕆᑐᔪᓂ ᑐᕌᖅᑎᑕᐅᓂᐅᔪᒥ ᑕᕐᕆᔭᓕᐊᖑᔪᒧᑦ.
“ᓂᕆᐅᒃᐳᒍᑦ ᑕᕐᕆᔭᓕᐅᖅᐸᓪᓕᐊᓕᕐᓂᐊᕐᓂᑦᑎᓐᓂ ᑕᒧᑐᒪᓂ ᐱᓇᓱᐊᕈᓯᐅᑉ ᓄᙳᐊᓂ.”
ᓴᐃᕗᕐ ᐅᖃᓚᐅᖅᐳᖅ ᐱᓪᓚᕆᐅᔮᖅᑐᒥ ᑲᑎᙵᓂᐅᔪᒥ ᐃᖏᕐᕋᓂᖃᕐᓂᖓᓂ ᐊᕐᕕᐊᖅᑎᒍᑦ ᑎᑭᐅᑎᓂᕐᒧᑦ ᓄᓇᓕᖕᓄᑦ ᐃᒻᒥᓂᒃ ᓇᓗᓇᐃᒃᑯᑕᙳᕐᓗᓂ ᐊᑐᖅᑕᐅᓪᓚᕆᒃᓯᒪᔪᒥᒃ ᑕᕐᕆᔮᕈᑎᖕᒥ.
ᐅᖃᓚᐅᖅᐳᖅ ᖁᙱᐊᖅᑎᓂᑦ ᑭᓱᓕᒫᑦᑎᐊᓂ ᐅᔾᔨᕈᓱᖁᕙᖏᑦ ᑕᑯᔭᒥᓂᑦ ᑲᑎᙵᓂᐅᔪᖅ ᐱᔾᔪᑎᖃᕐᓂᖓᓂ ᐃᓅᓯᐅᔪᒥ ᐅᕙᓂ ᓄᓇᕋᓛᖑᔪᒥ ᓂᒋᕐᒥ ᑭᕙᓪᓕᕐᒥ ᐊᕕᒃᑐᖅᓯᒪᓂᐅᔪᒥ.
“ᑕᑯᔪᒪᑦᑎᐊᖅᐳᒍᑦ ᐊᑐᕋᓱᐊᕐᓂᕐᒧᑦ ᐅᖃᓪᓚᖕᓂᐅᔪᓂ ᐃᓚᖏᓐᓂ ᐃᓄᑐᖃᕐᓂ ᑐᓂᓯᓲᖑᓂᖏᓐᓂ ᓈᓚᐅᑎᒃᑯᑦ – ᖃᓄᐃᓚᐅᕐᓂᖓᓂ ᐱᕈᖅᓴᓂᕐᒧᑦ ᑕᐃᔅᓱᒪᓂᐅᓚᐅᖅᑐᒥ ᓱᕈᓯᐅᑎᓪᓗᒋᑦ – ᐊᐅᐸᖅᑐᒥ ᐃᕙᓘᓪᓗᑎᒃ ᐅᖃᐅᔾᔨᖅᑐᐃᓂᕐᒧᑦ ᐊᒻᒪ ᐃᓕᓯᓂᖏᓐᓂ ᑎᑎᕋᖅᑕᐅᓯᒪᓂᐅᔪᒥ ᐅᓂᒃᑳᖑᔪᓂ ᒪᒃᑯᒃᑐᓂ ᐱᕈᖅᓴᔪᓂ ᒫᓐᓇᐅᔪᒥ, ᐊᒻᒪ ᑖᒃᑯᐊ ᒪᕐᕉᒃ ᑲᑎᙵᓂᖃᑦᑎᐊᕋᓱᒋᕙᒃᑲ.
ᑲᑎᙵᓂᐅᔪᓂ ᓄᓇᓕᖕᓂ ᖃᐅᔨᓴᖅᑎᐅᔪᓂᑦ – ᐃᓚᖃᖅᑐᒥ ᓲᓕ ᑕᕐᕋᓕᒃ, ᔫ ᖃᕆᑕᖅ ᐊᒻᒪ ᖃᔅᓯᐊᕐᔪᒃᑲᓐᓂᕐᓂ ᐊᓯᖏᓐᓂ – ᐱᓕᕆᓯᒪᕐᔪᐊᖅᐳᑦ IQ−ᒥ (ᐃᓄᐃᑦ ᖃᐅᔨᒪᔭᑐᖃᖏᓐᓂ), ᐊᒻᒪ ᐊᑕᐅᓯᐅᔪᖅ ᐱᒻᒪᕆᐅᖃᑕᐅᓛᖑᔪᒥ ᐃᓗᐊᓂ ᑕᐅᑐᒃᑕᑐᐊᖃᑲᐃᓐᓇᕐᓂᐅᔪᒥ ᐱᓕᕆᓂᖏᓐᓂ ᖃᓄᐃᓕᐅᕆᐊᖃᕐᓂᖏᓐᓂ ᐱᕈᖅᓴᐃᓂᕐᒥ ᐱᔪᓐᓇᑦᑎᐊᖅᑐᒥ ᐃᓄᖕᒥᑦ.
ᑕᐃᒎᓯᖓ ᑲᑎᙵᓂᐅᔪᒥ (ᒪᓐᓂᑦ, ᐅᔭᖅᑲᑦ, ᐃᓄᐃᑦ) ᓇᓗᓇᐃᖅᓯᓂᐅᕗᖅ ᐅᐱᒋᔭᐅᓂᖓᓐᓄᑦ ᑖᔅᓱᒧᖓ.
“ᐃᓄᑐᖃᖅ ᕉᑕ ᖃᕆᑕᖅ ᐅᖃᖅᓯᒪᕗᖅ, ‘ᐱᕈᖅᓴᐃᔪᓐᓇᖅᐳᑎᑦ ᓱᕈᓯᕐᓂ ᓱᕋᒃᓴᕋᐃᑦᑑᓗᑎᒃ ᒪᓐᓂᒃᑎᑐᑦ, ᑎᓯᓗᓂ ᐅᔭᖅᑲᑎᑐᑦ ᐅᕝᕙᓘᓐᓃᑦ ᐃᓄᓪᓚᑦᑖᖑᓗᑎᒃ,’ – ᑕᒪᓐᓇ ᑎᑎᕋᖅᑕᐅᓯᒪᓂᐅᔪᖅ ᐃᓕᓇᓱᐊᖅᑕᑦᑎᓐᓂ ᐅᕙᓂ ᑲᑎᙵᓂᐅᔪᒥ, ᑕᐃᒪᓐᓇ ᕿᓃᓐᓇᐅᔭᖅᐳᒍᑦ ᑲᑎᙵᓂᐅᔪᓂ ᐃᓄᑐᖃᕐᓂ ᖃᐅᔨᒪᔭᖏᓐᓂ ᓱᕈᓯᕐᓄᑦ ᐱᕈᖅᓴᐃᓂᐅᔪᒥ ᐊᒻᒪ ᖃᓄᖅ ᒪᒃᑯᒃᑐᐃᑦ ᐱᕈᖅᓴᓂᖏᓐᓂ ᐊᒻᒪ ᓇᓂᓯᓂᖏᓐᓂ ᐃᓂᒋᔭᖓᓐᓂ ᐅᕙᓂ ᓄᓇᕐᔪᐊᖑᔪᒥ ᐅᓪᓗᒥ,” ᐅᖃᓚᐅᖅᐳᖅ ᓴᐃᕗᕐ.
ᑕᕐᕆᔭᓕᐅᕆᔨᐅᔪᑦ ᑭᓱᓕᒫᓂ ᐅᓂᒃᑳᕆᓇᓱᐊᙱᑦᑐᑦ ᐅᕝᕙᓘᓐᓃᑦ ᐅᖃᐅᓯᖃᕐᓂᕐᒥ ᑕᐃᔅᓱᒪᓂᐅᓚᐅᖅᑐᒥ ᐱᒋᙱᑕᒥᓂᑦ, ᐅᖃᓚᐅᖅᐳᖅ.
ᑭᓯᐊᓂᖔᖅ, ᑐᓂᓯᓂᖃᕐᓂᐊᖅᐳᑦ ᑲᑎᙵᓂᐅᔪᒥ ᐃᒻᒥᒃᑰᖅᑐᓂ ᐅᓂᒃᑳᓕᐊᓂᑦ.
“ᓴᙱᓂᐅᔪᖅ ᐆᒪᙵᑦ ᐱᓕᕆᓂᐅᔪᒥ ᐅᓂᒃᑳᖑᔪᓐᓇᖅᐳᑦ ᖁᙱᐊᖅᑎᐅᔪᓂ ᑕᑯᔪᒥᓇᓛᕆᔭᖏᓐᓂᑦ, ᐊᒻᒪᓗ ᐃᓚᐅᖃᑕᐅᔪᓐᓇᕐᓂᖏᓐᓂ ᐊᔾᔨᒌᙱᕈᓘᔭᖅᑐᓂ ᐃᒻᒥᒃᑰᖅᑐᓂ ᐅᓂᒃᑳᖑᔪᓂ ᒪᒃᑯᒃᑐᓂ ᐊᕐᕕᐊᓂᑦ ᑕᐅᑐᙳᐊᖅᑎᑦᑎᓂᐊᖅᑐᒥ ᖃᓄᖅ ᐃᒃᐱᖕᓇᕐᓂᖓᓂ ᐱᕈᖅᓴᓂᕐᒥ ᐅᕙᓂ.
ᐱᓛᑦ ᐅᖃᓚᐅᖅᐳᖅ ᐃᓚᒋᔭᐅᓂᐅᔪᖅ ᐊᕐᕕᐊᓂ ᑕᕐᕆᔭᓕᐅᕐᓂᕐᒧᑦ ᑲᑐᔾᔨᖃᑎᒌᖑᔪᓄᑦ ᐊᓯᔾᔩᓐᓇᐅᔭᖅᐳᖅ ᐊᕐᕌᒍᒥ ᐊᕐᕌᒍᒧᑦ ᑕᐃᒪᓐᓇ ᖃᐅᔨᒪᔪᓐᓇᙱᓚᖅ ᖃᔅᓯᓂ ᐃᓚᒋᔭᐅᔪᓂ ᓴᖅᑭᓐᓂᐊᕐᓂᖏᓐᓂ ᑲᑎᒪᓂᕐᒧᑦ ᖃᖓᑐᐃᓐᓇᖅ ᐅᓐᓅᔪᒥ.
ᐅᖃᓚᐅᖅᐳᖅ ᐃᓱᒪᓕᐅᕆᓚᐅᖅᐳᖅ ᐱᒋᐊᔾᔮᙱᓐᓂᖓᓂ ᑭᓱᑐᐃᓐᓇᒥ ᑲᑐᔾᔨᖃᑎᒌᖑᔪᓄᑦ ᑕᒪᑐᒪᓂ ᐱᓕᕆᓂᐅᔪᒧᑦ ᑭᓯᐊᓂ ᓴᐃᕗᕐ ᑎᑭᒃᑯᓂ ᐊᒻᒪ ᐃᓱᒪᓕᐊᖑᓂᐅᔪᖅ ᑕᑯᒃᓴᐅᓂᖃᓚᐅᖅᐳᖅ ᑕᒪᙱᓐᓂᖓᓂ.
“ᓴᖅᑭᑦᑐᖃᑦᑎᐊᓚᐅᖅᐳᖅ 20-ᓂ-25−ᓄᑦ ᐃᓄᖕᓂ ᓯᕗᓪᓕᖅᐹᒥ ᑲᑎᒪᓂᐅᔪᒥ ᐃᓕᓐᓂᐊᕐᕕᓂᑦ ᐊᒻᒪ ᓄᓇᓕᐅᔪᒥ ᖃᐅᔨᓇᓱᐊᖅᑐᓂ ᑕᒪᓐᓇ ᑭᓱᓕᕆᓂᖓᓐᓂ,” ᐅᖃᓚᐅᖅᐳᖅ ᐱᓛᑦ. “ᐊᖏᔪᐊᓗᖕᒥ ᑕᓱᒃᑲᓐᓂᕐᓂᖃᖅᐸᒌᖅᐳᖅ ᐊᒻᒪ ᐱᔾᔪᑎᖃᕋᓱᒋᕙᕋ ᕕᓕᑉ ᐅᕙᓃᓚᐅᖅᓯᒪᖕᒪᑦ ᓯᕗᓂᐊᓂ ᐊᒻᒪ ᐱᖃᓐᓇᕆᔭᓕᐅᖅᖢᓂ ᐊᒻᒪ ᐱᓕᕆᖃᑎᖃᕐᓂᐅᔪᒥ, ᐊᒻᒪ ᓱᓕᓂᐅᔪᖅ ᖁᕝᕙᖅᓴᒃᑲᓐᓂᓚᐅᕐᓂᓐᓂ ᐃᓕᓐᓂᐊᕐᕕᐅᑉ ᐃᓗᐊᓂ ᐊᒻᒪ ᓄᓇᓕᖕᓂ ᓴᖅᑭᑎᑦᑎᓂᕐᒧᑦ ᐱᓕᕆᔪᒪᓂᖃᕐᓂᕐᒧᑦ ᑎᑭᓚᐅᖅᑳᕋᓂ.
“ᑕᒪᓐᓇ ᐱᒻᒪᕆᐊᓘᕗᖅ. ᐊᑭᓖᔪᓐᓇᕋᔭᙱᑉᐳᒍᑦ ᑕᐃᒪᐃᑦᑐᒥ ᑕᑯᒃᓴᐅᑎᑦᑎᓂᐅᔪᒥ, ᐱᓕᒻᒪᒃᓴᕐᓂᕐᒧᑦ ᐊᒻᒪ ᐱᔪᒪᓂᖃᕐᓂᐅᔪᒥ ᖃᓄᐃᓕᐅᕐᓂᑦᑎᓐᓂ ᐅᕙᓂ, ᕼᐋᒻᓚᕋᓛᕗᑦ, ᐊᒻᒪ ᓱᕈᓰᑦ ᐱᓕᕆᖃᑎᒋᕙᒃᑕᓐᓂ ᖃᐅᑕᒫᑦᑎᐊᖅ.
“ᐅᖃᐅᓯᕐᒧᑦ ᐃᓕᔪᓐᓇᙱᓚᕋ ᖃᓄᖅ ᖁᔭᓕᕐᔪᐊᕐᓂᓐᓂ ᐊᒻᒪ ᐱᕕᒃᓴᖃᕐᓂᓐᓂ ᐃᒃᐱᒋᔭᓐᓂ ᕕᓕᑉ ᐃᓚᐅᖃᑕᐅᓕᕐᓂᖓᓂ ᐅᕙᓂ ᑲᑎᙵᓂᐅᔪᒧᑦ, ᐊᒻᒪᓗ ᐱᔪᒪᑦᑎᐊᖅᖢᓂ, ᖁᕕᐊᖦᖢᓂ ᐊᒻᒪ ᐊᓕᐊᓇᐃᒋᔭᖃᑦᑎᐊᖅᖢᓂ ᖃᐅᔨᓇᓱᐊᕐᓂᕐᒧᑦ ᐃᓅᓯᐅᔪᒥ ᐅᕙᓂ, ᑎᑎᕋᖅᐸᓪᓕᐊᓂᕐᒧᑦ, ᐊᒻᒪ ᐊᓯᖏᓐᓄᑦ ᑐᓂᓯᓂᖓᓂ ᖃᐅᔨᒪᓂᖓᓂ ᐃᑲᔪᕐᓂᕐᒧᑦ ᐱᓕᒻᒪᒃᓴᕐᓂᕐᒧᑦ ᕿᑐᙵᑦᑎᓐᓄᑦ.”
ᐱᓛᑦ ᐅᖃᓚᐅᖅᐳᖅ ᑕᕐᕆᔭᓕᐅᖅᑎᐅᔪᑦ ᓇᒃᓴᖅᓯᒪᒋᕗᑦ ᓄᑖᓂ ᓄᑖᙳᖅᐸᓪᓕᐅᓂᐅᔪᓂ ᐊᓕᐊᓇᐃᑦᑐᒻᒪᕆᐅᓪᓗᓂ.
ᐅᖃᓚᐅᖅᐳᖅ ᑲᑐᔾᔨᖃᑎᒌᖑᔪᑦ ᐱᓕᕆᓯᒪᕐᔪᐊᖅᐳᑦ ᒥᑭᑦᑑᓂ ᑕᕐᕆᔭᓕᐊᖑᔪᓂ ᑕᐃᔅᓱᒪᓂᒃᑲᓐᓂᖅ, ᐊᒻᒪ ᑐᓴᐅᒪᔭᐅᐸᓗᓕᖅᖢᑎᒃ ᑕᒫᓂ ᐊᒻᒪ ᑕᐅᕙᓂ, ᑭᓯᐊᓂ ᓅᑉᐸᓪᓕᐊᓕᖅᐳᑦ ᐱᓪᓚᕆᐅᔮᖅᑐᒥ, ᐱᔪᒪᓂᕐᔪᐊᖑᓯᒪᔪᒥ ᓄᑕᖅᑲᓄᑦ ᓴᖅᑭᖃᑦᑕᖅᓯᒪᔪᓄᑦ.
“ᓇᒃᓴᓚᐅᖅᐳᑦ Google goggles−ᓂ ᐃᒡᒐᓂᓪᓘᓐᓃᑦ ᓂᐅᕕᐊᒃᓴᐅᙱᑐᓂᓘᓐᓃᑦ ᒫᓐᓇᐅᔪᒥ, ᐊᒻᒪ ᐱᓪᓚᕆᐅᓂᐅᔪᖅ ᑕᑯᔭᕐᓂᑦ ᐅᕙᓂ ᑲᒪᓇᕐᔪᐊᖅᐳᖅ,” ᐅᖃᓚᐅᖅᐳᖅ ᐱᓛᑦ. “ᓱᕈᓯᓕᒫᑦ ᐊᑐᕈᓐᓇᖅᓯᓚᐅᖅᐳᑦ ᐊᒻᒪ ᐃᒃᐱᒍᓱᖕᓂᖃᖅᖢᑎᒃ ᖃᓄᐃᓕᖓᓂᐊᕐᓂᖓᓂ ᑕᕐᕆᔭᓕᐊᖑᓪᓚᕆᒃᑐᒥ ᑕᑯᒃᓴᐅᓂᐊᕐᓂᖓᓂ ᐃᓗᐊᓂ ᐃᒡᒐᐅᔪᓂᑦ.
“ᑕᐃᒫᒃ ᓄᑖᖏᓐᓇᐅᕗᖅ ᐊᒻᒪ ᖁᕕᐊᓇᖅᖢᓂ ᐊᒻᒪ ᖁᔭᓕᕐᔪᐊᖅᓯᒪᕗᒍᑦ ᐆᒪᙵᑦ ᐱᕕᒃᓴᖃᕐᓂᐅᔪᒥᑦ.”