ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓴᓇᔨᖏᑦ ᑲᖏᖅᖠᓂᕐᒥ ᐃᓱᒪᙱᓈᖅᑕᐅᑉᓗᑎᒃ ᑐᓂᔭᐅᓚᐅᖅᑐᑦ ᓂᕆᔭᒃᓴᓂᒃ ᐊᑭᖃᙱᑦᑐᓂᒃ ᓴᓇᕝᕕᖏᓐᓄᑦ ᐊᔾᔭᖅᑐᕐᕕᐅᑉᓗᑎᒃ ᖁᔭᓐᓇᒦᕈᒪᑉᓗᒋᑦ ᐱᓕᕆᕐᔪᐊᖅᓯᒪᓂᖏᓐᓄᑦ ᓄᕙᒡᔪᐊᕐᓂᖅ - 19 ᑕᐃᒪᐅᑎᓪᓗᒍ ᑲᖏᖅᖠᓂᕐᒥ ᓄᕕᐱᕆ 18-ᒥ.
ᓂᕆᔭᒃᓴᖏᑦ ᓴᓇᔭᐅᓚᐅᖅᑐᑦ ᐊᔾᔭᖅᑐᖅᑕᐅᑉᓗᑎᒡᓗ ᐱᓕᕆᖃᑎᒌᒃᖢᑎᒃ Slapshot ᓂᕿᓕᐅᕐᕕᖕᒥ ᓇᖕᒥᓂᖁᑎᓕᒃ ᓵᑦ ᐳᕆᐅᓪ ᐊᒻᒪᓗ ᑎᐅᕆᓐᔅ ᑐᑐ ᐃᖅᑲᐅᒪᑉᓗᒍ Hᐊᑭᕕᒡᔪᐊᖅᑎᑦᑎᕙᒃᑐᑦ ᑲᑎᒪᔨᖏᑦ.
ᐳᕆᐅᓪ ᐅᖃᖅᖢᓂ ᐅᕐᓂᒃᑕᐅᓚᐅᕋᒥᒎᖅ ᑲᑎᒪᔨᒧᑦ ᐊᑐᐊᑦᔪᐊᖅ ᐊᒃᓴᕐᓂᕐᒧᑦ ᐱᓇᓱᐊᕈᓯᐅᓚᐅᖅᑐᒥ ᐅᑉᓗᕈᒥᑕᓕᐅᖁᑉᓗᒍ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓴᓇᔨᖏᓐᓄᑦ.
ᐅᖃᖅᖢᓂ ᑕᒪᓐᓇᒎᖅ ᐱᒻᒪᕆᐅᑎᓚᐅᖅᑕᖓ ᓴᓇᔩᑦ ᑕᑯᑎᑦᑐᒪᓐᓇᕐᒪᑕ ᖃᓄᖅ ᓄᓇᖅᑲᑎᒌᑦ ᖁᔭᓕᓯᒪᓂᖏᓐᓄᑦ ᐱᓕᕆᐊᖏᑦᑎᒍᑦ.
“ᑐᕈᐃ ᓂᕆᔭᒃᓴᑦᑎᐊᕙᖕᒥᒃ ᐃᒐᔭᐅᓯᒪᔪᒥᒃ ᐱᑎᑦᑎᖁᔨᓚᐅᕐᒪᑦ, ᑕᐃᒪᐃᒻᒪᑦ ᓚᓵᓐᔭᓕᐅᕈᑎᔪᒪᓕᓚᐅᖅᑕᒃᑲ ᐱᕈᖅᑐᓂᒃ ᐊᑯᑕᐅᓯᒪᕙᒃᑐᓂᒃ ᐃᓚᖃᕐᓗᒍ, ᓴᓇᓕᓚᐅᖅᑕᒃᑲ ᓂᕆᔭᒃᓴᑦᑎᐊᕚᓘᓕᖅᖢᒋᑦ ᐅᑉᓗᕈᒥᑕᕐᓇᖅᑳᕐᓇᓂ ᓴᓇᔭᖅᑐᖅᖢᖓ 6:00-ᒥ ᐅᑉᓛᒃᑯᑦ ᑕᐃᑉᓱᒪᓂ.
“ᑲᑎᒪᔨᕋᓛᖑᖃᑕᐅᔪᖅ ᐊᑐᐊᑦᔪᐊᖅ (ᐊᒃᓴᕐᓂᖅ) ᐊᒻᒪᓗ Hᐃᒪᔅ (ᑕᑎ) ᖃᐃᓚᐅᖅᑑᒃ, ᐊᐃᒃᖠᖅᖢᑎᒃ ᐊᒻᒪᓗ ᐊᔾᔭᖅᖢᒋᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓴᓇᔨᖏᓐᓄᑦ.
“ᐃᖅᑲᐅᒪᓗᐊᙱᑦᑐᖓ ᖃᑉᓯᓂᒃ ᐊᔾᔭᖅᑐᐃᓚᐅᕐᒪᖔᑕ, ᑭᓯᐊᓂ ᐃᒻᒪᖄ 36-ᓂᒃ 40-ᓄᑦ, ᑕᐃᒪᓐᓇᐅᖅᑰᖅᑐᖅ.”
ᐳᕆᐅᓪ ᐅᖃᖅᖢᓂ ᖃᐅᔨᒪᔭᖓᒍᒡᒎᖅ, ᓂᕿᓕᐊᖏᑦ ᖁᕕᐊᒋᔭᐅᑦᑎᐊᓚᐅᖅᑐᑦ.
ᐅᖃᖅᖢᓂ ᐊᒃᓴᕐᓂᐅᒡᒎᖅ ᐅᖃᐅᑎᓚᐅᖅᑕᓂ ᑕᒪᕐᒥᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖁᕕᐊᓱᑦᑎᐊᓚᐅᕐᒪᑕ ᐃᒐᔾᔪᔾᔭᐅᓂᕐᒥᓄᑦ, ᐸᑦᑕᒃᑐᓚᐅᖅᑐᒡᒎᖅ ᐊᒻᒪᓗ ᐃᒡᓚᖅᖢᑎᒃ ᓂᕿᓂᒃ ᑐᓂᔭᐅᒐᒥᒃ.
ᐳᕆᐅᓪ ᐅᖃᖅᖢᓂ ᓂᕿᓕᐅᕐᕕᖓᒎᖅ Slapshot ᒪᑐᐃᒃᑲᓐᓂᓚᐅᖅᑐᖅ ᑕᓪᓕᒻᒥᐅᓵᖅᑐᒥ, ᐱᓕᕆᔨᑑᑉᓗᓂ ᐃᒐᕝᕕᖕᒥ.
ᐅᖃᖅᖢᓂ ᖁᓖᓐᓇᐃᒡᒎᖅ ᓂᕿᑖᕆᓂᐊᖅᑕᖏᓐᓂᒃ ᐅᑕᖅᑭᑎᖃᑦᑕᖅᑕᖏᑦ ᓄᖑᑉᐸᓪᓕᐊᓂᖏᑦ ᒪᓕᒃᖢᒋᑦ ᐃᓚᕙᓪᓕᐊᖃᑦᑕᖅᖢᒋᑦ. “ᐃᒪᓐᓇᐃᓕᐅᖅᑎᑦᑎᖃᑦᑕᕐᓂᐊᖅᑐᖓ ᐃᓄᐃᑦ ᐅᖃᓗᒡᓗᑎᒃ ᑎᑭᓴᐃᓗᑎᒃ ᓂᕿᓕᐊᖑᖁᔭᒥᓂᒃ, ᖃᑉᓯᑐᕐᓂᐊᕐᒪᖔᑕ ᐅᖃᐅᑎᓗᒋᑦ ᐊᒻᒪᓗ ᐊᑭᓕᐅᑎᒥᓂᒃ ᖃᕆᑕᐅᔭᒃᑯᑦ ᓇᒃᓯᐅᔾᔨᓗᑎᒃ ᐅᕗᙵ slapshotcanteen@gmail.com.
“ᑕᒪᓐᓇ ᐃᓕᓯᑲᐅᑎᒋᓐᓇᖅᑐᖅ ᑮᓇᐅᔭᓂᒃ ᖃᕆᑕᐅᔭᒃᑯᑦ, ᑮᓇᐅᔭᑦ ᐱᓯᒪᓕᕈᑉᑭᑦ ᖃᕆᑕᐅᔭᒃᑯᑦ, ᐃᒐᓕᕋᔭᖅᑕᒃᑲ ᓂᕿᑖᕆᔪᒪᔭᖏᑦ, ᐅᖃᓗᒡᕕᒋᓗᒋᓪᓗ ᓂᕿᑖᕆᔪᒪᔭᖏᑦ ᐱᐊᓂᒃᐸᑕ, ᖃᐃᓗᑎᒃ ᐊᐃᒃᖠᑐᐃᓐᓇᕈᓐᓇᖅᓯᓇᔭᖅᖢᑎᒃ.”