Skip to content

ᓄᓇᖅᑲᑎᒌᑦ ᖁᕕᐊᓱᙱᑦᑐᑦ ᐅᔭᕋᖕᓂᐊᖅᑐᓕᕆᔨᒃᑯᑦ ᐱᓕᕆᐊᕆᔭᖏᓐᓂᒃ

ᑲᖏᖅᖠᓂᕐᒥᐅᑕᑦ ᓂᕆᐅᒃᑐᑦ ᐊᓯᐊᒍᒃᑲᓐᓂᖅ ᑲᒪᒋᔭᐅᓇᔭᕐᓂᖓᓄᑦ ᓇᓂᓯᔪᓐᓇᖁᑉᓗᒋᑦ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᑦ ᑕᓯᕐᔪᐊᕐᒧᑦ ᑯᕕᓯᙱᖔᕐᓗᑎᒃ.

ᑲᖏᖅᖠᓂᕐᒥ ᒪᐃᔭ Hᐊᕆ ᑕᐅᑐᙱ ᐱᕈᖅᓯᐊᙳᐊᕐᒥᒃ ᐃᓕᓯᔪᖅ 2019-ᒥ ᐃᖅᑲᐅᒪᓂᕐᒧᑦ ᐅᑉᓗᕆᔭᐅᑎᓪᓗᒍ. ᑕᐅᑐᙱ ᐅᖃᖅᖢᓂ ᐊᒥᓱᑦ ᐃᓄᐃᑦ ᑲᖏᖅᖠᓂᕐᒥ ᖁᕕᐊᓱᙱᒻᒪᑕ ᐊᒡᓂᒍ ᐃᒍᒃᑯᑦ ᑯᕕᓯᔪᒪᑎᓪᓗᒋᑦ ᐅᓗᕆᐊᓇᖅᑐᓕᖕᓂᒃ ᑕᓯᕆᔭᐅᔪᒥ ᑕᓯᕐᔪᐊᕐᒥ ᐅᔭᕋᖕᓂᐊᕐᕕᖕᒥ ᑕᓯᕐᔪᐊᕐᒧᑦ.

ᑕᓯᖅ ᐊᒡᓂᒍ ᐃᒍ ᐅᔭᖃᖕᓂᐊᖅᑐᓕᕆᔨᒃᑯᑦ ᑕᓯᕐᔪᐊᕐᒥ ᐅᔭᕋᖕᓂᐊᕐᕕᖓᓂᒃ ᐃᓗᓕᖃᕐᒪᑦ ᐃᒻᒪᖄ 18-ᓂᒃ ᑕᖅᑭᓂᒃ ᒪᖁᒡᕕᐅᖃᑦᑕᖅᓯᒪᓂᖓᓄᑦ ᐊᒻᒪᓗ ᑕᐃᑲᓂ ᐊᐳᑎ ᐊᐅᒃᐸᓪᓕᐊᓯᒪᑉᓗᓂ, ᐊᒻᒪᓗ ᐊᒡᓂᒍ ᐃᒍᒃᑯᑦ ᑐᐊᕕᕐᓇᖅᑐᒃᑯᑦ ᐋᖅᑭᒋᐊᖅᓯᔪᒪᓯᒪᓚᐅᕐᒪᑕ ᐃᒪᕐᒧᑦ ᓚᐃᓴᓐᓯᒥᓂᒃ ᐊᖏᖅᑕᐅᓯᒪᔪᒥᒃ ᒐᕙᒪᑐᖃᒃᑯᑦ ᐅᑭᐅᖅᑕᖅᑐᓕᕆᓂᕐᒧᑦ ᒥᓂᔅᑕᖓᓄᑦ ᑖᓐ ᕙᑎᐅᓪᒧᑦ ᐱᕕᒃᓴᖃᖅᑎᑦᑎᑉᓗᓂ ᑲᒻᐸᓂᒋᔭᐅᔪᒥᒃ ᑯᕕᓯᔪᓐᓇᕐᓂᖏᓐᓄᑦ ᐃᒪᕐᒥᒃ ᑕᓯᕐᔪᐊᕐᒧᑦ ᒫᓐᓇᐅᔪᒥ ᐅᑐᐱᕆᐅᑉ ᓄᙳᐊᓄᑦ.

ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᖏᑦ ᐅᖃᖅᓯᒪᔪᑦ ᑯᕕᖅᑕᕐᕕᒃ ᑕᓯᖅ ᑕᑕᑉᐸᓪᓕᐊᓕᕐᒪᑦ, ᐃᓗᓕᖃᖅᖢᓂ 650,000 cubic ᒦᑕᓂᒃ ᐃᒪᕐᒥᒃ, ᐊᒻᒪᓗ ᑲᒻᐸᓂᐅᔪᖅ ᓂᕆᐅᖕᒪᑦ ᐅᐱᕐᖔᖅ ᐊᐳᑎ ᐊᐅᒃᐸᓪᓕᐊᓕᖅᐸᑦ ᐃᒪᖃᒃᑲᓐᓂᕐᓂᐊᕐᓂᖓᓄᑦ 450,000-ᒥᒃ cubic ᒦᑕᓂᒃ.

ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᑦ ᖃᐅᔨᓴᕈᑎᖏᑦ ᑕᑯᑎᑦᑎᓯᒪᒐᓗᐊᖅᑎᓪᓗᒋᑦ ᐃᒪᖅ ᐅᓗᕆᐊᓇᖅᑐᖃᙱᓐᓂᖓᓄᑦ ᐊᒻᒪᓗ ᓱᕈᐃᔾᔮᙱᓐᓂᖓᓄᑦ ᐃᒪᕐᒥᐅᑕᓂᒃ, ᑲᖏᖅᖠᓂᕐᒥ ᒪᐃᔭ Hᐊᕆ ᑕᐅᑐᙱ ᐅᖃᖅᖢᓂ ᐊᒥᓱᑦ ᐃᓄᐃᑦ ᑲᖏᖅᖠᓂᕐᒥ, ᐱᓗᐊᖅᑐᒥ ᐃᓐᓇᑐᖃᐃᑦ, ᐃᓱᒫᓘᑎᖃᓪᓚᕆᖕᒪᑕ ᐃᒪᐅᑉ ᒥᒃᓵᓄᑦ ᑯᕕᖅᑕᖅᑕᐅᓇᔭᖅᐸᑦ ᑕᓯᕐᔪᐊᕐᒧᑦ.

ᑕᐅᑐᙱ ᐅᖃᖅᖢᓂ ᖃᐅᔨᒪᔪᕐᔪᐊᕌᓘᙱᑦᑑᒐᓗᐊᕉᖅ ᑭᓯᐊᓂ ᐃᓱᒫᓘᑎᖃᕋᒥ ᑯᕕᖅᑕᕋᔭᖅᐸᑕ ᐃᒪᕐᒥᒃ ᑕᓯᕐᔪᐊᕐᒧᑦ, ᖃᐅᔨᒪᔭᖓᒍᓪᓕ ᓯᕗᓪᓕᖅᐹᒥ ᖃᐅᔨᒋᐅᖅᓯᒪᖕᒪᑦ ᑕᓯᐅᑉ ᒥᒃᓵᓄᑦ.

ᐅᖃᖅᖢᓂ ᑕᓯᖅ ᐃᒥᖅᑕᕐᕕᐅᒐᔪᖕᒪᑦ ᐃᓄᖕᓄᑦ ᑲᖏᖅᖠᓂᕐᒥᐅᑕᓄᑦ ᐊᒻᒪᓗ ᑕᒪᓐᓇ ᐃᓱᒫᓘᑕᐅᑉᓗᓂ ᐊᒥᓱᓄᑦ ᑲᖏᖅᖠᓂᕐᒥᐅᑕᓄᑦ.

“ᐊᒡᓂᒍ ᐃᒍᒃᑯᑦ ᑐᓴᐅᒪᑎᑦᑏᓐᓇᓲᑦ ᖃᓄᐃᓕᐅᓕᕐᒪᖔᕐᒥᒃ, ᑭᓯᐊᓂ ᐊᓯᐊᒍᑦ ᒫᓐᓇᐅᔪᖅ ᐱᓕᕆᓯᒪᖕᒪᑕ ᐊᒻᒪᓗ ᐱᔾᔪᑎᑐᐊᖑᖅᑰᙱᒻᒪᑦ ᓄᕙᒡᔪᐊᕐᓂᖅ - 19,” ᑕᐃᒪᓐᓇ ᐅᖃᖅᖢᓂ ᑕᐅᑐᙱ.

“ᑕᒪᓐᓇ ᐱᓕᕆᐊᖑᓚᐅᖅᑐᖅ ᐊᖑᓇᓱᒃᑎᒃᑯᑦ ᑲᑎᒪᔨᖏᑦᑎᒍᑦ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᑦᑎᒍᑦ, ᓄᓇᕗᑦ ᑐᙵᕕᒃᑯᑦ ᑎᒥᖓᒍᑦ, ᓄᓇᕗᒥ ᐃᒪᕐᒧᑦ ᑲᑎᒪᔨᒋᔭᐅᔪᒃᑯᑦ ᐊᒻᒪᓗ ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑎᒍᑦ − ᑕᐃᑉᑯᑎᒎᓇᖅ ᑲᒪᒋᔭᐅᑉᓗᓂ ᐊᒻᒪᓗ ᒐᕙᒪᑐᖃᒃᑯᑦ ᒥᓂᔅᑕᖓᒍᑦ, ᓄᓇᓕᐅᔪᕐᓕ, ᑭᖑᓪᓕᖅᐹᖑᖃᑕᐅᑉᓗᓂ ᑐᓴᖅᑎᑕᐅᑉᓗᓂ.

“ᑕᒪᓐᓇ ᓈᒻᒪᒋᔭᐅᙱᑦᑐᖅ ᐃᓄᖕᓄᑦ, ᐱᓗᐊᖅᑐᒥ ᐃᓐᓇᑐᖃᐅᔪᓄᑦ, ᖁᕕᐊᓱᙱᑦᑐᑦ ᐃᒥᖃᑦᑕᕐᓂᐊᕐᓂᕐᒧᑦ ᐃᒪᕐᒥᒃ ᑯᕕᖅᑕᕐᕕᐅᓯᒪᔪᒥᒃ ᐃᒪᖁᑎᒋᓯᒪᓕᖅᑕᖓ ᐊᒥᓱᓂᒃ ᐅᑭᐅᓂᒃ.”

ᑕᐅᑐᙱ ᐅᖃᖅᖢᓂ ᓄᓇᓕᒃ ᓂᕆᐅᖕᓂᖃᕐᒪᑦ ᐊᒥᐊᒍᒃᑲᓐᓂᖅ ᐱᓕᕆᒋᐊᕋᔭᕐᓂᖏᓐᓄᑦ ᑯᕕᖅᑕᐃᑐᐃᓐᓇᙱᓪᓗᑎᒃ ᑕᓯᕐᔪᐊᕐᒧᑦ.

“ᐃᒻᒪᖄ ᐊᑐᕈᓐᓇᖅᑐᑦ ᐃᒪᕐᒥᒃ ᑕᓯᕐᒦᑦᑐᒥᒃ, ᓈᒻᒪᑐᐃᓐᓇᕐᓂᕋᕐᒪᒍ, ᐊᑐᕐᓗᒍ ᐅᔭᕋᖕᓂᐊᕐᕕᖕᒥ ᐃᒪᖁᑎᒋᔭᐅᔭᕆᐊᖃᖅᑐᒃᑯᑦ ᑯᕕᑐᐃᓐᓇᙱᓪᓗᒍ ᑕᓯᕐᔪᐊᕐᒧᑦ.”

“ᑭᐅᔾᔪᑎᒃᓴᖃᙱᑦᑐᒍᑦ, ᑭᓯᐊᓂ ᑕᐃᒪᑐᖅ ᐊᑑᑎᖃᕐᓂᖅᓴᒥᒃ ᓴᖅᑭᑦᑐᖃᕐᓂᐊᖅᐳᖅ ᐊᓯᐊᓂᒃ ᐸᕐᓇᐅᑎᒋᔭᖓᒍᑦ. ᐅᕙᒍᑦ, ᓄᓇᖅᑲᑎᒌᒃᑑᑕᐅᔪᒍᑦ, ᐊᓯᐊᒍᑦ ᐋᖅᑭᒋᐊᖅᓯᖁᔨᔪᒍᑦ.

“ᑕᒪᓐᓇ ᓄᓇᖅᑲᑎᒌᖕᓄᑦ ᐅᖃᖃᑎᒌᒍᑕᐅᔭᕆᐊᖃᓚᐅᖅᑑᒐᓗᐊᖅ, ᐅᖃᖃᑎᒌᒍᑕᐅᓚᐅᙱᑦᑐᖅ ᓄᕙᒡᔪᐊᕐᓂᖅ −19 ᐱᔾᔪᑎᒋᑉᓗᒍ, ᑭᓯᐊᓂ ᓈᓚᐅᑎᐊᓛᒃᑯᑦ ᑐᓴᖅᑎᑦᑎᓗᑎᒃ ᐅᖃᓪᓚᒋᐊᖃᓚᐅᖅᑑᒐᓗᐊᑦ ᐅᖃᓗᖃᑦᑕᖅᑎᑦᑎᓗᑎᒃ ᐊᒻᒪᓗ ᖃᓄᒃᑲᓐᓂᖅ ᑐᓴᖅᑎᑦᑎᓗᑎᒃ ᓄᓇᓕᖕᒥ ᖃᓄᐃᓕᐅᓕᕐᒪᖔᕐᒥᒃ.

“ᓴᓇᔭᒃᓴᖃᖁᔨᑦᑎᐊᖅᑐᒍᑦ ᐊᓯᖏᓐᓂᒡᓗ, ᑕᐃᒪᐃᒻᒪᑦ ᐃᑲᔪᖅᑐᐃᔭᕆᐊᖃᖅᑐᒍᑦ ᐅᔭᕋᖕᓂᐊᕐᕕᖕᒥ. ᑭᓯᐊᓂ, ᑕᐃᒪᐃᒃᑲᓗᐊᖅᑎᓪᓗᒍ, ᑐᓴᐅᒪᑎᑦᑎᑦᑎᐊᕆᐊᓖᑦ ᐅᕙᑉᑎᓐᓂᒃ ᐊᒻᒪᓗ ᖃᓄᖅ ᐸᕐᓇᐃᖕᒪᖔᑕ ᑕᓯᖁᑎᑉᑎᓐᓂᒃ ᑕᒪᓐᓇ ᒫᓐᓇᐅᔪᖅ ᐃᓱᒫᓘᑎᒋᔭᖅᐳᑦ ᑕᐃᒪᑐᖅ ᖃᓄᖅᑑᕈᑎᒃᓴᒃᑲᓐᓂᕐᒥᒃ ᓴᖅᑭᑎᑦᑎᓂᐊᖅᐳᑦ.”