Skip to content

ᑲᖏᖅᖠᓂᕐᒥᐅᑕᑦ ᓵᓚᖃᖅᑐᑦ ᓴᓪᓕᕐᒥᐅᑕᓂᒃ ᐊᓇᐅᓕᒑᕐᓂᒃᑯᑦ

ᑲᖏᖅᖠᓂᕐᒥᐅᑦ Freaks-ᑯᑦ ᓵᓚᖃᓚᐅᖅᑐᑦ ᓴᓪᓕᕐᒥᐅᑦ Invaders-ᓂᒃ 20-7 ᓵᓚᒃᓴᕐᓂᕆᓯᒪᔭᖓ ᑳᒻ ᐃᐊᒃᑯᑦ ᑎᖕᒥᓲᓕᕆᔨᒃᑯᑦ ᐊᓇᐅᓕᒑᒡᒎᑎᑎᓪᓗᒋᑦ ᑲᖏᖅᖠᓂᕐᒥ ᑕᖅᑭᐅᓚᐅᖅᑐᒥ.

Freaks−ᑯᑦ ᓵᓚᖃᓚᐅᖅᑐᑦ AC Traders-ᓂᒃ ᑭᖑᓪᓕᖅᐹᖅᓱᕐᓂᐊᖅᑐᑦ ᑐᖔᓂ ᑭᖑᓪᓕᖅᐹᖅᓱᕐᓂᐊᓕᖅᑎᓪᓗᒋᑦ, Invaders-ᑯᑦ ᓵᓚᖃᓚᐅᖅᖢᑎᒃ Blue Sox-ᑯᓐᓂᒃ ᑭᖑᓪᓕᖅᐹᖅᓱᖅᑐᑦ ᑐᖔᓂ.

2020 ᑳᒻ ᐃᐊᒃᑯᑦ ᐊᓇᐅᓕᒑᒡᒎᑎᑎᓪᓗᒋᑦ ᓵᓚᒃᓴᖅᑐᑦ ᑲᖏᖅᖠᓂᕐᒥ Freaks-ᑯᑦ ᐅᑯᐊᖑᔪᑦ, ᑐᓄᐊᓂ ᓴᐅᒥᖅᖠᕐᒥ, ᓖ ᕿᓚᒃ, ᑕᓂᕙᓐ ᐊᔭᕈᐊᖅ, ᓵᑦ ᑕᐃᐸᓈᖅ, ᓵᑦ ᒍᕆᐊᒻ, ᔭᐃᒪᓯ ᒥᐅᕆᑦ, ᐃᐅᕈ ᑭᖕ, ᓯᒪᔅ ᐊᔭᕈᐊᖅ, ᐊᒻᒪᓗ ᓄᐊᒪᓐ ᐅᑲᓕᖅ, ᐊᒻᒪᓗ ᓯᕗᓂᐊᓂ ᓴᐅᒥᖅᖠᕐᒥ, ᓱᕐᓕ ᓇᑯᓛᖅ, ᑐᕆᓯ ᕈᑦᔅ, ᑲᑦᑐᓕᒃ ᐊᔭᕈᐊᖅ, ᑳᓐᑎᔅ ᒍᕆᐊᒻ ᐊᒻᒪᓗ ᐅᓕᕕᐊ ᑕᕐᕋᓕᒃ ᑲᖏᖅᖠᓂᕐᒥ ᐊᒐᓯ 30-ᒥ. ᐊᔾᔨ ᑳᓐᑎᔅ ᒍᕆᐊᒻᒥᙶᖅᑐᖅ

ᖁᓕᐅᓚᐅᖅᑐᑦ ᐱᙳᐊᖃᑎᒌᒃᑐᑦ ᐊᓇᐅᓕᒑᒡᒎᑎᔪᓂᒃ, ᒪᕐᕈᒃ ᓴᓪᓕᓂᙶᖅᑐᑦ, ᖃᒪᓂ’ᑐᐊᕐᒥᙶᖅᑐᓪᓗ ᐊᒻᒪᓗ ᐃᖃᓗᖕᒥᐅᑕᑦ ᐃᓚᐅᖃᑕᐅᑉᓗᑎᒃ ᐊᕐᕕᓂᓕᖕᓂᒃ ᑲᖏᖅᖠᓂᕐᒥᐅᑕᓂᒃ ᐱᙳᐊᖃᑎᒌᒃᑎᓂᒃ. ᐱᙳᐊᖅᑏᑦ ᐊᕐᕕᐊᓂ, ᖃᒪᓂ’ᑐᐊᕐᒥ ᐊᒻᒪᓗ ᐃᖃᓗᖕᓂ ᐃᓚᐅᖃᑕᐅᓚᐅᕐᒥᔪᑦ ᖃᑉᓯᑲᓪᓚᖕᓂᒃ ᑲᖏᖅᖠᓂᕐᒥᐅᑦ ᐱᙳᐊᖅᑎᖏᓐᓂᒃ.

ᑭᖑᓪᓕᖅᐹᖅᓱᖅᑳᕐᓇᑎᒃ Freaks-ᑯᑦ ᐱᒋᐊᓪᓚᓚᐅᖅᑐᑦ ᓵᓚᖃᕋᒥᒃ Invaders-ᑯᓐᓂᒃ, ᓴᓪᓕᕐᒥᐅᓂᒃ ᓵᓚᒋᔭᐅᖅᑳᖅᖢᑎᒃ 20-7-ᑯᑦ.

Freaks-ᑯᓐᓄᑦ ᐱᙳᐊᖅᑎ ᑳᓐᑎᔅ ᒍᕆᔭᒻ ᐅᖃᖅᖢᓂ ᐱᕙᓪᓕᐊᑦᑎᐊᕐᓂᖃᓕᓚᐅᖅᑐᒡᒎᖅ New Era-ᑯᓐᓂᒃ ᓵᓚᖃᕐᒪᑕ ᓴᓇᑦᑕᐃᓕᒥ ᐅᑉᓛᒃᑯᑦ.

ᐅᖃᖅᖢᓂ ᑭᖑᓪᓕᖅᐹᖅ ᐊᓇᐅᓕᒋᐊᖅᑎ ᓵᓚᒃᓴᖅᑎᑦᑎᓚᐅᕐᒪᑦ.

“ᓵᓚᐅᓕᓚᐅᖅᑐᒍᑦ ᓯᑕᒪᓄᑦ 7-ᒋᔭᖓᓂᒃ ᐊᒻᒪᓗ ᐱᓱᒃᑎᑕᐅᔪᖃᖅᖢᓂ,” ᑕᐃᒪᓐᓇ ᐅᖃᖅᖢᓂ ᒍᕆᔭᒻ. “ᐊᓕᐊᓇᐃᓐᓂᖅᐹᖑᖃᑕᐅᓚᐅᖅᑐᖅ ᐱᙳᐊᕐᓂᕆᔭᑉᑎᓐᓂᒃ.

“ᐊᓇᐅᓕᒑᑦᑎᐊᖅᑐᐊᓘᓚᐅᖅᑐᑦ ᑕᒡᕙᓂ ᐅᑭᐅᒥ; ᐊᓕᐊᓇᐃᓐᓂᖅᐹᖑᖃᑕᐅᔪᖅ ᐊᓇᐅᓕᒑᒡᒎᖃᑦᑕᓕᖅᓯᒪᑎᓪᓗᑕ.

ᑭᓇᑐᐃᓐᓇᑦᑎᐊᖅ ᓵᓚᒃᓴᕈᓐᓇᓚᐅᖅᑐᖅ.”

ᒍᕆᔭᒻ ᐅᖃᖅᖢᓂ ᓄᕙᒡᔪᐊᕐᓂᖅ 19 ᐊᒃᑐᖅᓯᓂᖃᓚᐅᕐᒪᑦ ᐊᓇᐅᓕᒑᒡᒎᑎᔪᓂᒃ. ᐅᖃᖅᖢᓂ ᐊᓇᐅᓕᒑᒡᒍᑎᓂᐊᖅᑐᓂᒃ ᐸᕐᓇᐃᔩᑦ ᑎᑭᑎᑦᑎᔪᓐᓇᓚᐅᙱᑦᑐᑦ ᐃᒪᓐᓈᖅᑐᖅᑎᐅᓂᐊᖅᑐᓂᒃ ᓄᓇᕗᑦ ᓯᓚᑖᓂᕐᒥᐅᑕᓂᒃ ᑕᒡᕙᓂ ᐅᑭᐅᒥ.

“ᐊᐱᕆᓚᐅᖅᓯᒪᔪᒍᑦ ᖃᑉᓯᑲᓪᓚᖕᓂᒃ ᐃᓄᖕᓂᒃ ᑭᕙᓪᓕᕐᒥ ᐃᓕᑕᕆᔭᐅᔾᔪᑎᑖᕈᒪᓇᔭᕐᒪᖔᑕ ᐃᒪᓐᓈᖅᑐᖅᑎᐅᓂᕐᒧᑦ ᐊᒻᒪᓗ ᑲᖏᖅᖠᓂᓕᐊᕋᔭᖅᖢᑎᒃ ᐃᒪᓐᓈᖅᑐᕆᐊᖅᑐᕐᓗᑎᒃ, ᑭᓯᐊᓂ ᐋᒃᑳᓗᒃᑖᓚᐅᕐᒪᑕ.

“ᑕᐃᒪᐃᒻᒪᑦ ᒪᕐᕈᒃ ᑲᖏᖅᖠᓂᕐᒥᐅᑖᒃ ᐃᒪᓐᓈᖅᑐᖅᑎᐅᓕᓚᐅᖅᑑᒃ; ᐊᑕᐅᓯᖅ ᐃᓕᑕᕆᔭᐅᔾᔪᑎᑖᒃᑲᓐᓂᖅᖢᓂ ᐊᒻᒪᓗ ᐱᖃᑎᖓ ᐃᓕᑕᕆᔭᐅᔾᔪᑎᑖᖅᖢᓂ.

“ᓄᕙᒡᔪᐊᕐᓂᖅ ᐱᔾᔪᑎᒋᑉᓗᒍ ᑰᒡᔪᐊᕐᒥᐅᑦ ᑎᑭᑦᑐᓐᓇᓚᐅᙱᒻᒥᔪᑦ ᒎᒡᔪᐊᕐᒥ ᑲᖏᖅᖠᓂᕐᒧᑦ ᑐᕌᓪᓚᑦᑖᖅᑐᓂᒃ ᑎᖕᒥᓲᖃᕈᓐᓇᐃᓪᓕᖕᒪᑦ. ᑕᐃᒪᐃᒻᒪᑦ ᐱᙳᐊᖅᑎᖏᑦ ᑰᒡᔪᐊᕐᒥᐅᑦ ᐃᓄᑑᕝᕕᖕᒦᑦᑕᕆᐊᖃᕋᔭᖅᑐᑦ ᑲᖏᖅᖠᓂᓕᐊᕐᓂᐊᕐᓗᑎᒃ ᐅᑎᒧᓪᓗ.”

ᑲᖏᖅᖠᓂᕐᒥ Freaks-ᑯᑦ ᐊᒻᒪᓗ ᓴᓪᓕᕐᒥᐅᑦ Invaders−ᑯᑦ ᐃᓚᐅᖃᑕᐅᔪᓐᓇᖅᓯᔪᑦ 2021-ᒥ ᑲᓇᑕᒥ ᐊᓇᐅᓕᒑᒡᒎᑦᑐᒫᖅᑐᓂᒃ. ᑕᐅᕗᙵᐅᖃᑕᐅᔪᒫᕐᒥᔪᑦ ᑲᖏᖅᖠᓂᕐᒥᐅᑦ New Era−ᑯᖏᑦ ᐊᒻᒪᓗ ᑲᖏᖅᖠᓂᕐᒥᐅᑦ Royals-ᑯᖏᑦ, ᐃᓚᐅᖃᑕᐅᔪᓐᓇᖅᓯᓯᒪᓚᐅᖅᑐᑦ 2020-ᒥ ᑲᓇᑕᒥ ᐊᓇᐅᓕᒑᒡᒎᓐᓂᐊᓚᐅᖅᑐᓂᒃ ᓄᖅᑲᖅᑎᑕᐅᓚᐅᕐᒪᑕ ᓄᕙᒡᔪᐊᕐᓂᖅ ᐱᔾᔪᑎᒋᑉᓗᒍ.

ᒍᕆᔭᒻ ᐅᖃᖅᖢᓂ 2020-ᒥ ᐊᓇᐅᓕᒑᒡᒎᓐᓂᕆᔭᐅᔪᖅ ᐊᔾᔨᐅᙱᑦᑑᓚᐅᕐᒪᑦ ᐃᖕᒥᓄᑦ ᐅᐃᖓᓄᓪᓗ, ᓵᑦᒧᑦ. ᐅᐃᒌᒎᖅ ᐊᓇᐅᓕᒑᖃᑦᑕᖅᓯᒪᓕᕐᒪᑎᒃ ᐃᒻᒪᖄ 17-ᓂᒃ ᐅᑭᐅᓂᒃ.

“ᒪᒃᑯᒃᑑᑉᓗᓄᒃ ᐱᙳᐊᖃᑕᐅᖃᑦᑕᖅᓯᒪᓕᖅᑐᒍᒃ ᐊᒻᒪᓗ ᓯᕗᓪᓕᖅᐹᒥ ᑳᒻ ᐃᐊᒃᑯᑦ ᐊᓇᐅᓕᒑᒡᒍᑎᑎᓪᓗᒋᑦ ᖁᓕᑦ ᐅᑭᐅᑦ ᑕᐃᑉᓱᒪᓂᐅᓕᖅᑐᖅ. “ᑲᑎᑎᑕᐅᓚᐅᖅᓯᒪᔪᒍᒃ 2017-ᒥ, ᑕᐃᒪᐃᒻᒪᑦ ᐅᓇ ᓯᕗᓪᓕᖅᐹᖅ ᑳᒻ ᐃᐊᒃᑯᑦ ᐊᓇᐅᓕᒑᒡᒎᑎᑎᓪᓗᒋᑦ ᓵᓚᒃᓴᖃᑕᐅᑉᓗᓄᒃ ᐅᐃᒌᒃᖢᓄᒃ ᓄᓕᐊᕇᒃᖢᓄᒃ. ᐊᓕᐊᓇᐃᓚᐅᖅᑐᖅ.”

ᒍᕆᔭᒻ ᒫᓐᓇᐅᔪᖅ ᐸᕐᓇᐃᓯᒪᓕᕐᒥᔪᖅ ᐅᕿᒡᓕᓴᕐᓂᕐᒧᑦ ᐱᒡᒍᓴᐅᔾᔪᐊᕈᑎᒥᒃ ᑲᖏᖅᖠᓂᕐᒥ. ᐅᖃᖅᖢᓂ ᐃᓚᐅᔪᒪᔪᒡᒎᖅ ᐊᑭᓖᔭᕆᐊᓖᑦ $100-ᒥᒃ ᐊᑐᓂ ᑕᒪᕐᒥᒃ ᑮᓇᐅᔭᑦ ᑲᑎᑕᐅᔪᑦ ᓵᓚᒃᓴᖅᑐᒧᑦ ᑐᓂᔭᐅᓇᔭᖅᖢᑎᒃ, ᑕᒪᓐᓇ ᐱᓕᕆᐊᖑᓂᐊᖅᑐᖅ 12-ᓂᒃ ᐱᓇᓱᐊᕈᓯᕐᓂᒃ.

“ᑕᐃᒪᓐᓇᐃᑦᑐᕐᓚᖕᒥᒃ ᐱᒡᒍᓴᐅᔾᔪᐊᖅᑐᓂᒃ ᐃᓚᐅᖃᑕᐅᓚᐅᖅᓯᒪᔪᖓ 2018-ᒥ ᐊᒻᒪᓗ ᐃᑲᔫᑕᐅᑦᑎᐊᓚᐅᖅᑐᖅ ᐅᕙᒻᓄᑦ ᑎᒥᒃᑯᑦ, ᑕᐃᒪᐃᒻᒪᑦ ᐆᒃᑐᒃᑲᓐᓂᕈᒪᔪᖓ.

“ᐊᐱᕆᓚᐅᕋᒪ ᖃᑉᓰᓐᓇᕐᓂᒃ ᐃᓚᓐᓈᒃᑲᓂᒃ ᐱᔫᒥᒍᓱᖕᒪᖔᑕ, ᐊᒻᒪᓗ ᐊᐱᕆᓕᕆᑉᓗᖓ Facebook-ᑯᑦ ᐃᓚᓐᓈᒃᑲᓂᒃ ᑕᒪᑐᒪ ᒥᒃᓵᓄᑦ, ᐱᔫᒥᒍᓱᒃᑐᑦ ᐊᒥᓲᓂᖏᑦ ᓈᒻᒪᑦᑎᐊᕐᒪᑕ ᐊᒻᒪᓗ ᐃᑲᔪᖅᑐᖅᑕᐅᑉᓗᖓ ᒪᑐᐃᓚᐅᖅᑕᖅᐳᑦ ᓄᓇᓕᖕᒧᑦ.

“ᐆᒃᑐᕈᒪᔪᑦ ᐆᒃᑐᕈᓐᓇᕐᓂᐊᖅᑐᑦ ᐊᑭᓖᓗᑎᒃ ᓯᑎᐱᕆ 18-ᒧᑦ ᑎᑭᓪᓗᒍ.”