ᑭᕙᓪᓕᕐᒥ ᖁᙱᐊᖅᑕᐅᕙᒃᑐᖅ ᓵᒻ ᑐᑕᓐᓄᐊᖅ ᑲᖏᖅᖠᓂᕐᒥᐅᑕᖅ ᐊᑐᖅᓯᒪᕗᖅ ᑕᒪᕐᒥᒐᓚᒃ ᓄᕙᒡᔪᐊᕐᓇᖅ-19−ᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ ᐃᖃᓗᖕᓂ ᓄᓇᖃᖅᖢᓂ.
ᑕᐅᕙᓃᓐᓂᖓᓂ ᓴᖅᑭᔮᕐᕕᐅᓚᐅᖅᐳᖅ ᐊᔾᔨᒌᙱᕈᓘᔭᖅᑐᓂ ᐊᒥᓱᒃᑲᓐᓂᕐᓂ ᓂᔾᔮᑎᑦᑎᓂᕐᒧᑦ ᖁᙱᐊᖅᑕᐅᕙᒃᑐᓂ, ᐃᓱᒪᓂᒃᑯᑦ ᐊᒃᓱᓪᓘᓐᓃᑦ.
ᓵᒻ ᑐᑕᓐᓄᐊᕐᒧᑦ ᐊᔾᔨᓕᐅᖅᑕᐅᔪᖅ
ᐆᒻᒪᕆᒃᑐᒥ ᐅᐸᒃᑕᐅᓯᒪᓪᓗᑎᒃ ᖁᙱᐊᕐᓂᐅᔪᖅ ᓱᒃᑲᔪᒥᒃ ᓂᐱᖃᕈᓐᓃᓚᐅᖅᐳᖅ ᑎᑭᐅᑎᓂᐅᔪᒥ ᓄᕙᒡᔪᐊᕐᓇᐅᑉ ᐅᓗᕆᐊᓇᕐᓂᖓᓂ, ᑕᐃᒫᒃ ᑐᑕᓐᓄᐊᖅ ᐸᕐᓇᐃᕙᓪᓕᐊᓚᐅᖅᐳᖅ ᒪᕐᕈᖓᓂ ᓂᔾᔮᑎᑦᑎᓂᐅᔪᒥ ᑲᑎᙵᔪᓂ ᐊᒻᒪᓗ ᑕᐅᖅᓰᕙᒃᖢᓂ ᓂᔾᔮᑎᑦᑎᓂᕐᒧᑦ ᐃᓱᒪᒋᔭᐅᓂᐅᔪᓂ ᖁᙱᐊᖅᑕᐅᕙᒃᑐᓂ ᑎᑕᒃᑎᓄᑦ ᓲᕐᓗ ᔭᒫᓪ ᓲᓕᒥᑦ.
ᑐᑕᓐᓄᐊᖅ ᐅᖃᓚᐅᖅᐳᖅ ᓂᐱᖃᙱᓐᓂᐅᔪᖅ ᓂᔾᔮᑎᑦᑎᓂᐅᔪᒥ ᖁᙱᐊᖅᑕᐅᓂᖓᓂ ᐊᒃᓱᐊᓗᒃ ᑲᑕᖕᓇᓚᐅᖅᐳᖅ, ᐱᓗᐊᖅᑐᒥ ᑕᒪᓐᓇ ᐊᔭᐅᕈᑎᓪᓗᐊᑕᐅᓚᐅᕐᒪᑦ ᓅᓐᓂᖓᓄᑦ ᐊᖓᔪᖅᑳᖃᕐᕕᐅᔪᒧᑦ.
ᖁᙱᐊᖅᑎᐅᖃᑕᐅᔅᓲᔭᖅᑐᖅ ᐅᖃᐅᓯᖃᑲᐅᖅᑐᖅᐳᖅ ᖃᔅᓯᒐᓚᖕᓂ ᐊᓕᐊᓇᐃᒋᔭᐅᔪᓂ ᖁᙱᐊᖅᑕᐅᓯᒪᓂᐅᔪᓂ ᓱᖏᐅᑎᓯᒪᓕᖅᑕᖏᓐᓂ ᓄᓇᓕᖅᐸᐅᔭᒥ, ᐃᓕᓯᒋᓪᓗᓂ ᑲᙳᓇᙱᑦᑐᒥ ᓯᒥᐅᔪᒥ ᐊᓕᐊᓇᐃᑦ ᐱᓕᕆᐊᖏᓐᓂ ᐋᖅᑭᒃᓱᐃᓂᖓᓂ ᐊᖏᔪᓂ ᑮᓇᐅᔭᓕᐅᕈᓱᖕᓂᐅᔪᓂ ᐃᖃᓗᖕᓂ.
ᑐᑕᓐᓄᐊᖅ ᐅᖃᓚᐅᖅᐳᖅ ᑕᒪᒃᑭᓗᒃᑖᑦ ᓄᖅᑲᓚᐅᖅᐳᑦ ᕿᓚᒥᐊᓗᒃ ᐊᒥᓱᓄᑦ ᖃᓂᒻᒪᓐᓇᐅᔪᒥ ᒪᓕᒋᐊᖃᖅᑕᖏᑦ ᐋᖅᑭᒃᑕᐅᖕᒪᑕ ᓄᓇᕗᒻᒥ.
“ᑕᐃᒪᐃᓚᐅᖅᐳᖅ ᐊᒻᒪᓗ ᑕᒪᑦᑕ ᐃᒪᐃᓚᐅᖅᐳᒍᑦ, ‘ᐅᐊᑲᓪᓚᖔ, ᖃᓄᐃᓕᐅᕐᓂᐊᓕᖅᐱᑕᓕ?’” ᐅᖃᓚᐅᖅᐳᖅ ᑐᑕᓐᓄᐊᖅ.
“ᖃᓄᕐᓕ ᐅᕙᑦᑎᓐᓂ ᑕᑯᒃᓴᐅᑎᑦᑎᓂᐊᓕᖅᐱᑕ?
“ᖁᔭᓕᓚᐅᖅᐳᖓ ᐊᓕᐊᓇᐃᑦ ᓂᔾᔮᑎᑦᑎᓂᕐᒧᑦ ᖁᕕᐊᓱᒍᑕᐅᔪᒥ ᐃᑲᔪᖅᓱᐃᔨᐅᔪᓄᑦ ᐃᖅᑲᓇᐃᔭᖅᑎᖏᓐᓄᑦ ᐃᓴᓚᐅᖅᑐᓂ ᐊᒻᒪ ᐅᖃᖅᖢᑎᒃ, ‘ᐅᐸᒃᑕᐅᓯᒪᓂᐅᔪᒥ ᖁᙱᐊᖅᑕᐅᑎᑦᑎᔪᓐᓇᖅᐳᒍᑦ, ᑭᓯᐊᓂ ᖃᕋᓴᐅᔭᒃᑯᑦ, ᐃᓚᐅᖃᑕᐅᔪᒪᓇᔭᖅᐲᑦ?’
“ᐊᖏᓚᐅᖅᐳᖓ! ᑭᓱᑐᐃᓐᓇᑦᑎᐊᒥᒃ!’”
ᑐᑕᓐᓄᐊᑉ ᐱᔪᒪᓂᖓ ᑐᓂᓯᓂᕐᒥ ᖃᕋᓴᐅᔭᑎᒍᑦ ᐱᕕᒃᓴᖃᕐᓂᐅᔪᒥ ᕿᓚᒥᐊᓗᒃ ᓇᓗᓇᕈᓐᓃᓚᐅᖅᐳᖅ ᐊᒻᒪᓗ ᖃᐅᒪᓂᖅ ᐃᕐᙲᓐᓇᑲᐅᑎᒋ ᐊᕙᓗᓯᓯᒪᕙᒃᑐᒥ ᑕᒪᒃᑭᓂ ᖁᙱᐊᖅᑕᐅᕙᒃᑐᓂ ᐃᓱᒪᑖᕌᖓᒥᒃ ᖁᙱᐊᖅᑕᐅᑐᐃᓐᓇᕆᐊᖃᕐᓂᖏᓐᓂ ᓯᕗᓪᓕᕐᒥ ᐃᒻᒥᓂᒃ ᓴᖅᑭᓲᖑᕗᖅ.
ᑐᑕᓐᓄᐊᖅ ᐅᔾᔨᒋᔫᔮᓚᐅᖅᐳᖅ ᕿᓚᒥᐊᓗᒃ ᑭᒡᓕᖃᖅᑎᑕᐅᓂᐅᔪᓂᑦ ᖃᕋᓴᐅᔭᑎᒍᑦ ᖁᙱᐊᖅᑕᐅᓂᐅᔪᒥ.
“ᑕᒪᓐᓇ ᐃᓚᖓ ᐋᓐᓂᕐᓇᓚᐅᖅᐳᖅ,” ᐅᖃᓚᐅᖅᐳᖅ ᑐᑕᓐᓄᐊᖅ, ᐊᐱᕆᔭᐅᒐᒥ ᐱᑕᖃᙱᓐᓂᖓᓂ ᐅᖃᐅᓯᒃᓴᓕᐊᖑᔪᓂ ᐅᐸᒃᓯᒪᔪᓄᑦ ᖁᙱᐊᕆᐊᖅᓯᒪᔪᓄᑦ.
“ᑕᑯᕙᙱᓚᑎᑦ ᑮᓇᖓᓂ ᓇᓗᓇᐃᖅᓯᓂᐅᔪᑦ ᓂᐊᖁᖓ ᐊᐅᓚᓪᓗᓂ, ᐃᓯᒐᒥᓂᑦ ᐊᐅᓚᑎᑦᑎᔪᒥ ᐊᒻᒪᓗ ᐸᑦᑕᒃᑐᖅᑐᓂ, ᑭᓯᐊᓂ ᖃᕋᓴᐅᔭᑎᒍᑦ ᑕᑯᔪᓐᓇᖅᐳᑎᑦ ᐊᓯᖏᓐᓂ ᑎᑕᒃᑎᓂ ᐱᙳᐊᖅᑐᓂ ᐃᑲᕐᕋᒥᒃ ᒪᕐᕈᖕᓂᓪᓘᓐᓃᑦ.”