ᐳᓛᕐᕕᒃ ᖃᑉᓗᒃᑯᑦ ᐃᑲᔪᖅᐸᓪᓕᐊᓕᖅᑐᑦ ᐊᑐᓕᖅᑎᕆᓂᕐᒧᑦ 28-ᓂᒃ ᐅᑉᓗᓄᑦ ᐅᐃᕆᓯᒪᔪᑦ ᓱᓇᒧᑦ ᐃᑲᔪᖅᑕᐅᕝᕕᒃᓴᖓᓂᒃ ᓄᓇᒥ ᑲᖏᖅᖠᓂᐅᑉ ᖃᓂᒋᔭᖓᓂᒃ ᑐᕌᖓᓂᖃᕐᓂᐊᖅᑐᖅ ᒪᒥᓴᕈᓐᓇᕐᓂᕐᒧᑦ ᓄᓇᒥ ᐊᒻᒪᓗ ᐃᓕᖅᑯᓯᑐᖃᑎᒍᑦ ᖃᓄᐃᓕᐅᖅᑎᑕᐅᕙᒡᓗᑎᒃ.
ᐳᓛᕐᕕᒃ ᖃᑉᓗᒃᑯᑦ ᑐᑭᒧᐊᒃᑎᑦᑎᔨᖓ, ᓴᕐᓕᓐ ᐅᐃᓕᔭᒻᔅ− ᖃᓗᔾᔭᖅ, ᐅᖃᖅᖢᓂ ᐳᓛᕐᕕᒃ ᖃᑉᓗᒃᑯᑦ ᐊᑎᓕᐅᖅᓯᒪᓕᕐᒪᑕ ᑐᓂᔭᐅᓯᒪᓂᕐᒧᑦ ᐊᖏᕈᑎᒥᒃ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᖏᓐᓄᑦ ᐃᓅᑦᑎᐊᕈᒪᓂᕐᒧᑦ ᑎᑎᕋᕐᕕᒃᑯᑦ.
ᐅᐃᓕᔭᒻᔅ − ᖃᓗᔾᔭᖅ ᐅᖃᖅᖢᓂ ᑖᒻᓇᒎᖅ ᓯᕗᓪᓕᖅᐹᒃᑯᑦ ᐱᕙᓪᓕᐊᑎᑕᐅᓯᒪᔪᖅ ᐅᑭᐅᖑᔪᒥ ᐃᑲᔫᑎᒃᓴᖅ ᐊᒻᒪᓗ ᐳᓛᕐᕕᒃ ᖃᑉᓗᒃᑯᑦ ᒫᓐᓇᐅᔪᖅ ᓂᐅᕕᖅᐸᓪᓕᐊᔪᑦ ᐊᑭᑐᔫᑎᓂᒃ ᐱᖁᑎᓂᒃ ᐃᑲᔫᑎᒃᑯᑦ ᐊᑐᖅᑐᒃᓴᓂᒃ ᐊᒻᒪᓗ ᓴᓇᑎᑦᑎᓂᐊᖅᑐᑦ ᑳᓐᑐᕌᒃᑎᒥᒃ ᐃᒡᓗᕋᓛᓕᐅᕐᓂᐊᖅᑐᓂᒃ ᓄᓇᒥ ᐊᑐᖅᑐᒃᓴᓂᒃ.
“ᐃᓗᐃᑦᑐᒃᑯᑦ ᐃᓱᒪᒃᓴᖅᓯᐅᕈᑕᐅᓂᖓ ᐃᑲᔫᑎ ᐊᑐᕈᒪᓂᐊᖅᑐᑦ ᐃᓕᖅᑯᓯᑐᖃᑎᒍᑦ ᓄᓇᒥ ᖃᓄᐃᓕᐅᕈᑎᒃᓴᓂᒃ,” ᑕᐃᒪᓐᓇ ᐅᖃᖅᖢᓂ ᐅᐃᓕᔭᒻᔅ − ᖃᓗᔾᔭᖅ.
“28-ᓄᑦ ᐅᑉᓗᓅᖓᓂᐊᖅᑐᖅ, ‘ᖃᕆᑕᐅᔭᓕᕆᔪᓐᓃᕐᓗᑎᒃ,’ ᓄᓇᒦᓐᓂᐊᖅᑐᑦ ᒪᒥᓴᕆᐊᖅᑐᕐᓗᑎᒃ ᐅᖃᐅᔾᔨᒋᐊᖅᑎᑕᖃᕐᓗᓂ ᐊᒻᒪᓗ ᐃᑲᔫᑎᒃᑯᑦ ᓴᓇᔨᓂᒃ.”
ᐅᐃᓕᔭᒻᔅ − ᖃᓗᔾᔭᖅ ᐅᖃᖅᖢᓂ, ᐃᑲᔫᑎᒃᓴᕈᖅ ᐱᕙᓪᓕᐊᑎᑕᐅᓯᒪᓕᐊᓂᒃᐸᑦ, ᐸᕐᓇᐅᑎᖓ ᐋᖅᑭᒃᓯᒪᓂᐊᖅᑐᖅ ᐱᖓᓱᐃᖅᑕᕐᓗᑎᒃ ᑕᐃᒪᐃᓕᐅᖅᑎᑦᑎᖃᑦᑕᕈᒪᓂᐊᕐᓂᕐᒧᑦ ᐊᕐᕌᒍᑕᒫᒃᑯᑦ.
ᐅᖃᖅᖢᓂᓗ ᐅᖃᐅᔾᔨᒋᐊᖅᑏᑦ ᓴᓇᔩᑦ ᑕᐃᒪᐅᓂᐊᖅᑎᓪᓗᒋᑦ, ᐳᓛᕐᕕᒃᑯᑦ ᓴᓇᑎᑦᑎᓯᒪᓕᖅᑐᑦ ᐱᖓᓱᓂᒃ ᐱᕙᓪᓕᐊᑎᑦᑎᕙᓪᓕᐊᓕᖅᑐᓂᒃ ᑕᒪᑐᒥᙵ ᐃᑲᔫᑎᒥᒃ.
“ᐱᓕᕆᖃᑎᖃᖅᑐᒍᑦ ᓄᓇᕗᒥ ᐊᓯᖏᓐᓂᒃ ᓄᓇᓕᖕᓂᒃ ᐊᕕᒃᑐᖅᓯᒪᔪᓂᒃ ᐊᒻᒪᓗ ᐊᒥᖅᑳᕈᑎᖃᑦᑕᖅᑐᒍᑦ ᐱᐅᓂᖅᐹᓂᒃ ᖃᓄᐃᓕᐅᕈᑎᒃᓴᓂᒃ ᓄᓇᒦᖃᑦᑕᕐᓂᐊᕐᓂᕐᒧᑦ/ᐃᑲᔫᑎᒃᓴᒃᑯᓪᓗ.
“ᐃᑲᔪᕆᐊᖅᑕᐅᖃᑦᑕᕐᓂᐊᖅᑐᑦ ᑐᕌᖓᓂᖃᓗᐊᕐᓂᐊᖅᑐᑦ ᐅᐃᕆᓯᒪᔪᓄᑦ ᐃᒥᐊᓗᒃᑯᑦ, ᐋᖓᔮᕐᓇᖅᑐᒃᑯᑦ, ᐸᑦᑕᖃᑦᑕᕐᓂᕐᒧᑦ ᑮᓇᐅᔭᐃᔭᖃᑦᑕᕐᓂᕐᒧᑦ, ᐊᓯᖏᓐᓄᓪᓗ.”
ᐳᓛᕐᕕᒃ ᖃᑉᓗᒃᑯᑦ ᓇᓗᓇᐃᖅᑕᐅᓚᐅᖅᑐᑦ ᐃᓅᑦᑎᐊᕈᒪᓂᕐᒧᑦ ᑎᑎᕋᕐᕕᒃᑯᑦ ᑎᒥᑦᑎᐊᕙᐅᓇᔭᕐᓂᖏᓐᓄᑦ ᓯᕗᓕᖅᑎᐅᓂᐊᕐᓗᑎᒃ ᑭᕙᓪᓕᕐᒥ ᐱᓕᕆᐊᖑᔪᒪᔪᓂᒃ ᐱᓕᕆᐊᕆᖃᑦᑕᓕᐊᓂᒃᑕᖏᑦᑕ ᒥᒃᓵᓅᖓᖕᒪᑦ ᐅᖃᐅᔾᔨᒋᐊᖅᑎᖃᖅᑎᓪᓗᒋᑦ ᐊᒻᒪᓗ ᐃᓱᒪᓕᕆᓂᒃᑯᑦ ᑲᒪᖃᑦᑕᓕᐊᓂᒃᑎᓪᓗᒋᑦ.
ᐅᐃᓕᔭᒻᔅ − ᖃᓗᔾᔭᖅ ᐅᖃᖅᖢᓂ ᐳᓛᕐᕕᒃ ᖃᑉᓗᒎᖅ ᓄᓇᒧᙵᐅᔾᔨᔪᒪᓚᐅᖅᑑᒐᓗᐊᖅ 2020-2021 ᑮᓇᐅᔭᖃᕐᓇᐅᔪᖅ ᐃᓱᓕᖅᑳᖅᑎᓐᓇᒍ, ᑭᓯᐊᓂ ᓄᕙᒡᔪᐊᕐᓂᖅ − 19 ᐱᔾᔪᑎᒋᑉᓗᒍ ᐊᒻᒪᓗ ᐊᐅᓪᓚᕐᓂᐊᕐᓗᓂ ᒪᓕᒃᑕᐅᔭᕆᐊᓖᑦ ᑕᐃᒪᐅᑎᓪᓗᒋᑦ ᓄᕙᒡᔪᐊᕐᓂᒃᑯᑦ, ᐃᓕᓐᓂᐊᖅᑎᑦᑎᒍᑏᑦ ᓴᓇᔨᓂᒃ ᑭᖑᕙᖅᓯᒪᖕᒪᑕ, ᐊᕐᕌᒍ ᑕᐃᒪᐃᓕᐅᖅᑎᑦᑎᓇᓱᙶᖅᐸᑕ ᐱᐅᓂᖅᓴᐅᔫᔭᓕᖅᖢᓂ.
ᐅᖃᖅᖢᓂᓗ ᐊᑭᒋᓂᐊᖅᑕᖏᒡᒎᖅ ᐋᖅᑭᒃᓱᖅᑕᐅᔪᑦ ᓱᓕ ᐃᑲᔫᑎᒃᑯᑦ ᑕᒡᕙᓂ ᐅᑭᐅᒥ, ᐃᓚᐅᖃᑕᐅᑉᓗᒋᑦ ᑎᑭᓴᐃᔾᔪᑎᒃᓴᑦ, ᐃᖏᕐᕋᔾᔪᑎᒃᓴᑦ, ᓇᑉᐸᖅᑎᕆᓂᕐᒧᓪᓗ ᐊᒻᒪᓗ ᑎᑭᑎᑦᑎᔭᕆᐊᖃᕐᓂᕐᒧᑦ ᐱᖁᑎᓂᒃ ᐊᑭᒃᓴᓂᒃ.
“ᐊᓕᐊᓇᐃᒍᓱᒃᑐᖓ ᑕᒪᓐᓇ ᐃᑲᔫᑎ ᐊᐅᓪᓛᓕᕈᒫᕐᒪᑦ.
“ᖃᐅᔨᒪᔪᒍᑦ ᐃᑲᔫᑎᒃᓴᑦ ᑕᐃᒪᐅᖕᒪᑕ ᐊᒻᒪᓗ ᐃᑲᔪᕆᐊᕈᓐᓇᖅᑐᑦ ᑕᐃᒪᐅᖕᒪᑕ ᐃᓄᖕᓂᒃ ᐃᑲᔪᖅᑕᐅᔪᒪᔪᓂᒃ, ᑭᓯᐊᓂ ᐊᐅᓪᓚᕆᐊᖃᕋᔪᖕᒪᑕ ᓄᓇᕗᑦ ᓯᓚᑖᓄᑦ ᐃᑲᔪᖅᑕᐅᔭᖅᑐᕈᒪᒍᑎᒃ ᐊᒻᒪᓗ/ᐅᕝᕙᓘᓐᓃᑦ ᐱᔭᕆᐊᖃᖅᑕᖏᑦᑎᒍᑦ.
“ᑕᐃᒪᑐᖅ ᑕᒪᓐᓇ ᐃᑲᔫᑎᒃᓴᖅ ᐃᑲᔫᑕᐅᔪᓐᓇᕐᓂᐊᖅᐳᖅ ᐊᖏᕐᕋᒧᑦ ᖃᓂᓐᓂᖅᓴᒃᑯᑦ.”