Skip to content

ᐱᙳᐊᕐᓂᐅᔪᖅ lacrosse ᐆᒃᑐᖅᑕᐅᓂᐊᖅᑐᖅ ᑲᖏᖅᖠᓂᕐᒥ

ᐱᓕᕆᓇᓱᒃᑐᑦ ᓴᖅᑭᑎᑦᑎᓇᓱᒃᖢᑎᒃ ᓄᑖᒥᒃ ᐱᙳᐊᕈᑎᒥᒃ ᑲᖏᖅᖠᓂᕐᒥ ᑕᒪᓐᓇ ᐃᓚᒋᔭᐅᖃᑕᐅᔪᖅ Hᐊᑭᕐᓂᕐᒧᑦ, ᑕᒪᓐᓇ ᑲᔪᓯᒋᐊᕐᓂᐊᖅᑐᖅ ᐱᖓᓱᓂᒃ ᐅᑉᓗᓂᒃ ᐃᓕᓐᓂᐊᖅᑎᑕᐅᓗᑎᒃ ᐱᓇᓱᐊᕈᓯᐅᑉ ᓄᙳᐊᓃᑦᑐᒫᖅᑐᖅ. ᕿᑎᒃᑐᓕᕆᔨᒃᑯᑦ ᑲᒪᔨᖓ ᑕᐃᕕᑎ ᑲᓛᒃ ᐊᔭᐅᖅᑐᐃᖃᑕᐅᔪᖅ lacrosse ᖃᐅᔨᔪᒪᑉᓗᒍ ᐊᓕᐊᓇᐃᒋᔭᐅᓂᐊᕐᒪᖔᑦ ᑲᖏᖅᖠᓂᕐᒥ, ᐃᓕᓐᓂᐊᖅᑎᑦᑎᓂᐊᖅᑐᑦ ᐱᓇᓱᐊᕈᓯᐅᑉ ᓄᙳᐊᓂ ᖃᐃᔪᒥ ᐃᓕᓐᓂᐊᕈᑕᐅᓗᓂ Hᐊᑭᖃᑦᑕᓕᓵᖅᑐᓄᑦ ᒪᒃᑯᒃᑐᕐᔪᐊᓄᑦ ᑎᑭᓪᓗᒍ midget-ᓄᑦ.

Hᐊᑭᖅᑎᐊᓛᑦ, ᓴᐅᒥᖅᖠᕐᒥ, ᕆᑭ ᐳᑐᒥᕋᖅᑐᖅ, ᐳᕋᐃᔭᓐ ᑭᙵᖅᑐᖅ, ᑕᓂᐅᓪ ᑭᙵᖅᑐᖅ ᐊᒻᒪᓗ ᐃᒪᔅ ᓇᑯᓛᖅ ᖁᕕᐊᓱᓪᓚᕆᒃᑐᑦ ᑕᐃᕕᑎ ᑲᓛᒃᒦᖃᑕᐅᔭᕆᐊᒃᓴᖅ ᐊᖓᔪᖅᑳᕆᔭᐅᔪᖅ ᐃᓕᓐᓂᐊᖅᑎᑦᑎᔨᓂᒃ ᑲᖏᖅᖠᓂᕐᒥᐅᑕᖅ ᓯᕗᓪᓕᖅᐹᒥ Rankin Rock-ᑯᑦ Hᐊᑭᕐᓂᕐᒥᒃ ᐃᓕᓐᓂᐊᖅᑎᑦᑎᓪᓗᒋᑦ ᖃᒪᓂ’ᑐᐊᕐᒥ ᓄᕕᐱᕆ, 21-ᒥ 24-ᒧᑦ, 2018-ᒥ. ᑲᓛᒃ lacrosse-ᒥᒃ ᐱᙳᐊᕈᑕᐅᕙᒃᑐᒥᒃ ᐱᒋᐊᖅᑎᑦᑎᓇᓱᓕᖅᑐᖅ ᓄᓇᒥᓂᒃ. ᐊᔾᔨ ᑕᐃᕕᑎ ᑲᓛᒃᒥᙶᖅᑐᖅ

ᑲᓛᒃ ᐅᖃᖅᖢᓂ ᐱᔫᒥᒍᓱᒃᑐᖃᖅᑑᔭᓚᐅᖅᑐᕈᖅ, ᑕᐃᒪᐃᒻᒪᑦ ᐆᒃᑐᓚᐅᖅᑕᖓ ᕿᑎᒃᑐᓕᕆᔨᒃᑯᑎᒍᑦ ᓄᓇᓕᖕᓂ ᒐᕙᒪᒃᑯᓐᓂᓗ ᐱᔨᑦᓯᕋᖅᑎᒃᑯᑎᒍᑦ ᑮᓇᐅᔭᖅᑖᕈᑎᒋᑉᓗᒍ ᓂᐅᕕᕈᓐᓇᕐᓂᕐᒧᑦ ᐊᓇᐅᓕᒑᓂᒃ ᐊᒻᒪᓗ ᐊᖅᓴᕐᓂᒃ ᐊᑐᖅᑕᐅᕙᒃᑐᓂᒃ lacrosse-ᑯᑦ lacrosse ᐱᙳᐊᕐᓂᖅ ᓴᖅᑭᑎᑕᐅᔪᓐᓇᖁᑉᓗᒍ.

ᐅᖃᖅᖢᓂ lacrosse−ᒍᖅ Hᐊᑭᑎᑐᑦ ᐱᙳᐊᖅᑕᐅᓲᖅ ᐊᔾᔨᕐᓚᑦᑎᐊᖓ, ᑕᐃᒪᐃᒻᒪᑦ ᕿᑎᖃᑦᑕᕐᓂᐊᖅᑐᑦ Hᐊᑭᒍᑎᒥᓂᒃ ᐊᑐᕈᓐᓇᖃᑦᑕᕐᓂᐊᖅᑐᑦ.

ᑭᓇᑐᐃᓐᓇᖅ ᓄᑕᕋᖅ ᐱᔫᒥᒍᓱᒃᑐᖅ ᐃᓕᓐᓂᐊᖃᑕᐅᖁᔭᖅᐳᑦ ᐱᓇᓱᐊᕈᓯᐅᑉ ᓄᙳᐊᓂ, ᓯᑎᐱᕆ 25-ᒥ 27-ᒧᑦ, ᑭᓯᐊᓂ, ᐃᑲᔫᑕᐅᓪᓚᕆᖅᑰᖅᑐᖅ ᐊᒥᓱᑦ ᓄᑕᖅᑲᑦ ᓄᓇᑉᑎᓐᓂᒃ ᐃᓱᒫᓘᑎᖃᕆᐊᖃᔾᔮᙱᒻᒪᑕ ᐊᓐᓄᕌᖅᑖᕆᐊᒃᓴᖅ,” ᑕᐃᒪᓐᓇ ᐅᖃᖅᖢᓂ ᑲᓛᒃ.

ᑲᓛᒃ ᐃᓕᓐᓂᐊᖅᑎᑦᑎᓂᐊᖅᑐᖅ ᐊᑐᕐᓗᓂ ᓄᓇᓕᖕᒥ ᒪᒃᑯᒃᑐᓂᒃ ᓯᕗᓕᖅᑎᐅᔪᓂᒃ ᐃᑲᔪᖅᑎᒋᓗᓂᒋᑦ ᓲᕐᓗ Hᐊᑭᕐᓂᒃᑯᑦ ᐃᓕᓐᓂᐊᕈᑕᐅᖃᑦᑕᖅᑐᑎᑐᑦ Hᐊᑭᖃᑦᑕᕐᓂᐊᓕᕌᖓᑕ ᐃᓕᓐᓂᐊᕈᑕᐅᖃᑦᑕᖅᑐᑎᑐᑦ.

ᐅᖃᖅᖢᓂ ᓄᓇᕗᒥ ᑕᕐᕆᔭᐅᓯᐊᖑᓚᐅᖅᑐᖅ ᑐᙵᕕᒋᑉᓗᒍ, The Grizzlies, lacrosse ᐊᓕᐊᓇᐃᒋᔭᐅᓕᖅᓯᒪᔪᖅ ᒪᒃᑯᒃᑐᓄᑦ ᒫᓐᓇᐅᔪᖅ ᐊᒻᒪᓗ ᑕᐃᒪᑐᕈᖅ ᑕᒪᓐᓇ ᐊᓕᐊᓇᐃᒋᔭᐅᑎᓪᓗᒍ ᐊᒥᓱᑦ ᓄᑕᖅᑲᑦ ᐊᑎᓕᐅᖃᑕᐅᓂᐊᖅᐳᑦ.

ᐊᒥᓲᒃᐸᑕ ᐆᒃᑐᖅᑐᑦ ᐃᓕᓐᓂᐊᕈᑎᒥᒃ ᐊᒻᒪᓗ ᐊᓕᐊᓇᐃᒋᔭᐅᒃᐸᑦ ᑕᒪᓐᓇ ᐱᙳᐊᕐᓂᐅᕙᒃᑐᖅ, ᑕᐃᒪᑐᖅ, lacrosse-ᑎᑦᑎᖃᑦᑕᕐᓂᐊᖅᐳᒍᑦ ᐅᑭᐅᒥ ᖃᐃᔪᒥ. ᑕᒪᑦᑕ ᐃᓕᑦᑎᕙᓪᓕᐊᓂᐊᕋᑉᑕ,” ᑕᐃᒪᓐᓇ ᐅᖃᖅᖢᓂ.

ᑲᓛᒃ ᐅᖃᖅᖢᓂ lacrosse ᐱᒋᐊᕈᑕᐅᓂᐊᖅᑐᖅ ᑲᖏᖅᖠᓂᕐᒥ ᐱᙳᐊᖅᑐᑦ ᖁᕕᐊᓱᖃᑦᑕᑐᐊᖅᐸᑕ.

ᐅᖃᖅᖢᓂ ᓄᑕᖅᑲᒡᒎᖅ ᖁᕕᐊᓱᒃᑎᓪᓗᒋᑦ ᐊᒻᒪᓗ ᐃᓄᐃᑦ ᐅᖃᐅᓯᖃᑦᑎᐊᖃᑦᑕᖅᐸᑕ ᐊᓕᐊᓇᐃᓐᓂᖓᓄᑦ ᐃᑲᔫᑕᐅᓂᐊᖅᑐᖅ ᓴᖅᑭᑎᑦᑎᓂᕐᒧᑦ ᓄᑖᒥᒃ.