Skip to content

ᐊᕐᕕᐊᕐᒥᐅᑦ ᓯᕗᓪᓕᖅᐸᐅᑎᔪᑦ ᑲᐱᔭᐅᔪᓂᒃ

ᓄᓇᓕᒃ ᐊᒃᑐᖅᑕᐅᓯᒪᓂᖅᐹᖑᔪᖅ ᓄᕙᒡᔪᐊᕐᓂᒃᑯᑦ ᓄᓇᕗᒥ ᑲᐳᖅᑲᐃᕝᕕᐅᓕᓚᐅᖅᑐᖅ ᐱᓇᓱᐊᕈᓯᐅᓵᖅᑐᒥ ᑭᓯᐊᓂ ᐸᕐᓇᐅᑕᐅᓯᒪᔪᑦ ᒪᓕᒍᑎᑦᑎᐊᖅᓯᒪᙱᑦᑐᑦ ᓱᓕ ᐊᕐᕕᐊᓂ.

ᑐᓴᒐᒃᓴᖅ ᓴᖅᑭᑎᑕᐅᑎᓪᓗᒍ, 500 ᐅᖓᑖᓃᑦᑐᑦ ᓄᓇᓕᖕᒥ ᐃᓄᒋᐊᖕᓂᖃᖅᑎᓪᓗᒍ ᐊᕐᕕᐊᑦ 3,000 ᖃᓂᒋᔭᖓᓂᒃ ᐊᖏᖅᓯᒪᓕᓚᐅᖅᑐᑦ ᑲᐱᔭᐅᓇᔭᕐᓂᕐᒧᑦ ᐊᒻᒪᓗ Hᐊᒻᓚᒃᑯᑦ ᐊᑐᖅᑕᐅᒐᔪᒃᑐᒥᒃ ᑭᕙᓪᓕᕐᒥ ᐊᑐᓕᖅᖢᑎᒃ - ᓴᖅᑭᑎᑦᑎᓯᒪᔪᑦ ᑮᓇᐅᔭᓂᒃ ᓵᓚᒃᓴᖅᑕᐅᔪᓐᓇᖅᑐᓂᒃ ᐊᒧᔭᐅᔪᖃᕐᓗᓂ ᐊᑎᕐᓂᒃ ᑲᐱᔭᐅᓯᒪᔪᓂᒃ.

ᐱᓚᔾᔨ ᐊᐅᓚᔾᔪᑦ ᐃᓚᒋᔭᐅᖃᑕᐅᔪᖅ ᖁᓕᖏᓗᐊᖅᑑᓚᐅᖅᑐᓂᒃ ᐃᓐᓇᑐᖃᕐᓂᒃ ᑲᐱᔭᐅᔪᒪᔪᓂᒃ ᓄᕙᒡᔪᐊᖅᑕᐃᓕᒪᔾᔪᑎᒥᒃ ᐱᓇᓱᐊᕈᓯᐅᓚᐅᖅᑐᒥ ᐊᕐᕕᐊᓂ ᑕᑯᑎᑦᑎᔪᒪᑉᓗᑎᒃ ᑲᐴᑎ ᐊᑦᑕᓇᖅᑑᙱᒻᒪᑦ.

ᒪᐃᔭ ᐊᕐᕕᐊᓂ ᔫ ᓴᕕᑲᑖᖅ ᓄᑲᖅᖠᖅ ᐅᖃᖅᖢᓂ ᖁᕕᐊᓱᑦᑎᐊᓚᐅᕋᒥᒎᖅ ᑎᖕᒥᓲᖅ ᒥᒻᒪᑦ ᑲᐴᓯᔭᖅᖢᓂ ᕿᑎᐊᓂᐅᓚᐅᖅᑐᒥ ᔭᓄᐊᕆ 13-ᒥ.

ᐅᖃᖅᖢᓂ ᓄᓇᒃᑰᕈᑎᒃᑯᑦ ᑲᐴᑏᑦ ᓄᓇᓕᖕᒧᙵᐅᔾᔭᐅᓚᐅᕐᒪᑕ ᒥᑦᑕᕐᕕᖕᒥ ᐃᓄᐃᑦ ᖁᕕᐊᓱᖁᑉᓗᒋᑦ ᑎᑭᓐᓂᖏᓐᓄᑦ.

ᐊᒥᓱᑦ ᓈᓚᐅᑎᒃᑰᖅᓯᒪᔪᑦ ᐅᖃᖅᖢᑎᒃ ᖁᕕᐊᓱᖕᓂᕐᒥᓂᒃ ᖁᔭᓕᓂᕐᒥᓂᒡᓗ ᑎᑭᑎᑕᐅᓯᒪᓕᕐᓂᖏᓐᓄᑦ ᑲᐴᑏᑦ,” ᑕᐃᒪᓐᓇ ᐅᖃᖅᖢᓂ ᓴᕕᑲᑖᖅ.

ᓯᕗᓪᓕᖅᐹᒥ ᑕᐃᔭᐅᑎᓪᓗᒋᑦ ᐃᓅᔪᓐᓃᖅᓯᒪᔪᑦ ᓄᓇᕗᒥ − ᐊᑕᐅᓯᖅ ᐊᕐᕕᐊᓂ ᓄᓇᖃᖅᑐᖅ - ᐃᓄᐃᑦ ᐅᔾᔨᕈᓱᖕᓂᖅᓴᐅᓕᓚᐅᖅᑐᑦ ᖃᓄᐃᑦᑐᖃᕈᓐᓇᕐᓂᖓᓄᑦ ᓄᓇᒥ.

“ᐃᓅᔪᓐᓃᓚᐅᖅᑐᑯᓗᒃ ᐊᐃᑦᑖᖑᒐᓗᐊᖅ ᑭᓯᐊᓂ ᐃᓄᐃᑦ ᑐᐸᒃᐹᓪᓕᓚᐅᖅᑐᑦ ᐅᔾᔨᕈᓱᓕᖅᖢᑎᒃ ᖃᓄᐃᑦᑐᖃᕈᓐᓇᕐᓂᖓᓄᑦ, ᐃᓄᐃᑦ ᑕᒪᕐᒥᒃ ᒪᓕᑦᑎᐊᕋᓱᓚᐅᕋᓗᐊᖅᑎᓪᓗᒋᑦ ᒪᓕᒃᑕᐅᔭᕆᐊᓕᖕᓂᒃ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᓯᕗᓪᓕᖅᐹᖅ ᓄᕙᒡᔪᐊᕐᓂᖅᑖᖅᑳᖅᑎᓐᓇᒍᓘᓐᓃᑦ.

“ᐊᑕᐅᓰᕐᓗᖓᓘᓐᓃᑦ ᐃᒃᐱᒍᓱᓚᐅᙱᑦᑐᖓ ᑕᒪᓐᓇ ᐋᖅᑭᖕᓂᐊᕐᓂᖓᓄᑦ ᐊᔪᕐᓇᓕᕐᓂᐊᕐᒪᖔᑦ. ᐅᒃᐱᕈᓱᑦᑎᐊᓚᐅᖅᑐᖓ ᓄᓇᑉᑎᓐᓂᒃ ᐊᒻᒪᓗ ᒎᑎᒥᒃ, ᐊᐃᑦᑖᖑᒐᓗᐊᖅ ᓄᕙᒡᔪᐊᕐᓂᖅ ᐊᑯᓂ ᑕᒫᓃᓚᐅᕐᒪᑦ ᓄᓇᑉᑎᓐᓂᒃ ᑕᒫᓃᑦᑐᖅ ᖃᐅᔨᒪᔭᐅᓇᓂ.”

ᓴᕕᑲᑖᖅ ᐅᖃᖅᖢᓂ ᐅᒃᐱᕈᓱᑦᑎᐊᖅᑐᕉᖅ ᐃᓅᓯᕆᓚᐅᖅᑕᖏᓐᓄᑦ ᐅᑎᕈᓐᓇᕐᓂᐊᕐᒪᑕ ᕿᓚᒻᒥᐅᔪᒃᑯᑦ, ᑲᐴᑎᒃᑯᑦ ᐋᓐᓂᐊᖅᑕᐃᓕᒪᔾᔪᑎ ᑎᑭᐅᑎᓯᒪᑦᑎᐊᓕᖅᐸᑦ ᐱᓗᐊᖅᑐᒥ.

ᓄᕙᒡᔪᐊᖅᑖᖅᑕᐃᓕᒪᔾᔪᑎ ᐃᓱᒪᖅᓱᕈᓐᓇᖅᓯᓂᕐᒧᑦ ᖃᓂᓪᓕᕚᓪᓕᕈᑕᐅᓂᐊᕐᒪᑦ, ᑭᓯᐊᓂ, ᑐᓴᒐᒃᓴᖅ ᓴᖅᑭᑎᑕᐅᓂᐊᓕᖅᑎᓪᓗᒍ, 16.6%−ᑐᐃᓐᓇᑦ ᐊᕐᕕᐊᕐᒥᐅᑦ ᐊᑎᓕᐅᖅᑕᐅᓯᒪᓕᓚᐅᖅᑐᑦ ᑲᐱᔭᐅᔪᓐᓇᕈᒫᕐᓂᕐᒧᑦ.

ᓄᕙᒡᔪᐊᖅᑖᖅᑕᐃᓕᒪᓂᕐᒧᑦ ᑲᐱᔭᐅᔪᒪᔪᑦ 60%-ᒦᒐᔪᒃᑐᑦ ᐃᓄᖁᑎᒋᔭᐅᔪᑦ ᐊᒥᓲᓂᖏᑦ ᒪᓕᒃᖢᒋᑦ, ᑭᓯᐊᓂ ᐅᒃᐱᕆᔭᐅᔪᖅ ᐃᓚᖏᓐᓂᒃ ᓄᓇᓕᖕᓂᒃ ᐊᑦᑎᒃᑑᔪᓐᓇᕐᒪᑦ ᐃᒻᒪᖄ 43%-ᒥ ᓄᕙᒡᔪᐊᕐᓂᒃᑯᑦ ᑐᕌᖓᔪᒃᑯᑦ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᕐᔪᐊᖓ ᐃᖢᐊᖅᓴᐃᔨ ᐸᑐᓴᓐ ᐊᐱᕆᔭᐅᓚᐅᕐᒪᑦ ᒫᓐᓇᓵᖑᓚᐅᖅᑐᖅ ᐊᕐᕕᐊᕐᒥᐅᓂᒃ ᑐᑭᓯᒋᐊᖅᑎᑦᑎᓯᒪᑎᓪᓗᒍ ᑭᐅᓚᐅᖅᑐᖅ 500 ᐅᖓᑖᓂᐊᕐᔪᒃ ᐃᓄᐃᑦ ᑲᐱᔭᐅᔪᒪᑉᓗᑎᒃ ᐅᖃᓗᒃᓯᒪᓕᕐᓂᖏᓐᓄᑦ,” ᑕᐃᒪᓐᓇ ᐅᖃᖅᖢᓂ ᓴᕕᑲᑖᖅ.

“ᐊᔭᐅᖅᑐᐃᖏᓐᓇᕋᑉᑕ ᑲᑉᐱᐊᓱᖁᔨᓇᑕ ᐊᒻᒪᓗ ᑐᑭᓯᓂᕐᓗᖁᔨᓇᑕ ᑭᓯᐊᓂ ᖃᕆᑕᐅᔭᒃᑯᑦ ᐅᖃᐅᓯᐅᖃᑦᑕᖅᑐᑦ ᐅᐃᒪᔮᖅᑎᑦᑎᓯᒪᖕᒪᑕ.

“ᕿᑎᐊᖑᓚᐅᖅᑐᒥ ᖄᖏᓵᖅᑐᒥ, Hᐊᒻᓚᒃᑯᑦ ᖁᓕᖏᓗᐊᖅᑐᓂᒃ ᐃᓐᓇᑐᖃᕐᓂᒃ ᓯᕗᓪᓕᖅᐸᐅᑎᑦᑎᓚᐅᖅᑐᑦ ᑲᐱᔭᐅᔪᓐᓇᖁᑉᓗᒋᑦ ᐃᓄᐃᑦ ᑕᑯᔪᓐᓇᖁᑉᓗᒋᑦ ᖃᓄᐃᙱᒻᒪᑦ ᑲᐱᔭᐅᓗᓂ ᐊᑦᑕᓇᙱᑦᑎᐊᕐᒪᓪᓗ.

“ᑕᒪᕐᒥᒃ ᑲᐱᔭᐅᓚᐅᖅᑐᑦ ᑕᐃᑲᓂ ᐅᑉᓗᕐᒥ ᖃᐅᒃᑎᓪᓗᒍ ᑐᐸᑦᑎᐊᓚᐅᖅᑐᑦ.”

ᓴᕕᑲᑖᖅ ᐅᖃᖅᖢᓂ ᐊᑕᐅᓯᕐᒥᒎᖅ ᖃᓄᐃᓕᐅᕈᑎᒥᒃ ᐊᑐᖅᑐᑦ Hᐊᒻᓚᒃᑯᑦ ᐊᒥᓱᙳᖅᐹᓪᓕᕈᓐᓇᖁᑉᓗᒋᑦ ᑲᐱᔭᐅᓂᐊᖅᑐᑦ ᑲᓇᑕᒥᐅᓄᑦ ᑐᓴᐅᒪᔭᐅᓕᖅᖢᓂ.

ᐅᖃᖅᖢᓂ ᐃᓚᖏᑦ ᑕᒪᑐᒥᙵ ᑕᐅᑐᖕᒪᑕ ᐊᐃᕙᐅᑕᐅᔪᓐᓇᕐᓂᖓᓄᑦ.

“ᑲᐱᔭᐅᔭᕆᐊᓖᑦ ᑲᐱᔭᐅᓯᒪᓕᖅᐸᑕ ᐊᑎᕐᓂᒃ ᐊᒧᓯᓂᐊᕋᑉᑕ ᑕᓪᓕᒪᓂᒃ ᐊᒧᔭᐅᔪᓪᓗ $2,000.00-ᑖᕐᓂᐊᖅᖢᑎᒃ ᐊᑐᓂ.

“ᐃᓛᒃ, 61 ᐅᑉᓗᑦ ᐃᓗᐊᓂ ᓄᕙᒡᔪᐊᕐᓂᖅᑕᖃᖅᑎᓪᓗᒍ ᐊᕐᕕᐊᓂ ᓄᑕᕋᓛᖅᑖᖅᑐᖃᖃᑦᑕᓚᐅᖅᑐᖅ ᐊᓈᓇᑦᑎᐊᒃᑯᖏᑦᑕ ᐊᑖᑕᑦᑎᐊᒃᑯᖏᑦᑕ ᑕᑯᔪᓐᓇᙱᖦᖢᓂᒋᑦ ᒪᓕᒃᑕᐅᔭᕆᐊᓖᑦ ᐱᔾᔪᑎᒋᑉᓗᒋᑦ.

“ᖃᓄᑭᐊᖅ ᐃᒃᐱᒍᓱᓚᐅᖅᐸᑦ ᔭᓄᐊᕆ 12-ᒥ ᑕᑯᔪᓐᓇᖅᓯᑕᐃᓐᓇᕐᒪᒋᑦ, ᑕᐃᒪᐃᒻᒪᑦ ᖁᔭᓐᓇᒦᕈᒪᔭᒃᑲ ᐊᕐᕕᐊᕐᒥᐅᑕᑦ ᓱᓇᓂᒃ ᐱᑦᑕᐃᓕᓚᐅᕐᒪᑕ ᖃᓄᐃᓕᐅᖅᑕᐃᓕᓚᐅᕐᒪᑕ, ᐊᒻᒪᓗ ᖁᔭᓐᓇᒦᕈᒪᔭᒃᑲ ᑕᒪᕐᒥᒃ ᑲᓇᑕᒥᐅᑕᑦ ᑐᒃᓯᐅᔾᔨᖃᑦᑕᓚᐅᕐᒪᑕ ᐊᕐᕕᐊᕐᒥᐅᓂᒃ.”