ᐊᒥᓱᑦ ᐊᕐᓇᑯᓗᐃᑦ ᓇᓂᓗᒃᑖᖅ ᓄᓇᕗᒥᙶᖅᓯᒪᔪᑦ ᑲᖏᖅᖠᓂᕐᒨᓚᐅᖅᑐᑦ ᐱᓇᓱᐊᕈᓯᐅᓵᖅᑐᒥ ᐊᔾᔨᐅᙱᑦᑐᒃᑯᑦ ᐃᓕᓐᓂᐊᕆᐊᖅᖢᑎᒃ ᓴᓇᑐᓕᓴᕐᕕᒃᑯᑎᒍᑦ.
ᑕᒪᓐᓇ ᐸᕐᓇᒃᑕᐅᓯᒪᔪᖅ Skills Canada Nunavut-ᑯᓐᓄᑦ, ᐱᖓᓱᓂᒃ ᐅᑉᓗᓂᒃ ᐃᓕᓐᓂᐊᕈᑎ ᐃᓕᓐᓂᐊᖅᑐᖃᓚᐅᖅᖢᓂ 30-ᓂᒃ 15-ᖑᔪᓂᒃ ᓄᓇᓕᖕᓂᙶᖅᑐᓂᒃ ᐃᓕᓐᓂᐊᕐᓂᓖᑦ 9-ᒥ 12-ᒧᑦ, ᐃᓚᐅᖃᑕᐅᑉᓗᑎᒡᓗ ᐃᓚᖏᑦ ᖁᑦᑎᖕᓂᓕᖕᒥ 12-ᒥ ᐃᓕᓐᓂᐊᕈᑎᒥᓂᒃ ᐱᐊᓂᒃᓯᓵᖅᑐᑦ.
“ᑕᐃᒪᓐᓇᐃᑦᑐᑦ ᐃᓕᓐᓂᐊᕈᑏᑦ ᓴᖅᑮᓐᓇᖅᑐᑦ ᐊᒥᐊᓕᑲᒃᑯᑦ ᓄᓇᖓᓂᒃ ᓇᓂᓗᒃᑖᖅ ᐊᒻᒪᓗ ᑲᓇᑕᒥ ᐊᒥᓱᓂᒃ ᐅᑭᐅᖑᓕᖅᑐᓂᒃ ᐊᒻᒪᓗ Skills Canada Nunavut-ᑯᑦ ᑕᐃᒪᐃᑦᑐᒥᒃ ᐃᓕᓐᓂᐊᕈᑎᒥᒃ ᓴᖅᑭᑎᑦᑎᔪᒪᐃᓐᓇᓚᐅᕐᒪᑕ ᑕᒫᓂ. ᒫᓐᓇᐅᔪᖅ ᐃᓱᒪᓚᐅᕋᑉᑕ ᑕᐃᒪᐃᓕᐅᖅᑎᑦᑎᓚᐅᖅᑕ ᑲᖏᖅᖠᓂᕐᒥ,” ᑕᐃᒪᓐᓇ ᐅᖃᖅᖢᓂ ᒋᐅᓪ Hᐊᑐᕐ, ᐃᓕᓐᓂᐊᕈᑎᒥᒃ ᐋᖅᑭᒃᓱᐃᔨ Skills Nunavut Canada-ᒥ.
ᐃᓚᐅᖃᑕᐅᔪᑦ ᐊᔾᔨᒌᙱᑦᑑᑕᐅᔪᓂᒃ ᓴᓇᑐᓕᓴᕈᑎᓂᒃ ᐆᒃᑐᕈᓐᓇᖅᓯᓚᐅᖅᑐᑦ ᐱᓇᓱᐊᕈᓯᐅᑉ ᐃᓗᐊᓂ, ᓲᕐᓗ ᕿᔪᓕᕆᔨᐅᓂᕐᒧᑦ, ᓱᑉᓗᓕᓕᕆᔨᐅᓂᕐᒧᑦ, ᐃᑯᒪᓕᕆᔨᐅᓂᕐᒧᑦ, ᐊᒻᒪᓗ ᐊᒥᓱᓂᒃ ᐊᓯᖏᓐᓂᒃ.
ᓱᑉᓗᓕᓕᕆᔨᐅᓂᕐᒧᑦ Hᐅᓚ Hᐅᑉᓂᒃ ᐊᑐᓚᐅᖅᑐᑦ ᓴᓇᑐᓕᓴᕐᕕᖕᒥ ᐊᑐᖅᑕᐅᖃᑦᑕᖅᑐᓂᒃ ᐊᑐᖅᖢᑎᒃ. ᕿᔪᓕᕆᓂᕐᒧᑦ ᐅᖃᓘᑎᐊᓛᑦ ᐴᒃᓴᖏᓐᓂᒃ ᓴᓇᓚᐅᖅᑐᑦ, ᐊᒻᒪᓗ ᐃᑯᒪᓕᕆᓂᕐᒧᑦ ᐊᑐᕈᓐᓇᖅᓯᓚᐅᖅᑐᑦ ᐊᖁᒋᐅᖅᓴᓂᕐᒧᑦ ᐊᑐᖅᑕᐅᖃᑦᑕᖅᑐᒥᒃ ᓄᓇᕗᒥ ᓯᓚᑦᑐᖅᓴᕐᕕᖕᒥ.
“ᐊᓯᖓᑦᑕᐅᖅ ᐃᓕᓐᓂᐊᖅᑎᑦᑎᔩᑦ ᑐᓴᖅᑎᖁᓚᐅᖅᑕᖅᐳᑦ ᐃᓚᐅᔪᓄᑦ ᓴᓇᑐᓕᓴᕐᕕᒃᑯᑦ ᓴᓇᔭᒃᓴᑦ ᖃᓄᐃᑦᑑᖕᒪᖔᑕ,” ᑕᐃᒪᓐᓇ ᐅᖃᖅᖢᓂ Hᐊᑐᕐ. “ᖁᕕᐊᒋᔭᐅᑦᑎᐊᓚᐅᖅᑐᑦ ᐊᕐᓇᕐᓄᑦ ᑐᓴᖅᖢᑎᒃ ᖃᓄᐃᑦᑑᖕᒪᖔᑕ ᓴᓇᑐᓕᓴᕐᕕᒃᑯᑦ ᐃᓕᓐᓂᐊᖅᓯᒪᔪᑦ.”
ᐃᖃᓗᖕᒥᐅᑕᖅ ᐃᒪ ᐊᑯᓗᒡᔪᒃ−Hᐊᑭᑦ, ᓴᓇᑐᓕᓴᕐᓂᕐᒧᑦ ᐃᓕᓐᓂᐊᖅᑐᖅ ᐱᖁᑎᕐᔪᐊᓂᒃ ᒥᙳᐊᕆᐅᖅᓴᓂᒃᑯᑦ ᐊᒻᒪᓗ ᖄᖅᑕᖅᑐᓕᕆᓂᒃᑯᑦ, ᒥᐊᓂᖅᓯᔨᐅᖃᑕᐅᓚᐅᖅᑐᖅ ᐃᓕᓐᓂᐊᕆᐊᖅᑐᓂᒃ.
ᐊᕐᓇᐃᑦ ᐅᑉᓘᑉ ᐃᓗᐊᓂ ᐱᓕᕆᐊᕆᔭᖏᑦᑕ ᐃᓚᖓᒍᑦ ᐅᖃᓪᓚᖃᑦᑕᓚᐅᖅᑐᖅ ᐃᓕᓐᓂᐊᖅᑐᓄᑦ ᐃᓕᓯᒪᔭᕐᒥᓂᒃ ᐱᓕᕆᐊᕆᓯᒪᔭᕐᒥᓂᒃ ᓴᓇᖃᑕᐅᓕᕌᖓᑦ ᐱᓕᕆᕝᕕᒡᔪᐊᓂᒃ ᑲᓇᑕᐅᑉ ᖃᑉᓗᓈᑦ ᓄᓇᖏᓐᓂᒃ, ᐃᒪᖁᑎᒋᔭᐅᔪᓂᒡᓗ ᓂᑯᕕᓐᓛᓐᒥ ᐱᓕᕆᓯᒪᓂᕐᒥᓂᒃ ᐅᖅᓱᐊᓗᓕᕆᓂᒃᑯᑦ.
“ᐊᓕᐊᓇᐃᑦᑐᐊᓘᓚᐅᖅᑐᖅ ᑕᐅᑐᒃᖢᒋᑦ ᐊᕐᓇᑯᓗᐃᑦ ᐱᔫᒥᒍᓱᒃᑐᑦ ᓴᓇᑐᓕᓴᕐᓂᒃᑯᑦ,” ᑕᐃᒪᓐᓇ ᐅᖃᖅᖢᓂ ᐊᑯᓗᒃᔪᒃ−Hᐊᑭᑦ, 300-ᓂᒃ ᐃᑲᕐᕋᓂᒃ ᐱᓕᕆᔭᕆᐊᖃᖅᑐᖅ ᐱᐊᓂᒃᓯᓂᐊᕐᓗᓂ ᐃᑲᕐᕋᓂᒃ ᐊᓕᓚᔪᖅᑖᕈᑎᒃᓴᒧᑦ.
“ᐅᖃᐅᑎᓚᐅᖅᑕᒃᑲ ᐊᒥᓲᖕᒪᑕ ᐊᕐᓇᐃᑦ ᐱᓕᕆᓚᐅᖅᑐᑦ ᐱᓕᕆᐊᕆᔭᕐᒪ ᐊᔾᔨᖓᓂᒃ. ᐊᓕᐊᓇᐃᑦᑐᐊᓘᓚᐅᖅᑐᖅ ᑕᑯᑉᓗᓂ ᖃᑉᓯᓪᓚᑦᑖᖑᓂᖏᓐᓄᑦ ᐊᕐᓇᑦ ᓴᓇᑐᓕᓴᕐᓂᕐᒧᑦ ᐃᓕᓐᓂᐊᖅᑐᑦ.”
ᐊᑯᓗᒃᔪᒃ−Hᐊᑭᑦ ᐅᖃᐅᔾᔨᓚᐅᕐᒥᔪᖅ ᐊᕐᓇᕐᓂᒃ ᑕᑯᖃᑦᑕᕐᓂᐊᖅᑐᒃᓴᐅᓂᖏᓐᓄᑦ ᐃᓄᖕᓂᒃ ᑲᑕᒃᑎᕆᓂᐊᖅᑐᓂᒃ ᑕᐃᒪᐃᑦᑐᓕᕆᔨᐅᓂᖏᓐᓄᑦ ᐊᕐᓇᐅᓂᖏᑦ ᑕᑯᑉᓗᒋᑦ.
“ᐅᕙᒻᓂᒃ ᐊᔪᕋᓱᒋᑉᓗᑎᒃ ᐊᒃᓱᕈᕐᓇᙱᓐᓂᖅᓴᐅᔪᓂᒃ ᐱᓕᕆᐊᒃᓴᓂᒃ ᖃᐃᑦᑎᓇᓱᖃᑦᑕᓚᐅᖅᑐᑦ, ᑭᓯᐊᓂ ᑐᒃᓯᕋᐃᓐᓇᖃᑦᑕᓚᐅᖅᑐᖓ ᐊᒃᓱᕈᕐᓇᕐᓂᖅᓴᕐᓂᒃ ᓴᓇᔭᒃᓴᓂᒃ,” ᑕᐃᒪᓐᓇ ᐅᖃᖅᖢᓂ ᐊᑯᓗᒃᔪᒃ−Hᐊᑭᑦ. “ᐅᐱᒍᓱᑦᑎᐊᖃᑦᑕᓚᐅᖅᑐᑦ ᐱᓕᕆᐊᕆᔪᓐᓇᖅᑕᒃᑲᓂᒃ, ᐅᕝᕙᓘᓐᓃᑦ ᖃᓄᖅ ᐱᐅᑎᒋᓂᖏᑦ ᐅᔾᔨᕆᔭᐅᕙᒃᖢᑎᒃ ᐅᖃᐅᑎᔭᐅᕙᓕᖅᖢᖓᓗ ᐱᓕᕆᐊᕆᔭᒃᑲ ᐱᐅᓂᖅᓴᐅᓂᖏᓐᓄᑦ ᐊᑯᓂ ᑕᐃᒪᐃᑦᑐᓕᕆᔨᐅᓕᖅᑐᓂᒃ. “ᐅᖃᐅᑎᓚᐅᖅᑕᒃᑲ, ᑭᓇᑐᐃᓐᓇᕐᒧᑦ ᐊᔪᙱᓐᓂᕋ ᑲᑕᒃᑎᖅᑕᐅᔪᓐᓇᙱᑦᑐᖅ.”
ᐅᖃᖅᖢᓂᓗ ᑕᑯᒃᑲᓐᓂᕈᒪᓂᕐᒥᓄᑦ ᐊᕐᓇᕐᓂᒃ ᓄᓇᕗᒥ ᑎᒍᓯᔪᓐᓇᖅᑐᓂᒃ ᐱᕕᒃᓴᕆᔭᐅᔪᓂᒃ ᓴᓇᔪᓐᓇᕐᓂᕐᒧᑦ ᐅᑭᐅᖅᑕᖅᑐᒥ.
“ᐅᖃᐅᓯᕆᓚᐅᙱᑕᕋᓗᐊᕋ ᐅᖃᓪᓚᒃᑎᓪᓗᖓ ᑭᓯᐊᓂ ᐅᖃᓪᓚᐅᔭᖅᑎᓪᓗᑕ ᓂᑉᓕᐅᑎᒋᖃᑦᑕᓚᐅᖅᑕᕋ. ᐊᒥᓲᖕᒪᑕ ᐃᒡᓗᓕᐅᖅᑏᑦ ᑎᑭᑎᑕᐅᓲᑦ ᓄᓇᕗᒧᑦ ᐃᒡᓗᓕᐅᕆᐊᖅᑐᖅᖢᑎᒃ ᐊᒻᒪᓗ ᒫᓐᓇᐅᔪᖅ ᓴᓇᒋᐅᖅᓴᔪᑦ ᓱᓇᙳᕈᓐᓇᖅᐸᑕ ᓴᓇᑐᓕᓴᕐᕕᒃᑯᑎᒍᑦ, ᐱᓗᐊᖅᑐᒥ ᐊᕐᓇᐅᒃᐸᑕ, ᐊᓕᐊᓇᐃᑦᑐᒻᒪᕆᐊᓘᓇᔭᖅᑐᖅ,” ᑕᐃᒪᓐᓇ ᐅᖃᖅᖢᓂ.
“ᐃᓄᐃᑦ ᓄᓇᕗᒥᐅᑦ ᓴᓇᔪᓐᓇᖅᐸᑕ ᓄᓇᕗᒥ ᓄᓇᕗᒥᐅᑦ ᐊᒥᓲᓂᖅᓴᑦ ᓴᓇᔪᓐᓇᖅᓯᓇᔭᖅᑐᑦ ᕿᔪᓕᕆᔨᐅᓂᒃᑯᑦ, ᓱᑉᓗᓕᓕᕆᔨᐅᓂᒃᑯᑦ, ᐃᒡᓗᓕᕆᔨᐅᓂᒃᑯᑦ, ᓴᓇᑐᓕᓴᕐᕕᒃᑯᑦ ᐃᓕᓐᓂᐊᕈᑕᐅᕙᒃᑐᒃᑯᑦ.”