Skip to content

ᐊᐅᔭᒃᑯᑦ ᐃᑲᔫᑏᑦ ᐃᑲᔫᑕᐅᖃᑦᑕᖅᑐᑦ ᒪᒃᑯᒃᑐᑦ ᖃᓄᐃᙱᑦᑐᓐᓇᖁᑉᓗᒋᑦ ᐊᒃᓱᕈᕐᓇᖅᑐᒃᑰᖅᑎᓪᓗᑕ

ᐱᖓᓲᔪᑦ ᐃᑲᔫᑏᑦ ᐋᖅᑭᒃᓱᖅᑕᐅᓯᒪᔪᑦ ᐊᒻᒪᓗ ᑲᒪᒋᔭᐅᔪᑦ (ᐃᓕᑕᖅᓯᓂᖅ) ᓄᓇᕗᒥ ᐅᖃᐅᓯᓕᕆᓂᕐᒧᑦ ᑲᑎᒪᔨᓄᑦ ᑲᔪᓯᓂᖃᑦᑎᐊᓚᐅᖅᑐᑦ ᑲᖏᖅᖠᓂᕐᒥ ᐊᐅᔭᖅ.

ᐃᓕᑕᖅᓯᓂᒃᑯᓐᓂᙶᖅᑐᖅ ᑭᓕ ᑲᓛᒃ−ᓕᓐᑎᐅᓪ ᐅᖃᓚᐅᖅᑐᖅ ᑕᒪᒃᑯᐊ ᐃᓕᓐᓂᐊᕈᑏᑦ ᓴᖅᑭᑎᑕᐅᔪᓐᓇᖅᓯᓚᐅᕐᒪᑕ ᓄᓇᕗᑦ ᒐᕙᒪᒃᑯᖏᑦᑕ ᐃᓄᓕᕆᔨᒃᑯᖏᓐᓄᑦ, ᑮᓇᐅᔭᖅᑖᖅᑎᑦᑎᒐᔪᒃᑐᑦ ᐃᓕᑕᖅᓯᓂᒃᑯᑦ ᐃᑲᔫᑕᐅᔪᓄᑦ ᓴᖅᑭᑎᑕᐅᒐᔪᒃᑐᓂᒃ ᑲᖏᖅᖠᓂᕐᒥ.

ᕋᒧᓇ ᓂᕕᐊᑦᓯᐊᖅ ᕿᓇᓗᒐᕆᐅᖅᑐᖅ ᒪᒃᑯᒃᑐᑦ ᐱᓇᓱᐊᕈᓯᐅᑉ ᐃᓗᐊᓂ ᐃᖃᓗᒐᓱᒃᑎᑕᐅᓚᐅᖅᑎᓪᓗᒋᑦ (ᐃᓕᑕᖅᓯᓂᖅ) ᓄᓇᕗᒥ ᐅᖃᐅᓯᓕᕆᔨᒃᑯᑦ ᑲᑎᒪᔨᖏᓐᓄᑦ ᑲᖏᖅᖠᓂᕐᒥ ᐊᐅᔭᖅ. ᐊᔾᔨ ᑭᓕ ᑲᓛᒃ−ᓕᓐᑎᐅᒥᙶᖅᑐᖅ

ᐅᖃᖅᖢᓂ ᒪᒃᑯᒃᑐᓄᒡᒎᖅ ᐃᑲᔫᑕᐅᖃᑕᐅᔪᖅ ᐊᐅᔭᖅ ᐃᑲᔫᑖᐅᓚᐅᖅᑐᖅ ᐃᖃᓗᒐᓱᖕᓂᕐᒧᑦ ᑐᕌᖓᓂᖃᓚᐅᖅᑐᖅ ᒪᒃᑯᒃᑐᑦ ᐃᖃᓗᖕᓄᙵᐅᓪᓗᑎᒃ ᐃᖃᓗᒐᓱᒃᑎᑕᐅᓚᐅᖅᑐᑦ, ᐊᒻᒪᓗ ᐃᓕᓐᓂᐊᖅᑎᑕᐅᑉᓗᑎᒃ ᖃᓄᖅ ᐃᖃᓗᐃᑦ ᓴᓗᒻᒪᖅᓴᖅᑕᐅᖃᑦᑕᕐᒪᖔᑕ ᑲᒪᒋᔭᐅᖃᑦᑕᕐᒪᖔᑕ ᐱᑉᓯᓕᐊᖑᖃᑦᑕᕐᒪᖔᑕᓗ.

ᐃᓕᑦᑎᓚᐅᕐᒥᔪᑦ ᖃᓄᖅ ᐃᖃᓗᖕᓂᒃ ᐃᓯᖅᑎᕆᖃᑦᑕᕐᒪᖔᑕ ᐊᒻᒪᓗ ᐃᖃᓗᖕᓂᒃ ᖃᔪᓕᐅᕐᓂᕐᒧᑦ ᐊᑕᐅᓯᕐᒥᒃ ᐱᓇᓱᐊᕈᓯᕐᒥᒃ ᐃᓕᓐᓂᐊᖅᑎᑕᐅᑎᓪᓗᒋᑦ,” ᑕᐃᒪᓐᓇ ᐅᖃᖅᖢᓂ ᑲᓛᒃ − ᓕᓐᑎᐅᓪ.

ᑕᒪᓐᓇ ᐃᓕᓐᓂᐊᕈᑎ ᑲᔪᓯᑎᑦᑐᓐᓇᓚᐅᖅᑕᖅᐳᑦ ᒪᕐᕈᐃᖅᑕᖅᖢᒍ, ᑲᑎᖦᖢᒋᑦ ᐊᕐᕕᓂᓕᐅᑉᓗᑎᒃ 8-ᓄᑦ ᒪᒃᑯᒃᑐᑦ ᐃᓚᐅᖃᑕᐅᔪᑦ ᑕᒪᐃᓐᓂᒃ ᐃᓕᓐᓂᐊᕈᑕᐅᔪᓂᒃ.

ᑐᒡᓕᐊᒍᑦ ᐊᑕᐅᓯᕐᒥᒃ ᐱᓇᓱᐊᕈᓯᕐᒥᒃ ᐃᓕᓐᓂᐊᖅᑎᑦᑎᓕᖅᑎᓪᓗᑕ ᒪᒃᑯᒃᑐᓂᒃ ᐃᓕᓐᓂᐊᖅᑎᑦᑎᓚᐅᖅᑐᒍᑦ ᐸᐅᕐᖓᖅᑕᕐᓂᕐᒥᒃ, ᒪᒃᑯᒃᑐᑦ ᓄᓇᒧᙵᐅᓯᒪᓚᐅᖅᑐᑦ ᐱᓇᓱᐊᕈᓯᐅᑉ ᐃᓗᐊᓂ ᐸᐅᕐᖓᖅᑕᖅᖢᑎᒃ ᐃᓕᓐᓂᐊᖅᑎᑦᑎᔨᖃᖅᖢᑎᒃ ᐊᒻᒪᓗ ᓄᓇᒧᙵᐅᔾᔨᔨᖃᖅᖢᑎᒃ.

ᒪᒪᖅᓴᐅᑎᓕᐅᕐᓂᕐᒥᒃ ᐃᓕᑦᑎᓚᐅᕐᒥᔪᑦ ᐊᒻᒪᓗ ᐃᒐᔭᐅᙱᓪᓗᓂ ᓯᓯᒃᑯᑦ ᑮᒃᓕᐅᖅᖢᑎᒃ ᐸᐅᕐᖓᓕᖕᓂᒃ.”

ᑲᓛᒃ − ᓕᓐᑎᐅᓪ ᐅᖃᖅᖢᓂ ᑭᖑᓪᓕᖅᐹᒥᒎᖅ ᐃᓕᑕᖅᓯᓂᒃᑯᑦ ᐃᓕᓐᓂᐊᖅᑎᑦᑎᖕᒪᑕ ᐅᒥᐊᖅᑐᕈᔾᔨᓚᐅᖅᑐᑦ ᒪᒃᑖᓕᕆᑉᓗᑎᒡᓗ.

ᐅᖃᖅᖢᓂ ᐊᕐᕕᓂᓖᒡᒎᖅ ᒪᒃᑯᒃᑐᑦ ᐃᓕᓐᓂᐊᓚᐅᖅᑐᑦ ᐱᑯ ᒪᒃᑖᓕᐅᕆᐅᓚᐅᖅᑐᑦ ᐊᒻᒪᓗ ᐃᒐᒋᐅᖅᖢᑎᒃ ᒪᒃᑖᓂᒃ, ᐅᒥᐊᖅᑐᕆᐊᖅᑐᖅᑳᕐᓇᑎᒃ ᓯᑎᐱᕆ 8-ᒥ ᓄᓇᓕᖕᒥ ᐊᖑᓇᓱᒃᑎᓂᒃ ᓕᐅ ᖃᓗᔾᔭᕐᒥᒃ, ᑯᕆᔅ ᑲᓇᓕᒥᒃ ᐊᒻᒪᓗ ᐃᑲᔪᖅᑎᖏᓐᓂᒃ ᐱᖃᑎᖃᖅᖢᑎᒃ.

ᐱᖓᓱᑦ ᐊᕐᕕᓂᓕᐅᔪᓂᒃ ᐃᓚᐅᖃᑕᐅᔪᑦ ᑕᒡᕘᓇ ᐃᓕᓐᓂᐊᕈᑎᒃᑯᑦ ᕿᓇᓗᒐᓚᐅᖅᑐᑦ. ᔭᑕ ᖃᓗᔾᔭᖅ ᐊᒻᒪᓗ ᕋᒧᓇ ᓂᕕᐊᑦᓯᐊᖅ ᕿᓇᓗᒐᕆᐅᓚᐅᖅᑑᒃ ᐊᒻᒪᓗ ᐊᑕᒻ ᑕᐃᐸᓈᖅ ᑐᒡᓕᐊᓂ ᕿᓇᓗᒐᖅᖢᓂ.

ᑕᒪᕐᒥᒃ ᐃᓚᐅᖃᑕᐅᔪᑦ ᐊᖏᕐᕋᐅᔾᔨᔪᓐᓇᓚᐅᖅᑐᑦ ᒪᒃᑖᓂᒃ ᐃᓚᒥᓄᑦ ᐊᒻᒪᓗ, ᓯᑎᐱᕆ 10-ᒥ, ᑐᓂᐅᖅᑲᐃᓚᐅᖅᑐᒍᑦ ᒪᒃᑖᓂᒃ ᓄᓇᖅᑲᑎᒌᖕᓄᑦ ᐊᒻᒪᓗ 50 ᐅᖓᑖᓃᑦᑐᑦ ᐃᓄᐃᑦ ᐊᐃᒃᖠᑲᑕᓚᐅᖅᑐᑦ.”

ᑲᓛᒃ − ᓕᓐᑎᐅᓪ ᐅᖃᖅᖢᓂ, ᑕᐃᒪᑐᖅ, ᓯᓚᑦᑎᐊᕙᐅᖏᓐᓇᕐᓂᐊᖅᐳᖅ ᐊᕐᕕᓂᓕᐅᔪᑦ ᐅᒥᐊᖅᑐᒃᑲᓐᓂᕈᓐᓇᕐᓂᐊᕐᒪᑕ ᓯᕗᓂᒃᓴᖏᓐᓂᒃ.

ᐅᖃᖅᖢᓂ ᐱᐅᔪᒻᒪᕆᐊᓘᓇᔭᖅᑐᕈᖅ ᐱᖃᑎᖏᑦ ᐱᖓᓱᑦ ᐃᓚᐅᖃᑕᐅᔪᑦ ᕿᓇᓗᒐᕈᓐᓇᖅᐸᑕ ᕿᓇᓗᒐᕆᐅᕐᓗᑎᒃ ᑐᒡᓕᐊᓂ ᐅᒥᐊᖅᑐᕈᔾᔭᐅᑎᓪᓗᒋᑦ.

ᒐᕙᒪᒃᑯᑦ ᐃᓄᓕᕆᔨᒃᑯᖏᑦ ᑖᑉᑯᓂᙵ ᒪᒃᑯᒃᑐᓂᒃ ᐃᑲᔪᕈᒪᓚᐅᖅᑐᑦ ᓄᕙᒡᔪᐊᕐᓂᖅ -19 ᐊᒃᓱᕈᕐᓇᖅᑐᒃᑰᕈᑕᐅᖃᑦᑕᓕᖅᑎᓪᓗᒍ ᖁᕕᐊᓱᒍᓐᓇᖁᑉᓗᒋᑦ.

ᑕᒪᓐᓇ ᐃᓱᒪᒋᔭᐅᓚᐅᖅᑐᖅ ᒪᒃᑯᒃᑐᑦ ᐱᓕᕆᖃᑎᖃᕈᓐᓇᖁᑉᓗᒋᑦ ᓄᕙᒡᔪᐊᕐᓂᖅ ᖁᕕᐊᓱᒍᓐᓃᕈᑕᐅᖃᑦᑕᖅᑎᓪᓗᒍ ᐊᒻᒪᓗ ᓱᓇᓂᒃ ᐱᑦᑕᐃᓕᑎᑕᐅᒐᔪᒃᓯᑎᓪᓗᒋᑦ.

ᑕᒪᒃᑯᐊ ᐃᓕᓐᓂᐊᕈᑏᑦ ᐃᑲᔫᑕᐅᓇᓱᓚᐅᖅᑐᑦ ᓵᓚᒋᔭᐅᔪᓐᓇᖁᑉᓗᒍ ᓄᕙᒡᔪᐊᕐᓂᒃᑯᑦ ᓂᑲᓪᓗᖓᔾᔪᑕᐅᔪᑦ ᓵᓚᒋᔭᐅᖁᑉᓗᒋᑦ ᓄᓇᒦᔾᔪᔾᔭᐅᓗᑎᒃ ᓯᓚᑐᐃᓐᓇᕐᒥᓗ.

ᐃᓕᑕᖅᓯᓂᒃᑯᑦ ᒪᑐᐃᖅᓯᓯᒪᖕᒥᔪᑦ ᓄᑖᒥᒃ ᐅᖃᓕᒫᒐᖃᕐᕕᖕᒥ ᐱᓇᓱᐊᕈᓯᐅᓚᐅᖅᑐᒥ ᑲᖏᖅᖠᓂᕐᒥ ᐃᓕᓐᓂᐊᖅᑐᓕᕆᓂᒃᑯᑦ ᑲᑎᒪᔩᑦ ᖃᓄᐃᒃᓴᙱᓐᓂᖅᓴᐅᖁᑉᓗᒋᑦ ᐃᓱᒪᓕᐅᓚᐅᖅᑎᓪᓗᒋᑦ ᒪᑐᓯᓂᐊᕐᓂᕐᒧᑦ ᑲᖏᖅᖠᓂᐅᑉ ᐅᖃᓕᒫᒐᖃᕐᕕᖓᓂᒃ ᒫᓂ ᐅᓗᔪᒃ ᐃᓕᓐᓂᐊᕐᕕᒡᔪᐊᕐᒦᑦᑐᒥᒃ.”