Skip to content

ᐅᖃᐅᓰᑦ ᑎᑭᕋᕐᔪᐊᕐᒥᙶᖅᑐᑦ – ᓵᒥᐅᓪ ᐋᕈᐊᓛᖅ

60 ᐅᑭᐅᑦ ᖄᖏᖅᓯᒪᑐᐃᓐᓇᖅᑐᑦ ᐃᓄᐃᑦ ᓄᓇᑖᖅᐸᓪᓕᐊᓕᓚᐅᖅᑎᓪᓗᒋᑦ ᑎᑭᕋᕐᔪᐊᓂ − ᒫᓐᓇᓵᖑᓂᖓᓄᑦ ᐃᓚᖏᑦ ᑎᑭᕋᕐᔪᐊᕐᒥᐅᑕᐅᔪᑦ ᑎᑭᕋᕐᔪᐊᕐᒥᐅᑕᐅᖅᑳᓚᐅᖅᓯᒪᔪᑦ ᐃᓅᔪᑦ ᓱᓕ ᐅᖃᐅᓯᖃᕈᓐᓇᖅᖢᑎᒃ ᖃᓄᖅ ᑎᑭᕋᕐᔪᐊᖅ ᐱᒋᐊᖅᑳᓚᐅᕐᓂᖓᓄᑦ. ᓄᓇᓕᐅᔪᖅ ᐃᓚᐅᖃᑕᐅᔪᖅ ᖃᑉᓯᑲᓪᓚᖕᓂᒃ ᓄᓇᓕᖕᓂᒃ ᒐᕙᒪᑐᖃᒃᑯᑦ ᓄᓇᙳᖅᑎᓚᐅᖅᑕᖏᓐᓂᒃ ᐃᓄᐃᑦ ᓅᑎᑕᐅᑉᓗᑎᒃ ᐱᒋᐊᖅᖢᒍ 1920-ᖏᓐᓂᒃ.

ᐱᒋᐊᕈᑎᖓ ᐊᒃᓱᕈᕐᓇᓚᐅᕋᓗᐊᖅᑎᓪᓗᒍ, ᐅᑉᓗᒥᐅᔪᖅ ᑎᑭᕋᕐᔪᐊᕐᒥᐅᑦ ᐃᓅᖃᑎᒌᑦᑎᐊᖅᑐᑦ ᖃᐅᔨᒪᔭᐅᑦᑎᐊᖅᑐᓪᓗ Hᐊᑭᒃᑲᐅᓂᖏᓐᓄᑦ ᐅᖓᓯᒃᑐᓄᑦ ᓄᓇᓕᖕᓄᑦ ᓯᑭᑑᒃᑯᑦ ᐃᖏᕐᕋᓲᑦ Hᐊᑭᒋᐊᖅᑐᖅᖢᑎᒃ. ᖃᑉᓰᓐᓇᐅᓂᖅᐹᖑᔪᓪᓗ ᐃᓅᓯᕐᒥᓂᒃ ᑭᐱᓯᖃᑦᑕᖅᑐᓂᒃ ᓄᓇᕗᒥ.

ᕕᕗᐊᕆ 2019-ᒥ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᑦ ᑎᑎᕋᖅᑎᖓ ᑯᑎ ᐸᓐᑐᕐ ᐊᒻᒪᓗ ᓱᓯ ᓇᐸᔪᖅ−ᓱᐊᑦ ᑎᑭᕋᕐᔪᐊᓕᐊᓚᐅᖅᑑᒃ ᑎᑎᕋᕆᐊᖅᑐᖅᖢᑎᒃ ᐅᓂᑉᑳᖅᑐᐊᓂᒃ ᐊᕐᕕᓂᓕᖕᓂᒃ ᓄᓇᖅᑲᑎᒌᒃᑐᓂᙶᖅᑐᓂᒃ. ᐊᕐᕕᓂᓕᖕᓂᒃ ᐱᓇᓱᐊᕈᓯᕐᓂᒃ ᖃᐃᔪᓂᒃ, ᓴᖅᑭᑎᑦᑎᓂᐊᖅᑐᒍᑦ ᑎᑎᕋᐅᓯᕆᓚᐅᖅᑕᑉᑎᓐᓂᒃ, ᐃᓚᐅᖃᑕᐅᑉᓗᒋᑦ ᒪᕐᕈᒃ ᓄᓇᖃᖅᑳᓚᐅᖅᑑᒃ ᐅᓂᑉᑳᖅᑐᐊᖏᑦ, ᐱᖃᑎᖓ ᐊᐃᑦᑖᖑᒐᓗᐊᖅ ᐃᓅᔪᓐᓃᓚᐅᖅᑐᖅ ᐊᕐᕌᓂ.

ᐅᑯᐊ ᐅᖃᐅᓰᑦ ᑎᑭᕋᕐᔪᐊᕐᒥᙶᖅᑐᑦ

ᑐᓴᒐᒃᓴᓕᕆᔨᐅᑉ ᐅᖃᐅᓯᖓ: ᑖᑉᓱᒪ ᐅᓂᑉᑳᖅᑐᐊᑉ ᐊᔾᔨᖓ ᓴᖅᑭᓚᐅᖅᑐᖅ ᐊᐅᔭᒃᑯᑦ 2019-ᒥ ᐅᖃᓕᒫᒐᒃᑯᑦ Walrus-ᑯᑦ. ᑕᑯᓂᐊᖅᐸᐃᑦ ᐱᓇᓱᐊᕈᓯᐅᓕᕐᒥᒃᐸᑦ ᑐᓴᒐᒃᓴᖅ ᐱᖓᔪᖓ ᐅᓂᑉᑳᖅᑐᐊᑉ ᐃᓚᖓ.

ᓵᒥᐅᓪ ᐋᕈᐊᓛᖅ

ᓴᒥᐅᓪ ᐋᕈᐊᓛᖅ ᑎᑭᕋᕐᔪᐊᓂ ᐊᔪᕿᖅᑐᐃᔨᒋᔭᐅᔪᖅ. ᐋᕈᐊᓛᖅ ᑎᑭᕋᕐᔪᐊᕐᒥᐅᑕᙳᓚᐅᖅᑐᖅ ᑲᖏᖅᖠᓂᕐᒧᑦ ᓅᑎᑕᐅᒐᒥ ᐊᕐᕕᐊᓂ ᓴᓇᔭᖅᑐᖅᑎᑕᐅᑉᓗᓂ ᐅᔭᕋᖕᓂᐊᕐᕕᖕᒥ.

ᓵᒥᐅᓪ ᐋᕈᐊᓛᖅ ᑎᑭᕋᕐᔪᐊᕐᒥ ᐊᔪᕿᖅᑐᐃᔨ. ᓯᕗᓪᓕᖅᐸᐅᖃᑕᐅᓚᐅᖅᑐᖅ ᓄᓇᑖᖅᑐᓂᒃ ᑎᑭᕋᕐᔪᐊᕐᒥ ᓅᑎᑕᐅᒐᒥ ᑲᖏᖅᖠᓂᕐᒧᑦ ᐊᕐᕕᐊᓂᙶᖅᖢᓂ ᓴᓇᔭᖅᑐᖅᑎᑕᐅᑉᓗᓂ ᐅᔭᕋᖕᓂᐊᕐᕕᖕᒥ.

ᐊᖓᔪᖃᓚᐅᖅᑐᖓ ᐊᑎᖃᓚᐅᖅᑐᖅ ᐋᕈᐊᓛᕐᒥᒃ. ᐊᖓᔪᒐ ᐃᓅᔪᓐᓃᕐᒪᑦ, ᐊᑎᑐᐊᖓ ᐊᑎᖅᑖᕆᓚᐅᖅᑕᕋ, ᐊᑎᖃᓕᖅᖢᖓ ᓵᒥᐅᓪ ᐋᕈᐊᓛᕐᒥᒃ. ᑕᐃᑉᓱᒪᓂ, ᐊᑕᐅᓰᓐᓇᕐᒥᒃ ᐊᑎᖃᖃᑦᑕᓚᐅᕋᑉᑕ. ᐅᑉᓗᒥᓕ, ᐃᓄᐃᑦ ᐊᒥᓱᓗᐊᕌᓗᖕᓂᒃ ᐊᑎᖃᖃᑦᑕᓕᖅᑐᑦ.

ᐊᕐᕕᐊᕐᒥᐅᑕᒃᓴᔭᐅᔪᖓ. ᐊᑖᑕᒐ ᒪᕐᕈᖕᓂᒃ ᓄᓕᐊᖃᓚᐅᕐᒪᑦ ᐃᓅᑉᓗᓂ, ᑕᐃᒪᐃᒻᒪᑦ ᐊᒥᓱᓂᒃ ᓇᔭᖃᓚᐅᖅᑐᖓ ᓄᑲᖃᖅᖢᖓᓗ ᐊᖓᔪᖃᖅᖢᖓᓗ. ᐊᒥᓱᓂᒃ ᓇᔭᖃᓚᐅᖅᑐᖓ, ᑭᓯᐊᓂ ᖃᑉᓰᓐᓇᐅᓕᖅᑐᒍᑦ.

ᒪᒃᑯᒃᑐᑯᓘᓚᐅᖅᑐᖓ ᐊᑖᑕᒐ ᐃᓅᔪᓐᓃᕐᒪᑦ 1949-ᒥ. ᐊᓈᓇᒐ ᐊᕐᕕᐊᕐᒥᐅᑕᒃᓴᔭᐅᓚᐅᖅᑐᖅ. ᐃᖅᑲᐅᒪᙱᑦᑐᖓ ᐊᑖᑕᒐ ᐊᕐᕕᐊᕐᒥᐅᑕᓪᓚᕆᐅᓚᐅᕐᒪᖔᑦ. ᐊᓈᓇᒐ ᐃᖅᑲᐅᒪᖃᑦᑕᖅᑕᕋ ᖁᕕᐊᓱᖃᑦᑕᓚᐅᕋᑉᑕ, ᐅᕙᒻᓂᒃ ᓇᒡᓕᒍᓱᑦᑎᐊᓚᐅᖅᑐᖅ ᑲᒪᑦᑎᐊᖅᐸᒃᖢᓂᓗ. ᐃᖅᑲᐅᒪᔪᖓ ᐊᓈᓇᒐᓗ ᐃᖃᓗᒐᓱᒃᑲᐅᓚᐅᕋᒻᓄᒃ ᐊᑖᑕᒐ ᐃᓅᔪᓐᓃᖅᓯᒪᓕᖅᑎᓪᓗᒍ. ᐃᓅᕌᓂᒃᓯᒪᔪᒍᑦ ᐃᖃᓗᖕᓄᑦ ᓂᕿᑐᐊᕆᒐᔪᓚᐅᕋᑉᑎᒍᑦ.

ᐃᖅᑲᐅᒪᔪᖓ ᖃᓄᖅ ᐃᓅᖃᑦᑕᓚᐅᕐᒪᖔᑉᑕ, ᐃᓅᓯᕆᓚᐅᖅᑕᖅᐳᑦ. ᐃᓕᓐᓂᐊᖅᐸᓚᐅᖅᑐᒍᑦ ᐱᓕᕆᔪᓂᒃ ᑕᐅᑐᒃᖢᑕ − ᐆᒃᑐᖅᐸᒃᖢᑕ. ᑎᑎᕋᐅᓯᖃᓚᐅᙱᓐᓇᑉᑕ ᑕᐃᑉᓱᒪᓂ, ᐊᒻᒪᓗ ᐃᓕᓐᓂᐊᑦᑎᐊᓚᐅᖅᑐᒍᑦ ᐃᓅᓇᓱᐊᕐᓂᐅᑉ ᒥᒃᓵᓄᑦ. ᓴᐃᒪᓇᖅᑐᐊᓘᓚᐅᖅᑐᖅ ᑕᐃᑉᓱᒪᓂ.

1957-ᒥ, 19-ᓂᒃ ᐅᑭᐅᖃᓕᖅᖢᖓ, ᐊᐃᔭᐅᓚᐅᖅᓯᒪᔪᒍᑦ ᑎᖕᒥᓲᕋᓛᒃᑯᑦ ᐳᑭᖅᑕᓕᖕᓄᑦ ᐊᕐᕕᐊᓂ ᓴᓇᔭᖅᑐᖅᑎᑕᐅᑉᓗᑕ ᑲᖏᖅᖠᓂᕐᒧᑦ. ᓅᓚᐅᖅᓯᒪᔪᒍᑦ ᑲᖏᖅᖠᓂᕐᒧᑦ ᐅᔭᕋᖕᓂᐊᕐᕕᖕᒥ ᓴᓇᔭᖅᑐᖅᖢᑕ, ᓄᓕᐊᕋᓗ ᓄᑕᕋᖃᖅᑳᕐᓇᓄᒃ. ᐊᖏᖃᑎᖃᙱᒃᑲᓗᐊᕈᑉᑕ ᐅᕝᕙᓘᓐᓃᑦ ᐊᐅᓪᓚᕈᒪᙱᒃᑲᓗᐊᕈᑉᑕ, ᓈᓚᑐᐃᓐᓇᓚᐅᖅᑐᒍᑦ ᐳᑭᖅᑕᓕᖕᓂᒃ ᖁᒃᓴᒋᓚᐅᕋᑉᑎᒍᑦ. ᑭᓯᐊᓂ ᑕᐃᒪᐃᑦᑐᓐᓃᖅᑐᖅ. ᑲᑉᐱᐊᒋᔪᓐᓃᖅᑕᖅᐳᑦ.

ᒪᒃᑯᒃᑑᓚᐅᕋᒪ ᑕᐃᑉᓱᒪᓂ. ᐃᒃᐱᖕᓇᖅᑐᒻᒪᕆᐊᓘᓚᐅᖅᑐᖅ ᑕᐃᑉᓱᒪᓂ ᐅᕙᒻᓄᑦ. ᐱᓗᐊᖅᑐᒥ ᕿᒪᐃᑉᓗᑕ ᐃᓐᓇᑐᖃᑉᑎᓐᓂᒃ, ᐊᓈᓇᒐ ᐊᒻᒪᓗ ᐊᑖᑕᒃᓴᕋ ᐅᕙᒻᓂᒃ ᐃᑲᔪᖅᑎᖃᕆᐊᓖᒃ. ᓈᒻᒪᓚᐅᙱᑦᑐᖅ ᕿᒪᒃᑲᑉᑭᒃ. ᐊᓈᓇᒐ ᐊᑖᑕᒃᓴᕋᓗ ᐃᓅᔪᓐᓃᓚᐅᖅᑑᒃ ᑰᒡᔪᐊᕐᒥ, ᑲᖏᖅᖠᓂᕐᒦᑎᓪᓗᖓ. ᐃᓅᔪᓐᓃᖅᑳᕐᓇᑎᒃ ᓇᔪᓚᐅᙱᑕᒃᑲᓘᓐᓃᑦ ᓈᒻᒪᙱᑦᑐᒻᒪᕆᐊᓘᓚᐅᖅᑐᖅ.

ᓯᕗᓪᓕᖅᐹᑦ ᐅᔭᕋᖕᓂᐊᕐᕕᖕᒥ ᓴᓇᔭᖅᑐᖅᑎᑕᐅᔪᑦ ᑮᓇᐅᔭᓕᐅᓗᐊᓚᐅᙱᑦᑐᑦ, ᐱᓕᕆᕐᔪᐊᕋᓗᐊᕈᑉᑕ. ᓱᕙᓕᑭᐊᖑᕐᓚᓚᐅᖅᑐᖅ ᑮᓇᐅᔭᑎᒍᑦ. ᐊᔪᕐᓴᕐᓂᑉᑎᓐᓂᒃ ᐱᕚᓪᓕᖅᑎᑦᑎᓚᐅᙱᑦᑐᖅ, ᑮᓇᐅᔭᓕᐊᑦ ᒥᑭᓗᐊᓚᐅᕐᒪᑕ.

ᐃᓄᓕᕆᔨ ᐊᒻᒪᓗ ᓄᓇᓕᖕᒥ ᑎᑎᕋᖅᑎ ᑲᑎᒪᑎᑦᑎᓚᐅᖅᓯᒪᔫᒃ ᑲᖏᖅᖠᓂᕐᒥ. ᑕᐃᒪᐃᒻᒪᑦ ᓴᐃᒪᓐ ᑎᓈᖅ ᐅᒃᑯᓯᒃᓴᓕᖕᒥᐅᑕᖅ ᐅᕝᕙᓘᓐᓃᑦ ᐅᖅᓱᖅᑑᕐᒥᐅᑕᖅ ᑲᑎᒪᔭᖅᑐᓚᐅᖅᑐᒍᒃ, ᑕᐃᑲᓂ ᑎᑎᕋᖅᑎᒋᔭᐅᔪᖅ ᐊᐱᕆᓚᐅᖅᓯᒪᔪᖅ ᐅᑎᕈᒪᖕᒪᖔᑉᑕ ᐃᓕᖅᑯᓯᑐᖃᑎᒍᑦ ᐃᓅᒋᐊᖅᑐᕐᓗᑕ ᓅᓗᑕᓗ ᑎᑭᕋᕐᔪᐊᕐᒧᑦ, ᑕᐃᑲᓂ ᑕᓕᖅᐳᑦ ᖁᒻᒧᒃᑎᖦᖢᒋᑦ ᐅᖃᓚᐅᖅᑐᒍᒃ ᑕᐃᑯᙵᐅᔪᒪᓂᕋᖅᖢᓄᒃ. ᓗᐃᔅ ᕗᐃᓯ ᑕᐃᑯᙵᐅᔾᔨᖃᑕᐅᓚᐅᖅᑐᖅ ᐅᒥᐊᒃᑯᑦ. ᑕᐃᒪᓐᓇ ᑎᑭᕋᕐᔪᐊᕐᒧᑦ ᓅᓚᐅᖅᓯᒪᔪᖓ ᐊᒐᓯ 1959-ᒥ. ᑕᐃᒪᙵᓂ ᑕᒫᓂᕐᒥᐅᑕᐅᔪᖓ.

ᑕᒪᐅᙵᕋᑉᑕ, ᓄᓇᖓ ᐱᐅᔪᒻᒪᕆᐊᓘᓚᐅᖅᑐᖅ. ᐃᒡᓗᕐᔪᐊᖅᑕᖃᙱᖦᖢᓂ, ᓯᑕᒪᐃᓐᓇᐅᓚᐅᖅᑐᑦ ᑐᐲᑦ. ᓴᓗᒪᔪᒻᒪᕆᐊᓘᑉᓗᓂ, ᓄᓇᑐᐃᓐᓇᖅ. ᖃᐅᔨᒪᔾᔪᑎᙱᒃᑲᓗᐊᕐᓂᕈᑉᑕ ᑕᐃᓱᒪᓂ, ᐃᓅᖃᑎᒌᑦᑎᐊᓚᐅᖅᑐᒍᑦ ᐊᔾᔨᒌᖕᓂᒃ ᐱᒻᒪᕆᐅᑎᑦᑎᓚᐅᕋᑉᑕ ᐃᓕᖅᑯᓯᖃᖅᖢᑕᓗ ᐊᔾᔨᒌᖕᓂᒃ.

ᓅᑕᐅᖅᑳᖅᖢᑕ ᑎᑭᕋᕐᔪᐊᕐᒧᑦ ᐊᒻᒪᓗ ᐃᓕᖅᑯᓯᑐᖃᑎᒍᑦ ᐃᓅᔪᓐᓈᖅᓯᒐᑉᑕ ᐱᕚᓪᓕᖅᓯᒪᓂᖅᓴᐅᓕᓚᐅᖅᑐᒍᑦ ᑮᓇᐅᔭᓕᐅᕐᓂᒃᑯᑦ.

ᑐᕌᒐᕆᓗᐊᓚᐅᖅᑕᖅᐳᑦ ᐊᖑᓇᓱᖕᓂᖅ ᓂᕿᖃᕈᓐᓇᕈᒪᑉᓗᑕ, ᐱᓕᕆᖃᑎᒌᖕᓂᒃᑯᑦ ᑕᒪᓐᓇ ᐱᓕᕆᐊᕆᓕᓚᐅᖅᑕᖅᐳᑦ. ᑕᒪᐅᙵᕋᑉᑕ, ᖃᒧᑎᑕᖃᓚᐅᙱᑦᑐᖅ, ᖁᑭᐅᑎᑕᖃᙱᖦᖢᓂ, ᕿᒻᒥᒃᑕᖃᙱᖦᖢᓂ. ᑲᖏᖅᖠᓂᕐᒥ ᐊᐅᓚᑦᑎᔨᖃᕐᒪᑦ, ᑕᐃᑲᓂᕐᒥᐅᑕᑦ ᐋᖅᑭᒃᓯᓚᐅᖅᑐᑦ ᕿᒻᒥᕐᓂᒃ ᑎᑭᑎᑦᑎᔪᖃᕐᓂᐊᕐᓂᕐᒧᑦ ᑎᑭᕋᕐᔪᐊᕐᒧᑦ ᐃᓄᐃᑦ ᕿᒧᒃᓯᖃᕈᓐᓇᓕᖁᑉᓗᒋᑦ. ᕿᒻᒥᖅᑖᕋᑉᑕ, ᐃᓅᓯᖅᐳᑦ ᐱᕚᓪᓕᖅᓯᒪᓕᓚᐅᖅᑐᖅ. ᐊᖑᓇᓱᒍᓐᓇᖅᓯᒃᑲᓐᓂᖅᖢᑕ, ᓄᓇᓕᐊᕈᓐᓇᖅᓯᑉᓗᑕ, ᓂᕿᒃᓴᖅᑖᖅᑎᑦᑎᔪᓐᓇᖅᓯᑉᓗᑕ, ᐊᒻᒪᓗ ᐃᓕᖅᑯᓯᑐᖃᑉᑎᓐᓄᑦ ᐅᑎᖅᓯᒪᓕᖅᖢᑕ.

1960-ᒥ, ᓴᓇᔭᒃᓴᖅᑖᓚᐅᖅᑐᖓ ᒐᕙᒪᒃᑯᓐᓂᒃ, ᐊᑉᖁᑎᓕᐅᖅᑎᐅᓕᖅᖢᖓ. ᑕᐃᑲᓂ ᓴᓇᐃᓐᓇᓚᐅᖅᑐᖓ 1970ᒧᑦ ᑎᑭᖦᖢᒍ ᓄᓇᓕᒃ Hᐊᒪᓚᙳᕐᒪᑦ. ᐃᓄᒃᑎᑐᑦ ᐃᓕᓐᓂᐊᖅᑎᑦᑎᔨᐅᓚᐅᕐᒥᔪᖓ ᐃᓕᓐᓂᐊᕐᕕᖕᒥ ᓯᑕᒪᓂᒃ ᐅᑭᐅᓂᒃ. ᒫᓐᓇᓵᖑᓚᐅᖅᑐᕐᓘᓐᓃᑦ ᓯᑎᐱᕆᒥ, ᓄᑕᖅᑲᑦ ᓄᓇᒧᙵᐅᖃᑎᒋᓚᐅᖅᑕᒃᑲ. ᑐᒃᑐᒋᐅᖅᑎᖦᖢᒋᑦ ᓄᑕᖅᑲᑦ ᖁᕕᐊᓱᑦᑎᐊᓲᑦ. ᐃᖅᑲᐅᒪᐃᓐᓇᕐᓂᐊᖅᑕᕋ ᑐᒃᑐᒋᐅᕐᓂᕆᓚᐅᖅᑕᕋ. ᐊᖓᔪᖅᑳᒃᑲ ᐊᑐᖅᑐᐊᕆᐊᖃᓚᐅᖅᑐᑦ ᖁᑭᐅᑎᒥᒃ ᑐᒃᑐᒋᐅᖁᑉᓗᖓ. ᐳᐃᔨᓂᒃ ᐊᖑᓇᓱᒃᑎᐅᓗᐊᙱᑦᑐᖓ ᐅᕝᕙᓘᓐᓃᑦ ᐃᖃᓗᒐᓱᒃᑎᐅᓗᐊᙱᑦᑐᖓ. ᑭᓯᐊᓂ ᑐᒃᑐᒋᐅᖅᓯᒪᓂᕋ ᐳᐃᒍᓚᐅᖅᓯᒪᔾᔮᙱᑕᕋ .22-ᒥᒃ ᖁᑭᐅᑎᒧᑦ ᑕᐃᑉᓱᒪᓂ ᐊᑐᖃᑦᑕᓚᐅᖅᑕᑉᑎᓐᓂᒃ.

ᐱᓕᕆᖃᑕᐅᙱᓐᓇᖃᑦᑕᖅᓯᒪᔪᖓ ᐊᔪᕿᖅᑐᐃᔨᑦ ᑐᒃᓯᐊᕐᕕᖓᓂᒃ ᑕᐃᑉᓱᒪᓂ ᓄᑕᕋᐅᑉᓗᖓ ᐊᕐᕕᐊᓂ ᐱᒋᐊᖅᖢᒍ. ᐃᓅᓯᒻᓂᒃ ᑕᑯᖃᑦᑕᖅᓯᒪᔪᖓ ᐃᓄᖕᓂᒃ ᒎᑎᒥᒃ ᐅᒃᐱᓪᓚᑦᑖᖅᑐᓂᒃ, ᑭᓯᐊᓂ ᑕᐃᒪᐃᓗᐊᕈᓐᓃᖅᑐᑦ ᑕᐃᑉᓱᒪᓂᑎᑐᑦ. ᐃᑉᔪᔪᓄᑦ ᐃᓚᓯᒋᐊᕋᓱᒍᓐᓇᙱᑦᑐᖓ ᐅᕝᕙᓘᓐᓃᑦ ᑎᑎᕋᖅᓯᒪᔪᓄᑦ. ᑭᓯᐊᓂ ᐃᓱᒪᒋᔭᒃᑲᓂᒃ ᐅᖃᐅᓯᖃᖃᑦᑕᖅᑐᖓ ᐊᔪᕿᖅᑐᐃᑉᓗᖓ ᐅᑉᓗᒥᐅᔪᖅ, ᐅᖃᐅᑎᔭᐅᖃᑦᑕᖅᓯᒪᒐᑉᑕ ᐃᑉᔪᔪᑦ ᑎᑎᕋᒃᑲᓐᓂᕈᓐᓇᙱᓐᓇᑉᑎᒍᑦ ᒎᑎᐅᑉ ᐅᖃᐅᓯᕆᖕᒪᒋᑦ.

ᐃᓐᓇᕈᖅᐸᓪᓕᐊᑉᓗᓂ, ᑎᒥ ᐊᔪᓕᖅᐸᓪᓕᐊᖃᑦᑕᕐᒪᑦ ᐃᓱᒪᒋᖃᑦᑕᖅᓯᒪᔭᖅᐳᑦ ᑎᒍᒥᐊᖃᑦᑕᖅᓯᒪᔭᖅᐳᑦ. ᑕᐃᒪᐃᒻᒪᑦ ᐱᒻᒪᕆᐅᔪᖅ ᓄᑕᕋᑉᑎᓐᓂᒃ ᐃᖅᑲᐃᑎᑦᑎᖃᑦᑕᕆᐊᖃᕋᑉᑕ ᒪᒃᑯᒃᑐᖁᑎᖃᕐᒪᑕ ᐊᒻᒪᓗ ᐱᓕᕆᔪᓐᓇᕐᒪᑕ. ᓱᖏᐅᑎᔪᓐᓇᕐᓂᖅᓴᐅᔪᑦ ᐅᕙᑉᑎᓐᓂᒃ. ᑕᐃᑉᓱᒪᓂᑎᑐᑦ ᐊᒻᒪᓗ ᐅᑉᓗᒥᐅᓕᖅᑐᖅ ᐃᓅᓯᕆᔭᐅᔪᒃᑯᑦ ᒐᕙᒪᖃᓕᖅᑎᓪᓗᒋᑦ ᑕᒪᕐᒥᒃ ᐊᑑᑎᖃᑦᑎᐊᖅᑐᑦ, ᑭᓯᐊᓂ ᓇᓕᒧᒌᓕᖅᓯᒪᔭᕆᐊᓖᑦ. ᐅᖃᐅᓯᓕᕆᒃᑲᓐᓂᕆᐊᖃᖅᑐᒍᑦ ᑕᒪᐃᓐᓂᒃ ᖃᑉᓗᓈᑎᑐᑦ ᐃᓄᒃᑎᑐᓪᓗ.

ᐊᖑᓇᓱᐃᓐᓇᖃᑦᑕᕐᓂᐊᖅᑐᖓ ᐱᔪᓐᓇᑐᐊᕈᒪ. ᑕᐃᒪᓐᓇ ᐃᓕᓐᓂᐊᖅᑎᑕᐅᓯᒪᒐᒪ. ᐃᓗᒥᐅᑕᕆᒐᑉᑯ, ᓇᓗᓇᐃᒃᑯᑕᕆᒐᑉᑯ ᑭᓇᐅᓂᒻᓄᑦ. ᑕᐃᒪᓐᓇ ᐱᓕᕆᕙᒃᑲᒪ. ᐃᒪᓐᓈᖅᑐᕈᑎᒋᕙᒃᑕᕋ, ᐃᓅᔾᔪᑎᒋᔭᕋ. ᑕᐃᒪᓐᓇ ᐃᓅᕌᓂᒃᓯᒪᔪᖓ, ᑕᐃᒪᓐᓇᓗ ᐃᓄᐃᑦ ᐃᓅᕌᓂᒃᓯᒪᔪᑦ, ᐱᖁᑎᖄᓗᙱᒃᑲᓗᐊᖅᖢᑎᒃ. (ᑐᑭᓕᐊᖑᔪᖅ ᐃᓄᒃᑎᑑᖅᑳᖅᓯᒪᔪᖅ)