Skip to content

ᐅᒥᐊᖅᑐᖅᑐᑦ ᐅᒥᐊᖓ ᐳᓯᑦᑐᖅ ᐃᒪᖁᑎᒋᔭᐅᔪᒥ ᐃᓅᓕᓴᖅᑕᐅᔪᑦ ᖃᒪᓂ’ᑐᐊᑉ ᖃᓂᒋᔭᖓᓂᒃ

ᒪᕐᕈᒃ ᐊᖑᑏᒃ ᖃᒪᓂ’ᑐᐊᕐᒥᐅᑖᒃ ᖃᓄᐃᙱᑦᑑᒃ ᐃᓅᓕᓴᖅᑕᐅᒐᒥᒃ ᐅᒥᐊᕐᔪᐊᕐᒧᑦ ᐅᖅᓱᐊᓗᖕᒥ ᐊᔾᔭᖅᑐᐃᔨᓄᑦ.

ᒪᕐᕈᒃ ᐊᖑᑏᒃ ᐅᒥᐊᕐᔪᐊᒃᑯᑦ ᑐᕙᒃ W-ᑯᑦ ᓇᓂᔭᐅᓚᐅᖅᑑᒃ ᔪᓚᐃ 23-ᒥ, 15 ᒥᓂᑦᒥᒃ ᐅᒥᐊᖓ ᐳᓯᓯᒪᓕᖅᑎᓪᓗᒍ ᐃᒻᒪᖄ ᐊᑕᐅᓯᖅ ᑭᓛᒥᑕ ᐅᖓᓯᖕᓂᓕᖕᒥ ᓯᒡᔭᒧᑦ.

ᐊᔾᔨ Coastal Shipping Ltd-ᑯᑦ ᑐᕙᒃ W ᐅᒥᐊᖅ ᐃᒪᕐᒥ. ᐅᒥᐊᕐᔪᐊᕐᒥᐅᑕᑦ ᒫᓐᓇᓵᖑᓚᐅᖅᑐᖅ ᐃᓅᓕᓴᐃᓚᐅᖅᑐᑦ ᖃᒪᓂ’ᑐᐊᕐᒥᐅᑕᓂᒃ ᐊᖑᑎᓂᒃ ᐅᒥᐊᖓ ᐳᓯᒻᒪᑦ ᐃᒪᖁᑎᒋᔭᐅᔪᒥ ᐊᑕᐅᓯᕐᒥᒃ ᑭᓛᒥᑕᒥᒃ ᐅᖓᓯᖕᓂᓕᖕᒥᒃ.
ᐊᔾᔨ Coastal Shipping Ltd-ᑯᓐᓂᙶᖅᑐᖅ

“ᓇᓗᓇᙱᑦᑐᖅ ᐃᓅᓕᓴᖅᑕᐅᓚᐅᕐᒪᑎᒃ,” ᑕᐃᒪᓐᓇ ᐅᖃᖅᖢᓂ ᑯᕆᒃ ᕕᐅᕈ, ᐃᒪᕐᒥᐅᑕᓕᕆᓂᕐᒧᑦ ᐊᖓᔪᖅᑳᕆᔭᐅᔪᖅ Coastal Shipping Ltd-ᑯᓐᓄᑦ.

ᐅᖃᖃᑎᖃᖅᖢᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓂᒃ, ᕕᐅᕈ ᐅᖃᐅᓯᖃᓚᐅᖅᑐᖅ ᐅᒥᐊᕐᔪᐊᕐᒥᐅᑕᑦ ᖃᓄᖅ ᑕᒪᑐᒥᙵ ᑲᒪᓚᐅᕐᒪᖔᑕ. ᐅᖃᖅᖢᓂ ᐅᒥᐊᕐᔪᐊᕐᒥ ᓴᓇᔨᒋᔭᐅᔪᑦ ᐅᒥᐊᕐᔪᐊᕐᒥ ᓄᓇᒧᙵᐅᕙᓪᓕᐊᑉᓗᑎᒃ ᐅᒥᐊᙵᒃᑯᑦ ᔪᓚᐃ 23 ᐅᑉᓛᖓᓂᒃ. ᐋᖅᑭᒃᓱᐃᑉᓗᑎᒃ ᐅᖅᓱᐊᓗᒃᑖᖅᑎᑦᑎᓂᐊᕐᓂᕐᒧᑦ ᑎᖕᒥᓲᓄᑦ ᐅᖅᓱᐊᓗᒋᔭᐅᕙᒃᑐᓂᒃ ᒥᑦᑕᕐᕕᒋᔭᐅᔪᒧᑦ. ᓄᓇᒧᙵᐅᕙᓪᓕᐊᓕᖅᖢᑎᒃ ᐃᕆᐊᓛᖅᑐᓂᒃ ᑐᓵᓕᕐᓂᖅᖢᑎᒃ. ᖃᐅᔨᓴᑦᑎᐊᓕᕋᒥᒃ ᐅᔾᔨᕈᓱᓕᖅᖢᑎᒃ ᒪᕐᕈᖕᓂᒃ ᐊᖑᑎᓂᒃ ᐅᒥᐊᖓᓗ ᐳᓯᙵᑉᓗᓂ ᐃᒪᕐᒥ.

“ᓱᑉᓗᓕᒃ ᓴᑉᑯᖦᖢᒍ ᐊᒧᕙᓪᓕᐊᔭᖓ ᒪᕐᕈᒃ ᐊᖑᑏᒃ ᐃᓅᓕᓴᖅᑕᐅᓕᓚᐅᖅᑑᒃ ᐃᒪᕐᒥᒃ ᐊᒧᑉᓗᒋᒃ ᐊᒥᐊᕐᔪᐊᓕᐊᕈᑎᓕᖅᖢᒋᒃᓗ,” ᑕᐃᒪᓐᓇ ᐅᖃᖅᖢᓂ ᕕᐅᕈ, ᓄᓇᒧᒡᒎᖅ ᓇᓗᒍᓐᓇᕋᔭᓚᐅᙱᒃᑑᔭᖅᑑᒃ.

ᐳᑭᖅᑕᓖᑦ ᑐᓴᒐᒃᓴᖓ ᒪᓕᒃᖢᒍ, ᐅᒥᐊᖓ ᐳᓯᓚᐅᖅᑐᖅ ᐃᒻᒪᖄ 10:25-ᒥ ᐅᑉᓛᒃᑯᑦ, ᐊᒻᒪᓗ ᐅᒥᐊᖅᑐᖅᑏᒃ, ᐳᑦᑕᖅᑯᑎᓕᖕᓂᒃ ᖁᓕᖅᑕᖅᓯᒪᔫᒃ ᓂᒡᓕᓇᖅᑐᐊᓗᖕᒥ ᐃᒪᕐᒦᓕᓚᐅᖅᖢᑎᒃ.

ᕕᐅᕈ ᐅᖃᖅᖢᓂ ᐊᒃᓱᓪᓘᓐᓃᒡᒎᖅ ᓇᓂᔭᐅᓚᐅᕐᒪᑎᒃ ᐅᒥᐊᕐᔪᐊᕐᒥᐅᑕᓄᑦ ᒫᓐᓇᑲᐅᑎᒋ ᐅᒥᐊᖓ ᐳᓯᓵᖅᑎᓪᓗᒍ.

“ᓈᒻᒪᓈᖅᑐᕕᓃᒃ,” ᑕᐃᒪᓐᓇ ᐅᖃᖅᖢᓂ ᕕᐅᕈ. “ᐅᒥᐊᕐᔪᐊᕐᒥᐅᑕᓪᓗ ᐱᒋᐊᑲᐅᑎᒋᓚᐅᖅᑐᑦ ᐃᑲᔪᕆᐊᑲᐅᑎᒋᑉᓗᑎᒃ.”

ᐃᒪᕐᒥᒃ ᓄᓱᒃᑕᐅᒐᒥᒃ ᐅᒥᐊᕐᔪᐊᕐᒧᑦ ᑐᕙᒃ W-ᒧᙵᐅᔾᔭᐅᓚᐅᖅᑑᒃ, ᐋᓐᓂᐊᖃᕐᓇᙱᑦᑐᓕᕆᔨᒧᓪᓗ ᖃᐅᔨᓴᖅᑕᐅᑉᓗᑎᒃ.

“ᖃᐅᓯᙱᑦᑐᓂᒃ ᐊᓐᓄᖄᖅᑎᖦᖢᒋᑦ ᐊᒻᒪᓗ ᖃᐅᓯᕈᓐᓃᖅᑎᖦᖢᒋᑦ ᐊᒻᒪᓗ ᐃᒃᑮᕈᓐᓃᖅᑎᖦᖢᒋᑦ,” ᑕᐃᒪᓐᓇ ᐅᖃᖅᖢᓂ ᕕᐅᕈ. ᓄᓇᒧᙵᐅᔾᔭᐅᓕᓚᐅᖅᑐᑦ ᐳᑭᖅᑕᓕᖕᓄᑦ.

ᕕᐅᕈ ᐅᖃᖅᖢᓂ ᐅᒥᐊᕐᔪᐊᓕᕆᔩᒡᒎᖅ ᐅᖅᓱᐊᓗᖕᒥ ᐊᔾᔭᖅᑐᐃᔩᑦ ᑐᐊᕕᕐᓇᖅᑐᓕᕆᒐᔪᒃᑐᑦ ᐅᒥᐊᕐᔪᐊᓕᕆᔨᓄᑦ ᑐᓴᖅᑎᑕᐅᒑᖓᒥᒃ.

ᑭᓯᐊᓂᓕ, ᑕᐃᒪᓐᓇ ᓇᓂᓯᒐᔪᙱᑦᑐᑦ ᐃᓅᓕᓴᐃᓗᑎᒡᓗ ᐳᓯᑦᑐᓂᒃ ᐅᒥᐊᒃᑯᑦ ᐅᔾᔨᕐᓇᙱᑦᑐᒃᑯᑦ.

“ᐱᓕᕆᐊᒃᓴᕆᖃᑦᑕᕋᑉᑎᒍᑦ ᑭᐅᓯᖃᑦᑕᕆᐊᖃᕐᓂᖅ ᐊᒃᓱᕈᕐᓇᖅᑐᒃᑰᖅᑐᓂᒃ ᐃᒪᕐᒦᖦᖢᓂ,” ᑕᐃᒪᓐᓇ ᐅᖃᖅᖢᓂ. “ᑭᓯᐊᓂ ᑕᐃᒪᐃᑦᑐᒥᒃ ᑕᑯᓚᐅᖅᓯᒪᙱᑦᑐᒍᑦ ᐅᒥᐊᕐᔪᐊᑉᑎᓐᓂᒃ.”