ᐊᓯᒥᑎᑐᑦ ᓴᓇᖃᑦᑕᖅᑐᑎᑐᑦ ᐃᓅᖃᑎᒥᑎᑐᑦ, ᓄᕙᒡᔪᐊᕐᓂᖅ−19 ᒪᑐᓯᓚᐅᖅᑎᓪᓗᒍ ᓄᓇᕗᒥ ᒫᓐᓇᓵᖑᓚᐅᖅᑐᖅ, ᑕᓂᐅᓪ ᐊᓚᕋᓚᒃ ᓴᓇᔪᓐᓃᓚᐅᖅᓯᒪᖕᒪᑦ.
ᑕᓂᐅᓪ ᐊᓚᕋᓚᖕᒥᙶᖅᑐᖅ ᐊᔾᔨ
ᐊᓚᕋᓚᒃ ᕿᔪᓕᕆᔨᐅᓚᐅᖅᑐᖅ ᐊᕐᕕᐊᑦ ᐃᒡᓗᓕᕆᔨᒃᑯᖏᓐᓂᒃ ᐱᐊᓂᒃᓯᖅᑳᖅᖢᓂ ᐃᓕᑕᕆᔭᐅᔾᔪᑎᒥᓂᒃ ᑕᐃᑉᓱᒪᓂᑐᖃᖅ.
ᐅᑉᓘᑉ ᐃᓚᖓᓂᒃ, ᓄᓇᖅᑲᑎᖓ ᐊᕐᓇᖅ ᐊᐱᕆᓚᐅᖅᓯᒪᔪᖅ ᑕᓂᐅᓪ ᐃᓚᓐᓇᕆᔭᖓᓗ ᓴᒥᐅᓪ ᖃᕆᑕᖅ ᓴᓇᔾᔪᔾᔨᔪᓐᓇᕐᒪᖔᑕ ᖃᒧᑎᐅᑉ ᕿᔪᖁᑎᒃᓴᖓᓂᒃ. ᐱᐊᓂᒃᑲᒥᒃᔪᒃ ᐊᒻᒪᓗ ᐊᔾᔨᖓᓂᒃ ᓴᖅᑭᑎᑦᑎᒐᒥᒃ ᖃᕆᑕᐅᔭᒃᑯᑦ, ᓴᓇᖁᔭᐅᓕᓚᐅᕐᒥᔫᒃ ᐊᓯᐊᓄᑦ.
“ᖃᑉᓯᑦ ᐅᑉᓗᑦ ᐱᐊᓂᑐᐃᓐᓇᖅᑎᓪᓗᒋᑦ, ᑕᐃᒪᐃᑦᑐᖅᑖᖅᑐᖃᒃᑲᓐᓂᕈᒪᓕᖅᖢᓂ. ᓴᓇᒃᑲᓐᓂᓕᓚᐅᖅᑐᒍᑦ ᖃᒧᑎᐅᑉ ᕿᔪᖁᑎᖓᓂᒃ,” ᑕᐃᒪᓐᓇ ᐅᖃᖅᖢᓂ.
ᑕᐃᑲᓂ ᑖᑉᑯᐊᒃ ᒪᕐᕈᒃ ᐃᓚᓐᓇᕇᒃ ᐅᔾᔨᕈᓱᓕᓚᐅᖅᑑᒃ ᐊᔪᙱᓐᓂᕆᔭᖏᑦ ᐊᑑᑎᖃᕐᓂᖏᓐᓄᑦ ᐊᑐᖅᑕᐅᔪᒪᒃᑲᐅᓂᖏᓐᓄᓪᓗ.
“ᑕᒪᓐᓇ ᑕᐃᒪᐃᓚᐅᖅᑐᖅ ᓄᕙᒡᔪᐊᕐᓂᖅ ᐱᒋᐊᓕᓵᖅᑎᓪᓗᒍ. ᓴᓇᙱᓐᓇᓐᓄᒃ ᐱᕕᒃᓴᖃᑦᑎᐊᖅᖢᓄᒃ. ᑕᐃᒪᐃᒻᒪᑦ ᐱᒋᐊᖅᑎᑦᑎᔪᒪᓕᓚᐅᖅᑐᒍᒃ ᓇᖕᒥᓂᒃᓴᒥᒃ,” ᑕᐃᒪᓐᓇ ᐅᖃᖅᖢᓂ ᐊᓚᕋᓚᒃ.
ᐊᓚᕋᓚᒃ ᐊᒻᒪᓗ ᖃᕆᑕᖅ ᐊᑎᓕᐅᖅᑕᐅᓚᐅᖅᑑᒃ Hᐊᒻᓚᒃᑯᓐᓄᑦ ᖃᑉᓯᑲᓪᓚᑦ ᑕᖅᑭᑦ ᖄᖏᖅᓯᒪᓕᖅᑐᑦ ᓇᖕᒥᓂᖅᑖᕐᓂᕐᒧᑦ Arviat Off-Grid General Contractors-ᒥᒃ.
“ᐊᓕᓚᔪᓕᕆᔾᔪᑏᑦ ᐅᐃᒪᓇᖅᑐᑦ. ᑭᓯᐊᓂ ᐱᐊᓂᒃᐸᓪᓕᐊᓕᖅᑕᖅᐳᑦ, ᐆᒃᑐᕐᓇᖅᑐᒻᒪᕆᐊᓗᒃ ᑕᒻᒪᖅᑕᕐᓇᖅᖢᓂᓗ,” ᑕᐃᒪᓐᓇ ᐅᖃᖅᖢᓂ.
ᑲᒻᐸᓂᓂ ᐱᒋᐊᖅᑎᒻᒪᒍ ᐱᓕᕆᓯᒪᓕᖅᑑᒃ ᓄᑖᙳᖅᑎᕆᖃᑕᐅᑉᓗᑎᒃ ᐃᒡᓗᓂᒃ, ᐋᖅᑭᒃᓱᐃᖃᑦᑕᖅᓯᒪᓕᖅᖢᑎᒡᓗ ᐊᒻᒪᓗ ᓴᓇᕙᒃᖢᑎᒃ ᒥᑭᔪᓂᒃ ᐱᖁᑎᓂᒃ ᓲᕐᓗ ᓂᕆᔭᖅᑐᕐᕕᖕᒥ ᓄᓇᒥ ᐋᓪᓕᕋᐅᔭᕐᓂᒃ ᐊᒻᒪᓗ ᖁᑭᐅᑎᓄᑦ ᖁᓕᕈᐊᒃᓴᓂᒃ.
ᒫᓐᓇᒧᑦ ᑎᑭᖦᖢᒍ ᐱᐊᓂᒃᓯᓯᒪᓕᖅᑑᒃ 15-ᓂᒃ 20-ᓄᑦ ᐱᓕᕆᐊᓂᒃ.
ᐊᓚᕋᓚᒃ ᐅᖃᖅᖢᓂ ᐃᓄᐃᑦ ᐱᓕᕆᔾᔪᑎᓯᒪᔭᖏᑦ ᐱᐅᒃᓴᑦᑎᐊᖅᓯᒪᔪᑦ ᐅᖃᐅᓯᐅᓯᒪᔪᓪᓗ ᐱᐅᔪᐃᓐᓇᐅᑉᓗᑎᒃ.
“ᓴᕆᒪᒋᑦᑎᐊᖅᑕᖅᐳᑦ ᐱᓕᕆᐊᕆᓯᒪᔭᖅᐳᑦ,” ᑕᐃᒪᓐᓇ ᐅᖃᖅᖢᓂ. “ᐱᐅᓱᒋᔮᙱᒃᑲᓗᐊᖅᑐᖓ − ᐱᐅᓂᖅᐹᒃᑯᑦ ᐱᓕᕆᓇᓱᒃᐸᒃᑐᒍᑦ ᐱᓕᕆᐊᒃᑯᑦ − ᑭᓯᐊᓂ ᐱᔨᑦᓯᕋᖅᑕᖅᐳᑦ ᖁᕕᐊᓱᑦᑎᐊᓲᑦ ᐊᒻᒪᓗ ᓈᒻᒪᒃᓴᓲᑦ ᐱᓕᕆᐊᕆᓯᒪᔭᑉᑎᓐᓂᒃ.”
ᐊᓚᕋᓚᒃ ᐅᖃᖅᖢᓂ ᐆᒃᑐᕋᖃᑦᑕᓚᐅᖅᑐᒡᒎᖅ ᐃᒡᓗᒥᐅᑕᓂᒃ ᐋᓪᓕᕋᐅᔭᓂᒃ ᓱᓇᕈᓘᔭᕐᓂᒃ ᓴᓇᓂᕐᒧᑦ ᑭᓯᐊᓂ ᐊᑭᖏᑦ ᐊᑑᑎᖃᓗᐊᓚᐅᙱᒻᒪᑕ.
“ᐱᔭᕆᐊᑐᔪᐊᓘᖕᒪᑕ ᐊᑭᑐᔫᑉᓗᑎᒡᓗ ᓴᓇᓇᓱᒃᖢᒋᑦ,” ᑕᐃᒪᓐᓇ ᐅᖃᖅᖢᓂ.
ᐊᑐᓂ ᐃᓕᑕᕆᔭᐅᔾᔪᑎᖃᖅᖢᑎᒃ ᐃᓕᑦᑎᕙᓪᓕᐊᖏᓐᓇᖅᑑᒃ. ᖁᔭᓐᓇᒦᖅᓯᒪᔫᒃ ᑖᓐ ᓴᐃᓐ ᔮᓐᒥᒃ ᐃᓕᓐᓂᐊᖅᑎᑦᑎᓯᒪᖕᒪᑦ ᐃᖕᒥᓂᒃ ᐅᖃᐅᑎᔭᐅᒋᐊᕆᐊᖃᕌᖓᒥᒃ.
“ᐃᑲᔪᖅᑕᐅᖏᓐᓇᖅᑐᒍᒃ ᑖᓐᒧᑦ ᖁᔭᓕᓯᒪᑦᑎᐊᖅᑕᖅᐳᑦ,” ᑕᐃᒪᓐᓇ ᐅᖃᖅᖢᓂ ᐊᓚᕋᓚᒃ.
ᐊᓚᕋᓚᒃ ᓴᓇᓕᕐᒥᑎᓪᓗᒍ ᐃᒡᓗᓕᕆᔨᒃᑯᓐᓂᒃ,
ᓇᖕᒥᓂᖁᑎᒋᔭᖓ ᐅᑉᓘᑉ ᐃᓚᐃᓐᓇᖓᓂᒃ ᐱᓕᕆᐊᕆᖃᑦᑕᓕᖅᑕᖓ.
ᑭᓯᐊᓂ ᓂᕆᐅᒃᑑᒃ ᖃᑯᒍᒃᑲᓐᓂᖅ ᓇᖕᒥᓂᕆᔭᖓ ᑲᔪᓯᑦᑎᐊᓕᕈᒫᖁᑉᓗᒍ ᐃᑲᔫᑕᐅᑦᑎᐊᓕᕐᓗᓂ ᑕᒪᐃᓐᓄᑦ.
“ᖃᑉᓯᓂᒃ ᐅᑭᐅᓂᒃ ᖄᖏᖅᓯᒪᔪᓂᒃ ᓇᖕᒥᓂᕆᔭᖅᐳᑦ ᑲᒪᒋᔪᒪᓕᕐᓂᐊᖅᑕᕗᑦ ᐃᓗᐃᑦᑐᒃᑯᑦ ᐱᓕᕆᐊᒃᓴᖅᑖᕆᓪᓚᑦᑖᕐᓗᒍ,” ᑕᐃᒪᓐᓇ ᐅᖃᖅᖢᓂ.
ᐊᐅᔭᐅᓕᕐᒥᒃᐸᑦ ᐊᕐᕌᒍ ᑲᒻᐸᓂᒋᔭᐅᔪᖅ ᐸᕐᓇᒃᑕᐅᔪᖅ ᐃᒡᓗᕋᓛᓕᐅᕈᒫᕐᓂᕐᒧᑦ ᐊᕐᕕᐊᕐᒥᐅᓄᑦ.
“ᓯᕗᓂᒃᓴᒥ ᑕᐅᑐᕐᕈᖅᑑᒃ ᓴᓇᖃᑦᑕᕈᒪᓕᕈᒫᖅᖢᑎᒃ ᐃᒡᓗᓂᒃ ᐊᑭᑐᓗᐊᙱᑦᑐᓂᒃ ᐊᕐᕕᐊᓂ,” ᑕᐃᒪᓐᓇ ᐅᖃᖅᖢᓂ.
ᐊᓚᕋᓚᒃ ᓇᖕᒥᓂᖁᑎᒥᓂᒃ ᐊᑐᕈᒪᖕᒥᔪᖅ ᑐᙵᕕᒋᔭᐅᖁᑉᓗᒍ ᐃᓅᓯᕐᒥᓂᒃ ᐃᓄᐃᑦ ᑭᐱᓯᖃᑦᑕᕈᓐᓃᖁᑉᓗᒋᑦ ᐱᓕᕆᖃᑎᖃᖃᑦᑕᕐᓗᓂ ᒪᒃᑯᒃᑐᓂᒃ ᐊᕐᕕᐊᓂ ᐃᓕᑦᑎᔪᒪᔪᓂᒃ ᓄᑖᓂᒃ. ᐅᖃᖅᖢᓂ ᖃᐅᔨᒋᐊᕈᒪᓂᐊᖅᑐᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ ᐊᒻᒪᓗ Hᐊᒻᓚᒃᑯᓐᓂᒃ ᑮᓇᐅᔭᖅᑖᕈᒪᓂᐊᕐᓂᕐᒧᑦ.
“ᓴᓇᑎᑦᑎᔪᒪᓂᐊᖅᑐᒍᑦ ᒪᒃᑯᒃᑐᓂᒃ ᐃᓕᑦᑎᔪᓐᓇᖁᑉᓗᒋᑦ ᕿᔪᓕᕆᓂᕐᒥᒃ,” ᑕᐃᒪᓐᓇ ᐅᖃᖅᖢᓂ.
“ᑕᒪᒃᑯᐊ ᐃᑲᔫᑏᑦ ᐃᑲᔫᑕᐅᓪᓚᕆᓲᑦ ᐊᒻᒪᓗ ᒪᒃᑯᒃᑐᑦ ᐊᓕᐊᓇᐃᒍᓱᑦᑎᐊᓲᑦ.”