ᐅᖃᐅᓯᓕᕆᓂᖅ ᐃᑲᔫᑕᐅᔪᖅ 200 ᐅᖓᑖᓄᑦ ᒪᒃᑯᒃᑐᓄᑦ ᐅᖃᓘᑎᓕᕆᔨᒃᑯᑦ ᑲᖏᖅᖠᓂᕐᒥ Hᐊᑭᖅᑎᓂᒃ ᐃᓕᓐᓂᐊᖅᑎᑦᑎᓚᐅᖅᑎᓪᓗᒋᑦ Hᐊᑭᖃᑦᑕᕐᓂᐊᓕᕐᒥᔪᑦ ᐱᒋᐊᕈᒫᓕᕐᒥᑎᓪᓗᒋᑦ, ᐅᔾᔨᖅᑐᕐᓂᖅ ᓇᖕᒥᓂᖅ ᐱᕈᖅᐸᓪᓕᐊᔪᓐᓇᕐᓂᕐᒧᑦ ᒪᒃᑯᒃᑐᑦ ᐊᒻᒪᓗ ᑐᑭᓯᐅᒪᖁᑉᓗᒋᑦ ᖃᓄᖅ Hᐊᑭᓐᓂᖅ ᐊᒃᑐᖅᓯᓂᖃᖅᓯᒪᖕᒪᖔᑦ ᓄᓇᓕᖕᒧᑦ ᑲᖏᖅᖠᓂᕐᒧᑦ ᐊᒻᒪᓗ ᖃᓄᖅ ᐅᖓᑖᒍᒃᑲᓐᓂᖅ ᐱᔾᔪᑎᖃᕐᒪᖔᑦ ᐱᙳᐊᕐᓂᒃᑯᑦ ᓯᑯᒥ.
ᐅᑭᐅᖅ ᑕᐃᒪᓐᓇᐃᑦᑐᖅ ᓱᓕ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᖅᑎᑦᑎᔩᑦ ᑕᑯᒋᐊᖅᑎᑦᑎᓚᐅᖅᑎᓪᓗᒋᑦ Hᐊᑭᕐᓂᕐᒥᒃ - ᐱᙳᐊᕐᓂᑐᐃᓐᓇᐅᙱᑦᑐᒃᑯᑦ ᓯᑯᒥ − ᓯᑯᒦᙱᑎᓪᓗᒋᓪᓘᓐᓃᑦ ᐱᓕᕆᑎᓪᓗᒋᑦ ᓄᓇᓕᖕᒥ.
ᑭᓕ ᓕᓐᑎᐅᓪ ᐃᓕᑕᖅᓯᓂᒃᑯᓐᓂᕐᒥᐅᑕᖅ: ᓄᓇᕗᒥ ᐅᖃᐅᓯᓕᕆᓂᒃᑯᑦ ᑲᑎᒪᔨᒃᑯᓐᓂᒃ ᐃᓕᓐᓂᐊᖅᑎᑦᑎᔨᐅᓚᐅᖅᑐᖅ Hᐊᑭᕐᓂᕐᒧᑦ ᐃᓕᓐᓂᐊᖅᑐᓂᒃ ᐅᖃᐅᓯᓕᕆᓂᒃᑯᑦ, ᐅᖃᖅᖢᓂ ᐱᓕᕆᖃᑎᖃᓚᐅᖅᑐᒡᒎᖅ ᓄᑕᖅᑲᓂᒃ ᑐᕌᒐᕆᔪᒪᔭᒥᓂᒃ ᓇᓗᓇᐃᔭᐃᕙᓪᓕᐊᖁᑉᓗᒋᑦ ᐅᑭᐅᖅ; ᓇᓗᓇᐃᔭᐃᖁᑉᓗᒋᑦ ᓇᖕᒥᓂᖅ ᑐᕌᒐᕆᔪᒪᔭᖏᓐᓂᒃ Hᐊᑭᕐᓇᐅᓂᐊᖅᑐᒥ ᐊᒻᒪᓗ ᖃᓄᖅ ᑎᑭᐅᑎᓇᓱᖕᓂᐊᕐᒪᖔᑕ ᑐᕌᒐᕆᔭᖏᓐᓄᑦ. ᐅᖃᖅᖢᓂ ᐅᖃᖃᑎᒌᓚᐅᕐᒥᔪᒡᒎᖅ ᐆᒃᑑᑎᑦᑎᐊᕙᖕᓂᒃ ᐃᓄᖕᓂᒃ ᒪᒃᑯᒃᑐᑦ ᐅᐱᒋᔭᖏᓐᓂᒃ Hᐊᑭᓕᕆᓂᒃᑯᑦ, ᐅᕝᕙᓘᓐᓃᑦ ᓄᓇᓕᖕᒥ ᑭᓇᐅᒐᓗᐊᖅᐸᑦ.
“ᐅᖃᖃᑎᒋᖃᑦᑕᓚᐅᖅᑕᖅᐳᑦ ᓱᖕᒪᑦ ᐅᐱᒍᓱᖃᑦᑕᕐᒪᖔᑕ ᐊᓯᖏᓐᓂᒃ ᐊᒻᒪᓗ ᐅᐱᒋᔭᖏᑦ ᖃᓄᐃᓕᐅᕈᔾᔨᖃᑦᑕᕐᒪᖔᑕ ᐃᖕᒥᓂᒃ,” ᑕᐃᒪᓐᓇ ᐅᖃᖅᖢᓂ ᓕᓐᑎᐅᓪ.
“ᐅᖃᖃᑎᒋᓚᐅᕐᒥᔭᖅᐳᑦ ᐃᖕᒥᓂᒃᑕᐅᖅ ᐆᒃᑑᑕᐅᖃᑦᑕᕈᒫᕐᒥᖕᒪᑕ ᓄᑲᕆᓂᖅᓴᖏᓐᓄᑦ ᓄᓇᓕᖕᒥ, ᐊᒻᒪᓗ ᖃᓄᐃᓕᖓᔪᒫᕐᒪᖔᑦ ᑕᐃᒪᐃᑕᐅᓕᕈᑎᒃ.
“ᖃᐅᔨᒐᒪ ᐅᖃᐅᓯᓕᕆᓂᕐᒥᒃ ᑲᒪᓂᐊᕐᓂᒻᓄᑦ ᑕᒡᕙᓂ Hᐊᑭᕐᓂᕐᒧᑦ ᐃᓕᓐᓂᐊᖅᑐᓂᒃ ᖃᐅᔨᒋᐊᓚᐅᖅᑐᖓ 30 ᐅᖓᑖᓂ Hᐊᑭᖅᑎᓄᑦ ᓄᓇᑉᑎᓐᓂᒃ ᐊᐅᓪᓚᓚᐅᖅᓯᒪᔪᓄᑦ Hᐊᑭᒋᐊᖅᑐᖅᖢᑎᒃ, Hᐊᑭᖃᑦᑕᓚᐅᖅᑐᓄᑦ ᖃᑉᓗᓈᑦ ᓄᓇᖓᓂᒃ ᐊᒻᒪᓗ ᑭᓇᒧᑦ Hᐊᑭᕐᓂᒃᑯᑦ ᐱᕚᓪᓕᖅᑎᑕᐅᓯᒪᖕᒪᖔᑕ ᐃᓅᓯᕐᒥᒍᑦ.
“ᐊᐱᕆᓚᐅᖅᑕᒃᑲ ᐅᐊᔪᓕᐊᖑᓯᒪᔪᒥᒃ ᓇᐃᑦᑐᒥᒃ ᓇᒃᓯᐅᔾᔨᔪᓐᓇᕐᒪᖔᑕ ᐅᖃᐅᓯᒃᓴᕆᓇᔭᖅᑕᒥᓂᒃ ᓄᑕᖅᑲᓄᑦ ᐃᓕᓐᓂᐊᖅᑐᓄᑦ ᐃᒪᓐᓈᖅᑐᐃᔪᓐᓇᖁᑉᓗᒋᑦ ᓱᓇᑐᐃᓐᓇᒃᑯᑦ ᐱᔾᔪᑎᖃᖅᑐᒃᑯᑦ, ᑎᑭᕝᕕᐅᓚᐅᖅᑐᒍᑦ 15-ᓂᒃ ᐅᐊᔪᓕᐊᖑᓯᒪᔪᓂᒃ 15-ᓂᒃ Hᐊᑭᖅᑎᐅᕙᒃᑐᓂᒃ, ᐃᓚᖏᑦ ᐊᐅᓪᓚᖅᓯᒪᔪᓂᙶᖅᑐᑦ ᖃᑉᓗᓈᑦ ᓄᓈᓐᓂ ᒫᓐᓇᐅᔪᖅ ᐊᒻᒪᓗ ᑎᑭᕝᕕᐅᓚᐅᕆᑉᓗᑕ ᔪᐊᑕᓐ ᑐᑐᒥ.”
ᓕᓐᑎᐅᓪ ᐅᖃᖅᖢᓂ ᐅᖃᐅᓯᒃᓴᒡᒎᖅ ᑲᑎᖦᖢᒋᑦ 15 ᒥᓂᑦᒨᖓᔪᒃᓴᐅᔪᑦ ᒪᒃᑯᒃᑐᓄᑦ ᑐᕌᖓᔪᑦ Hᐊᑭᖅᑎᓪᓚᕆᖕᓂᙶᖅᑐᑦ ᑕᐃᑉᓱᒪᓂ ᐊᒻᒪᓗ ᐅᑉᓗᒥ, ᐃᓄᖕᓄᑦ ᐆᒃᑑᑎᑦᑎᐊᕙᐅᓂᕋᖅᑕᐅᓯᒪᔪᑦ ᐱᔪᓐᓇᕐᓂᖏᑦ ᒪᓕᒃᖢᒋᑦ.
ᐅᖃᖅᖢᓂ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᕈᑎ ᐃᑲᔫᑕᐅᓚᐅᕐᒪᑦ ᓄᑕᖅᑲᓄᑦ ᓇᓗᓇᐃᔭᐃᔪᓐᓇᖁᑉᓗᒋᑦ ᐊᔪᙱᓕᐊᓂᒃᑕᒥᓂᒃ, ᓱᓇᓂᒃ ᐱᓕᕆᐊᖃᕐᓂᖅᓴᐅᓇᔭᕐᒪᖔᑕ ᐊᒻᒪᓗ ᖃᓄᖅ ᑐᕌᒐᕆᔭᖏᓐᓄᑦ ᑎᑭᐅᑎᓂᐊᕐᒪᖔᑕ.
ᓕᓐᑎᐅᓪ ᐅᖃᖅᖢᓂ Hᐊᑭᖅᑎᓄᑦ ᐅᖃᐅᓯᒃᓴᓕᐊᖑᓚᐅᖅᑐᑦ ᑲᑎᖦᖢᒋᑦ 15 ᒥᓂᑦᒦᓐᓇᔭᖅᑐᑦ ᑕᕐᕆᔭᒐᒃᓴᑦ ᒪᒃᑯᒃᑐᓄᑦ ᓯᑯᒥ ᐱᙳᐊᖃᑦᑕᖅᓯᒪᓂᖏᓐᓄᑦ.
“ᐱᔾᔪᑎᖃᕐᒥᔪᖅ ᑭᓇᐅᔪᒪᓂᖏᓐᓄᑦ, ᓄᓇᒥᓂᒃ ᑭᓇᐅᔪᒪᖕᒪᖔᕐᒥᒃ ᐊᒻᒪᓗ ᐃᑲᔪᕈᓐᓇᕐᓂᖏᓐᓄᑦ.”
“ᐱᔾᔪᑎᖃᕐᒥᔪᖅ ᖃᓄᐃᓕᒋᐊᕈᑎᖃᕈᒪᓂᕐᒧᑦ ᐱᑦᑎᐊᖃᑦᑕᙱᑦᑐᓂᒃ ᐊᒻᒪᓗ ᑕᒪᕐᒥᒃ ᐃᓄᐃᑦ ᐃᓚᐅᖃᑕᐅᑎᑕᐅᑦᑎᐊᖃᑦᑕᕈᓐᓇᖁᑉᓗᒋᑦ − ᑕᒪᒃᑯᐊ ᑕᒡᕙ ᑲᒪᒋᓇᓱᓚᐅᖅᑕᖅᐳᑦ ᐊᒻᒪᓗ ᐅᖃᐅᓯᕆᓇᓱᓚᐅᖅᑕᖅᐳᑦ ᓄᑕᖅᑲᓄᑦ ᐅᖃᐅᓯᓕᕆᓂᒃᑯᑦ ᐃᓕᓐᓂᐊᖅᑎᑦᑎᑎᓪᓗᑕ.”
ᓕᓐᑎᐅᓪ ᐅᖃᖅᖢᓂ ᓄᑕᖅᑲᑦ ᖁᕕᐊᒋᔭᖃᓪᓚᕆᓚᐅᕐᒪᑕ ᐅᖃᐅᓯᓕᕆᓂᕐᒥᒃ ᐃᓕᓐᓂᐊᖅᖢᑎᒃ ᑕᒡᕙᓂ ᐅᑭᐅᒥ.
ᐅᖃᖅᖢᓂ ᐱᙳᐊᖅᑏᑦ ᐱᙳᐊᖃᑎᖃᖃᑦᑕᕐᓂᖏᓐᓄᑦ, ᐅᖃᐅᓯᖃᖃᑦᑕᓚᐅᖅᑐᑦ ᓇᖕᒥᓂᖅ ᐱᕙᓪᓕᐊᒃᑲᓐᓂᕈᒪᓂᕐᒧᑦ ᐊᒻᒪᓗ ᐃᓕᖅᑯᓯᕆᓂᐊᖅᑕᖏᑦ ᐅᖃᐅᓯᐅᒐᔪᓚᐅᖅᖢᑎᒃ.
“ᐃᖢᐊᖏᓕᐅᕈᑎᖃᕌᖓᕕᑦ, ᖃᓄᖅ ᑲᒪᒋᖃᑦᑕᖅᐱᐅᒃ? ᖃᓄᕐᓗ ᐃᓄᒃ ᐃᒃᐱᒋᔭᕐᒥᓂᒃ ᓇᓗᓇᐃᖅᓯᔪᓐᓇᖃᑦᑕᖅᐸ ᓈᒻᒪᒃᑐᒃᑯᑦ? ᑕᒪᒃᑯᐊ ᑕᒡᕙ ᐅᖃᖃᑎᒌᒍᑕᐅᓚᐅᖅᑐᑦ ᑕᐃᒪᐃᑦᑐᓕᕆᑎᓪᓗᑕ.
“ᓄᑕᖅᑲᑦ ᐊᑯᓂ Hᐊᑭᖃᑦᑕᕈᓐᓃᖅᓯᒪᖕᒪᑕ. ᓯᕗᓪᓕᖅᐹᒃᑯᑦ ᓯᑯᒦᒋᐅᖅᓯᒪᔪᓪᓘᓐᓃᑦ ᐅᑭᐅᖅ, ᑕᐃᒪᐃᒻᒪᑦ ᑕᖃᖓᔪᑦ ᐊᒻᒪᓗ ᐃᒃᐱᖕᓂᐊᓂᕆᔭᖏᑦ ᓴᖅᑭᓴᕋᐃᖦᖢᑎᒃ, ᐃᓛᓐᓂᒃᑯᑦ.
“ᓯᕗᓕᖅᑎᒋᔭᐅᔪᑦ ᕿᓄᐃᓵᑦᑎᐊᖃᑦᑕᓚᐅᖅᑐᑦ ᓄᑕᖅᑲᓂᒃ ᐅᑭᐅᖅ ᐊᒻᒪᓗ ᑲᒪᑦᑎᐊᖃᑦᑕᖅᖢᑎᒃ ᐱᑦᑎᐊᕈᓐᓃᖅᑐᖄᕐᔪᒃᑳᖓᑦ. ᑕᐃᒪᐃᒻᒪᑦ ᐅᖃᖃᑎᒌᖃᑦᑕᓚᐅᖅᑐᑦ ᑕᐃᒪᐃᑦᑐᒃ ᒥᒃᓵᓄᑦ Hᐊᑭᕐᓂᒃᑯᑦ.
“ᐃᓕᓐᓂᐊᕐᕕᖕᓂᒃ ᐊᑐᕈᓐᓇᓚᐅᙱᓐᓇᑉᑕ ᐅᑭᐅᖅ ᓄᕙᒡᔪᐊᕐᓂᖅ ᐱᔾᔪᑎᒋᑉᓗᒍ, ᑕᐃᒪᐃᒻᒪᑦ ᐱᔪᓐᓇᕐᓂᓗᒃᑖᒃᑯᑦ ᐊᑐᕈᓐᓇᖅᑕᑉᑎᓐᓂᒃ ᐊᑐᑦᑎᐊᕋᓱᓚᐅᖅᑐᒍᑦ ᑕᒪᕐᒥᒃ ᐃᓚᐅᖃᑕᐅᔪᑦ ᖁᕕᐊᓱᑦᑎᐊᖅᑑᔭᓚᐅᖅᑐᑦ. ᖁᔭᓕᓯᒪᔪᒍᑦ ᓴᕐᓕᐊᒃᑯᓐᓂᒃ ᓄᓇᒃᑰᕈᑎᕐᔪᐊᒃᑯᑦ ᐊᔾᔭᖅᑐᐃᖃᑦᑕᓚᐅᕐᒪᑕ. ᑕᒪᓐᓇ ᐃᑲᔫᑕᐅᓪᓚᕆᓚᐅᖅᑐᖅ ᑲᔪᓯᑦᑎᐊᕈᓐᓇᖁᑉᓗᒍ ᐃᓕᓐᓂᐊᕐᓂᐅᔪᖅ ᓄᑕᖅᑲᑦ ᐱᕈᖅᐸᓪᓕᐊᔪᓐᓇᖁᑉᓗᒋᑦ.”