ᔫᓐ Hᐃᒃᑲᑎ ᖃᒪᓂ’ᑐᐊᕐᒥᐅᑕᖅ ᖁᕕᐊᓱᓚᐅᙱᑦᑐᖅ ᑕᑯᒐᒥ ᖃᕆᑕᐅᔭᒃᑯᑦ ᑎᑎᕋᖅᓯᒪᔪᒥᒃ ᑕᑯᒐᒥ ᐅᖃᖅᓯᒪᔪᒥᒃ ᒪᕐᕈᒎᖅ ᓯᐲᓰᒥᐅᑖᒃ ᖃᒪᓂ’ᑐᐊᓕᐊᖅᐸᓪᓕᐊᖕᒪᑎᒃ ᖃᐅᔨᓴᖅᑕᐅᓯᒪᓇᑎᒃ ᓄᕙᒡᔪᐊᕐᓂᖃᕐᒪᖔᕐᒥᒃ ᐊᒻᒪᓗ, ᐱᓗᐊᖅᑐᒥ, ᐃᓄᑑᔭᕆᐊᖃᖅᓯᒪᙱᖦᖢᑎᒃ ᐊᓯᖏᑦᑎᑐᑦ ᓄᓇᖅᑲᑎᒥᑐᑦ.

ᐊᐅᓪᓚᖅᓯᒪᔪᑦ ᐋᓐᓂᐊᕐᕕᓕᐊᖅᓯᒪᔪᑦ ᖃᒪᓂ’ᑐᐊᕐᒥᐅᑕᑦ, ᐃᓄᑑᑎᑕᐅᖅᑳᖅᖢᑎᒃ 14-ᓂᒃ ᐅᑉᓗᓂᒃ ᕕᓂᐲᒃᒥ, ᖃᖓᑕᖃᑎᖃᓚᐅᖅᑐᑦ ᑖᑉᑯᓂᙵ ᒪᕐᕈᖕᓂᒃ, ᕕᓂᐲᒃᒥ ᑲᖏᖅᖠᓂᕐᒧᑦ ᐊᒻᒪᓗ ᑲᖏᖅᖠᓂᕐᒥ ᖃᒪᓂ’ᑐᐊᕐᒧᑦ.

ᔫᓐ Hᐃᒃᑲᑎ ᖁᕕᐊᓱᒃᑐᖅ ᓴᑭᒥᓂᒃ ᐃᓅᖃᑎᖃᐅᔭᖅᖢᓂ, ᔭᓂᑦ ᑕᒍᕐᓈᕐᒥᒃ, ᑕᓕᖅᐱᐊᓃᑦᑐᖅ, ᖃᒪᓂ’ᑐᐊᕐᒥ ᒫᓐᓇᓵᖑᓚᐅᖅᑐᖅ. ᐊᔾᔨ ᔫᓐ Hᐃᒃᑲᑎᒥᙶᖅᑐᖅ

Hᐃᒃᑲᑎ 72-ᓂᒃ ᐅᑭᐅᓕᒃ, ᐅᖃᓚᐅᖅᑐᖅ ᑲᑉᐱᐊᓱᓚᐅᖅᑐᖅ ᐋᓐᓂᐊᓕᖁᙱᖦᖢᓂᒋᑦ ᓄᓇᖅᑲᑎᓂ.

ᐅᖃᖅᖢᓂᓗ ᖁᔭᓕᒐᒥ ᓄᓇᕗᒥᐅᑦ ᒪᓕᒃᑕᐅᔭᕆᐊᓕᖕᓂᒃ ᐋᖅᑭᒃᓱᕈᔾᔭᐅᓯᒪᖃᑦᑕᕐᒪᑕ ᓴᐳᓐᓂᐊᖅᑕᐅᔪᓐᓇᖁᑉᓗᒋᑦ ᐊᑦᑕᓇᖅᑐᒦᖁᓇᒋᑦ, ᐊᒻᒪᓗ ᐃᓱᒪᔪᖅ ᓱᖕᒪᑦ ᑕᒪᒃᑯᐊ ᐊᑦᑕᓇᖅᑐᒦᑎᑕᐅᓇᔭᕐᒪᖔᑕ ᓯᐲᓰᒥᐅᑕᓄᑦ.

ᐃᒃᐱᒍᓱᒃᑲᒪ ᑕᒪᓐᓇ ᓈᒻᒪᒐᔭᙱᒻᒪᑦ 100-ᖏᓐᓃᑦᑐᓄᑦ ᓄᓇᕗᒥᐅᓄᑦ ᒪᓕᑦᑎᐊᓚᐅᖅᑐᓄᑦ ᑕᒪᐃᓐᓂᒃ ᒪᓕᒐᕆᔭᐅᔪᓂᒃ ᑕᒪᓐᓇ ᓄᕙᒡᔪᐊᕐᓂᐅᔪᖅ (ᓄᓇᑉᑎᓐᓄᑦ ᑎᑭᖁᓇᒍ),” ᑕᐃᒪᓐᓇ ᐅᖃᖅᖢᓂ Hᐃᒃᑲᑎ. “ᐅᖃᐅᑎᔭᐅᓚᖓ ᓱᖕᒪᑦ ᐱᒻᒪᕆᐅᖕᒪᖔᑦ ᓯᐲᓰᒃᑯᓐᓂᕐᒥᐅᑕᑦ ᓴᓇᔩᑦ ᑎᑭᑦᑕᕆᐊᖃᕐᓂᖏᓐᓄᑦ ᖃᒪᓂ’ᑐᐊᕐᒧᑦ?”

ᔭᐃᓐ ᑐᕋᓐ, ᓄᓇᓕᖕᓂ ᐊᕕᒃᑐᖅᓯᒪᔪᓂᒃ ᐊᖓᔪᖅᑳᖅ ᑐᓴᐅᒪᖃᑦᑕᐅᑎᓕᕆᓂᕐᒧᑦ, ᓂᐅᕕᐊᒃᓴᓕᕆᓂᕐᒧᓪᓗ ᐊᒻᒪᓗ ᓯᐲᓰᒃᑯᑦ ᐅᑭᐅᖅᑕᖅᑐᒥ ᓂᐅᕕᐊᒃᓴᕆᖃᑦᑕᖅᑕᖏᓐᓄᑦ ᓴᔅᑳᑦᑐᐊᓐᒥᓗ, ᐅᖃᖅᑐᖅ ᓯᐲᓰᒃᑯᑦ ᓯᑕᒪᓂᒃ ᓴᓇᔨᓂᒃ ᖃᒪᓂ’ᑐᐊᓕᐊᖅᑎᑦᑎᓚᐅᕐᒪᑕ ᐅᑐᐱᕆ 29-ᒥ ᑲᒪᔭᖅᑐᖅᖢᑎᒃ “ᐱᒻᒪᕆᐊᓗᒃᑯᑦ ᑐᐊᕕᕐᓇᖅᑐᒥᒃ” ᓇᐸᔪᖅ ᐋᖅᑭᒃᓱᖅᑕᐅᔭᕆᐊᖃᖅᑎᓪᓗᒍ.

“ᑕᒪᓐᓇ ᐱᓕᕆᐊᖑᔭᕆᐊᖃᓚᐅᖅᑐᖅ ᓈᓚᐅᑎᒃᑯᑦ FM-ᑯᑦ ᓈᓚᒃᑕᐅᓲᖅ ᑐᓴᖅᓴᐅᔪᓐᓇᖅᓯᖁᑉᓗᒍ,” ᑐᕋᓐ ᐅᖃᖅᖢᓂ.

ᓯᐲᓰᒃᑯᑦ ᓴᓇᔨᖏᑦ ᑕᐅᕙᓂ ᐊᖏᖅᑕᐅᓯᒪᖕᒪᑕ ᑎᑭᑦᑐᓐᓇᕐᓂᖏᓐᓄᑦ ᐊᖏᖅᑕᐅᓯᒪᑉᓗᑎᒃ ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᔨᕐᔪᐊᒧᑦ ᑎᑎᖅᑲᑎᒍᑦ ᓇᓗᓇᐃᖅᓯᑉᓗᓂ ᑎᑭᑦᑐᓐᓇᕐᓂᖏᓐᓄᑦ ᓴᓇᔩᑦ ᑕᑕᑎᕆᖅᑳᖅᖢᑎᒃ ᓄᓇᕗᒧᙵᐅᔪᓐᓇᕐᓂᕐᒧᑦ ᑕᑕᑎᕈᑎᒥᒃ. ᖃᒪᓂ’ᑐᐊᓕᐊᖅᑐᑦ ᐅᖃᐅᑎᔭᐅᓯᒪᓚᐅᖅᑐᑦ ᐅᔾᔨᖅᑐᕆᐊᖃᕐᓂᖏᓐᓄᑦ, ᐊᒻᒪᓗ ᒪᓕᑦᑎᐊᖅᑐᑦ ᑕᒪᐃᓐᓂᒃ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐅᔾᔨᖅᑑᑕᐅᔭᕆᐊᓕᖕᓂᒃ, ᒪᓕᒃᖢᒍ ᑐᕋᓐ ᐅᖃᐅᓯᕆᓯᒪᔭᖓ.

ᐅᖃᖅᖢᓂᓗ ᓇᐸᔪᖅ ᐋᖅᑭᒃᓱᕆᐊᖅᑐᖅᑕᐅᓚᐅᖅᑐᖅ ᐋᖅᑭᒃᑕᐅᓯᒪᓕᕐᒪᑦ ᐊᒻᒪᓗ ᒪᕐᕉᒃ ᓇᐸᔪᒥᒃ ᐋᖅᑭᒃᓱᐃᓚᐅᖅᑑᒃ ᑳᓐᑐᕌᒃᑏᒃ ᐅᐃᓂᐲᒃᒧᑦ ᐅᑎᓚᐅᕐᓂᕋᖅᖢᒋᑦ ᓴᓇᑦᑕᐃᓕᒥ. ᐱᖃᑎᖏᒃ ᒪᕐᕉᒃ ᓴᓇᔩᒃ ᐱᐊᓂᒃᓯᔭᕆᐊᖃᖅᑑᒃ ᐱᓕᕆᐊᒥᓂᒃ ᐊᕐᕕᐊᓂ ᕿᑎᐊᓄᑦ ᑎᑭᓪᓗᒍ, ᑕᐃᒪᓐᓇ ᐅᖃᒃᑲᓐᓂᖅᖢᓂ.

Hᐃᒃᑲᑎ ᐅᖃᖅᖢᓂ ᑕᒪᕐᒥᒃ ᐃᓄᐃᑦ ᒪᓕᒐᓂᒃ ᒪᓕᖃᑦᑕᕋᔭᕋᓗᐊᕐᒪᑕ ᓄᕙᒡᔪᐊᕐᓂᖅ-19 ᐱᔾᔪᑎᒋᑉᓗᒍ.

ᑖᑉᑯᐊᑦᑕᐃᓐᓇᖅ ᒪᓕᒐᑦ ᒪᓕᒃᑕᐅᔭᕆᐊᖃᖅᑎᑕᐅᔫᒐᓗᐊᑦ ᑕᒪᐃᓐᓄᑦ ᓄᓇᕗᓕᐊᖅᑐᓄᑦ, ᐱᓗᐊᖅᑐᒥ ᕕᓂᐲᒃᒥᙶᖅᑐᑦ,” ᑕᐃᒪᓐᓇ ᐅᖃᖅᖢᓂ. “ᐅᕙᖓᓕ ᑎᖕᒥᓲᕐᒧᑦ ᐃᑭᔪᒪᓇᔭᙱᓐᓇᒪ ᐃᑭᕝᕕᒋᔭᖓᓄᑦ ᖃᐅᔨᒪᒍᒪ ᐃᓄᑑᑎᑕᐅᓚᐅᙱᓐᓂᖏᓐᓄᑦ, ᖃᐅᔨᓴᖅᑕᐅᓯᒪᙱᑦᑐᑦ ᑎᖕᒥᓲᕐᒦᖃᑕᐅᔪᑦ.”

Hᐃᒃᑲᑎ ᐅᖃᖅᖢᓂ ᑕᒪᕐᒥᒃ ᐃᓄᐃᑦ ᐊᒃᑐᖅᑕᐅᓂᖃᖅᓯᒪᖕᒪᑕ ᐃᓅᓯᕐᒥᒍᑦ ᓄᕙᒡᔪᐊᕐᓂᒃᑯᑦ.

ᐅᖃᖅᖢᓂ ᓄᕙᒡᔪᐊᓕᕋᔭᕐᓂᕐᒧᑐᐃᓐᓇᐅᙱᑦᑐᖅ, ᐃᓄᐃᑦᑕᐅᖅ ᐊᒃᑐᖅᑕᐅᓯᒪᓂᖃᕐᒪᑕ ᐃᓱᒪᒃᑯᑦ ᓄᕙᒡᔪᐊᕐᓂᖅ ᐱᔾᔪᑎᒋᑉᓗᒍ.

ᓄᕙᒡᔪᐊᕐᓂᖅ ᓄᓇᕗᒦᙱᓐᓂᖓᓄᑦ ᐱᖏᒐᙱᑦᑑᙱᓐᓇᑉᑕ,” ᑕᐃᒪᓐᓇ ᐅᖃᖅᖢᓂ. “ᓄᓇᕗᑦ ᑎᑭᑕᐅᓂᐊᖅᐸᑦ ᐃᓄᖕᓄᑦ ᖃᐅᔨᓴᖅᑕᐅᓯᒪᙱᑦᑐᓄᑦ ᓄᕙᒡᔪᐊᕐᓂᖅ -19-ᑯᑦ, ᐊᒻᒪᓗ ᐃᓄᑑᑎᑕᐅᓯᒪᙱᑎᓪᓗᒋᑦ, ᐅᔾᔨᕈᓱᒃᑎᑕᐅᓇᔭᕋᑉᑕ ᖃᐅᔨᒪᓂᐊᕋᑉᑕ ᐃᓚᐅᖃᑕᐅᔪᒪᓂᐊᕐᒪᖔᑉᑕ ᑎᑭᓯᒪᔾᔪᑎᒋᔭᖏᓐᓄᑦ.”

ᑭᕙᓪᓕᕐᒥ ᓂᐲᑦ ᑐᓴᒐᒃᓴᓕᕆᔨᒃᑯᖏᑦ ᖃᐅᔨᒋᐊᓚᐅᖅᑐᑦ ᓯᐲᓰᒃᑯᓐᓄᑦ ᓂᑉᓕᐅᑎᖃᕈᓐᓇᖁᑉᓗᒋᑦ ᑭᓯᐊᓂ ᑭᐅᔭᐅᓚᐅᙱᑦᑐᑦ ᑕᒪᓐᓇ ᑎᑎᕋᖅᓯᒪᔪᖅ ᓴᖅᑭᑎᑕᐅᖅᑳᖅᑎᓐᓇᒍ.

Advertisement

Darrell Greer

Darrell Greer is Editor of Kivalliq News