ᕿᓂᕐᓂᖅ ᐊᖓᔮᕐᓇᖅᑐᕐᓗᖕᓂᒃ ᑐᑭᓯᒋᐊᕈᑎᒃᑦᓴᓂᒃ

915

ᐊᒥᓱᑦ ᐃᓕᓐᓂᐊᖅᑎᑦ ᖁᕕᐊᓱᖏᔾᔪᑎᖃᓚᐅᖅᐳᑦ ᐊᖓᔮᕐᓇᖅᑐᓂᒃ ᓵᓚᒃᓴᐅᑎᖃᕋᓱᐊᖅᖢᑎᒡᓗ ᑎᑎᕋᐅᔭᖅᖢᑎᒃ ᑐᓴᕐᕕᒃ ᐃᓕᓐᓂᐊᕐᕕᖓᓂ ᐊᒻᒪ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᓇᐅᔮᓂ ᑕᒡᕙᓂ ᑕᖅᑭᒥ ᐊᑐᖅᑐᒥ.

ᒥᑭᔪᑦ ᐃᓕᓐᓂᐊᖅᑎᑦ, ᒪᒃᑯᒃᑐᓪᓗ ᐃᓕᓐᓂᐊᕐᕕᒡᔪᐊᒥ ᐅᑭᐅᖁᖅᑐᓂᖅᓴᐃᓪᓗ ᐃᓕᓐᓂᐊᖅᑎᑦ ᐅᕕᓂᕈᖅᓯᒪᔪᑦ ᐊᒻᒪ ᓇᓴᖃᖅᑐᓂᒃ ᐱᔭᐅᓚᐅᖅᑐᓂᒃ Father Daniel Scwarc ᑎᑎᕋᐅᔭᖅᑎᑦᓯᑎᓪᓗᒍ ᑕᑯᒃᓴᐅᑎᑕᐅᔪᒃᓴᓂᒃ ᐊᖓᔮᕐᓇᖅᑐᕐᓗᐃᑦ ᐱᐅᖏᓐᓂᖏᓐᓄᑦ ᓇᐅᔮᓂ ᔭᓐᓄᐊᕆ 15-ᖑᓚᐅᖅᑐᒥ.

ᑕᒪᓐᓇ ᓵᓚᒃᓴᐅᑕᐅᓇᓱᐊᖅᑐᖅ ᐱᒋᐊᖅᑕᐅᓚᐅᖅᖢᓂ ᐊᐅᓚᑕᐅᓚᐅᖅᖢᓂᓗ Father Daniel Scwarcᒧᑦ, ᐃᓕᓐᓂᐊᖅᑎᓪᓗ ᔭᓐᓄᐊᕆ 9-ᒥᑦ 12-ᒧᑦ ᓴᓇᑎᑕᐅᓚᐅᖅᐳᑦ ᑎᑎᕋᐅᔭᖅᑎᑕᐅᑉᓗᑎᒃ ᑐᑭᖃᖅᑐᓂᒃ ᑐᓴᖅᑎᑎᒍᑎᓂᒃ ᑕᒪᒃᑯᐊ ᐊᖓᔮᕐᓇᖅᑐᕐᓗᐃᑦ ᐱᐅᖏᓐᓂᖏᓐᓄᑦ.

ᑕᒪᒃᑯᐊ ᑎᑎᕋᐅᔭᖅᑕᐅᓯᒪᔪᑦ ᖃᐅᔨᓴᖅᑕᐅᓚᖅᐳᑦ ᔭᓐᓄᐊᕆ 15−ᒥ ᑖᒃᑯᐊᓗ ᑎᑎᕋᐅᔭᑦᓯᐊᖅᑐᑦ 11 ᐊᑐᓂ ᐃᓕᓐᓂᐊᕐᕕᖕᓂᑦ ᓵᓚᒃᓴᐅᑎᖃᓚᐅᖅᐳᑦ. ᐊᒧᓯᖃᑦᑕᓚᐅᖅᐳᓪᓗ ᐊᑎᕐᓂᒃ ᐃᓚᐅᔪᓂᒃ ᐃᓕᓐᓂᐊᖅᑎᓂᒃ ᐊᑐᓂ ᐃᓕᓐᓂᐊᕐᕕᖕᒥ ᓄᑖᑦᓯᐊᓂᒃ ᑕᓪᓕᒪᓂᒃ ᑐᓂᔭᒃᓴᖃᓚᐅᖅᖢᑎᒡᓗ ᑐᓴᕐᓈᕈᑎᐊᓛᓂᒃ ᓯᐅᒻᒥᐅᑕᓂᒃ.

ᐊᑐᓂ ᐃᓕᓐᓂᐊᖅᑎᑦ ᐃᓚᐅᓚᐅᖅᑐᑦ ᐅᕕᕈᖅᑖᓚᐅᖅᖢᑎᒃ ᐊᒻᒪ ᓇᓴᖃᖅᑐᓂᒃ ᑎᑎᕋᖅᓯᒪᑉᓗᑎᒃ ᐊᖓᔮᕐᓇᖅᑐᕐᓗᐃᑦ ᐱᐅᖏᓐᓂᖏᓐᓄᑦ.

ᑲᑎᓪᓗᒋᑦ 208 ᐃᓕᓐᓂᐊᕐᕕᓛᒥ ᑎᑎᕋᐅᔭᖅᑕᐅᓚᐅᖅᑐᑦ ᐊᒻᒪ 95 ᒪᒃᑯᖕᓂᖅᓴᓂᑦ ᐊᒻᒪ ᐅᑭᐅᖅᑯᖅᑐᓂᖅᓴᓂᒃ ᑐᓂᔭᐅᓚᐅᖅᐳᑦ ᓵᓚᒃᓴᕋᓱᐊᖃᑕᐅᑉᓗᑎᒃ.

ᐊᑖᑕ Father Scwarc ᐅᖃᓚᐅᖅᐳᖅ ᐱᒋᐊᖅᑎᑦᓯᓚᐅᖅᐳᖅ ᑕᐃᒪᓐᓇ ᓵᓚᒃᓴᐅᑎᖃᖅᑎᑦᓯᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᓕᐅᓚᐅᖅᑎᓪᓗᒋᑦ ᒪᓕᒐᑎᒍᑦ ᐊᑐᖅᑕᐅᔪᓐᓇᕐᓂᐊᓕᕐᓂᖏᓐᓄᑦ ᓱᐴᖅᑐᒐᕐᓗᐃᑦ ᐊᖓᔮᕐᓇᖅᑐᕐᓗᐃᑦ ᔪᓚᖑᑐᐊᖅᐸᑦ.

ᐅᖃᓚᐅᖅᐳᖅ ᐊᒥᓱᑦ ᐃᓄᐃᑦ ᐃᓱᒪᖕᒪᑕ ᒪᓕᒐᑎᒍᑦ ᐊᑐᖅᑕᐅᔪᓐᓇᖅᑐᖃᓕᕌᖓᑦ, ᑐᑭᖃᕐᓂᖓᓄᑦ ᓈᒻᒪᒃᑑᓂᖏᓐᓄᑦ ᑕᒪᓐᓇ ᓱᓕᓗᐊᖏᒻᒪᑦ.

ᖃᒡᓕᓂᖓᓄᑦ ᑕᒪᓐᓇ ᐅᑉᓗᖅ, ᖃᐅᔨᑎᑦᓯᒋᐊᖃᕋᑉᑕ ᒪᒃᑯᒃᑐᓂᒃ ᓄᑕᖃᓂᒃ ᐊᖓᔮᕐᓇᖅᑐᕐᓗᐃᑦ ᐱᐅᖏᓐᓂᖏᓐᓄᑦ, ᒪᓕᒐᑎᒍᑦ ᐊᑐᖅᑕᐅᔪᓐᓇᕋᓗᐊᖅᖢᑎᒃ,” ᐅᖃᓚᐅᖅᐳᖅ.

ᑕᐃᒪᓐᓇ ᐊᖓᔮᕐᓇᖅᑐᕐᓗᖃᑦᑕᓕᕐᓗᓂ ᐊᓯᖏᓐᓄᑦ ᐊᖓᔮᕐᓇᖅᑐᓄᑦ ᐱᒋᐊᑐᐃᓐᓇᕆᐊᖃᕐᒪᑕ, ᓇᐅᔮᒥᐅᑕᐅᒐᒪ ᖃᐅᔨᒪᖏᑦᖢᖓᓗ ᑕᒪᒃᑯᓂᖓ ᐊᖓᔮᕐᓇᖅᑐᓂᒃ ᐊᓯᖏᓐᓂᒃ ᓴᓐᖏᔪᓂᒃ ᐱᑕᖃᕐᒪᖔᑦ ᑕᒡᕙᓂ.

ᑭᓯᐊᓂ ᐊᖓᔮᕐᓇᖅᑐᕐᓗᒃ ᓱᐴᖅᑐᒐᕐᓗᐃᑦ ᐱᑕᖃᕐᒪᑕ ᓇᐅᔮᓂ ᐃᖢᐃᓪᓕᐅᕈᑕᐅᑉᓗᑎᒡᓗ ᓄᓇᓕᖕᒥ, ᐅᒃᐱᕈᓱᒃᖢᖓᓗ ᑕᒪᒃᑯᐊ ᓄᑕᖃᑦ ᐱᒋᐊᕈᑎᖃᖅᐸᑕ ᐊᖓᔮᕐᓇᖅᑐᕐᓗᖕᓂᒃ ᓱᐴᖅᑐᒐᕐᓗᖕᓂ ᓴᓐᖏᓂᖅᓴᓄᑦ ᐊᖓᔮᕐᓇᖅᑐᓄᑦ ᐊᑐᓕᑐᐃᓐᓇᕆᐊᖃᕐᒪᑕ ᐅᑭᐅᖁᖅᑐᓂᖅᓴᐅᓕᕈᑎᒃ.”

ᐊᑖᑕ Father Scwarc, ᓇᐅᔮᓂᒥᐅᑕᐅᓯᒪᓕᖅᖢᓂ ᐅᑭᐅᓄᑦ ᖁᓕᓄᑦ, ᐅᖃᒪᐅᖅᐳᖅ ᖁᕕᐊᓱᓚᐅᕋᒥ ᑭᐅᔭᐅᑦᓯᐊᕐᓂᕐᒥᓄᑦ ᓵᓚᒃᓴᐅᑎᖃᖅᑎᑎᒍᑕᐅᓚᐅᖅᑐᒧᑦ ᐱᑎᑦᓯᓚᐅᖅᖢᓂ ᐃᓕᓐᓂᐊᕐᕕᖕᓂ ᒪᕐᕉᖕᓂ.

ᐅᖃᓚᐅᖅᐳᖅ ᐱᓕᕆᐊᖃᕋᓱᐊᕋᒥ ᓄᑕᖃᑦ ᐊᐱᖅᓱᖃᑦᑕᖁᑉᓗᒋᑦ ᑕᒪᒃᑯᐊ ᐊᖓᔮᕐᓇᖅᑐᑦ ᖃᓄᖅ ᐱᐅᖏᓐᓂᖏᓐᓂᒃ ᖃᓄᐃᓕᐅᕈᑕᐅᔪᓐᓇᕐᓂᖏᓐᓄᓪᓗ ᑕᐃᒪᓐᓇᐃᑦᑐᖃᑦᑕᖅᑐᓄᑦ.

ᐊᑕᐅᓯᖅ ᒪᒃᑯᒃᑐᖅ ᓂᕕᐊᖅᓯᐊᖅ ᐅᐸᓚᐅᖅᐳᖅ ᐅᕙᒻᓄᑦ ᐱᓇᓱᐊᕈᓯᒥ ᑎᑎᕋᐅᔭᕆᐊᖃᕐᓂᐊᓕᖅᖢᑎᒃ, ᐅᖃᓚᐅᖅᖢᓂᓗ ᖃᕆᑕᐅᔭᒃᑯᑦ ᕿᓂᓚᐅᖃᒥ ᖃᓄᐃᑦᑐᓂᒃ ᑎᑎᕋᐅᔭᕐᓂᐊᕐᒪᖔᒥ ᓇᓂᓯᓚᐅᕋᒥ ᐊᖓᔮᕐᓇᖅᑐᐃᑦ ᒥᒃᓵᓄᑦ ᑎᑎᕋᐅᑕᐅᓯᒪᔪᓂᒃ.

ᐅᖃᓚᐅᖅᐳᖅ ᐅᖃᓕᒫᓕᖅᖢᓂᒋᑦ ᑐᓴᕐᓂᕆᓚᐅᕋᒥᒋᑦ, ᑕᐃᒪᓐᓇ ᑕᒡᕙ ᐱᒋᐊᖅᑎᑦᓯᒍᒪᓚᐅᖅᐳᖓ, ᐃᓱᒪᒃᓴᖅᓯᐅᕈᑕᐅᔪᒃᓴᓂᒃ, ᖃᐅᔨᒋᐊᕈᓐᓇᖁᑉᓗᒋᑦ ᓇᖕᒥᓂᖅ, ᐃᖢᐊᖏᔾᔪᑎᖃᕐᓂᖏᓐᓄᑦ ᐊᖓᔮᕐᓇᖅᑐᐃᑦ.

ᓄᑕᖃᑦ ᑲᔪᖏᖅᓴᖅᑕᐅᓚᐅᕐᒪᑕ ᐃᓚᐅᖁᔭᐅᑉᓗᑎᒃ ᑎᑎᕋᐅᔭᕐᓂᕐᒧᑦ ᓵᓚᒃᓴᐅᑎᒃᓴᖃᑦᓯᐊᓚᐅᕐᒪᑕ, ᑕᐃᒪᓐᓇ ᑲᑎᓚᖅᑕᒃᑲ ᐱᒋᐊᕈᑎᒋᓚᐅᖅᑕᒃᑲ ‘ᐱᒍᒪᒍᑕᐅᖁᑉᓗᒋᑦ ᐃᓚᐅᓂᕐᒧᑦ’, ᑲᔪᓯᑦᓯᐊᓚᐅᖅᐳᖅ ᑕᒪᓐᓇ.

ᐃᓚᖏᑦ ᓄᑕᖃᑦ ᐊᖓᔮᕐᓇᖅᑐᖅᑐᖃᑦᑕᕐᒪᑕ, ᓱᓕ ᑎᑎᕋᐅᔭᕐᓂᕐᒧᑦ ᐃᓚᐅᓚᐅᖅᐳᑦ ᓵᓚᒃᓴᕋᓱᐊᖅᖢᑎᒃ ᑕᐃᒪᓐᓇ ᓄᖅᑲᖅᑎᑕᐅᔪᓐᓇᖏᒻᒪᑕ, ᑭᓯᐊᓂ ᓇᐅᔮᓂ, ᐊᒥᓱᑦ ᒪᒃᑯᒃᑐᑦ ᐊᖓᔮᕐᓇᖅᑐᓚᐅᖅᓯᒪᖏᒻᒪᑕ ᐱᒍᒪᖏᑦᓯᐊᖅᖢᑎᒡᓗ, ᑕᐃᒪ ᐊᒥᓲᓂᖅᓴᓂᒃ ᓄᑕᖃᓂᒃ ᐃᓚᐅᔪᖃᖅᐸᑦ ᑐᑭᓯᒋᐊᕈᑎᒃᓴᓂᒃ ᖃᐅᔨᒋᐊᕈᓐᓇᖃᑦᑕᖁᑉᓗᒋᑦ ᐊᐱᖅᓱᖃᑦᑕᕐᓗᑎᒡᓗ ᑕᒪᒃᑯᓂᖓ ᑕᐃᒪᓐᓇ ᐱᒍᒪᖏᑦᑐᑦ ᐊᒥᓲᓂᖅᓴᐅᓕᖅᐸᓪᓕᐊᖁᑉᓗᒋᑦ, ᑕᐃᒪᑐᖅ, ᑕᒪᓐᓇ ᐱᐅᒐᔭᖅᐳᑦ ᒪᓕᒐᑎᒍᑦ ᐱᔪᓐᓇᖅᑎᑕᐅᒐᓗᐊᖅᐸᑕ ᐱᔪᓐᓇᖅᑎᑕᐅᒍᓐᓇᖏᑉᐸᑕᓗ.”