ᐊᒥᓲᓚᐅᖅᑐᑦ ᖁᖓᔮᖅᑐᑦ 50 ᓄᑕᖅᑲᑦ ᓄᑖᓂᒃ ᑐᒃᑲᕆᐊᓕᖕᓂᒃ ᑐᓂᐅᖅᑲᖅᑕᐅᖕᒪᑕ ᑲᖏᖅᖠᓂᕐᒥ ᐱᓇᓱᐊᕈᓯᐅᓚᐅᖅᑐᒥ Hᐊᒻᓚᒃᑯᓐᓂᙶᖅᑐᓂᒃ.

Hᐊᒻᓚᒃᑯᑦ ᕿᑎᒃᑐᓕᕆᔨᖓ ᑕᐃᕕᑎ ᑲᓛᒃ ᖃᐅᔨᓴᖅᑐᖅ ᑐᑭᓕᕇᓕᖅᓯᒪᔪᓂᒃ ᑐᒃᑲᕆᐊᓕᖕᓂᒃ ᓵᓚᒃᓴᖅᑕᐅᓂᐊᖅᑐᓂᒃ ᐊᒧᖅᑲᐃᓂᐊᖅᑎᓪᓗᒋᑦ ᓄᑖᒥ ᑲᖏᖅᖠᓂᐅᑉ ᓯᐊᕐᕆᔮᕐᕕᖓᓂᒃ ᒪᐃ 14-ᒥ.
ᑎᐅᕈᓪ ᒍᕆᐅᕐ/ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᓂᙶᖅᑐᖅ ᐊᔾᔨ

ᑲᖏᖅᖠᓂᕐᒥ ᕿᑎᒃᑐᓕᕆᔨ ᑕᐃᕕᑎ ᑲᓛᒃ ᐅᖃᖅᖢᓂ Hᐊᒻᓚᒃᑯᑦ ᖃᓄᐃᓕᐅᖅᑎᑦᑎᔪᒪᓚᐅᕐᒪᑕ ᖁᕕᐊᓱᒃᑎᑦᑎᔪᒪᑉᓗᑎᒃ ᓄᑕᖅᑲᓂᒃ, ᐊᒥᓱᑦ ᖃᓄᐃᓕᐅᕈᑎᒃᓴᑦ ᓄᖅᑲᖅᑎᑕᐅᓯᒪᑎᓪᓗᒋᑦ ᓴᖅᑭᓐᓇᔭᓚᐅᖅᑐᑦ ᐸᑲᓪᓚᒃ ᑕᐃᒻ ᑲᔪᓯᓇᔭᓚᐅᖅᐸᑦ.

ᐅᖃᖅᖢᓂ ᓄᖅᑲᖅᑎᑕᐅᔪᑦ ᖃᓄᐃᓕᐅᕈᑎᒃᓴᑦ ᐊᒻᒪᓗ ᐅᖓᓯᒌᖃᑦᑕᕆᐊᖃᕐᓂᖅ ᐊᒃᓱᕈᕐᓇᖅᑐᒃᑰᕈᑕᐅᓯᒪᖕᒪᑦ ᑕᒪᐃᓐᓄᑦ ᐃᓄᖕᓄᑦ ᑕᖅᑭᕐᓂᒃ ᖄᖏᓵᖅᓯᒪᔪᓂᒃ, ᓄᑕᖅᑲᑦ ᐱᓗᐊᖅᑐᒥ ᐊᒃᓱᕈᕐᓇᖅᑐᒃᑰᖅᓯᒪᔪᑦ ᐊᓃᖃᑎᖃᕈᓐᓇᐃᓪᓕᓯᒪᑎᓪᓗᒋᑦ ᓄᑕᕋᐅᖃᑎᒥᓂᒃ.

“ᐃᓱᒪᓚᐅᕋᑉᑕ ᑕᒪᓐᓇ ᖁᕕᐊᒋᔭᐅᓂᐊᕋᓱᒋᑉᓗᒍ ᐃᑲᔪᕈᓐᓇᕈᑉᑕ ᒥᑭᔪᒃᑯᓪᓘᓐᓃᑦ, ᑕᐃᒪᐃᒻᒪᑦ Hᐊᒻᒪᓚᒃᑯᑦ ᓂᐅᕕᓕᓚᐅᖅᑐᑦ ᑐᒃᑲᕆᐊᓕᖕᓂᒃ ᑐᓂᐅᖅᑲᐅᑕᐅᓂᐊᖅᑐᓂᒃ ᓄᑕᖅᑲᓄᑦ ᓄᓇᑉᑎᓐᓂᒃ,” ᑕᐃᒪᓐᓇ ᐅᖃᖅᖢᓂ ᑲᓛᒃ.

“ᐸᕐᓇᐃᓯᒪᓗᐊᓚᐅᙱᑦᑐᒍᑦ ᖃᓄᐃᓕᐅᕐᓂᐊᕐᒪᖔᑉᑕ ᐅᕝᕙᓘᓐᓃᑦ ᖃᓄᑐᐃᓐᓇᖅ, ᑕᐃᒪᐃᒻᒪᑦ ᐱᓕᕆᐊᕆᑐᐃᓐᓇᓕᓚᐅᖅᑕᕋ.

ᐊᒨᖅᑲᐃᓇᔭᓚᐅᖅᑐᒃᓴᐅᔪᒍᑦ ᐸᑲᓪᓚᒃ ᑕᐃᒻᖑᑎᓪᓗᒍ ᐅᕝᕙᓘᓐᓃᑦ ᐃᖃᓪᓕᐊᕐᔪᐊᕆᐊᖅᑳᕐᓇᑎᒃ ᐃᓄᐃᑦ – ᐃᓄᐃᑦ ᑲᑎᓯᒪᓕᖅᐸᑕ – ᑭᓯᐊᓂ ᐃᓄᐃᑦ ᑲᑎᑦᑕᐃᓕᒪᑎᑕᐅᑎᓪᓗᒋᑦ, ᖃᓄᐃᓕᐅᖅᑎᑦᑎᓂᐊᕐᓂᕋᓂᒃ ᐃᓱᒪᒃᓴᖅᓯᐅᕆᐊᖃᓚᐅᕋᒪ.”

Hᐊᒻᓚᒃᑯᑦ ᓄᑖᓂᒃ ᑐᒃᑲᕆᐊᓕᖕᓂᒃ ᐱᔪᓐᓇᖅᓯᓚᐅᖅᑐᑦ ᖁᖓᔮᑦᑎᐊᕈᓐᓇᖅᓯᑉᓗᑎᒃ 50 ᓄᑕᖅᑲᑦ ᓄᓇᑉᑎᓐᓂᒃ.

ᑲᓛᒃ ᐅᖃᖅᖢᓂ ᑐᒃᑲᕆᐊᓖᑦ ᓵᓚᒃᓴᖅᑕᐅᔪᓐᓇᖅᓯᓚᐅᕐᒪᑕ ᓄᑕᖅᑲᓄᑦ ᐅᑭᐅᓕᖕᓄᑦ ᑕᓪᓕᒪᓂᒃ ᖁᓕᓄᑦ ᐊᑎᖏᑦ ᐊᒧᔭᐅᖃᑦᑕᖅᓗᑎᒃ ᑲᖏᖅᖠᓂᐅᑉ ᓯᐊᕐᕆᔮᕐᕕᒃᑖᓵᖓᓂᒃ ᓯᑕᒻᒥᐅᓚᐅᖅᑐᒥ, ᒪᐃ 14-ᒥ.

“ᓇᓂᓯᔪᓐᓇᕈᒪ ᑮᓇᐅᔭᒃᑲᓐᓂᕐᓂᒃ, Hᐊᒻᓚᒃᑯᑦ ᑕᐃᒪᐃᓕᐅᖅᑎᑦᑎᒃᑲᓐᓂᕈᒪᔪᑦ ᓯᕗᒻᒧᐊᒃᐸᓪᓕᐊᑎᓪᓗᑕ ᐃᑲᔪᕈᒪᒐᑉᑕ ᓄᑕᕋᖁᑎᕗᑦ ᓄᖅᑲᖓᑐᐃᓐᓇᖃᑦᑕᖁᓇᒋᑦ ᖃᓄᐃᓕᐅᖅᑎᑦᑎᔪᒪᑉᓗᒋᑦ.

“ᓄᑕᕋᑯᓗᐃᑦ ᐃᖏᕐᕋᔭᒃᑎᓪᓗᒋᑦ ᑐᒃᑲᕆᐊᓕᖕᓂᒃ ᐊᑐᕐᓗᑎᒃ ᐃᓅᖃᑎᒥᓂᒡᓗ ᐅᖓᓯᒐᓱᒋᐊᖃᕐᓗᑎᒃ ᑕᒡᕙ ᐃᑲᔫᑕᐅᔪᓐᓇᖅᑐᖅ.

ᑕᒪᕐᒥᒃ ᒪᓕᒃᑕᐅᔭᕆᐊᓖᑦ ᓄᕙᒡᔪᐊᕐᓂᖅ -19-ᑯᑦ ᒪᓕᒃᑕᐅᑦᑎᐊᑐᐊᖅᐸᑕ, Hᐊᒻᓚᒃᑯᑦ ᖃᐅᔨᒋᐊᖏᓐᓇᕐᓂᐊᖅᑐᑦ ᖃᓄᐃᓕᐅᖅᑎᑦᑎᔪᓐᓇᕐᒪᖔᕐᒥᒃ ᓄᑕᕋᑯᓗᐃᑦ ᓄᖅᑲᖓᑐᐃᓐᓇᖃᑦᑕᖁᓇᒋᑦ.

“ᐱᒻᒪᕆᐊᓘᒐᓱᒋᒐᑉᑯ ᓄᑕᖅᑲᑦ ᓄᓇᑉᑎᓐᓂᒃ ᓯᕗᓂᒃᓴᑦᑎᐊᕙᖕᒥ ᑕᐅᑐᒍᓐᓇᕆᐊᖃᕐᓂᖏᓐᓄᑦ, ᐱᔪᓐᓇᕐᓂᓗᒃᑖᒃᑯᑦ, ᐊᒻᒪᓗ ᓄᑕᕋᑯᓗᖕᒧᑦ, ᓵᓚᒃᓴᖅᖢᓂ ᓄᑖᒥᒃ ᑐᒃᑲᕆᐊᓕᖕᒥᒃ ᐱᒻᒪᕆᐊᓘᖕᒪᑦ.”

ᑲᓛᒃ ᐅᖃᖅᖢᓂ ᑐᓂᓯᓂᐊᕐᓗᓂ ᑐᒃᑲᕆᐊᓕᖕᒥᒃ, Hᐊᒻᓚᒃᑯᑦ ᐋᖅᑭᒃᓯᓚᐅᖅᑐᑦ ᐊᒧᖅᑲᐃᔾᔪᑎᒃᓴᓂᒃ ᓲᕐᓗ Penny Sale-ᑎᑐᑦ.

ᐅᖃᖅᖢᓂ 50 ᑐᒃᑲᕆᐊᓖᒡᒍᖅ ᑐᑭᓕᕇᓚᐅᖅᑐᑦ, ᐴᒃᓴᖃᖅᖢᑎᒃ ᑎᒍᒻᒥᕝᕕᖏᓐᓂᒃ ᐊᑐᓂ ᓄᑕᖅᑲᑦ ᐱᖓᓱᓂᒃ ᐊᒧᔭᒃᓴᓂᒃ ᐃᓕᓯᔪᓐᓇᖅᖢᑎᒃ.

“ᐊᒧᔭᒃᓴᒥᓂᒃ ᐃᓕᓯᖃᑦᑕᓚᐅᖅᑐᑦ ᑐᒃᑲᕆᐊᓕᖕᓄᑦ ᐱᑖᕆᔪᒪᔭᒥᓄᑦ ᐊᒧᖅᑲᐃᑎᓪᓗᒋᑦ,” ᑕᐃᒪᓐᓇ ᑐᑭᓯᑎᑦᑎᒋᐊᖅᖢᓂ ᑲᓛᒃ.

“ᐊᒧᔭᐅᔪᖃᕋᔪᒃᓯᒃᐸᑦ ᐊᑕᐅᓯᖅ ᓄᑕᕋᖅ ᐊᑕᐅᓰᓐᓇᕐᒥᒃ ᑐᑭᓕᕆᐊᓕᖕᒥᒃ ᐱᑎᑕᐅᔪᓐᓇᖃᑦᑕᓚᐅᖅᑐᖅ.

ᐅᖓᓯᒌᒃᑑᑎᖃᑦᑕᓚᐅᖅᑐᒍᑦ ᑕᐃᒪᐃᓕᐅᖅᑎᑦᑎᑎᓪᓗᑕ, ᑕᐃᒪᐃᒻᒪᑦ ᐊᖓᔪᖅᑳᕆᔭᐅᔪᑦ ᐊᑕᐅᓯᕐᒧᑦ ᐅᒃᑯᐊᒃᑯᑦ ᐃᑎᖃᑦᑕᖅᖢᑎᒃ ᐊᒻᒪᓗ ᐱᖃᑖᒍᑦ ᐅᒃᑯᐊᒃᑯᑦ ᐊᓂᕙᒃᖢᑎᒃ ᐊᑎᓕᐅᕆᔪᓐᓇᖁᑉᓗᒋᑦ ᐊᒧᔭᒃᓴᒃᑯᑦ.

“ᖃᐅᔨᒪᓚᐅᖅᑐᑦ ᖃᓄᖅ ᐊᖏᑎᒋᔪᓂᒃ ᑐᒃᑲᕆᐊᓕᖕᓂᒃ ᓄᑕᖅᑲᖏᑦ ᐱᑖᕆᐊᖃᕐᒪᖔᑕ ᐊᒻᒪᓗ, ᐃᒻᒪᖄ, ᖃᓄᖅ ᓴᓇᓯᒪᔭᕆᐊᖃᕐᓂᖏᓐᓄᑦ ᑐᒃᑲᕆᐊᓖᑦ ᓵᓚᒃᓴᕋᔭᕈᑎᒃ.”

Advertisement

Darrell Greer

Darrell Greer is Editor of Kivalliq News