ᓴᖅᑭᑎᑦᑎᓂᖅ ᐃᓄᐃᑦ ᐅᖃᔪᐃᑦᑐᑦ ᐅᖃᐅᓯᒃᑯᑦ ᐆᒃᑐᕋᐅᑎᒋᕙᒃᑕᖏᓐᓂᒃ ᑲᔪᓯᕙᓪᓕᐊᔪᖅ

268

ᐊᒥᓱᑦ ᐊᒻᒪᓗ ᐱᓕᕆᖃᑎᒌᑦᑎᐊᖅᑐᑦ ᑲᑎᒪᑎᑕᐅᓚᐅᖅᑐᑦ ᑲᒪᕙᓪᓕᐊᑉᓗᑎᒃ ᓄᓇᖃᖅᑳᖅᓯᒪᔪᑦ ᖃᐅᔨᓴᖅᑕᐅᖃᑦᑕᕈᑎᖏᓐᓂᒃ ᐊᒻᒪᓗ ᐃᓕᓐᓂᐊᕈᑎᒃᑯᑦ ᐊᑐᖅᑕᐅᔪᓐᓇᖅᑐᑦ ᒥᒃᓵᓄᑦ ᐱᔾᔪᑎᖃᓗᐊᖅᖢᑎᒃ ᑎᒥᒥᒍᑦ ᐊᔪᕈᑎᓖᑦ ᐱᔪᓐᓇᐅᑎᒋᔭᖏᓐᓂᒃ, ᐅᖃᔪᐃᑦᑐᓂᒃ ᐊᒻᒪᓗ ᐱᕙᓪᓕᐊᑎᑦᑎᒃᑲᓐᓂᕈᒪᓂᕐᒥᒃ ᐃᓄᐃᑦ ᐅᖃᔪᐃᑦᑐᑦ ᐅᖃᐅᓯᖓᒍᑦ ᐆᒃᑑᑕᐅᕙᒃᑐᓂᒃ ᑲᑎᒪᔾᔪᑕᐅᓚᐅᖅᑐᖅ ᑲᖏᖅᖠᓂᕐᒥ ᔭᓄᐊᕆ 21-ᒥ.

Elder Monica Ugjuk lights the qulliq to open a workshop addressing indigenous research and training capacities with a focus on disability rights, deafness and the revitalization of Inuit sign language in Rankin Inlet on Monday, Jan. 21, 2019. Photo courtesy Paige MacDougall
Elder Monica Ugjuk lights the qulliq to open a workshop addressing indigenous research and training capacities with a focus on disability rights, deafness and the revitalization of Inuit sign language in Rankin Inlet on Monday, Jan. 21, 2019. Photo courtesy Paige MacDougall

ᑲᑎᒪᖅ ᐱᒋᐊᖅᑎᑕᐅᓚᐅᖅᑐᖅ ᑲᓇᑕᒥ ᐅᖃᔪᐃᑦᑐᑦ ᖃᐅᔨᓴᖅᑎᖏᓐᓄᑦ ᐊᒻᒪᓗ ᐃᓕᓐᓂᐊᖅᑎᑦᑎᓂᕐᒧᑦ ᑲᒪᔨᖏᓐᓄᑦ ᐱᓕᕆᖃᑎᖃᖅᖢᑎᒃ ᓄᓇᕗᒥ ᐅᖃᔪᐃᑦᑐᑦ ᑲᑎᒪᔨᖏᓐᓂᒃ ᐊᒻᒪᓗ ᐃᑲᔪᖅᑐᖅᑕᐅᑉᓗᓂ ᐱᓕᕆᖃᑎᒌᖕᓂᒃᑯᑦ ᑐᓂᕐᕈᓯᐊᖅᓯᒪᓂᒃᑯᑦ ᐃᓅᖃᑎᒌᒃᑐᑦ ᖃᐅᔨᓴᖅᑕᐅᖃᑦᑕᕐᓂᖏᓐᓄᑦ ᐊᒻᒪᓗ ᐃᓄᐃᑦ ᖃᐅᔨᓴᖅᑕᐅᖃᑦᑕᕐᓂᖏᓐᓄᑦ ᑲᑎᒪᔨᓄᑦ.
ᑲᑎᒪᓂᖅ ᐊᐅᓚᑕᐅᓚᐅᖅᑐᖅ ᑲᓇᑕᒥ ᐅᖃᔪᐃᑦᑐᑦ ᖃᐅᔨᓴᖅᑎᖏᓐᓄᑦ ᐊᒻᒪᓗ ᐃᓕᓐᓂᐊᖅᑎᑦᑎᓂᕐᒧᑦ ᑲᒪᔨᖏᓐᓄᑦ ᐊᖓᔪᖅᑳᖅ ᖃᐅᔨᓴᐃᓂᕐᒧᑦ ᐸᐃᔾ ᒪᒃᑐᒍᒧᑦ ᐅᖃᖅᖢᓂ ᑲᑎᒪᔭᖅᑐᖅᑐᒡᒎᖅ ᐅᑉᓗᓗᒃᑖᒃᑯᑦ ᐅᖃᖃᑎᒌᑦᑎᐊᓚᐅᖅᑐᑦ.
ᐅᖃᖅᖢᓂ ᑲᑎᒪᔪᒡᒎᖅ ᑕᑯᒋᐊᓚᐅᖅᑐᑦ ᐊᑐᖅᑕᐅᖃᑦᑕᖅᓯᒪᔪᓂᒃ ᐱᓕᕆᐊᖑᖃᑦᑕᖅᓯᒪᔪᓂᒡᓗ ᐱᓕᕆᖃᑎᒌᖕᓂᒃᑯᑦ ᑎᑎᕋᖅᐸᓪᓕᐊᓂᕐᒧᑦ ᐃᓄᐃᑦ ᐅᖃᔪᐃᑦᑐᑦ ᐅᖃᐅᓯᖓᒍᑦ ᐆᒃᑑᑕᐅᕙᒃᑐᓂᒃ, ᓯᕗᒻᒧᐊᒃᐸᓪᓕᐊᑎᑦᑎᑎᓪᓗᒋᑦ ᐊᑐᓕᖅᑎᕆᔪᒪᓂᕐᒧᑦ ᐊᑐᖅᑕᐅᖃᑦᑕᓕᖅᑐᓂᒃ ᐊᑑᑎᖃᑦᑎᐊᕋᖅᑐᒃᑯᑦ ᓄᓇᓕᖕᓂ.
“ᐃᓚᐅᖃᑕᐅᑎᑦᑎᓯᒪᔪᖅ ᖃᐅᔨᓴᐃᓂᕐᒥᒃ ᓄᓇᓕᖕᓂ ᐃᓄᖕᓄᑦ ᐃᓱᒪᓕᐅᕐᓂᕐᒧᑦ ᓇᓂ ᐊᑐᖅᑕᐅᖃᑦᑕᕐᓂᐊᖅᑐᑦ ᐃᓂᖃᖅᑎᑕᐅᑦᑎᐊᕋᔭᕐᒪᖔᑕ ᐃᓄᐃᑦ ᐅᔾᔨᕈᓱᓕᕈᓐᓇᖁᑉᓗᒋᑦ ᐅᖃᔪᐃᑦᑐᓂᒃ ᐃᓄᖃᕐᕕᐅᕙᒃᑐᓂᒃ ᑕᒫᓂ ᑲᖏᖅᖠᓂᕐᒥ,” ᑕᐃᒪᓐᓇ ᐅᖃᖅᖢᓂ ᒪᒃᑑᒍ.
“ᑕᒪᕐᒥᒃ ᑲᑎᒪᔭᖅᑐᖅᑐᑦ ᐃᓱᒪᒃᓴᖅᓯᐅᕈᑕᐅᔪᓐᓇᖅᑐᓂᒃ ᓂᑉᓕᐅᑎᖃᖃᑦᑕᓚᐅᖅᑐᑦ ᓲᕐᓗ ᐃᓄᐃᑦ ᑮᓇᐅᔭᖃᕐᕕᓕᐊᖃᑦᑕᖅᑐᑦ, ᑎᑎᖅᑲᖅᑖᕐᕕᓕᐊᖃᑦᑕᖅᑐᑦ, ᐋᓐᓂᐊᕐᕕᓕᐊᖃᑦᑕᖅᑐᑦ, ᒥᑦᑕᕐᕕᓕᐊᖃᑦᑕᖅᑐᑦ, ᓂᕆᕝᕕᓕᐊᖃᑦᑕᖅᑐᑦ, ᐳᑭᖅᑕᓕᓕᐊᖃᑦᑕᖅᑐᑦ ᐊᒻᒪᓗ ᑖᒃᓯᒃᑰᖃᑦᑕᖅᑐᑦ ᐅᔾᔨᕈᓱᓕᕈᓐᓇᖁᑉᓗᒋᑦ ᐅᖃᔪᐃᑦᑐᓂᒃ ᑕᐃᒪᒃᑲᓐᓂᐅᑉᓗᑎᒃ ᐊᓯᖏᑦ ᐃᓱᒪᒋᔭᐅᔪᓐᓇᖅᑐᑦ.
“ᑕᐃᒪᐃᒻᒪᑦ, ᐃᓚᒋᐊᕈᑎᒋᓗᒋᑦ ᐊᑐᖅᑕᐅᖃᑦᑕᖅᓯᒪᔪᓄᑦ ᓲᕐᓗ ᑎᑎᖅᑲᖁᑎᒋᔭᐅᔪᓄᑦ ᐅᖃᔪᐃᑦᑐᑦ ᐅᖃᐅᓯᖏᓐᓄᑦ ᑐᕌᖓᔪᒃᑯᑦ, ᐅᐊᔪᓕᐊᖑᓯᒪᔪᒃᑯᑦ ᐊᒻᒪᓗ ᐅᖃᓕᒫᒐᒃᑯᑦ, ᐃᓱᒪᔪᒍᑦ ᓴᖅᑭᑎᑦᑎᔪᒪᑉᓗᑕ ᓴᓂᕋᕐᒥᐅᑕᓂᒃ ᑎᑎᕋᖅᓯᒪᔪᖃᕐᓗᓂ ᐊᒻᒪᓗ ᐃᒻᒪᖄ ᐅᖃᔪᐃᑦᑐᒃᑯᑦ ᐊᑐᖅᐸᒃᑕᖏᓐᓂᒃ ᐆᒃᑐᕋᐅᑎᓂᒃ, ᐅᖃᔪᐃᑦᑐᑦ ᓇᒧᙵᐅᔭᕌᖓᑕ ᑕᑯᔪᓐᓇᖃᑦᑕᕐᓂᐊᕐᒪᑕ ᐃᖢᐊᖅᓴᕐᓂᖅᓴᐅᓂᐊᕐᓗᑎᒡᓗ ᑕᐃᑲᓂ ᐅᕐᓂᒃᓯᒪᔭᖓᓂᒃ ᓴᓇᔨᐅᔪᑦ ᐅᔾᔨᕈᓱᖕᓂᖏᓐᓄᑦ ᐊᒃᓱᕈᕐᓇᖅᑐᒃᑰᕈᑎᒋᖃᑦᑕᖅᑕᖏᓐᓂᒃ ᐅᖃᔪᐃᑦᑑᑉᓗᑎᒃ ᑐᓴᐅᒪᖃᑦᑕᐅᑎᓕᕆᓂᒃᑯᑦ.
“ᖃᑉᓯᑲᓪᓚᑦ ᑲᑎᒪᔪᑦ ᖁᕕᐊᓱᑦᑎᐊᓚᐅᖅᑐᑦ ᑕᐃᒪᓐᓇ ᐱᓕᕆᔪᓐᓇᕐᓂᐊᕐᓂᕐᒥᓂᒃ ᓄᓇᒥᓂᒃ, ᑕᐃᒪᐃᒻᒪᑦ ᑕᑯᒋᐊᖃᑦᑕᕐᓂᐊᖅᑐᑦ ᐅᐸᒃᑕᐅᕙᒃᑐᓂᒃ ᐊᒻᒪᓗ ᐱᖃᑕᐅᑎᑦᑎᓗᑎᒡᓘᓐᓃᑦ ᑎᑎᕋᐅᔭᖅᑎᓂᒃ ᓄᓇᒥᓂᒃ ᓴᓂᕋᕐᒥᐅᑕᓂᒃ ᓴᓇᔪᓐᓇᖁᑉᓗᒋᑦ ᐊᒻᒪᓗ, ᐃᒻᒪᖄ, ᐅᖃᓕᒫᒐᕋᓛᕐᓂᒃ.”
ᒪᒃᑐᒍ ᐅᖃᖅᖢᓂ ᖃᑉᓯᑲᓪᓚᒡᒎᖅ ᑲᑎᒪᖃᑕᐅᔪᑦ ᐅᖃᐅᓯᖃᖃᑦᑕᓚᐅᖅᑐᑦ ᑲᑎᒪᔪᓄᑦ ᐃᖢᐊᖏᓕᐅᕈᑎᖃᖃᑦᑕᖅᓯᒪᒐᒥᒃ ᑖᒃᓯᒃᑰᕋᓱᒃᖢᑎᒃ, ᐅᕝᕙᓘᓐᓃᑦ ᐃᖢᐊᖏᓕᐅᕈᑎᖃᖃᑦᑕᖅᓯᒪᑉᓗᑎᒃ ᐋᓐᓂᐊᕐᕕᖕᒥ ᐅᑕᖅᑭᖃᑦᑕᖅᓯᒪᔪᓪᓗ ᐊᕐᕕᓂᓕᖕᓂᒃ ᐃᑲᕐᕋᓂᒃ ᑕᑯᔭᐅᓂᐊᕐᓗᑎᒃ ᐊᑎᖏᑦ ᑕᐃᔭᐅᖃᑦᑕᖅᓯᒪᙱᑎᓪᓗᒋᑦ ᑐᑭᓯᓂᐊᖅᑕᒃᑯᑦ.
ᐅᖃᖅᖢᓂ ᐃᓚᖏᒡᒎᖅ ᐃᖢᐊᖏᓕᐅᕈᑕᐅᔪᑦ ᐋᖅᑭᒐᒃᓴᐅᔪᑦ ᐊᑐᖅᑕᐅᔪᓐᓇᖅᑐᓂᒃ ᓴᖅᑭᑦᑎᓗᑎᒃ ᓄᓇᓕᖕᒥ.