ᑭᕙᓪᓕᕐᒥᐅᑦ ᓂᕆᐅᓚᐅᖅᑑᒐᓗᐊᑦ ᑐᒃᓯᐊᖃᑦᑕᖅᖢᑎᒡᓗ ᓄᕙᒡᔪᐊᕐᓂᖅ ᖄᖏᐅᑎᑐᐃᓐᓇᖁᑉᓗᒍ ᐊᑯᓂ ᐊᒃᑐᖅᑕᐅᓚᐅᙱᓐᓂᖏᓐᓄᑦ, ᑐᓴᒐᒃᓴᖅ ᖁᒃᓴᓇᕆᔭᐅᖏᓐᓇᖅᑐᖅ ᑐᓴᖅᑕᐅᓕᓚᐅᖅᑐᖅ ᑐᓴᖅᑎᑕᐅᖕᒪᑕ ᑲᖏᖅᖠᓂᕐᒥᐅᑦ ᓯᕗᓪᓕᖅᐸᐅᑉᓗᑎᒃ ᐊᒻᒪᓗ ᑐᒡᓕᕆᔭᐅᑉᓗᑎᒃ ᐊᕐᕕᐊᕐᒥᐅᑦ ᐊᑕᐅᓯᕐᓘᓐᓃᒡᒎᖅ ᐊᑐᓂ ᓄᓇᓕᖕᓂᒃ ᓄᕙᒡᔪᐊᕐᓂᖅ-19-ᖃᓕᕐᒪᑦ.
ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᔨᕐᔪᐊᖅ ᐃᖢᐊᖅᓴᐃᔨ ᒪᐃᑯ ᐸᑐᓴᓐ, ᐅᖃᓚᐅᖅᑐᖅ ᐋᓐᓂᐊᖅᑖᓚᐅᕐᓂᖓ ᒪᓕᒃᖢᒍ ᐱᑕᖃᓕᕐᓂᖓᓗ ᑲᖏᖅᖠᓂᕐᒥ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᒃᐱᕈᓱᒃᑐᑦ ᓄᕙᒡᔪᐊᕐᓂᖅᑖᓚᐅᕐᓂᖓᓄᑦ ᓄᕕᐱᕆ 5 ᖃᓂᒋᔭᖓᓂᒃ.
ᐅᖃᖅᖢᓂ, ᓄᕕᐱᕆ 12-ᒥ, ᖃᓂᓪᓕᖃᑦᑕᖅᓯᒪᔭᖏᑦᑕ ᐊᒥᓲᓂᖏᑦ ᖃᑉᓰᓐᓇᐅᓗᐊᓚᐅᖅᑐᒡᒎᖅ ᐅᖃᐅᓯᕆᔭᕆᐊᒃᓴᖅ, ᑭᓯᐊᓂ ᐃᓚᕙᓪᓕᐊᓇᔭᕐᓂᖏᑦ ᓂᕆᐅᒋᔭᐅᓚᐅᖅᑐᑦ, ᐅᖃᒃᑲᓐᓂᖅᖢᓂ ᐅᓗᕆᐊᓇᖅᑐᒦᓗᐊᖅᑐᑦ ᐃᓅᖃᑎᒋᓚᐅᖅᑕᖏᑦ ᐃᓄᑑᑎᑕᐅᓇᔭᕐᓂᖏᓐᓄᑦ ᐊᖏᕐᕋᒥ. ᐅᓗᕆᐊᓇᖅᑐᒦᙱᓐᓂᖅᓴᐅᔪᑦ ᐃᖕᒥᓂᒃ ᖃᐅᔨᓴᖁᔭᐅᓂᐊᖅᖢᑎᒃ ᐋᓐᓂᐊᖃᙱᑦᑑᔭᕐᒪᖔᑕ.
“ᐃᓕᓐᓂᐊᕐᕕᑦ ᑭᕙᓪᓕᕐᒥ ᑲᖏᖅᖠᓂᐅᑉ ᓯᓚᑖᓂ ᐊᒻᒪᓗ ᐃᓕᓐᓂᐊᕐᕕᑦ ᐃᖃᓗᖕᓂ ᒪᑐᐃᖓᖁᔭᐅᓯᒪᔪᑦ ᐊᒻᒪᓗ ᒪᓕᒡᓗᑎᒃ ᒐᕙᒪᒃᑯᑦ ᐃᓕᓐᓂᐊᖅᑐᓕᕆᔨᒃᑯᖏᑦᑕ ᒪᑐᐃᖓᔭᕆᐊᖃᕐᓂᕐᒧᑦ ᐸᕐᓇᐅᑎᖏᓐᓂᒃ ᓄᓇᕗᒥ ᐃᓕᓐᓂᐊᕐᕕᖕᓄᑦ,” ᑕᐃᒪᓐᓇ ᐅᖃᖅᖢᓂ ᐸᑐᓴᓐ. “ᑕᒪᕐᒥᒃ ᓂᕿᑖᕐᕕᑦ ᑭᕙᓪᓕᕐᒥ ᑲᖏᖅᖠᓂᐅᑉ ᓯᓚᑖᓂ, ᐊᒻᒪᓗ ᐃᖃᓗᖕᓂ, ᒪᑐᐃᖓᔪᓐᓇᕐᓂᐊᖅᑐᑦ ᓂᕆᔭᖅᑐᕐᕕᐅᖃᑦᑕᕐᓗᑎᒃ, ᐊᔾᔭᖅᑐᐃᖃᑦᑕᕐᓗᑎᒃ ᓂᕆᔭᒃᓴᓂᒃ, ᐊᒻᒪᓗ ᐊᖏᕐᕋᐅᔾᔨᔪᓐᓇᖃᑦᑕᕐᓗᑎᒃ , ᑭᓯᐊᓂᓕ, ᓂᕆᔭᖅᑐᕐᕕᖕᓂᒃ ᓂᕆᔭᖅᑐᖅᑐᑦ 50 ᐅᖓᑖᓃᑦᑐᓐᓇᔾᔮᙱᑦᑐᑦ ᐅᕝᕙᓘᓐᓃᑦ 50% ᐅᖓᑖᓃᑦᑐᓐᓇᙱᓪᓗᑎᒃ ᐃᒃᓯᕙᕝᕕᐅᖃᑦᑕᖅᑐᒃᑯᑦ.
“ᒪᕐᕉᖕᓂᒡᓘᓐᓃᑦ ᒦᑕᓂᒃ ᐅᖓᓯᒌᒍᑎᔭᕆᐊᓖᑦ ᐋᓪᓕᕋᐅᔭᑦ ᐃᓄᐃᓪᓗ ᑐᑭᓕᕇᒃᑐᒃᑯᑦ ᓂᑯᕕᖓᔪᑦ ᐊᖏᕐᕋᐅᔾᔨᓂᐊᕐᓂᕐᒧᑦ ᓂᕆᓂᐊᖅᑕᒥᓂᒃ ᐅᕝᕙᓘᓐᓃᑦ ᓴᓇᔨᓄᑦ ᐱᔨᑦᓯᕋᖅᑕᐅᓂᐊᕐᓗᑎᒃ ᐊᑭᓖᕝᕕᒃᑯᑦ, ᐊᒻᒪᓗ ᐊᕐᕕᓂᓖᑦ ᐃᒃᓯᕙᖃᑎᒌᒍᓐᓇᖅᑐᑦ ᐅᖓᑖᒎᙱᑦᑐᖅ.
“ᑕᒪᕐᒥᒃ ᐋᖅᑭᒃᓱᖅᑕᐅᓯᒪᔪᑦ ᐃᓄᐃᑦ ᑲᑎᓐᓂᕆᓂᐊᖅᑕᖏᑦᑎᒍᑦ ᒪᓕᒐᓕᖅᑐᖅᑕᐅᓯᒪᔪᑦ 50 ᐃᓄᐃᑦ ᑲᑎᑦᑐᓐᓇᖅᖢᑎᒃ ᓯᓚᒥ ᑲᑎᓐᓂᐊᖅᑐᓂᒃ, ᑕᓪᓕᒪᓪᓗ ᐃᓄᐃᑦ ᐊᖏᕐᕋᕆᔭᐅᔪᓂᒃ ᐃᓚᒋᐊᕈᑎᒋᓯᒪᓗᒋᑦ ᐃᒡᓗᒥᐅᖃᑎᒌᒃᑐᓄᑦ, (ᑕᐃᑉᑯᐊᓕ) ᐊᓯᖏᑦ ᐱᓕᕆᕝᕕᑦ ᐊᑐᖅᑕᐅᕙᒃᑐᑦ ᓄᓇᖅᑲᑎᒌᖕᓄᑦ ᖃᓄᐃᓕᐅᕐᕕᐅᑉᓗᑎᒃ ᐅᕝᕙᓘᓐᓃᑦ ᑲᑎᒪᕝᕕᐅᑉᓗᑎᒃ, ᓲᕐᓗ ᑐᒃᓯᐊᕐᕕᑦ, ᐃᓄᖃᕈᓐᓇᖅᑐᑦ 50-ᓂᒃ ᐅᕝᕙᓘᓐᓃᑦ 50%-ᒋᔭᖏᑦᑕ ᖃᑉᓯᐅᔪᓐᓇᕐᓂᖏᓐᓄᑦ ᐋᖅᑭᒃᑕᐅᓯᒪᔪᖅ ᖃᑉᑎᕆᔨᒃᑯᑦ ᐊᖓᔪᖅᑳᖓᓄᑦ ᒪᓕᒡᓗᒍ.”
ᑲᖏᖅᖠᓂᕐᒥ ᒪᐃᔭᒋᔭᐅᔪᖅ Hᐊᕆ ᑕᐅᑐᙱ ᐅᖃᖅᖢᓂ ᐅᖃᓗᒡᕕᐅᓚᐅᕐᓂᕐᒥᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓᓄᑦ ᖁᐊᓴ ᑯᓱᒐᕐᒧᑦ ᐃᖅᑲᐅᒪᓐᓇᐅᑎᓪᓗᒍ ᐅᑉᓗᖓᓂᒃ ᐅᑉᓛᒃᑯᑦ ᑐᓴᖅᑎᑕᐅᑉᓗᓂ ᓄᕙᒡᔪᐊᕐᓂᒃᑯᑦ ᐋᓐᓂᐊᖃᖅᑐᖃᕐᓂᖓᓄᑦ ᑲᖏᖅᖠᓂᕐᒥ. ᐅᖃᖅᖢᓂ Hᐊᒻᓚᒃᑯᑦ ᑐᓴᖅᑎᑦᑎᓯᒪᓕᕐᒪᑕ ᓄᕙᒡᔪᐊᕐᓂᖅ-19-ᑕᖃᕐᓂᖓᓄᑦ ᓇᐅᒃᑯᓗᒃᑖᖅ ᑐᓴᖅᑎᑦᑎᔾᔪᑕᐅᔪᓐᓇᖅᑐᒃᑯᑦ, ᐊᒻᒪᓗ ᒪᓕᒃᑐᑦ ᑕᒪᐃᓐᓂᒃ ᒪᓕᒐᓕᐊᖑᓯᒪᔪᓂᒃ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᖏᓐᓄᑦ ᑕᒪᓐᓇ ᑲᒪᒋᓂᐊᕐᓗᒍ.
“ᑐᓂᐅᖅᑲᐃᓯᒪᔪᒍᑦ ᒪᑐᐊᓂᒃ ᑕᒪᐃᓐᓂᒃ ᐱᔪᓐᓇᖅᓯᒪᔭᑉᑎᓐᓂᒃ ᓄᓇᖅᑲᑎᒌᖕᓄᑦ ᐊᒻᒪᓗ, ᐱᒋᐊᖅᑎᑦᑎᓯᒪᔪᒍᑦ ᓂᕿᑖᕐᕈᑎᒃᓴᓂᒃ ᑐᓂᐅᖅᑲᐅᑕᐅᔪᓐᓇᖅᓯᓂᐊᖅᑐᒃᓴᐅᔪᑦ, ᑕᐃᒪᑐᖅ, ᑕᒡᕙᓂ ᐱᓇᓱᐊᕈᓯᕐᒥ ᑐᒡᓕᐊᓂᓘᓐᓃᑦ, ᑭᓯᐊᓂ ᐱᓕᕆᓐᓇᖅᑐᒻᒪᕆᐊᓗᒃ,” ᑕᐃᒪᓐᓇ ᐅᖃᖅᖢᓂ ᑕᐅᑐᙱ.
“ᖃᐅᔨᒪᓗᒃᑖᓚᐅᖅᑰᖅᑐᒍᑦ ᖃᑯᒍᑐᐃᓐᓇᖅ ᑕᐃᒪᐃᑦᑐᒃᑰᕐᓂᐊᕐᓂᑉᑎᓐᓂᒃ. ᐊᐱᖅᑯᑎᒃᓴᑐᐊᖑᓚᐅᖅᑐᖅ ᖃᖓᐅᓇᔭᕐᒪᖔᑦ. ᕕᓂᐲᒃᒥ ᑕᐃᒪᐃᑦᑐᖃᓗᐊᓚᐅᕐᒪᑦ, ᐅᕝᕙᓘᓐᓃᑦ ᓇᓂᑐᐃᓐᓇᖅ, ᐊᒻᒪᓗ ᐃᓱᒪᔪᖓ ᐱᕕᒃᓴᖃᖅᑎᑕᐅᑐᐃᓐᓇᒧᑦ ᐊᑯᓂ ᖃᓄᐃᙱᑦᑐᓐᓇᓚᐅᕋᑉᑕ.
“ᐊᒥᓲᓚᐅᖅᑐᑦ ᑎᖕᒥᓲᒃᑯᑦ ᑎᑭᖃᑦᑕᖅᑐᑦ ᐃᓄᑑᑎᑕᐅᓚᐅᙱᑦᑐᓪᓗ ᑕᐃᒪᐅᓚᐅᖅᑐᑦ ᐅᕝᕙᓘᓐᓃᑦ ᐃᖕᒥᓂᒃ ᐃᓄᑑᑎᓯᒪᓚᐅᙱᑦᑐᑦ ᑕᒪᐅᙵᖅᑳᖅᑎᓐᓇᒋᑦ. ᐃᓚᖏᑦ ᐃᓄᐃᑦ ᐅᔾᔨᖅᑐᙱᓗᐊᓚᐅᖅᑐᑦ, ᓄᓇᑉᑎᓐᓄᑦ ᑎᑭᖃᑦᑕᖅᓯᒪᔪᑦ ᒪᑐᐊᖅᓯᒪᓇᑎᒃ ᑕᐃᒪᐃᑦᑐᕈᔪᖕᓂᒡᓗ.
“ᖃᐅᔨᒪᔪᐊᓘᙱᑦᑐᖓ ᑭᓯᐊᓂ ᐊᒥᓱᓂᒃ ᐃᓄᖕᓂᒃ ᑎᑭᑦᑐᓂᒃ ᑕᑯᖃᑦᑕᕋᑉᑕ ᐃᓕᑕᕆᔪᓐᓇᙱᖦᖢᒋᓪᓗ ᐊᒥᓱᑦ, ᑕᐃᒪᐃᒻᒪᑦ ᐃᓱᒪᓐᓇᖅᓯᖃᑦᑕᖅᑐᖅ ᓇᑭᙶᖅᓯᒪᖕᒪᖔᑕ ᐊᒻᒪᓗ ᑕᒫᓂ ᓱᓕᕆᖕᒪᖔᑕ.”
ᑕᐅᑐᙱ ᐅᖃᖅᖢᓂ ᑲᖏᖅᖠᓂᕐᒥᐅᑦ ᐃᓄᖏᑦ ᐊᓂᑦᑕᐃᓕᑎᑕᐅᓕᓚᐅᕐᒪᑕ ᐊᒃᓱᕈᕐᓇᓗᐊᙱᑦᑐᒃᑯᑦ ᒫᓐᓇᐅᔪᖅ, ᐊᔭᐅᑐᐊᓗᒋᐊᖃᕐᓇᑎᒃ ᐅᕝᕙᓘᓐᓃᑦ ᐃᖅᑲᐃᑏᓐᓈᓗᒋᐊᖃᕐᓇᑎᒃ.
ᐅᖃᖅᖢᓂ ᐃᓄᐃᑦ ᑕᒪᕐᒥᒃ ᖃᐅᔨᒪᖕᒪᑕ ᖃᓄᐃᓕᐅᖅᑐᖃᕐᒪᖔᑦ ᐊᒻᒪᓗ ᐱᓕᕆᖃᑎᒌᒋᐊᖃᕐᒪᑕ ᓄᓇᖅᑲᑎᒌᒃᑑᑉᓗᑎᒃ ᑕᒪᓐᓇ ᐊᓂᒍᕈᓐᓇᖁᑉᓗᒍ.
“ᖃᐅᔨᒪᔪᖃᙱᑦᑑᒐᓗᐊᖅ, ᑭᓯᐊᓂ ᐃᒃᐱᒍᓱᒃᑐᖓ ᑕᒪᓐᓇ ᐊᓂᒎᑎᓂᐊᕐᓂᖓᓄᑦ.
“ᐊᒥᓱᑦ ᐃᓄᐃᑦ ᖁᒃᓴᓪᓚᒃᓯᒪᓚᐅᖅᑐᑦ ᐊᒻᒪᓗ ᑲᑉᐱᐊᓱᓕᖅᖢᑎᒃ ᓯᕗᓪᓕᖅᐹᒃᑯᑦ, ᐊᒻᒪᓗ ᖃᑉᓰᓐᓇᑦ ᑎᒃᑯᐊᖅᑐᕈᑎᓚᐅᖅᑐᑦ ᐱᑎᑦᑎᓂᕋᐃᑉᓗᑎᒃ ᑎᖕᒥᓲᓕᕆᔨᒃᑯᓐᓂᒃ ᐊᒻᒪᓗ ᐃᓱᒪᓕᐅᕈᑕᐅᓯᒪᔪᓂᒃ ᒐᕙᒪᒋᔭᑉᑎᓐᓄᑦ, ᑭᓯᐊᓂ ᓇᓗᓇᖃᑦᑕᙱᑦᑐᖅ ᑕᐃᒪᐃᓕᐅᖅᑐᖃᕐᓂᐊᕐᓂᖓᓄᑦ.
“ᑕᑯᓂᐊᖅᑐᒍᑦ ᖃᓄᐃᓕᖓᓕᕐᓂᐊᕐᒪᖔᑕ ᐃᓅᖃᑎᒋᔭᐅᖃᑦᑕᖅᓯᒪᔪᑦ ᖃᐅᔨᒋᐊᖅᑕᐅᖅᑳᖅᑎᓪᓗᒋᑦ ᑭᓯᐊᓂ ᑕᐃᒪᑐᖅ ᐊᑕᐅᓯᕐᒥᒃ ᒪᕐᕉᖕᓂᒡᓘᓐᓃᑦ ᑕᐃᒪᐃᑦᑐᖃᖅᑳᕐᓗᓂ ᑕᒪᓐᓇ ᐱᐊᓂᒃᓯᒪᓕᕐᓂᐊᖅᐳᖅ.
“ᓈᒻᒪᖕᓂᐊᖅᑐᒍᑦ ᐅᐃᒻᒪᙱᑐᐊᕈᑉᑕ ᐊᒻᒪᓗ ᐃᑲᔪᖅᑑᑎᒍᑉᑕ. ᖃᓄᐃᔾᔮᙱᖅᑰᖅᑐᒍᑦ ᐅᐃᒻᒪᓗᑕ ᑕᒪᑐᒥᙵ ᑲᒪᓇᓱᙱᑐᐊᕈᑉᑕ.”