ᒪᓕᒃᑕᐅᔭᕆᐊᓖᑦ ᑕᐃᒪᐅᑎᓪᓗᒋᑦ ᓄᕙᒡᔪᐊᕐᓂᖅ -19-ᑯᑦ ᐃᓄᐃᑦ ᖁᕕᐊᓱᖃᑎᒌᑦᑎᐊᓚᐅᖅᑐᑦ ᔮᓐ ᐊᕐᓈᓗᒡᔪᐊᖅ ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᖅᑐᑦ ᐃᓕᓐᓂᐊᕈᑎᒥᓂᒃ ᐱᐊᓂᒃᓯᑎᓪᓗᒋᑦ 2020-ᒥ ᑐᓂᔭᐅᑉᓗᑎᒃ ᐃᓕᑕᕆᔭᐅᔾᔪᑎᓂᒃ ᐃᓕᓐᓂᐊᕈᙱᒥᓂᒃ ᐱᐊᓂᒃᓯᓂᕐᒧᑦ ᑕᓪᓕᒻᒥᐅᓚᐅᖅᑐᒥ, ᔫᓐ 19-ᒥ, ᐊᕐᕕᐊᓂ.

2020-ᒥ ᐃᓕᓐᓂᐊᕈᑎᒥᓂᒃ ᐱᐊᓂᒃᓯᔪᑦ ᔮᓐ ᐊᕐᓈᓗᒡᔪᐊᖅ ᐃᓕᓐᓂᐊᕐᕕᔪᐊᕐᒥ ᖁᕕᐊᓱᖃᑎᒌᒃᑐᑦ ᐊᕐᕕᐊᓂ ᔫᓐ 19-ᒥ.
ᐊᔾᔨ ᓗᐊᕇᓐ ᒪᓚᒥᙶᖅᑐᖅ

ᔮᓐ ᐊᕐᓈᓗᒡᔪᐊᖅ ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᖅᑎᑦᑎᔨ ᒍᐊᑦ ᐱᓕᐊᑦ ᐊᒥᓲᓂᖅᐹᓂᒃ ᐊᔾᔨᓕᐅᕆᓚᐅᖅᑐᖅ ᐊᒻᒪᓗ ᐅᐊᔪᓕᐅᖅᖢᓂ ᐱᓇᓱᐊᕈᓯᐅᑉ ᐃᓗᐊᓂ ᐸᕐᓇᒃᑎᓪᓗᒋᑦ ᐃᓕᓐᓂᐊᕌᓂᒍᑕᐅᓂᐊᖅᑐᒥᒃ, ᐊᒻᒪᓗ ᐅᖃᖅᖢᓂᓗ ᐊᔾᔨᓕᐅᕆᑲᑕᖕᓂᖅ ᑲᔪᓯᓂᖃᑦᑎᐊᓚᐅᕐᒪᑦ ᓄᕙᒡᔪᐊᕐᓂᖅ -19-ᑯᑦ ᒪᓕᒃᑕᐅᔭᕆᐊᓖᑦ ᑕᐃᒪᐅᒐᓗᐊᖅᑎᓪᓗᒋᑦ.

ᐅᖃᖅᖢᓂ ᐊᑐᓂ ᐃᓕᓐᓂᐊᕌᓂᒃᑐᑦ ᐊᔾᔨᓕᐅᖅᑕᐅᑎᓪᓗᒋᑦ ᐊᔾᔨᓕᐅᕆᑲᑕᓚᐅᖅᑐᑦ ᐃᓕᓐᓂᐊᕐᕕᐅᑉ ᑐᖅᓲᖓᓂᒃ ᔫᓐ 17-ᒥ ᐊᒻᒪᓗ 18-ᒥ, ᐃᓄᑑᖃᑦᑕᐅᔭᖅᖢᑎᒃ ᑐᖅᓲᖕᓂᒃ ᐊᔾᔨᓕᐅᖅᑕᐅᓕᕌᖓᒥᒃ.

“ᐊᑕᐅᓯᖅ ᐃᓕᓐᓂᐊᕌᓂᒃᑐᖅ ᐱᐊᓂᒃᑕᐅᔭᕌᖓᑦ ᐊᓯᖓ ᐃᑎᖅᐸᒃᖢᓂ ᐊᒻᒪᓗ ᒪᕐᕉᒃᑲᓐᓂᕐᓂᒃ ᐃᑲᔪᖅᑎᖃᓚᐅᖅᑐᒍᑦ ᖁᓕᑦᑕᖏᓐᓂᒃ ᓇᓴᖏᓐᓂᒡᓗ ᐊᑎᑎᑦᑎᕙᒃᑐᓂᒃ, ᑕᐃᒪᐃᒻᒪᑦ ᑲᔪᓯᑦᑎᐊᓚᐅᖅᑐᖅ ᑕᒪᓐᓇ,” ᑕᐃᒪᓐᓇ ᐅᖃᖅᖢᓂ ᐱᓕᐊᑦ.

“ᒪᓕᑦᑎᐊᖅᑕᖅᐳᑦ ᐃᓄᐃᑦ ᐅᖓᓯᒌᒍᑎᔭᕆᐊᖃᕐᓂᖏᓐᓄᑦ ᒪᓕᒐᕆᔭᐅᔪᖅ ᑕᐃᒪᐃᒻᒪᑦ ᓱᓇᓗᒃᑖᑦ ᑲᔪᓯᑦᑎᐊᓚᐅᖅᑐᑦ.”

“ᑐᓂᐅᖅᑲᖅᑕᐅᓂᖏᑦ, ᑲᔪᓯᓂᖃᑦᑎᐊᓚᐅᕐᒥᔪᑦ ᓯᕿᓐᓂᔮᑦᑎᐊᖅᑐᒥ ᐅᑉᓗᕐᒥ 38 ᐃᓕᓐᓂᐊᕌᓂᒃᑐᑦ 40-ᐅᓇᔭᖅᑐᓂᒃ ᖃᐃᓯᒪᓚᐅᕐᒪᑕ ᐃᓕᑕᕆᔭᐅᔾᔪᑎᒥᓂᒃ ᐊᐃᒃᖠᖅᖢᑎᒃ.

“ᐊᔾᔨᓕᐅᕆᕕᒡᔪᐊᓕᓚᐅᖅᑐᖓ, ᐅᐊᔪᓕᐅᕈᑏᓪᓗ ᑕᐃᒪᐅᑉᓗᑎᒃ ᐊᒻᒪᓗ Facebook-ᑯᑦ ᑕᑯᒃᓴᐅᑎᖦᖢᒍ.”

ᐱᓕᐊᑦ ᐅᖃᖅᖢᓂ ᑐᓂᐅᖅᑲᖅᑕᐅᖅᑳᖅᑎᓪᓗᒋᑦ ᐃᓕᓐᓂᐊᕌᓂᒃᑐᑦ ᓄᓇᓕᖕᒥ ᐃᖏᕐᕋᔭᓕᓚᐅᖅᑐᑦ.

ᐊᒃᓱᕈᕐᓇᖅᑐᖅ ᑕᐃᒪᐅᒐᓗᐊᖅᑎᓪᓗᒍ − ᐃᓕᑕᕆᔭᐅᔾᔪᑎᒥᓂᒃ ᑐᓂᐅᖅᑲᐃᔪᑦ ᐊᑯᓂᐅᓗᐊᓚᐅᙱᑦᑐᑦ ᐊᒻᒪᓗ ᐊᓕᐊᓇᐃᑦᑐᒻᒪᕆᐊᓘᑉᓗᓂ ᐱᒻᒪᕆᐅᓂᖅᓴᒃᑯᓪᓘᓐᓃᑦ ᑕᐃᑉᓱᒪᓂᐅᖓᓂᒃ − ᓱᓇᓗᒃᑖᑦ ᑲᔪᓯᑦᑎᐊᖅᑐᒻᒪᕆᐊᓘᓚᐅᖅᑐᑦ.

ᐃᓄᐃᑦ ᖁᕕᐊᓱᑦᑎᐊᓚᐅᖅᑐᑦ ᐋᖅᑭᒃᓱᐃᓯᒪᓂᑉᑎᓐᓄᑦ ᑕᒪᓐᓇ ᓴᖅᑭᑦᑐᓐᓇᖁᑉᓗᒍ.

“ᐃᓄᐃᓪᓗ ᑐᑭᓯᐅᒪᓚᐅᖅᑐᑦ ᖃᓄᐃᑦᑐᖃᕐᓂᖓᓄᑦ ᓄᕙᒡᔪᐊᕐᓂᖅ ᐱᔾᔪᑎᒋᑉᓗᒍ ᐊᒻᒪᓗ ᖃᐅᔨᒪᓚᐅᖅᑐᑦ ᐊᑐᖅᑕᐅᖃᑦᑕᖅᑐᓂᒃ ᐊᑐᔾᔮᙱᓐᓂᖏᓐᓄᑦ, ᑕᐃᒪᐃᒻᒪᑦ ᐸᕐᓇᒃᓯᒪᓚᐅᖅᑐᑦ ᐊᔾᔨᐅᙱᑦᑑᓂᐊᕐᓂᖓᓄᑦ, ᑕᐃᒪᓐᓇ ᐅᒃᐱᕈᓱᒃᑐᖓ.

“ᐃᓕᓐᓂᐊᖅᑐᑦ ᐊᔾᔨᓕᐅᖅᑕᐅᔭᖅᑐᓚᐅᖅᑐᑦ ᐊᒻᒪᓗ ᐃᓕᓐᓂᐊᕌᓂᒃᑐᑦ ᐃᓕᑕᕆᔭᐅᑎᓪᓗᒋᑦ ᖃᐃᓚᐅᖅᑐᑦ ᖁᓕᑦᑕᖅᓯᒪᑉᓗᑎᒃ ᓇᓴᖅᓯᒪᑉᓗᑎᒡᓗ ᓯᑕᒪᓕᒃᑯᑦ ᖃᐃᓚᐅᖅᑐᑦ ᖁᕕᐊᓱᑦᑎᐊᓚᐅᖅᑐᑦ.

“ᖁᒡᕕᐅᖅᑐᖃᖃᑦᑕᓚᐅᖅᑐᖅ ᖁᕕᐊᓱᖕᓂᒃᑯᑦ ᐃᓚᖏᑦ ᐃᓕᓐᓂᐊᕌᓂᒃᑐᑦ ᐊᖓᔪᖅᑳᖏᓪᓗ ᐊᒻᒪᓗ, ᑕᐃᒪᓐᓇ ᑲᒪᒋᔭᐅᓚᐅᕋᓗᐊᖅᑎᓪᓗᒍ, ᐃᒃᐱᖕᓂᖓ ᐊᓯᔾᔨᖅᓯᒪᔫᔭᓚᐅᙱᑦᑐᖅ ᐃᓕᓐᓂᐊᕌᓂᒃᑐᖃᖃᑦᑕᖅᑎᓪᓗᒍ.”

ᐱᓕᐊᑦ ᐅᖃᖅᖢᓂ ᓂᕆᕕᒡᔪᐊᙱᖔᖅᖢᑎᒎᖅ ᐃᓕᓐᓂᐊᕌᓂᒃᑐᑦ ᐱᖓᓱᓂᒃ ᖃᐃᖁᔨᖃᑦᑕᖅᑎᓪᓗᒋᑦ ᓯᑕᒪᓂᒡᓘᓐᓃᑦ, ᔮᓐ ᐊᕐᓈᓗᒡᔪᐊᖅ ᐃᓕᓐᓂᐊᕐᕕᒡᔪᐊᖅ ᑐᓂᓯᓚᐅᖅᑐᖅ ᓂᕆᔭᒃᓴᓂᒃ ᑕᒪᐃᓐᓄᑦ ᐃᓕᓐᓂᐊᕌᓂᒃᑐᓄᑦ.

ᐅᖃᖅᖢᓂ ᐃᓚᒋᔭᐅᔪᑦ ᐱᖓᓲᔪᓂᒃ ᓂᕈᐊᖅᖠᕈᓐᓇᓚᐅᖅᑐᑦ ᓂᕆᔭᒃᓴᐅᓇᔭᖅᑐᓂᒃ, ᐊᕿᒡᒋᕐᔪᐊᖅᑐᕈᓐᓇᕐᓂᕐᒧᑦ, ᐃᓄᒃᓯᐅᑎᓂᒃ ᓂᕆᔪᓐᓇᕐᓂᕐᒧᑦ ᐅᕝᕙᓘᓐᓃᑦ ᐊᔾᔨᒌᙱᑦᑑᑕᐅᔪᓂᒃ ᖁᐊᖑᔪᓂᒃ ᓂᕿᑖᕈᑎᑖᕈᓐᓇᕐᓂᕐᒧᑦ.

“ᐃᓕᓐᓂᐊᕌᓂᒃᑐᑦ ᑐᓂᓚᐅᖅᑕᖅᐳᑦ ᐃᓕᑕᕆᔭᐅᔾᔪᑎᓂᒃ ᐃᓕᓐᓂᐊᕐᕕᑉᑎᓐᓂᙶᖅᑐᓂᒃ, ᐊᒻᒪᓗ ᒐᕙᒪᒃᑯᓐᓂᙶᖅᑐᖅ ᐃᓕᑕᕆᔭᐅᔾᔪᑎ ᖃᐃᑕᐅᔪᒫᖅᑐᖅ ᐊᒐᓯᒥ.

ᐊᔾᔨᓕᐅᓚᐅᖅᑕᒃᑲ ᑲᑎᓪᓗᒋᑦ ᖃᕆᑕᐅᔭᒃᑯᑦ ᑲᑎᑦᑎᔾᔪᑎᒃᑯᑦ ᐃᓕᔪᒫᖅᑕᒃᑲ ᐊᑐᓂᓗ ᐃᓕᓐᓂᐊᕌᓂᒃᑐᑦ ᑐᓂᓗᒋᑦ.

“ᐃᓗᐃᑦᑐᒃᑯᑦ, ᐃᓄᐃᑦ ᐱᓕᕆᖃᑎᒌᑦᑎᐊᓚᐅᖅᑐᑦ ᐊᒻᒪᓗ ᐱᓕᕆᑦᑎᐊᕋᓱᒃᖢᑎᒃ ᐊᒃᓱᕈᕐᓇᖅᑐᖃᕋᓗᐊᖅᑎᓪᓗᒍ ᐊᒻᒪᓗ ᐅᑉᓗᕆᔭᐅᔪᖅ ᐳᐃᒍᕐᓇᔾᔮᙱᑦᑐᖅ.”

Advertisement

Darrell Greer

Darrell Greer is Editor of Kivalliq News

Leave a comment

Your email address will not be published. Required fields are marked *