ᖃᐅᔨᒪᔭᐅᑦᑎᐊᖅᑐᖅ ᖃᒪᓂ’ᑐᐊᕐᒥᐅᑕᖅ ᓇᖕᒥᓂᖃᖅᑎ ᐲᑕ (ᓱᒨ) ᑕᐸᑕᐃ ᑐᓂᔭᐅᓚᐅᖅᑐᖅ ᓄᓇᕗᒥ ᖁᑦᑎᖕᓂᖅᐹᒃᑯᑦ ᐃᓕᑕᕆᔭᐅᔾᔪᑎᒥᒃ ᑕᐃᔭᐅᖕᒪᑦ ᐃᓕᑕᕆᔭᐅᔾᔪᑎᑖᖁᑉᓗᒍ 2020-ᒥ ᑕᖅᑭᐅᓚᐅᖅᑐᒥ.

ᑕᐸᑕᐃ, ᑲᔪᓯᑎᑦᑎᑦᑎᐊᖅᓯᒪᐃᓐᓇᖅᑐᖅ ᓇᖕᒥᓂᖁᑎᒥᓂᒃ ᐲᑕᒃᑯᑦ ᐊᔾᔭᖅᑐᐃᔨᒃᑯᑦ ᓇᖕᒥᓂᖁᑎᖓᓂᒃ Peter’s Expediting-ᑯᑦ 22-ᖑᓕᖅᑐᓂᒃ ᐅᑭᐅᓂᒃ, ᖃᐅᔨᒪᔭᐅᑦᑎᐊᖏᓐᓇᖅᑐᖅ ᓱᐳ ᓯᒨᖑᓚᐅᕐᓂᕐᒧᑦ, ᐊᒻᒪᓗ ᐃᑲᔪᖅᓯᒪᑎᓪᓗᒍ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᖏᑦᑎᒍᑦ.

ᐲᑕ ᑕᐸᑕᐃ ᖃᒪᓂ’ᑐᐊᕐᒥᐅᑕᖅ ᑕᖅᑭᐅᓵᖅᑐᖅ ᑭᕙᓪᓕᕐᒥᐅᑕᐅᑉᓗᓂ ᐃᓕᑕᕆᔭᐅᓚᐅᖅᑐᖅ ᖁᑦᑎᖕᓂᖅᐹᒃᑯᑦ ᓄᓇᕗᒥᐅᑕᐅᑉᓗᓂ ᐃᓕᑕᕆᔭᐅᔾᔪᑎᒃᑯᑦ. ᐊᔾᔨ ᐃᑕᓐ ᑎHᐃᑎᐊᕐᒥᙶᖅᑐᖅ

ᓄᓇᕗᙵ ᖁᑦᑎᖕᓂᖅᐹᒃᑯᑦ ᐃᓕᑕᕆᔭᐅᔾᔪᑎᑖᕈᑎ, ᓵᓚᖃᕈᓐᓇᖅᑐᖅ ᑕᒪᐃᓐᓂᒃ ᐃᓕᑕᕆᔭᐅᔾᔪᑎᑖᖑᔪᓐᓇᖅᑐᓂᒃ, ᓴᖅᑭᑎᑕᐅᓚᐅᖅᑐᖅ 2010-ᒥ ᐃᓕᑕᕆᔪᒪᑉᓗᒋᑦ ᐃᓄᐃᑦ ᐃᑲᔪᖅᓯᒪᓪᓚᕆᒃᑐᑦ ᓄᓇᕗᒥ.

ᑕᐸᑕᐃ ᐅᖃᖅᖢᓂ ᓴᓇᑦᑕᐃᓕᐊᕈᓯᐅᓚᐅᖅᑐᕈᖅ ᓯᓚᑦᑎᐊᕚᓘᑉᓗᓂ ᓄᓇᒧᙵᐅᕝᕕᒃᓴᑦᑎᐊᕚᓘᑉᓗᓂ ᐅᖃᓗᒡᕕᐅᒐᒥ ᐊᐱᕆᔭᐅᑉᓗᓂ ᖃᓄᐃᒃᓴᙱᓐᓇᔭᕐᒪᖔᑦ ᐃᓕᑕᕆᔭᐅᒃᐸᑦ ᖁᑦᑎᖕᓂᖅᐹᒃᑯᑦ ᐃᓕᑕᕆᔭᐅᔾᔪᑎᒃᑯᑦ.

ᐅᖃᖅᖢᓂ ᐅᐱᒍᓱᓚᐅᕐᓂᕐᒥᓄᑦ ᐊᒻᒪᓗ ᐃᖕᒥᓂᒃ ᒥᑭᓪᓕᑎᓚᐅᕐᓂᕐᒥᓄᑦ ᑕᐃᒪᓐᓇ ᐃᓕᑕᕆᔭᐅᔪᒪᑎᓪᓗᒍ.

ᑕᐃᑲᓂ ᑭᖑᓂᐊᓂᓗ ᐅᖃᓗᒡᕕᐅᖅᑳᑎᓪᓗᖓ, ᐅᕙᒻᓂᒃ ᒥᑭᔪᑯᓗᒃᑎᑐᑦ ᑕᐅᑐᓕᖅᑐᖓ,” ᑕᐃᒪᓐᓇ ᐅᖃᖅᖢᓂ ᑕᐸᑕᐃ.

ᒥᑭᔫᔭᖅᑐᖓ ᐊᒥᓱᐊᓘᑎᓪᓗᒋᑦ ᑕᖅᑳᓃᑦᑐᑦ ᐱᓕᕆᕐᔪᐊᖅᓯᒪᔪᑦ ᓄᓇᕗᒥ.

ᐅᐱᒍᓱᑦᑎᐊᖅᑐᖓ ᑕᐃᒪᓐᓇ ᑐᓂᔭᐅᔪᒪᓯᒪᒐᒪ ᐊᖏᓚᐅᖅᑐᖓ ᓂᐱᖅᑯᖅᑐᓗᐊᕐᓇᖓ.

ᓱᓕᔪᒃᑯᑦ ᒥᑭᓪᓕᑎᖅᑎᕆᓯᒪᔪᖓ ᐅᕙᒻᓂᒃ. ᓲᕐᓗ ᐅᖃᓗᒡᕕᐅᔪᖓ ᑮᓇᐅᔭᖅᑖᕐᔪᐊᕐᓂᕋᖅᑕᐅᓯᒪᑉᓗᖓ − ᑭᓯᐊᓂ ᐱᒻᒪᕆᐅᓂᖅᓵᓗᒃ!”

ᑕᐸᑕᐃ ᐅᖃᖅᖢᓂ ᖁᒡᕕᐅᕈᑎᒋᖃᑦᑕᖅᑕᖓᓘᓐᓃᒡᒎᖅ ᐃᖅᑲᐃᑎᑕᐅᔭᕌᖓᒥ ᖁᑦᑎᖕᓂᖅᐹᒃᑯᑦ ᓄᓇᕗᒥ ᐃᓕᑕᕆᔭᐅᓂᕐᒥᓄᑦ.

ᐅᖃᖅᖢᓂ ᖃᓄᖅ ᓂᑉᓕᕆᐊᒃᓴᖅ ᓇᓗᓕᖃᑦᑕᕋᒥ ᑐᓴᖅᑎᑦᑎᓇᓱᖕᓂᐊᕐᓗᓂ ᖃᓄᖅ ᐃᒃᐱᒍᓱᖕᒪᖔᕐᒥ ᐊᒻᒪᓗ ᐃᖕᒥᓂᒃ ᐊᐱᕇᓐᓇᖅᑐᖅ ᖃᓄᖅ ᑕᐃᒪᐃᑕᐅᓯᒪᓂᕐᒥᓄᑦ. ᐅᐱᒍᓱᑦᑎᐊᖅᑐᕐᓗ ᖃᓄᖅ ᐃᖅᑲᐅᒪᔭᐅᖃᑦᑕᕐᓂᕐᒥᓄᑦ ᓱᐳ ᓴᒨᖑᓚᐅᕐᓂᕐᒥᓂᒃ.

ᑕᐃᒻᓇ ᑕᕐᕆᔭᐅᓯᐊᕆᓚᐅᖅᑕᖅᐳᑦ ᓴᖅᑭᑳᓪᓚᓚᐅᕐᒪᑦ ᑕᒪᐅᓇᒥᐊᖅ. ᑕᕐᕆᔭᐅᑎᓕᐅᕈᑎᖃᕋᑉᑕ ᑕᐃᑉᓱᒪᓂ ᐆᒃᑐᕋᑐᐃᓐᓇᓚᐅᖅᓯᒪᔪᒍᑦ.

ᑭᓇᒧᒃᑭᐊᖅ ᐅᖃᐅᓯᐅᖅᑳᓚᐅᖅᓯᒪᔪᖅ, ᑭᓯᐊᓂ ᑎᖅᑭᐊᓕᖕᒥᒃ ᓇᓴᖅᓯᒪᑉᓗᖓ ᐸᓪᓗᖓᑉᓗᖓ ᐋᓪᓕᕋᐅᔭᕐᒥᒃ ᖃᐅᓪᓗᖅᑐᓂᒃ ᕿᐱᖕᓂᒃ ᐊᑐᖅᖢᖓ. ᑎᑉᓯᓵᕆᑐᐃᓐᓇᓚᐅᖅᓯᒪᒐᓗᐊᖅᑐᖓ ᐊᒻᒪᓗ ᐃᓕᓯᕝᕕᐅᑉᓗᓂ ᓇᓴᕋ ᑎᑎᕋᖅᓯᒪᔪᒥᒃ.

ᐊᒻᒪᓗ ᐊᔾᔨᓕᐅᕈᑎᓕᕆᑎᓪᓗᒋᑦ, ᓇᓴᕋ ᐲᖅᑕᐅᑉᓗᓂ ᐃᒪᓐᓇ ᐅᖃᓕᓚᐅᖅᑐᖓ, “ᐅᐊᑲᓪᓚᒃ. ᖃᖓᑕᔫᔭᓕᖅᑐᖓ.”

ᑕᐃᒪᓐᓇ ᓱᐳ ᓴᒨ ᐱᒋᐊᓚᐅᖅᓯᒪᔪᖅ, ᐱᔮᕆᓂᒃᑰᙱᑦᑐᕐᓗ. 150-ᓂᒃ ᑕᑯᔭᒐᒃᓴᓂᒃ ᓴᖅᑭᑎᑦᑎᓚᐅᖅᓯᒪᑉᓗᑕ ᓱᐳ ᓴᒨᒥᒃ ᐊᒻᒪᓗ ᐱᖓᓱᐃᓐᓇᑦ ᑕᕐᕆᔭᖅᑕᐅᔪᓐᓇᖅᓯᓯᒪᓚᐅᖅᑐᑦ, ᐃᒻᒪᖄ 35 ᒥᓂᑦᖑᔪᑦ ᑲᑎᖦᖢᒋᑦ, ᑭᓯᐊᓂ ᐅᐱᓐᓇᖅᑐᖅ ᖃᓄᖅ ᐃᖅᑲᐅᒪᔭᐅᑎᒋᖃᑦᑕᕐᒪᖔᑦ − ᑭᓯᐊᓂ, ᓱᐳ ᓴᒨ ᐱᙳᐊᖑᑐᐃᓐᓇᓚᐅᖅᑐᖅ ᐊᒻᒪᓗ ᓄᓇᕗᒥ ᖁᑦᑎᖕᓂᖅᐹᒃᑯᑦ ᐃᓕᑕᕆᔭᐅᔾᔪᑎ ᐱᒻᒪᕆᐅᓂᖅᓴᒻᒪᕆᐊᓗᒃ.”

ᑕᐸᑕᐃ, 67-ᓂᒃ ᐅᑭᐅᓕᒃ, ᐅᖃᖅᖢᓂ ᓴᓇᓂᒃᑯᑦ ᓄᖅᑲᑐᐃᓐᓇᕈᓐᓇᙱᓐᓇᒥ ᐱᓕᕆᐊᒃᓴᖃᓗᐊᕋᒥ ᐃᑲᔪᕆᐊᖃᕐᓂᕐᒧᑦ ᐃᓕᓐᓂᐊᖅᑎᑦᑎᔭᕆᐊᖃᕐᓂᕐᒧᑦ ᒪᒃᑯᒃᑐᓂᒃ.

ᐅᖃᖅᖢᓂ ᐅᐱᒍᓱᑦᑎᐊᕋᒥᒎᖅ ᖁᑦᑎᖕᓂᖅᐹᒃᑯᑦ ᒪᒃᑯᒃᑐᑯᓗᐃᑦ ᐊᒃᓱᕈᕐᓇᖅᑐᒃᑰᖃᑦᑕᖅᑎᓪᓗᒋᑦ ᐅᑉᓗᒥ, ᐊᒥᓱᓂᒃ ᓴᖅᑭᑦᑎᕝᕕᐅᓲᑦ ᓇᑭᓗᒃᑖᖅ.

ᐅᖃᖃᑎᖃᕈᒪᔪᖓ ᐃᓕᓐᓂᐊᖅᑐᓂᒃ ᐊᒻᒪᓗ ᐃᑲᔪᕈᒪᑉᓗᒋᑦ ᖃᓄᑐᐃᓐᓇᖅ ᒪᑭᑦᑎᐊᖃᑦᑕᖁᑉᓗᒋᑦ ᐅᑉᓛᑕᒫᒃᑯᑦ, ᐃᓕᓐᓂᐊᕆᐊᖃᑦᑕᖁᑉᓗᒋᑦ, ᐃᓕᓐᓂᐊᕈᑎᒥᓂᒃ ᐱᐊᓂᒃᓯᓇᓱᖃᑦᑕᖁᑉᓗᒋᑦ ᐊᒻᒪᓗ ᓯᕗᒻᒧᐊᒃᑲᓐᓂᖁᑉᓗᒋᑦ ᐃᓕᓐᓂᐊᕐᓂᒃᑯᑦ ᓄᓇᕗᑦ ᒪᒃᑯᒃᑑᖕᒪᑦ ᐊᒻᒪᓗ ᒪᒃᑯᒃᑐᖁᑎᕗᑦ ᐊᑐᕆᐊᖃᕐᓂᐊᕋᑉᑎᒍᑦ.

ᓄᓇᕗᑦ ᐱᔾᔪᑎᖃᐃᓐᓇᕐᒪᑦ ᒪᒃᑯᒃᑐᖁᑎᑉᑎᓐᓂᒃ ᐊᒻᒪᓗ ᐃᓕᓐᓂᐊᖅᑎᑦᑎᔪᓐᓇᕈᒪ ᖃᓄᑐᐃᓐᓇᖅ ᒪᒃᑯᒃᑐᖁᑎᑉᑎᓐᓂᒃ, ᑕᐃᒪᐃᓕᐅᕈᒪᑦᑎᐊᖅᑐᖓ. ᓄᓇᕗᑦ ᐱᐅᔪᐊᓗᒃ ᐊᒻᒪᓗ ᒪᒃᑯᒃᑐᖁᑎᑉᑕ ᐱᒋᔭᖓ.

ᑕᒪᓐᓇ ᐃᓕᑕᕆᔭᐅᓂᕋ ᐅᐱᒋᑦᑎᐊᖅᑕᕋ ᐅᒃᐱᕆᙱᑕᕋ ᓱᓕ ᐃᓛᒃ ᐊᖏᓗᐊᖅᑐᐊᓘᖕᒪᑦ. ᐅᐱᒍᓱᑦᑎᐊᖅᑐᖓ ᒪᓕᒐᓕᐅᖅᑎᒃᑯᑦ ᐅᕙᒻᓂᒃ ᓂᕈᐊᖅᖠᓚᐅᕐᒪᑕ ᐱᓕᕆᒃᑲᓐᓂᕈᒪᔾᔪᑎᒋᓕᖅᑕᕋ.

ᑕᐅᑐᕐᕈᙱᓐᓇᓚᐅᕋᒪ ᓄᓇᕗᖃᓕᕈᓐᓇᖁᑉᓗᑕ. ᐱᕙᓪᓕᐊᓕᓵᖅᑐᒍᑦ ᐊᒻᒪᓗ ᐃᔾᔪᐊᕈᓐᓇᖅᑕᖅᐳᑦ ᑕᐃᒪ ᐱᒻᒪᕆᐊᓗᐃᑦ ᓱᓕ.

ᒪᒃᑯᒃᑐᖁᑎᕗᑦ ᐃᓅᑦᑎᐊᖁᓐᓇᕐᒪᑕ ᐊᒻᒪᓗ ᑕᐃᒪᑐᖅ, ᒥᑭᔪᒃᑯᓪᓘᓐᓃᑦ, ᐃᑲᔪᖅᓯᒪᕗᖓ ᑕᒡᕘᓇ, ᐊᒻᒪᓗ ᐃᑲᔪᒃᑲᓐᓂᕈᓐᓇᕐᓂᐊᖅᐳᖓ.”

Advertisement

Darrell Greer

Darrell Greer is Editor of Kivalliq News