ᓄᓇᕗᒥᐅᑦ ᕿᒃᓵᒃᑐᑦ ᐊᓂᕐᓂᖃᕈᓐᓃᖅᑎᓪᓗᒍ ᓴᕐᓕ ᐸᓂᒍᓂᐊᖅ

81

ᓄᓇᕗᒥᐅᑦ ᕿᒃᓵᒃᑐᑦ ᐊᓂᕐᓂᖃᕈᓐᓃᓚᐅᖅᑎᓪᓗᒍ ᐃᒻᖏᖅᑎᕐᔪᐊᖅ ᓴᕐᓕ ᐸᓂᒍᓂᐊᖅ ᑲᖏᖅᖠᓂᕐᒥ ᒫᑦᓯ 6-ᖑᑎᓪᓗᒍ.
ᓇᒡᓕᒋᔭᐅᑦᑎᐊᖅᓯᒪᔪᖅ ᐃᒻᖏᖅᑎ – ᐃᒻᖏᐅᓯᐅᖅᑎ ᐋᓐᓂᐊᕐᓂᖃᓚᐅᕐᒪᑦ ᓄᑭᒥᒍᑦ ᖃᑉᓯᑲᓪᓚᖕᓂᒃ ᐅᑭᐅᓂᒃ ᐋᓐᓂᐊᕆᓕᖅᖢᓂᐅᒃ ᐃᓅᔪᓐᓃᖅᑳᕐᓇᓂ.

Charlie Panigoniak performs during a benefit concert in his honour in Arviat on Aug. 30, 2016. NNSL file photo
Charlie Panigoniak performs during a benefit concert in his honour in Arviat on Aug. 30, 2016.
NNSL file photo

ᐃᓅᓚᐅᖅᓯᒪᔪᖅ ᐃᒡᓗᓕᒑᕐᔫᑉ ᖃᓂᒋᔭᖓᓂᒃ, ᐸᓂᒍᓂᐊᖅ ᐃᓕᑕᕆᔭᐅᔾᔪᑎᑖᓚᐅᖅᓯᒪᔪᖅ ᖁᑦᑎᖕᓂᖅᐹᖑᖃᑕᐅᔪᒃᑯᑦ ᐃᓕᑕᕆᔭᐅᔾᔪᑎᒃᑯᑦ ᓄᓇᕗᒥ 2012-ᒥ ᐊᒻᒪᓗ ᓄᓇᕗᒥ ᑲᒥᓯᓇᐅᑉ ᐃᓕᑕᕆᓚᐅᕆᑉᓗᓂᐅᒃ ᐃᒻᖏᖃᑦᑕᕐᓂᖓᓄᑦ ᐃᓕᑕᕆᔭᐅᔾᔪᑎᒃᑯᑦ 2016-ᒥ.
ᓴᕐᓕ ᐸᓂᒍᓂᐊᖅ ᓇᓂᑐᐃᓐᓇᑦᑎᐊᖅ ᖃᐅᔨᒪᔭᐅᓚᐅᖅᑐᖅ, ᐸᓂᒍᓂᐊᖅ ᐃᓱᒪᒋᔭᐅᓯᒪᔪᖅ ᐊᒥᓱᓄᑦ ᐱᒋᐊᖅᑎᑦᑎᖅᑳᓚᐅᖅᓯᒪᓂᖓᓄᑦ ᐃᓄᒃᑎᑐᑦ ᐃᒻᖏᖃᑦᑕᕐᓂᕐᒥᒃ, ᖁᖓᑎᑦᑎᕙᒃᖢᓂ ᐊᒻᒪᓗ ᓇᒡᓕᖕᓂᖓ ᐃᒃᐱᖕᓇᖃᑦᑕᖅᖢᓂ ᐃᓄᖕᓄᑦ ᓈᓚᐅᑎᒃᑯᑦ ᐃᒻᖏᐅᑎᖏᑦ ᑐᓴᖅᓴᐅᓕᕌᖓᑕ ᐃᓄᒃᑎᑐᑦ, ᐅᕝᕙᓘᓐᓃᑦ ᐃᒻᖏᕆᐊᖅᑐᖅᓯᒪᔪᖅ ᑕᑯᔭᐅᔭᕌᖓᑦ.
ᓰᐲᓰᒃᑯᓐᓂᒃ ᐊᑯᓂ ᓴᓇᔨᒋᔭᐅᓚᐅᖅᑐᖅ, ᐸᓂᒍᓂᐊᖅ ᐃᒻᖏᖃᑕᐅᓚᐅᖅᓯᒪᔪᖅ ᓄᓇᕗᑦ ᐅᑉᓗᖓᓂᒃ ᖁᕕᐊᓱᖕᓂᖃᖅᑎᓪᓗᒋᑦ 1999-ᒥ, ᐊᒻᒪᓗ 30-ᓂᒃ ᐅᑭᐅᓂᒃ ᓇᓪᓕᐅᓐᓂᖅᓯᐅᕐᓂᖃᖅᑎᓪᓗᒍ ᐃᓄᐃᑦ ᑕᐱᕇᒃᑯᑦ ᑲᓇᑕᒥ 2001-ᒥ.
ᐃᓄᒃᑎᑐᑦ ᐃᒻᖏᖅᑎ ᐊᒻᒪᓗ ᓂᐱᓕᐅᖅᓯᒪᔪᖅ ᐃᒻᖏᐅᑎᒥᓂᒃ ᓵᒻ ᑐᑕᓐᓄᐊᖅ, 51-ᓂᒃ ᐅᑭᐅᓕᒃ, ᐅᖃᓚᐅᖅᑐᖅ ᐸᓂᒍᓂᐊᕉᖅ ᖃᐅᔨᒪᔭᐅᑦᑎᐊᖅᑐ ᐃᓄᒃᑎᑐᑦ ᐃᒻᖏᖅᑎᐅᓂᖓᓄᑦ ᐊᒻᒪᓗ ᐃᓅᖃᑎᒥᓄᑦ ᐅᐱᒋᔭᐅᓯᒪᑦᑎᐊᖅᖢᓂ.
ᐅᖃᖅᖢᓂᓗ ᓴᕆᒪᒋᔭᖓᒎᖅ ᐃᒻᖏᖃᑎᒋᓚᐅᖅᓯᒪᖕᒪᒍ ᐸᓂᒍᓂᐊᖅ ᑲᖏᖅᖠᓂᕐᒥ ᐃᒻᖏᖅᑎᓪᓗᒋᑦ ᐋᓐᓂᐊᖃᓕᖅᑐᖅ ᖃᐅᔨᔭᐅᓵᖅᑎᓪᓗᒍ.
“ᐃᓄᒃᑎᑐᑦ ᐃᒻᖏᐅᓯᐅᖅᑏᑦ ᓄᓇᕐᔪᐊᕐᒥ ᐃᓚᐃᖅᑐᑦ ᐃᒻᖏᖅᑎᕐᔪᐊᕐᒥ ᐅᐱᓐᓇᖅᑐᒥᒃ ᓴᕐᓕ ᐃᓅᔪᓐᓃᖅᑎᓪᓗᒍ,” ᑕᐃᒪᓐᓇ ᐅᖃᖅᖢᓂ ᑐᑕᓐᓄᐊᖅ.
“ᓴᕐᓕ ᐸᓂᒍᓂᐊᖅ ᐅᔾᔨᕆᓕᑕᐃᓐᓇᓚᐅᖅᓯᒪᔭᕋ ᖃᒪᓂ’ᑐᐊᕐᒥᐅᑕᐅᑉᓗᖓ ᓱᓕ 1970-ᓂᒃ ᐅᕝᕙᓘᓐᓃᑦ 1980 ᐱᒋᐊᓕᓵᖅᑎᓪᓗᒍ, ᒪᒃᑯᒃᑐᙳᖅᐸᓪᓕᐊᓕᖅᑎᓪᓗᖓ.
“ᐃᖅᑲᐅᒪᔪᖓ ᑐᓴᕐᓂᖅᑐᒻᒪᕆᐊᓘᓚᐅᕐᒪᑦ ᐊᒻᒪᓗ ᐅᐱᒋᑉᓗᒍ ᐆᒃᑑᑎᑦᑎᐊᕙᐅᓇᓱᒋᑉᓗᒍ ᐃᒻᖏᐅᓯᐅᖅᑎᓄᑦ.
“ᑕᐃᓱᒪᓂ, ᐃᓱᒪᓇᓚᐅᖅᑐᖅ, ᐅᐊᒃ, ᐃᒻᖏᖅᑎᖃᖅᑐᒍᑦ ᑎᑕᖃᑦᑕᖅᑐᒥᒃ Creedence ClearWater Revival-ᑯᑎᑐᑦ ᐊᒻᒪᓗ ᔮᓂ ᑳᔅᑎᑐᑦ – ᑕᐃᑉᑯᑎᑐᓇᖅ ᐃᒻᖏᖃᑦᑕᖅᖢᓂ – ᐊᒻᒪᓗ ᑐᑭᓯᐊᔪᓐᓇᖅᖢᒍ ᐅᖃᐅᓯᑉᑎᓐᓂᒃ ᐊᑐᖅᖢᓂ ᐃᒻᖏᕐᒪᑦ ᓴᕆᒪᓇᓚᐅᖅᑐᖅ.”
ᑐᑕᓐᓄᐊᖅ ᐅᖃᖅᖢᓂ ᖁᕕᐊᓱᑦᑎᐊᓚᐅᖅᑐᕉᖅ ᐸᓂᒍᓂᐊᑉ ᐅᐱᒋᔭᐅᓂᖓ ᓴᖅᑭᑎᑕᐅᑦᑎᐊᓚᐅᕐᒪᑦ ᐋᓐᓂᐊᓕᖅᑎᓪᓗᒍ.
ᐅᖃᖅᖢᓂ 2016-ᒥᒎᖅ ᐊᕐᕕᐊᓂ ᐃᒻᖏᖅᑎᑦᑎᖕᒪᑕ ᐸᓂᒍᓂᐊᖅ ᐃᒻᖏᖃᑕᐅᑉᓗᓂ ᑭᖑᓪᓕᖅᐹᒃᑯᑦ ᐃᖅᑲᐅᒪᔭᐅᙱᓐᓇᕐᓂᐊᖅᑐᖅ ᑭᕙᓪᓕᕐᒥ.
“ᕿᐊᓱᙳᓇᓚᐅᖅᑐᖅ ᓄᓇᓕᐅᔪᖅ ᐃᒻᖏᖅᑎᑦᑎᖕᒪᑦ ᐃᑲᔪᕈᒪᓂᕐᒧᑦ ᐊᒻᒪᓗ ᐃᓕᑕᖅᓯᓂᕐᒧᑦ ᓴᕐᓕ ᐸᓂᒍᓂᐊᕐᒥᒃ. “ᐃᓱᒪᓚᐅᖅᑐᖓ ᑕᒪᓐᓇ ᐅᐱᓐᓇᕐᓂᖓᓄᑦ ᐊᕐᕕᐊᕐᒥᐅᑦ ᑕᐃᒪᐃᓕᐅᖅᑎᑦᑎᑎᓪᓗᒋᑦ.
“ᐊᑕᐅᓰᖅᖢᖓ ᐃᒻᖏᖃᑎᒋᓚᐅᖅᓯᒪᒐᑉᑯ ᑲᖏᖅᖠᓂᕐᒥ ᐊᓯᐊᒍᓪᓗ ᐃᒻᖏᖃᑎᒋᓚᐅᖅᓯᒪᙱᖦᖢᒍ ᓴᕐᓕ, ᑭᓯᐊᓂ ᐃᒻᖏᖃᑦᑕᕐᓂᖓ ᐱᒻᒪᕆᐅᑎᓚᐅᖅᑕᕋ, ᑭᓯᐊᓂ ᑕᒪᓐᓄᒃ ᑕᐃᑉᓱᒥᙵᑦᑕᐃᓐᓇᖅ ᓂᐱᓕᐅᕆᔨᓂᒃ ᐊᑐᓚᐅᖅᑐᒍᒃ, Rip Roar Music-ᑯᓐᓂᒃ – ᐊᑐᕚ ᓯᓚᑎᑦᑎᐊᖓᓂᒃ.
“ᓴᕐᓕ ᐱᒋᐊᖅᑎᑦᑎᓚᐅᖅᑐᖅ ᐃᓄᒃᑎᑐᑦ ᐃᒻᖏᕐᓂᕐᒥᒃ ᒪᓕᒃᑕᐅᓕᖅᖢᓂᓗ ᐃᒻᖏᖅᑎᐅᔪᓄᑦ ᖁᔭᓐᓇᒦᕆᐊᖃᖅᑐᒍᑦ ᓴᕐᓕᒥᒃ ᐱᒋᐊᖅᑎᑦᑎᓚᐅᖅᓯᒪᓂᖓᓄᑦ.”